Read kalabari Romu 8 Bible Online

Romu 8 - kalabari bible

Romu 8

¹Mịọkụ Kịrayịsị Jizọsị na gbọrụ ḅụ emi apụ ma ịn ḅarị ḅẹrẹ-ḅarasii nyana-a.

²Gotẹ ọkọ ḅẹẹarị, Kịrayịsị Jizọsị ḅụ, Tẹmẹ ḅe kẹ ḅo wararị ḍumo pịrị oloko mẹ, si na fịị na oloko mẹ ḅụ ị̀ fima tẹ.

³Tomḅọ si sime-ḅara ịnyọ nyana-a gotẹ Oloko mẹ inetẹ mịẹ-a ye mẹ, Tamụnọ mịẹ tẹ. Ori ọ̀ Tụḅọ kẹ fịrịma tẹ ò tomḅọ sọm, kẹ si dee-siin ḅẹ ẹrẹsị, tomina si sime-ḅara mẹ ḅụ.

⁴Tamụnọ gotẹ miemẹ mịẹ ye, Oloko mẹ ḅiiarị karakara amịẹaị ma, ḅintẹ ḅara kẹ wamịna ḅụụ mịẹ tẹ aị sọ ḅẹ ḅara, wa Tẹmẹ ḅe sime-ḅara ḅụ angarị ḅara ḅụ, ḅarị tomḅọ si sime-ḅara ḅụ-a.

⁵Tomḅọ si sime-ḅara mẹ ḍiki angarị apụ ma, tomḅọ si sime-ḅara mẹ mie pịkị ịn mịẹ ḅẹ ye ḍuko ịn pịrịarị, ịna aḅioḅẹngbọ ma sọ tomḅọ si sime-ḅara mẹ ḅiiarị aị ma mie ḅẹrẹtọn arị pịrịarị. Tẹmẹ ḅe ḍuko ịn pịrị ḅara ḍiki angarị apụ ma, Tẹmẹ ḅe ḅiiarị aị mie pịkị ḅẹrẹtọn ịna aḅioḅẹngbọ pịrịarị.

⁶Tomḅọ si sime-ḅara ḅẹrẹtọn tomḅọ pịrị mẹ dogi-ḅoarị ye fịị; Tẹmẹ ḅe ḅẹrẹtọn tomḅọ pịrị mẹ dogi-ḅoarị ye ḍumo na dein na.

⁷Anie ḅụ, tomḅọ si sime-ḅara ḅẹrẹtọn tomḅọ pịrịarị ḅẹḅẹ, mḅọ Tamụnọ na fịya-a ḅọ sọ tẹ, mḅọ Tamụnọ oloko koko koko-a, karakaraye ḅụ mḅọ inetẹ koko ḅịa.

⁸Amịna tomina si sime-ḅara ḍuko ye, ḍuko ye mịẹarị ḅọ inetẹ Tamụnọ ḅụụ-ḅẹlẹarị ye mịẹ ḅịa.

⁹Ọmịnị kụma, ó tomḅọ sime si ḅara ḍuko ọ́ pịrị ye mịẹ-a, anie nakara Tẹmẹ ḅe ḍuko ọ́ pịrị ḅara anie ó ḍiki angarị, anie Tamụnọ Tẹmẹ ḅe nwẹnị karakara-ḅara-ḅụ ọmịna ḅụụ ḅio angarị ḅẹḅẹ. Kịrayịsị Tẹmẹ ḅe nyana-a ḅọ sime Kịrayịsị pịrị-a.

¹⁰Kụma Kịrayịsị ọmịna ḅụụ ḅio angarị ḅẹḅẹ, Tẹmẹ ḅe ọmịna ḍumo sọ tẹ, anie ọ́ Tamụnọ ḅụ karakara tẹ ẹrẹsị, tụkụmaye ọmịna meni-oju mẹ si ẹrẹsị fịị ḅarị sọ.

¹¹Tamụnọ Tẹmẹ ḅe fịị ḅụ Kịrayịsị saakịmam. Anị Tẹmẹ ḅe ọmịna ḅụụ ḅio emi ḅẹḅẹ, ọ̀ pịkị ḍumo kẹ ọmịna fịị fịị oju ma pịrị ḅa.

¹²Ọkọẹrẹsị, ị̀ amịnapụ, wa saa fị wararị, tomḅọ si sime-ḅara mẹ ḅara ḅụ tẹ anị ḅii ḅara kẹ ḍumo kọn ḅụ-a.

¹³Kẹ gotẹ ọkọ ḍukoarị, ó tomḅọ si sime-ḅara mẹ ḍiki anga angaa, ọ́ fịị ḅa; kụma ọ́ nwẹnị Tẹmẹ ḅe ḅụ ḅọrọ tẹ ọmịna si amịẹaị ma ḅaa-ḅaa, ó ḍumo ḅa.

¹⁴Tamụnọ Tẹmẹ ḅe dogi mẹnjịarị apụ ma anie Tamụnọ awọmẹ ma.

¹⁵Kẹ gotẹ ọkọ ḍukoarị, Tamụnọ kẹ ọ́ pịrị Tẹmẹ ḅe ọ́ kẹ omoni sọma tẹ ọmịna Tẹmẹ-naịn-naịnma ḅẹ ḅọ-a; anie nakara Tẹmẹ ḅe rẹ ọ́ kẹ Tamụnọ awọmẹ sọmarị, tẹ Tẹmẹ ḅe kụrọ ḅụ wa oloku pakama tẹ Tamụnọ naa ḅa, “Ḍaa, ị̀ Ḍa.”

¹⁶Tamụnọ Tẹmẹ ḅe wamịna tẹmẹ ḅụ sọ tẹ Tamụnọ awọmẹ kẹ wa sịn-arị.

¹⁷Wamịnị ori awọmẹ ḅẹ sakị, ọ̀ kẹ ori atomi wẹrịma aboma ma ḅụ wamịnị sọ ḍiekiri nyana ḅa; wa Kịrayịsị na sọ tẹ tọrụsiẹrị ḅẹḅẹ, wa pịkị ori ebube ḅụ ḍiekiri nyana ḅa.

¹⁸À sịn-arị ḅara, mịọkụ wa ẹrịarị tọrụsiẹrị mẹ na, tọrọkọ-jụ ịn kẹ wa ḍie ḅarị ebube mẹ na, tọnma, tọnma ọkụ ofori.

¹⁹Bebe Tamụnọ tẹmẹ ye mẹmgba opu ḅio-sẹsẹ ḅụ Tamụnọ ori awọmẹ pakama-ḅo ḅarị ene koruarị.

²⁰Kẹ gotẹ ọkọ ḍukoarị, Tamụnọ tomikiri mẹ ḅo ó gotẹ anị tẹmẹ ye mịẹ-a kiri ḅụ sịẹ tẹ, anị ḅarana tọn ḅara ḅụ-a, kụma Tamụnọ mininim anị ọkọ mịẹ. Anịsọ ḅiokpọ paa emi,

²¹anie Tamụnọ Tẹmẹ ye mẹ anị sọ wararị ḅụrụ-kọsịtẹ omoni mẹ ḅio paka-ḅo tẹ Tamụnọ awọmẹ ebube ḅio sọ ḅarị ene mẹ.

²²Gbala wa nimi ḅara ḅụ, ḅo mịọkụ la sọ, Tamụnọ tẹmẹ ye-mẹmgba akụ ye ḅụ iningiarị, iyi la tẹ ẹrẹḅọ akụ ye da ḅara.

²³Kụma Tamụnọ tẹmẹ ye-mẹmgba ngẹrị iningi-a, wamịnị Tamụnọ tarị, ò ḍiepịrịye ḅara kẹ, Tẹmẹ ḅe kẹ pịrị tẹ apụ ma sọ iningi, iningi tẹ Tamụnọ wa kẹ gbọrsịḅị ori awọmẹ sọma fama ḅarị sakị mẹ koruarị.

²⁴Anị sime-ḅara ḅụ wamịna ḅọrọma mẹ ḅiokpọma ye ḅụ anị emi; kụma wa nwẹnị tọrụngbọ kẹ anị ẹrị tẹ ḅẹ kụma, wa pịkị tiegotẹ anị kẹ ḅiokpọmarị, anie karakara-ḅara-ḅụ anị ḅarị ḅiokpọma ye-a. Kẹ gotẹ ọkọ ḍukoarị, tụḅọ ḅọrọ mḅọ tọrụngbọ kẹ ẹrị tẹ ye kẹ ḅiokpọma ye ḅara ọkị ḅẹ?

²⁵Kụma wa nwẹnị wa tọrụngbọ kẹ amụ ẹrị-a ye kẹ ḅiokpọmarị ḅẹḅẹ wa inema tẹ anị koru ḅa.

²⁶Anị gbọrụ ḅara anie Tẹmẹ ḅe sọ pịkị ḅarasụa wamịna ịnyọ ofori mẹ pịrịarị ḅara. Wa tẹkẹ ḅẹ ḅara sọ wa nimi-a. Tẹmẹ ḅe anie ḅarana wa inetẹ ḍuko ḅịa ḅara kẹ wa gotẹ owu Tamụnọ pịrịarị.

²⁷Tẹ wamịna ḅioḅẹngbọ ẹrịarị Tamụnọ ḅe, Tẹmẹ ḅe kuromarị ye mẹ nimi wararị; gbala Tẹmẹ ḅe Tamụnọ atomi gotẹ ọ̀ ḅara ḅiiarị aị ma anie pịkị ọ̀ tọn aị ma.

²⁸Wa nimi wararị mịnẹ Tamụnọ ḅẹlẹmarị tẹ ọ̀ kẹ ye tọn ḅara ḅụ ọ̀ ḅarana sịn ọkị atomi ma ḅụ ye goyegoye iḅi go mịẹarị.

²⁹Tamụnọ sẹlẹ ọkị tẹ apụ ma, ọ̀ pịkị in sikima koroma tẹ, mịnẹ ini ọ̀ Tụḅọ ḅe sime-ḅara sime, tẹ Tụḅọ ḅe nwẹnị tọnwa amịnapụ ogboku tarịḅọ sọ.

³⁰Mie ḅụ, Tamụnọ sẹlẹ sikima tẹ apụ ma anie ọ̀ sịn ọkị tẹ apụ ma, tẹ ọ̀ sịn ọkị tẹ apụ ma ori ịn kẹ amịna ḅụụ kịkamam, mịẹtẹ ini ori na ori ebube ḅio sime ḅẹ ḅara.

³¹Ma mamgba ḅụ wa tiye ḍuko ḅẹ? Tamụnọ wamịnị na emi ogbo tụḅọ inetẹ wamịnị na tụḅụrụ ḅẹ?

³²Karakara-ḅara-ḅụ Tamụnọ rẹ ọkọ sime ye mịẹ ḅịa, ori ọ̀ Tụḅọ sọ ọlọ-sịẹma-a, tẹ ọ̀ kẹ agbamịẹ wamịnị-mgba pịrịm. Ori amịna Tụḅọ kẹ wa pịrị ḅọ ḅe, tiye kụma ọ̀ kẹ ọ̀ ḅụụ papaa sụa wa pịrị ḅịa?

³³Tamụnọ sẹlẹ-ọkị tẹ atomi ma, tụḅọ ḅẹrẹ kẹ ịna sịḅị sẹịn ḅẹ? Ori kọkọ ḅarana ḅẹrẹ-ḅaraiḅi pẹlẹ ịn pịrị tẹ.

³⁴Tụḅọ ḅọrọ ḅẹrẹ-ḅarasii pẹlẹ ịn pịrị ḅẹ? Anị ḅọrọ Kịrayịsị tẹ fịị ḅọ ḅe mụnọọ? Ori ịn kọkọ fịị ḅụ ọ̀ saakịma tẹ ọ̀ Tamụnọ ama-ḅara anga sime tẹ wa ḍụarị.

³⁵Anị kụma tụḅọ inetẹ Kịrayịsị ḅẹlẹma mẹ ḅụ wa puu sikima ḅẹ? Ḅụụ-fụka inetẹ ḅẹ mụnọọ, kụrọ-kụrọ mụnọọ, ḅaa-ḅọkọ kẹ wa ḍọkị mụnọọ, ḅuru pọkọ tarị mụnọọ, igoin mụnọọ, ḅalafama asi-aị mụnọọ, fịị mụnọọ?

³⁶Anie Fịafịa Ḍiri mẹ ḅẹẹ ḅara, “Ị́ sịḅị ẹrẹsị wa fịị ḅọkọ ḅụ sịẹ wararị sakị mamgba; ịn kẹ ḅaa ḅẹ-muarị anana awọmẹ mịẹ ḅara mie ịn kẹ wa mịẹ ye.”

³⁷Gbala-gbala, ma mamgba ḅio, wa ḅẹlẹma ḅọ ḅe ḅụ, owu wamịna ḅara iḅi fama tẹ!

³⁸Ì ḅiokpọ wararị, ọ̀ ḅẹlẹma mẹ ḅụ wa puu ḅelema ḅẹ gberie-sọ ofori: anị ḅọrọ fịị-o, ḍumo-o, enjẹlị apụ-o, So-ḅio ḅẹrẹtọn-arị apụ-o, kụrọ-o, mịọkụ emi aị-o, tọrọkọ-jụ ḅo ḅarị aị-o;

³⁹So-ḅio ḅẹ ye-o, kiri ḅio ḅẹ ye-o, Tamụnọ tẹmẹ aị ma ḅụ gberie-sọ inetẹ wa Nyanaḅọ Kịrayịsị Jizọsị ḅụ Tamụnọ ḅọrọ tẹ nyana wa pịrị ḅẹlẹma mẹ ḅụ wa puu-ḅelema ḅịa.