Read kalabari Romu 5 Bible Online

Romu 5 - kalabari bible

Romu 5

¹Mịọkụ minini ḅụ wa ḅọrọ tẹ Tamụnọ ḅụ karakara tẹ ḅara, wa Nyanaḅọ Jizọsị Kịrayịsị ḅụ wa ḅọrọ tẹ Tamụnọ na dein anga kọn tẹ.

²Minini ḅụ ọ̀ mịẹtẹ wa Tamụnọ ḍiki-ḅụụjịrị mẹ nyana tẹ anị ḅụ ḍumoarị. Tamụnọ ebube mẹ ḅụ wamịnị sọ ḍiekiri nyana tẹ ye mẹ ḅụ ḅẹ ḅiokpọ mẹ wa anị kẹ ḅụụ-tọn-arị.

³Wa wamịna ḅụụ-fụka ma sọ kẹ ḅụụ-tọn-arị, gotẹ ọkọ ḅẹẹarị, ḅụụ-fụka ḅụ mie wa ḅọrọ tẹ ye inema ḍawọarị ye,

⁴tẹ ye-inema mịẹtẹ Tamụnọ wamịna ḍumo bomarị, tẹ anị nwẹnị ḅiokpọ kẹ wa pịrịarị.

⁵Tamụnọ ọ̀ kẹ ḍie wa pịrị wararị Fịafịa Tẹmẹ ḅe ḅụ ḅọrọ tẹ ḅẹlẹma kẹ wamịna ḅioḅẹngbọ ḅụ ọsụma sara tẹ ẹrẹsị, wa nyana ḅiokpọ mẹ ḅarị papaaye sọ-a.

⁶Gbala mịẹ-mịẹ ọkụ wamịnị na ofori ogbo mie Kịrayịsị ḅo Tamụnọ tọn sakị ḅụ si-sịḅịḅio-sụapụ gotẹ fịị ye.

⁷Sarasara-a tomḅọ karakaraḅọ gotẹ fịị, tomi-juḅẹye ja sakị tomḅọ iḅi-ḅọ kọn ḅẹ fịị ọkị kọn ḅẹ ḍọkị ḍọkịm ḅẹsọ.

⁸Kụma Tamụnọ kẹ ọ̀ wa ḅẹlẹma la ḅara kẹ wa ḍie ye anie, wamịnị paa si-mịẹapụ wararị ogbo, Kịrayịsị fịị wa pịrịm.

⁹Ọ̀ fịị mẹ wa kẹ Tamụnọ tọrọkọ karakara atomi sọma tẹ. Ọkọ nẹngị ḅara ọ̀ pịkị nwẹn kẹ Tamụnọ ịganị ḅụ wa ḅọrọma ḅa.

¹⁰Tarị tarị wamịnị anie Tamụnọ na fịya-a apụ, kụma ọ̀ Tụḅọ ḅe fịị ḅụ ọ̀ wa kẹ ori ikiapụ sọma tẹ. Mịọkụ wa ḅo Tamụnọ ikiapụ sọ tẹ ḅẹ sakị, Kịrayịsị pịkị ọkọ nẹngị ḅara kẹ wa ḅọrọma ḅa ò ḍumo ḅụ.

¹¹Kụma anie ngẹrị-a, wa Nyanaḅọ Jizọsị Kịrayịsị ḅe tẹ wa kẹ Tamụnọ ikiapụ sọma ḅọ ḅe ḅụ, wa ḅọrọ tẹ Tamụnọ ḅụ ḅioḅẹlẹ nyana tẹ.

¹²Si gbọrụ tomḅọ ḅụ ḅọrọ ḅo tomikiri sọ tẹ fịị dogi-ḅom. Mị-ḅara ḅụ ḅẹḅọ-ḅẹḅọ si mịẹ tẹ ẹrẹsị, fịị bebe tomikiri mẹ kana-koro tẹ.

¹³Oloko amụ sụa-a sakị si tomikiri simem, kụma oloko ofori anga ịn kẹ tomina asi kịẹn-kịẹn ye ofori.

¹⁴Adamụ ḅụọ ḅụ ọkị mu Mozizi ḅụọ la tomi fịị simem, tẹ Adamụ Tamụnọ ḅịḅị kan tẹ mịẹ si mẹ mịẹ-a apụ sọ fịịm. Ḅị Adamụ ḅe anie ịn kẹ ḅo ḅarị ḅọ ḅe tọnma ḅọ.

¹⁵Kụma maaịn ma gberie-a, kẹ gotẹ ọkọ ḅẹẹarị Tamụnọ kẹ papaa ḍie tomi pịrịarị ye na Adamụ si na kịka-a. Tomi-juḅẹye mịnẹ gbọrụ tomḅọ si ḅụ tọnwa-apụ ḅọrọ tẹ fịịm. Kụma Tamụnọ ḍiki-ḅụụjịrị mẹ ḅaka lama ḅara ẹrẹsị anị ḅị gbọrụḅọ, Jizọsị Kịrayịsị, ḅe ḅụ ḅọrọ mu tọnwa tomi la tẹ.

¹⁶Tamụnọ ḍiepịrịye mẹ na gbọrụḅọ mịẹ si mẹ na ḅụ kịrị pịkị emii. Gbọrụḅọ mịẹ si ḅẹrẹ-ḅarasii dogi-ḅom, kụma tọnwa-apụ mịẹ asi ḅụ mie Tamụnọ ḍiki-ḅụụjịrị ḅụ tomi nyana gbẹẹ-a ḅẹrẹ-ḅaraiḅi ḍiepịrịye ḅo yee.

¹⁷Karakaraye, gbọrụḅọ mịẹ ḅo si fị dogi-ḅo tomi mamgba pịrịm, kụma Jizọsị Kịrayịsị ḅe gbọrụ iḅi kọrịnama mẹ ḅụ ḅo iḅiye mẹ tẹịn lamam. Kụma Tamụnọ opu ḍiki-ḅụụjịrị mẹ nyana tẹ apụ mamgba, ịn mịẹ iḅi ofori ḅara ḅụ, tẹ Tamụnọ kẹ ọ̀ ḅụụ ḅụ karakara kiri ḅụ wẹrịtẹ apụ ma, ịn Kịrayịsị ḅụ ḅọrọ tẹ ḍumo tẹ ama-da ḅa.

¹⁸Anie ḅụ, gbọrụḅọ si-mịẹapụ mamgba kẹ ḅẹrẹ-ḅarasii ḅụ suu ḅara, anie gbọrụ karakara mịẹ pịkị tomi mamgba ḅọrọma tẹ in ḍumo tẹ ḅara.

¹⁹Anie anị pịkị sime-ḅara, gbọrụ tomḅọ ḅịḅị poki-a inweni-mgba kẹ si-mịẹapụ sọma ḅara anie gbọrụḅọ ḅịḅị poki pịkị Tamụnọ tọrọkọ inweni-mgba kẹ karakara kiri ḅụ sịẹma ḅarị ḅara.

²⁰Oloko sụa ye anie kuraye mịẹ-a kẹ ḅin ye, kụma si ọkọ kẹ ḅin tẹ anga Tamụnọ ḍiki-ḅụụjịrị pịkị ḅin ḅaka tẹ.

²¹Anị sime-ḅara ḅụ, si fịị ḅụ ḅọrọ tẹ ḅẹrẹtọn ḅara, anie Tamụnọ ḍiki-ḅụụjịrị mẹ sọ karakara mịẹ ḅụ ḅọrọtẹ ḅẹrẹtọn-arị ḅara, tẹ nwẹnị wa kẹ mu sime gbamaso ḍumo lamarị, Jizọsị Kịrayịsị wa Nyanaḅọ ḅe ḅụ.