Read kalabari Romu 6 Bible Online

Romu 6 - kalabari bible

Romu 6

¹Wa ḅọrọ tiye ḍuko ḅẹ? Wa si mịẹ-mịẹ tẹ anga ma mu tẹ Tamụnọ ḍiki-ḅụụjịrị ḅin tọrọkọ-tọrọkọ mu ḅẹ mụnọọ?

²Gbala-gbala ọkọ sime ye ofori. Ndẹẹ wamịnị fịị si pịrị tẹ apụ ma paa anị ḅio anga ḅarị ḅara?

³Ọ́ kọkọ nimi lama wararị, mịnẹ Kịrayịsị Jizọsị ẹrẹ ḅụ wa sara minji mẹ wa kẹ mu ọ̀ fịị na gboloma tẹ.

⁴Wa sara minji mẹ ḅụ wa ori na sọ tẹ fịị tẹ ḍiḅi tẹ, ọkọẹrẹsị Ḍaḅọ ḅe ebube kụrọ mẹ fịị ḅụ Kịrayịsị saakịma ḅara, mie wamịnị sọ ịwọ ḍumo kọn ḅarị ḅara.

⁵Wa fịị ḅụ ori na gberie mịẹ tẹ ḅara, anie wa pịkị fị-ḅụ-saakị ḅụ ori na gberie mịẹ ḅarị ḅara.

⁶Wa nimi wararị mịnẹ, wamịna si sime-ḅara mẹ ḅẹ elemu ḅụụ mẹ ịn kẹ ori na sụa ẹngbẹsẹ-sịn ḅụ ḅakụ tẹ, mịẹtẹ anị ḅarị kụrọ nyana tẹ jen kẹ wa kẹ si omoni sọma ḅịa ḅara.

⁷Tomḅọ fịị tẹ ḅẹḅẹ si ḅarị mḅọ ḅụ kụrọ nyana-a.

⁸Wa Kịrayịsị ḅụ sọ fịị tẹ ḅara wa mininim wa pịkị ọ̀ ḅụụ sọ tẹ ḍumo ḅa.

⁹Wa nimi wararị mịnẹ Tamụnọ fịị ḅụ Kịrayịsị saakịma tẹ mẹ ọ̀ ḅarị jen kẹ fịị ḅịa, fịị ḅarị jen kẹ ọ̀ ḅụụ kụrọ nyana ḅịa.

¹⁰Mie ḅụ, ọ̀ fịị tẹ mẹ si ḅarị ọ̀ ḅụụ kụrọ nyana-a; tẹ mịọkụ ọ̀ kọn-arị ḍumo mẹ, ọ̀ Tamụnọ ḅụ sọ tẹ ḍumoarị.

¹¹Anị gbọrụ ḅara ḅụ, ọmịnị sọ ọkịị mịnẹ ọ́ fịị si pịrị tẹ, kụma ọ́ Kịrayịsị na gbọrụ ḅụ sime tẹ ḍumo Tamụnọ pịrị wararị.

¹²Ọ́ ḅarị ḍụkụ tẹ si ḅẹrẹtọn ọmịna fịị, fịị oju mẹ pịrị tẹ ọmịnị oju ḅẹ meni mẹ ḅii ḅara, ḅii ḅara mịẹ ma.

¹³Ọ́ pịkị ḍụkụ tẹ si ọmịna ḅụ ḅẹ gbọrụ pakịrị sọ ọkị mu si amịẹaị ḅio suu ma. Anie nakara ọmịnị ọmịna aḅụụ mamgba saakị Tamụnọ pịrịị, anie fịị ḅụ ḅọrọ ḅo ḍumo ḅio sọ tẹ apụ ḅara ḅụ, tẹ ọmịna bebe oju mẹ sịkị karakara mịẹ pịrịị.

¹⁴Ọ́ ḅarị oloko suku-ḅio ofori, tẹ Tamụnọ ḍiki-ḅụụjịrị mẹ suku-ḅio sọ tẹ ḅẹ sakị, si ḅarị ḅẹrẹtọn ọ́ pịrị ḅịa.

¹⁵Wa nwẹnị tọ-ḅara mịẹ ḅẹ? Wa ḅarị oloko suku-ḅio ofori tẹ Tamụnọ ḍiki-ḅụụjịrị suku-ḅio sọ tẹ ẹrẹsị wa si mịẹ ḅẹ mụnọọ? Gbọrụ ḅọkọ sọ ḅụ-a.

¹⁶Ó nimi lama wararị mịnẹ ọ́ ḅụụ sịkị pịrị tẹ ḅịḅị pokiarị ḅọ mẹ anie ọ́ nyana tẹ ọmịnị omoni sọ pịrịarị ḅọ mẹ — anị ḅọrọ si ḅẹḅẹ, fịị anie anị dogi-ḅo ḅarịye, anị ḅọrọ Tamụnọ ḅịḅị poki ḅẹḅẹ, anị dogi-ḅo ḅarịye anie Tamụnọ na kura ḅụ sime.

¹⁷Tamụnọ mịẹ tẹẹ! Tụkụmaye, tarị tarị ọmịnị omoni sọ si pịrị simem sọ, ó ḅo ọmịna ḅioḅẹngbọ mamgba kẹ ịn kẹ ó tolumaye mẹ daa-ọkị tẹ anị ḅẹẹ ḅara ḍiki anga tẹ.

¹⁸Si omoni ḅụ ọ́ paka-ḅo tẹ karakara mịẹ omoniapụ sọ tẹ.

¹⁹(Ọmịna sime-ḅara mie à gotẹ sarasara ẹkwẹn kẹ ma ma ḍuko ọ́ pịrịarị.) Sakị ḅẹ gbọrụ sakị ḅụ ọ́ gbọrsịḅị ọmịna aḅụụ sin koroma fịafịa-a aị na, si-sịḅịḅio na pịrị tẹ arịḅẹ amịẹaị mịẹm. Mịọkụ anị gbọrụ ḅara ḅụ ọ́ pịkị ọmịna aḅụụ mamgba sịkị karakara mịẹ pịrị tẹ anị omoniapụ sọ, tẹ fịafịa amịẹaị mịẹ.

²⁰Si ọ́ kẹ omoni sọma wararị sakị mẹ ḅụ karakara mịẹ ọmịna ḅụ ḅẹrẹ nyana-a.

²¹Ọmịnị arị ḅụụ-jịrịma-aị ma mịẹ sime sakị ọ́ tọ sọye nyana? Arị aị ma dogi-ḅoarị ye anie fịị.

²²Kụma mịọkụ in si ḅara-ḅio ọ́ pụkọ-pakamaḅo Tamụnọ omoniapụ sọma tẹ mẹ, ọ́ nyana ye anie ḅụụ mamgba kpaịnma koroma ọ́ pịrị, tẹ aniemẹ dogi-ḅo ọ́ pịrị ḅarịye anie sime gbamaso ḍumo.

²³Si kẹ tomi pịrịarị gbẹẹ-ye anie fịị; kụma Tamụnọ kẹ papaa ḍie tomi pịrịarị ye anie sime gbamaso ḍumo, wa Nyanaḅọ Kịrayịsị Jizọsị na gbọrụ ḅụ sime ḅụ.