Read kalabari Romu 9 Bible Online

Romu 9 - kalabari bible

Romu 9

¹Yẹrị à sime Kịrayịsị pịrịm, iruo ye ḍuko-a ḅara ḅụ. Karakara mẹ mie à ḍukoarị. Ị̀ tẹmẹ ḅioḅẹngbọ, tẹ Fịafịa Tẹmẹ ḅe ḅẹrẹtọn pịrịarị ye mẹ sọ, ị̀ ḅẹẹarị àrị iruo-a

²à ḍukoarị sakị mịnẹ opu kururu ị̀ ḅụụ ḅio emi, tẹ kuno-a ḅara kẹ ì ḅioḅẹngbọ fụkamarị,

³ị̀ amịnapụ ma gotẹ, anie ị̀ na gbọrụ ịla ḅio paka-ḅo apụ ma. Ịna sịḅị ẹrẹsị Tamụnọ wori-nume ḅo ị̀ la tẹ, à Kịrayịsị ḅụ pẹlẹ-so sọ, à sịkị-a.

⁴Ini anie Tamụnọ atomi ma; ori ḅarana ịn kẹ ori awọmẹ sọma, tẹ ori ebube kẹ in ḍiem; ori ini na ọḅọkụ fị tẹ Oloko mẹ kẹ ịn pịrịm; ini anie karakara Tamụnọ tẹkẹ mẹ nyana ye; Tamụnọ minini ịn pịrị aị ịn nyana tẹ;

⁵eresoarị Hiburu ḅẹ atẹngịapụ ma furo mie ịn paka ye; tẹ Kịrayịsị, tomḅọ ḅara ḅụ, pịkị ịna furo ḅụ paka-ḅom. Yee tomi, Tamụnọ, ḅẹrẹtọn tomikiri mẹmgba pịrịarị ḅọ ḅe, tokini gbamaso! Amẹnị.

⁶À ḅẹẹ-a mịnẹ Tamụnọ ḅarị ò minini ye mịẹ ḅịa-o; gbala Izirẹlị ẹrẹ fị apụ mamgba Tamụnọ atomi-a.

⁷Anie anị sime-ḅara: Ebira-amụ furo paka apụ mamgba Tamụnọ awọmẹ-a. Tamụnọ Ebira-amụ ḅẹẹm, “À minini ị́ pịrị awọmẹ ma Ayịzịkị ḅụ mie ịn saakị ḅarịye.”

⁸Miemẹ fiearị ye anie, tomi awọ iyi-iyi ḅara kẹ iyi apụ mamgba Tamụnọ awọmẹ ma-a; anie nakara Tamụnọ minini ye ḅụ iyi apụ ma anie karakara-ḅara-ḅụ Ebira-amụ furo-ḅẹ-apụ ma.

⁹Mie Tamụnọ ye mẹ minini sakị ọ̀ kọn ẹkwẹn, “Karakara sakị mẹ la tẹ ḅẹḅẹ à pịkịma ḅo tẹ Sera owiḅọtụḅọ iyi ḅa.”

¹⁰Mie ngẹrị-a, gbala Ribeka maa owiapụ-awọmẹ ma, gbọrụ ḍaḅọ; wamịna atẹngịḅọ Ayịzịkị ḅe anie ịna ḍaḅọ.

¹¹Anịsọ, tẹrẹmẹ maa-apụ-awọmẹ ma iyi koro, anịanịa amụ ini iḅi na si na mịẹ-a ogbo, mịẹtẹ Tamụnọ ḅarana tọn tẹ ye sẹlẹ-ọkị-ọkị ḅara mẹ sịẹsime ḅẹ ẹrẹsị,

¹²tomḅọ kọrị ye ḅụ-a, kụma kịnị sịn ọkị-ọkị ḅọ ḅe ḅụ — in ḍuko á pịrịm, “Omongiḅọ ḅe sịḅị-tuu kalaḅọ ḅe pịrị ḅa.”

¹³Anie paa Fịafịa Ḍiri mẹ ḅẹẹ ḅara mẹ: “À Jekọbụ ḅẹlẹmam, kụma arị Ịsọ ḍiki-ḅioḅum.”

¹⁴Mie ḅụ wa ḍuko ḅẹ ye tiye? Wa ḅẹẹ ḅẹ mụnọọ, mịnẹ Tamụnọ kuraye mịẹ-a? Gbala-gbala ọkọ sime ye ofori!

¹⁵Ọ̀ kọkọ Mozizi ḅẹẹ, “Arị ọkụrụkụrụ nyana pịrị ḅẹ ḅọ mie arị ọkụrụkụrụ nyana pịrị ḅarịye, tẹ à ḍiki-ḅụụjịrị nyana pịrị ḅẹ ḅọ mẹ mie à ḍiki-ḅụụjịrị nyana pịrị ḅarịye.”

¹⁶Mie ḅụ, ye goyegoye tomi ḅiiarị ye, anịanịa tomi kọrị ye, ḅụ sịrẹrẹ-a, kụma Tamụnọ ḍiki-ḅụụjịrị ḅụ ngẹrị.

¹⁷Kẹ gotẹ ọkọ ḅẹẹarị, Fịafịa Ḍiri mẹ Ijiputi ḅẹ amadaḅọ ḅe ḅẹẹm, “À gotẹ ị́ kẹ ama-dama ye tomi ị́ ḅụụ ḅọrọ tẹ ị̀ kụrọ ẹrị, tẹ ị̀ ereso tomikiri mẹ ikelema ḅẹ ẹrẹsị.”

¹⁸Mị-ḅara ḅụ, Tamụnọ ḍiki-ḅụụjịrị nyana ọ̀ ḅụụ ḅẹlẹ ḅọ ḅẹlẹ ḅọ pịrịarị, tẹ pịkị ọ̀ ḅụụ ḅẹlẹ ḅọ ḅẹlẹ ḅọ mịẹtẹ mḅọ ḅịḅị poki-a ḅọ sọarị.

¹⁹Kụma ọmịna ḅụ gbọrụḅọ ì gbela ḅa, “Ọkọ kụma Tamụnọ paa tiegotẹ inetẹ tomḅọ ḅụ si ḍọkị ḅẹ? Tụḅọ inetẹ ori na ye-nụnụa ḅẹ?”

²⁰Kụma, ì ikiaḅọ, tụḅọ tẹ Tamụnọ ḅịḅị pakịrị ḅẹ? Aram-ḅẹlẹ anị tẹmẹḅọ gbela, gbela-a, “Í tiegotẹ mị-ḅara kẹ ị̀ tẹmẹ?”

²¹Mịẹ ḅara, mịẹ ḅara sọ, ḅẹlẹ tẹmẹḅọ ḅe mie lịka mẹ kẹ ò ḅiotọn ye tẹmẹ kụrọ mẹ nyana ye, tẹ gbọrụ lịka kpo ḅụ maa aḅẹlẹ tẹmẹ pakama-ḅo tẹ, gberie sime karakara mịẹye mịẹ-mịẹ saakị pịrị, tẹ osi ye sime ene-ḅaaene-ḅaaene ḅẹ amịẹaị pịrị ḅarị ye.

²²Mị-ḅara anie Tamụnọ sọ mịẹ tẹ ḅara. Ò ḅiim tomi ori ịganị mẹ ẹrị, tẹ pịkị ọ̀ kụrọ mẹ nimii. Kụma ọ̀ kpọma opu ye-inema nyana kẹ ori ịganị mẹ da tẹ fịị fa na-iḅi apụ ma pịrị lamam.

²³Tẹ ọ̀ pịkị ḅiim ori ori opu ebube mẹ mịẹfinji, anie ọ̀ kẹ wamịnị ori ọkụrụkụrụ nyana pịrịarị apụ ma ọgọnọ ọsụma sara ye mẹ, anie wamịna ḅụ ọ̀ tẹlẹma tẹ ori ebube mẹ nyana ḅẹ apụ ma.

²⁴Gbala wamịnị anie ọ̀ sịịn ọkị tẹ atomi ma, Juu-ḅẹ-apụ ma ogboku ḅụ ngẹrị-a, kụma Ja asịẹ ḅẹ apụ ogboku sọ.

²⁵Mie Hosiya ḍiri ḅio ọ̀ ḅẹẹ ḅara: “Ị̀ atomi-a apụ ma arị ịn sịn ḅa ‘Ị̀ Atomi.’ À ḅẹlẹma sime-a sịẹ mẹ arị anị sịn ḅa ‘Ị̀ Ḅẹlẹmaḅọ.’

²⁶Tẹ anị gbọrụ anga mẹ tẹ in ḍuko ịn pịrịm ‘Ọmịnị ị̀ atomi-a’ ḅẹẹ anga mẹ ḅụ mie ini ịn sịn ḅarịye, ḍumo wararị Tamụnọ ḅe awọmẹ.”

²⁷Mie Ayịzaya ḅe Izirẹlị ḅụ oloku pakama ye: “Izirẹlị atomi ma nwẹnị tuḅu ọgọnọ ḅẹ onwi ḅin ḅara ḅin sọ, ịna ḅụ ḅo-a kala-apụ kịngẹ mie ḅọrọma ḅarịye;

²⁸gbala KỊNỊNYANAḄỌ ḅe ḅẹrẹkọn ala-a sakị ḅụ ḅo tomikiri mẹ la ḅa.”

²⁹Anie paa Ayịzaya tarị tarị ḅụ ḍuko ḅara, “Kụrọmamgba nyana KỊNỊNYANAḄỌ ḅe awọ kọnma wa pịrị-a namịna mimgbe wa Sọdọmụ kịka tẹ, mimgbe wa Gomora sime-ḅara sime tẹẹ.”

³⁰Mie ḅụ wa ḅẹẹarị mịnẹ Ja asịẹ ḅẹ apụ tẹ, ḅarana amịna aḅụụ kẹ Tamụnọ na karakara ḅụ wẹrị ḅẹ ḍọkị-a apụ ma, ịn nyana minini ḅụ ḅọrọ tẹ Tamụnọ ḅụ karakara tẹ;

³¹tẹ Tamụnọ atomi ma tẹ oloko mẹ ḅụ ḅọrọ tẹ Tamụnọ ḅụụ karakara ḅẹ ḍọkị apụ ma rẹ anị ḍọkị-ẹrịa.

³²Anị tiegotẹ ọkọ mịẹ-a? Ini ma in minini ḅụ sịrẹrẹ-a ẹrẹsị, kụma ịn kọrị kọrịnama ḅụ mie ịn sịrẹrẹ ye. Ọkọẹrẹsị ḅụọ bịan ḍụḅarị mẹ ịna aḅụọ bịan tẹ ịn pụmbụ tẹ ḅịkịm.

³³Anị ḍụḅarị mẹ ḅụ Fịafịa Ḍiri mẹ ḅẹẹm: “Ḍikii, à gbọrụ ḍụḅarị kẹ Zayọnị ḅụ koromarị, anị tomina ḅụọ bịan, bịan tẹ ịn pụmbụ ḅa, ịkụ tẹ mịẹtẹ ịn ḅịkị ḅarịye. Kụma ọ̀ ḅụụ minini nyana ḅọ, nyana ḅọ papaa ḅara ọlọ ḅịa.”