Read kalabari Romu 11 Bible Online

Romu 11 - kalabari bible

Romu 11

¹Yee àrị ó ḅii: Tamụnọ ọ̀ ḅara-kuḅu ḅe atomi ma ori ịn sịkị? Gbala-gbala ọkọ sime ye ofori. Ì ḅioju sọ Izirẹlị ḅẹ ḅọ, Ebira-amụ furo paka ḅọ, Benijamịnị ọrụ mẹ ḅẹ ḅọ.

²Tamụnọ sukuyọ-saakị ḅụ sẹlẹ-ọkị atomi ma ori ịn sịkị-a. Ịlayịja ịn kẹ mu Tamụnọ tọrọkọ ḍuko ye ḅụ Fịafịa Ḍiri mẹ ḅẹẹ ye ó nimi wararị:

³“KỊNỊNYANAḄỌ, ini ị́ ịkịankoroapụ ma ḅaa tẹ, pịkị ị́ agbamịẹ-anga ma kan gboloki sara tẹ; yẹrị kọn gbọrụḅọ ḅe sọ ini ị̀ ḅaa ḅẹ ḍọkịarị.”

⁴Anị sakị Tamụnọ tiye kẹ ọ̀ pakịrị? “Amụ sunsin Balị nwẹn-sịn oru ḅe pịrị-a kịnị maa ẹndẹ oyia asi finji ofori kịnị puku à paa nwẹn kẹ ḅụụ wẹrịma wararị.”

⁵Anie mịọkụ sọ anị simearị ḅara. Ò ḍiki-ḅụụjịrị gotẹ Tamụnọ sẹlẹ-ọkị wararị boowa kala apụ paa emi.

⁶Ò ḍiki-ḅụụjịrị ḅụ ori ịn sẹlẹ-ọkịm, ịn kọrị kọrịnama ḅụ-a. Tamụnọ kọrịnama ḍiki tẹ ịn sẹlẹ-ọkị namịna, ḍiki-ḅụụjịrị ḅarị ḍiki-ḅụụjịrị-a.

⁷Anịtẹso sakị tiye paka? Izirẹlịapụ ma ịn ḍọkị sime ye mẹ ini ẹrị-a. Tamụnọ sẹlẹ-ọkị kala apụ ma anie anị ẹrị ye; kirikọn-apụ ḅeri-iningima Tamụnọ sịn-ḅịḅị mẹ pịrịm.

⁸Anie Fịafịa Ḍiri mẹ kẹ anị ḅẹẹ ḅara, “Tamụnọ ịna akuroma na ịna ḅioḅẹngbọ na pụnmam, anie mịẹtẹ ḅo mịmgba la sọ, ịn paa inetẹ ye ẹrị-a, pịkị ye naa-a.”

⁹Tẹ Devidi sọ nwẹn ḅẹẹm, “Yee ịn fị ma ḅọrọarị alalị ma ḍiein sọ tẹ in kun koroma, tẹ mịẹtẹ ịn ḅịkị tẹ fomu-ḅara da.”

¹⁰Yee ịna atọrụngbọ pụụn tẹ ịn ḅarị inetẹ ye ẹrị ma; tẹ mịẹtẹ ịna ḅụụ-fụka ma in ponoma tẹ ini iḅoma sakị mamgba.

¹¹Yee à paa ó ḅii: Juu-ḅẹ-apụ ma pụmbụ ye mẹ ḅụ ịn ḅịkị fa so? Gbọrụ ḅọkọ sọ ḅụ-a. Ịn mịẹ si ḅụ mie ḅọrọma ḅọrọ ḅo Ja asịẹ ḅẹ apụ ma pịrị ye, mịẹtẹ ịna ḅụụ-sịnịsịnị ḅẹ ḅara.

¹²Ó kuroma-o, tomikiri mẹ nwẹnị Juu-ḅẹ-apụ ma si ḅụ ḅọrọ tẹ boma nyana ḅinma, tẹ tẹmẹ anga ḅụ ini kọn igoin nwẹnị pịkị Ja asịẹ ḅẹ apụ ma kọnma ḅinma kụma boma ḅụ, ọ́ sịn-arị mịnẹ inimgba sọ-ḅo mẹ ọkị-ḅo ḅarị boma tẹịn ḅịa?

¹³Mịọkụ ọmịnị Ja asịẹ ḅẹ apụ mie à mị ẹkwẹn mẹ kọn pịrịarị; Tamụnọ ị̀ kẹ ọmịnị Ja asịẹ ḅẹ apụ ma fịrịmẹnjịḅọ mịẹ ye mẹ ẹrẹsị arị ị̀ kọrịnama mẹ kẹ ḅụụ-tọn ḅa.

¹⁴Ẹbịsịya anị ḅụ ḅo ye ì pembema Juu-ḅẹ-apụ ma ḅụụ-sịnịsịnịma tẹ ini ḅẹ ja apụ ḅọrọma ḅarị ḅoto.

¹⁵Kẹ gotẹ ọkọ ḅẹẹarị, Tamụnọ ịn sịkị ye mẹ ḅụ mie bebe tomikiri mẹ ḅọrọ tẹ Tamụnọ na fịya tẹ ori ikiapụ sọ yee. Nwẹnị ọkọ kụma, ndẹẹ anị sime ḅẹ ḅara ọ̀ pịkị ịn daa-ọkị sakị? Anị gbala kịka ḅarịye anie fịtẹ-ḅọ ḍumo tẹẹ!

¹⁶Ḅuru ẹfẹrẹ ḅụ í ḅuru gbọrụ mgbọlị kẹ Tamụnọ karịma, karịma ḅuru ẹfẹrẹ mẹ ḅo Tamụnọ nye sọ tẹ; tẹ ịn sịn mẹ akuno karị Tamụnọ pịrị, pịrị sịn mẹ aḅara ma sọ ò nye sọ tẹ.

¹⁷Anị gbala kịkarị ye anie, ḍụọ ḅio in ḍiḅi tẹlẹma wararị olivu sịn ḅụ ịkpangị anyịma sin tẹ piri ḅio ngẹrị so-paka ye ḅẹ ịkpangị kẹ ḅo anị kiri ḍima, tẹ anị olivu sịn mẹ na gbọrụ ḅụ sime-ḅara. Ọmịnị Ja asịẹ ḅẹ apụ ma anị piri-ḅio ngẹrị so-paka olivu sịn mẹ na kịkam, tẹ mịọkụ Juu-ḅẹ-apụ ma na sọ tẹ kụrọtẹ tẹmẹ ḅụ ḅẹ ḍumo iḅi mẹ fịarị.

¹⁸Mie ḅụ ọmịnị Ja asịẹ ḅẹ apụ ma, ọmịnị ini anyịma siin sịn aḅara ma ḍiki-sima ma, gbala-gbala. Ndẹẹ ọmịnị inetẹ opu amịẹaị mịẹ ḅẹ ḅara? Ọmịnị anie sịn ḅara kịngẹ: ọmịnị kuno ma dogi-a — kuno ma rẹ ó dogi wararị.

¹⁹Ẹbịsịya ọ́ ḅẹẹ ḅa, “Inn ịn kiri kẹ ị̀ pịrị ḅẹ gotẹ ịkpangị ma anyịma siinm.”

²⁰Ọkọọ. In minini nyana-a mie in gotẹ ini anyịma sin ye, anị kụma ọmịna minini mie pịkị ọ́ kẹ kiri ḅụ wẹrị ye. Kụma ọmịnị anị kẹ opu amịẹaị mịẹ ma; anie nakara ọ́ ḅalafaa.

²¹Tamụnọ sịn mẹ na koro ịkpangị sime ọkụ sime Juu-ḅẹ-apụ ma sọ pẹlẹ-siin kụma, ori ọmịnị rẹ ḍiki tọrụ sin ḅẹ?

²²Mịanga ḅụ wa Tamụnọ dein ḅara na, kụrọ-ḅara na kẹ ye mịẹ-mịẹ ḅara ẹrị tẹ. Ọ̀ ḅụụ ḅịkị so apụ ma ọ̀ kụrọ ḅara kẹ ini na mịẹarị; kụma ọmịnị ọ̀ ḅụụ paa emi apụ ma ò dein ḅara kẹ ọmịnị na mịẹarị. Ọ́ ḍụkụ-a kụma ori ọmịnị sọ anyịma siin ḅa.

²³Ini Juu-ḅẹ-apụ ma sọ, ini ịna minini nyana-a mẹ ḅụ ḅara-siin kụma ọ̀ pịkị ịn kẹ ịna sime kiri koroma ḅa. Gbala Tamụnọ inetẹ aniemẹ mịẹ ḅa.

²⁴Ọmịnị Ja asịẹ ḅẹ apụ ma, ọ́ kịkarị ye anie piri-ḅio ngẹrị so-paka olivu sịn ịkpangị tẹ anyị so tẹ, so tọn-a ḅara ḅụ, kẹ ḍụọ ḅio in ḍiḅi tẹlẹma wararị olivu sịn ḅụ oḅolo ye. Juu-ḅẹ-apụ ma kịkarị ye anie, ḍụọ ḅio ḍiḅi tẹlẹma wararị olivu sịn; ịn kẹ sin ḅo elemu in sime tẹ anyị so yọ ḅụ oḅolo mẹ Tamụnọ ḅụụ sarasara tẹịn lama ḅa.

²⁵Ị̀ amịnapụ, à mịẹtẹ ọ́ gbọrụ kikimatẹ karakaraye nimi ḅẹ-ḅiiarị, ọkọ-a kụma ó ḅofa ọkị mịnẹ ó ye nimi ḅakam. Mịọkụ Izirẹlịapụ ma nyana wararị kọngọ-kụrọ mẹ sime gbamaso ḅịa, kụma anị sime mu la ḅarị sakị anie pịkị Ja asịẹ ḅẹ apụ tẹ Tamụnọ ḍọkụma-ḅo ḅarị apụ kịẹn-ḅịḅị kara ḅẹ sakị.

²⁶Mie Izirẹlị mẹmgba ḅọrọtẹ ḅọrọma ḅarị ḅara. Fịafịa Ḍiri mẹ ḅẹẹm, “Ḅọrọmaḅọ ḅe Zayọnị ḅụ sime tẹ ḅo tẹ Jekọbụ furo-ḅẹ-apụ ma ḅụ si-sịḅịḅio mẹmgba sin ḅa.

²⁷Tẹ àrị ịna asi ma saakị-siin sakị, àrị ini na mị ọḅọkụ mẹ fịị ḅa.”

²⁸Ini Iḅi Oku mẹ sịkịm ẹrẹsị ini Juu-ḅẹ-apụ ma ḅo Tamụnọ na fịya-a apụ sọ tẹ, ọmịnị Ja asịẹ ḅẹ apụ ma sịḅị ẹrẹsị. Tamụnọ ịna atẹngịapụ ma sẹlẹ-ọkị ye ḅụ in ḅo ori ikiapụ sọ tẹ.

²⁹Kẹ gotẹ ọkọ ḅẹẹarị, Tamụnọ sẹlẹ-ọkị tẹ boma tẹ ye ḅụ, ọ̀ ḅịḅị ḍima ḍima-a.

³⁰Tarị ọmịnị Ja asịẹ ḅẹ apụ ma kẹ Tamụnọ ḅịḅị poki-a ye mamgba sọ, Juu-ḅẹ-apụ ḅịḅị poki-a mẹ gotẹ, mịọkụ ori ó ḍiki sịḅị-kụrụkụrụ tẹ.

³¹Ọmịna ḅara la ọkụrụkụrụ mẹ gotẹ, Juu-ḅẹ-apụ ma sọ ḅarị ḅịḅị poki-a, ọkụrụkụrụ anị ḅụ ḅo ịn la ḅarị ḅara gotẹ, anị ḅo ọ́ la gbọrụ ḅara mẹ.

³²Gbala anị simearị ḅara Tamụnọ inweni-mgba kẹ ḅịḅị kan kiri ḅụ ịkasị koroma tẹ, ori anị ḅụ ḅọrọ tẹ inimgba ḍiki tọrụ-kụrụkụrụ ḅarị ḅara.

³³Tamụnọ ngọ ma ḅaka ḅara ḍikii! Ò nimi na, ye ḅio lekiri na, pokolo la ḅara ḍikii! Tụḅọ inetẹ ori aḅẹrẹkọn ma sime-ḅara nimi tẹ ḍuko finji ḅẹ? Tụḅọ inetẹ ori amịẹaị sime-ḅara lekiri ḅẹ?

³⁴Fịafịa Ḍiri mẹ wẹrịtẹ ḅẹẹ ḅara, “KỊNỊNYANAḄỌ ḅe kuroma nimi ḅọ tụḅọ? Tụḅọ inetẹ ḅẹrẹ ḍuko ò toluma ḅẹ?

³⁵Jen sakị ọ̀ ḅara ḅụ ye ḅọlọ tẹ ḅọ emi, mịẹtẹ ori anị kẹ mḅọ gbẹẹ ḅẹ ḅara?”

³⁶Kẹ gotẹ ọkọ ḅẹẹarị, ori mie ye mamgba tẹmẹ yee, tẹ ye mamgba ọ̀ ḅụụ ḅọrọ tẹ emi, tẹ pịkị sime ọ̀ pịrịm. Ebube sime Tamụnọ pịrị gbamasoo! Amẹnị.