Read kalabari 1 Kọrịntị 15 Bible Online

1 Kọrịntị 15 - kalabari bible

1 Kọrịntị 15

¹Tẹ mịọkụ, ị̀ amịnapụ, à ḅiiarị, mịnẹ àrị à ḍuko ọ́ pịrị tẹ ọ́ daa-ọkị tẹ, ọmịna minini pịkị anị ḅụ sịẹ-kụrọ wararị Iḅi-Oku mẹ kẹ ọmịna ḅiokoroma.

²Anie mẹ anie Iḅi-Oku mẹ tẹ à ḍuko ọ́ pịrị ye mẹ. Ọmịnị anị ḅụ ḅọrọ tẹ ḅọrọma tẹ, ọmịna minini anị ḅụ sịẹ-kụrọ wararị ḅẹḅẹ — anie ọ́ papaaye kẹ karakara sọma tẹ mininim sikima tẹ.

³Yẹrị daa-ọkị ye mẹ mie à da-saḅama ọ́ pịrị ye, anie kpọma ḍuko ḅẹ ọkụ ofori ḅara kẹ iḅiọkụ yela wararị ye mẹ: mịnẹ Kịrayịsị wamịna asi gotẹ fịịm, Fịafịa Ḍiri mẹ ḅio anị kẹẹ koro ḅara ḅụ;

⁴mịnẹ ini ò ḍiḅim, tẹ tẹra aḍin karama ene ḅụ Tamụnọ fịị ḅụ ọ̀ saakịma tẹ ò ḍumom, Fịafịa Ḍiri mẹ ḅio anị kẹẹ koro ḅara ḅụ;

⁵mịnẹ ọ̀ ḅụụ pakama Pita ḍiem, anịtẹso ọ̀ ḅụụ kẹ oyi maa fịrịmẹnjịapụ finji ma ḍiem.

⁶Anịtẹso ọ̀ nwẹnị ḅụụ kẹ ò ḍukamẹnjịapụ ma ḅụ ḅẹ kịnị ẹndẹ sọnọa si finji ḍie gbọrụ sakị ḅụ, ịna ḅụ tọnwa-apụ paa ḍumo wararị, karakaraye ja apụ fịị tẹ sọ.

⁷Anịtẹso ọ̀ ḅụụ kẹ Jemusị ḍiem, tẹ anie ḅọrọ tẹso, ọ̀ nwẹnị ḅụụ kẹ fịrịmẹnjịapụ mamgba ḍie.

⁸Arịmgba ḅẹ kunoma ḅụ ọ̀ ḅụụ pakama yẹrị sọ ḍiem — karakaraye yẹrị anie kịnị ḅiokoroma-a ḅara ḅụ iyi tụḅọ sọ.

⁹À gotẹ ọkọ ḅẹẹarị, fịrịmẹnjịapụ mamgba ḅụ yẹrị iderima tẹịnm, sụntẹ à kẹ ḅaa-ḅọkọ kẹ Tamụnọ sọsị mẹ ḍọkị ḅara ḅụ fịrịmẹnjịḅọ kẹ ị̀ sịn sọ na-iḅi-a.

¹⁰Kụma Tamụnọ ḍiki-ḅụụjịrị mie ị̀ kẹ ḅo à nwẹn sime-ḅara mẹ wẹrị ye, anịsakị ọ̀ kẹ ị̀ pịrị ḍiki-ḅụụjịrị mẹ pịkị papaa fa-a. Anie nakara, yẹrị rẹ ịnyọ kpọma kọrịnama kọrị osi afịrịmẹnjịapụ mamgba nẹngị tẹ, karakaraye yẹrị ị̀ ịnyọ kẹ kọrị-a, kụma Tamụnọ kẹ ị̀ pịrị ḍiki-ḅụụjịrị mẹ mie ị̀ ḅụụ ḅio sime tẹ kọrị ye.

¹¹Anie ḅụ, ị̀ ḅịḅị ḅo-o, ịna ḅịḅị ḅo-o, gberie mẹ mie wa ḍukoarị, aniemẹ mie ọ́ pịkị minini ye.

¹²Mịọkụ wa kẹ ḅo oku anie, Tamụnọ fịị ḅụ Kịrayịsị saakịma tẹ ḅẹẹ sakị, ndẹẹ ọmịna ḅụ ḅẹ ja apụ pịkị inetẹ ḅẹẹ ḅẹẹ ḅara mịnẹ ịn fịtẹ-apụ saakịma tẹ in ḍumo ḅịa?

¹³Nwẹnị ọkọ kụma anie Kịrayịsị sọ ini ọ̀ saakịma-a,

¹⁴tẹ ịn fịị ḅụ Kịrayịsị saakịma-a ḅẹḅẹ wa ḍuko ọ́ pịrị ḅẹ ye ḅarị ofori tẹ ọmịnị sọ minini ḅẹ ye ḅarị ofori.

¹⁵Anie nẹngị ye, wa ḅo Tamụnọ ḅụ iruoye ḍuko tẹ, kẹ gotẹ ọkọ ḍukoarị, wa ḅẹẹ tẹ mịnẹ ọ̀ fịị ḅụ Kịrayịsị saakịma tẹ — kụma anị nwẹnị karakaraye mịnẹ fịị apụ saakị tẹ ḍumo ḍumo-a ḅẹḅẹ, anie fiearị Kịrayịsị sọ ori ọ̀ saakịma-a.

¹⁶Gbala fịtẹ-apụ saakị saakị-a ḅẹḅẹ, Kịrayịsị sọ Tamụnọ ọ̀ saakịma-a.

¹⁷Tamụnọ fịị ḅụ Kịrayịsị saakịma-a ḅẹḅẹ, ọmịna minini sọ oḅori kẹ ḅụụ sịn ye sọ tẹ, tẹ ọmịnị ọmịna asi ḅụ paa sime tẹ fịị fa tẹ.

¹⁸Anị pịkị fie tẹ mịnẹ mị minini mẹ nyana tẹ Kịrayịsị ḅụ fịị apụ ma sọ ịn papaa fịị fa tẹ.

¹⁹Mị tomikiri mẹ ḅẹ ḍumo kịngẹ mie Kịrayịsị ḅụ wa nyana ḅiokpọmaye simearị ḅẹḅẹ, wa sịḅị-kụrụkụrụ nyana pịrị ḅẹ apụ sọ ḅẹḅọ-ḅẹḅọ nẹngị tẹẹ, bebe tomikiri mẹ ḅụ.

²⁰Kụma karakara mẹ anie, Tamụnọ Kịrayịsị saakịma tẹ fịị ḅụ, miemẹ nwẹnị anị ḅẹ karakara mẹ mịẹ kụrọma tẹ, mịnẹ fịị mono kọn-arị apụ ma sọ ori ịn saakịma ḅa.

²¹Anị sime-ḅara ḅụ, gbọrụ tomḅọ ḅụ fịị ḅo tomi mamgba la ḅara, anie gbọrụ tomḅọ ḅụ fị-ḅụ-saakị pịkị ḅo tomi mamgba laarị ḅara.

²²Anị sime-ḅara, kịnị mamgba fịịarị, ini Adamụ na gboloma ye ḅụ, anị gbọrụ ḅara ḅụ inimgba pịkị fị-ḅụ-saakị tẹ ḍumo ḅa ịn Kịrayịsị na gboloma ye gotẹ.

²³Kụma ini ọrụḅọ-ọrụḅọ saakịma ḅa mḅọ karakara ọrụ ḅụ: Tamụnọ tarị fịị ḅụ saakịma ḅọ anie Kịrayịsị, tẹso, ori ḅe ḅo sakị ḅụ in sime ọ̀ pịrị apụ ma saakịma ḅa.

²⁴Anịtẹso, ḅo kunoma mẹ la sakị, Kịrayịsị nwẹnị tẹmẹ ḅụ ḅẹrẹtọn-arị apụ mamgba na ịn kụrọ kẹ ḅara ḅụ sụa wararị apụ na, kụrọ ma na nẹngịma tẹ ḅẹrẹtọn mẹ saḅama Tamụnọ Ḍaḅọ ḅe pịrị ḅa.

²⁵Kẹ gotẹ ọkọ ḍukoarị, Kịrayịsị ḅẹrẹtọn nwenii Tamụnọ si kẹ ọ̀ tọn apụ mamgba nẹngịma ọ̀ pịrị tẹ ịn kẹ ọ̀ ḅụọ suku-ḅio suu sakị la ḅa.

²⁶Si kẹ ọ̀ tọn apụ ma ḅụ kunomaḅọ tẹ Tamụnọ nẹngịma ḅarị ḅọ anie fịị.

²⁷Fịafịa Ḍiri mẹ ḅẹẹarị, “Tamụnọ ye mamgba kẹ ọ̀ ḅụọ suku-ḅio suum.” Anị giregire wararị “ye mamgba” nwẹn ḅẹẹ ẹkwẹn ma Tamụnọ amịna ḅụụ kẹ sụa-a, ori ye mamgba kẹ Kịrayịsị suku-ḅio suuarị ḅọ ḅe.

²⁸Kụma Kịrayịsị ḅo ḅẹrẹtọn ye mamgba pịrị sakị, mie ori Tụḅọ ḅe ḅioju sọ amịna ḅụụ kẹ ye mamgba kẹ ò suku-ḅio suu ḅọ ḅe suku-ḅio suu ḅarịye; tẹ Tamụnọ nwẹnị gbọrsịḅị ḅẹrẹtọn ye mamgba pịrị ḅa.

²⁹Mịọkụ ndẹẹ anị sime minji sara-a tẹ fịtẹ-apụ tọrụ ḍima tẹ minji sararị apụ ma pịrị ḅarị ḅara? Ịn tọ iḅi nyana ḅo ḅẹ, anị nwẹnị karakaraye mịnẹ fịtẹ-apụ saakị saakị-a ḅẹẹ kụma, arị atomi ma ḅọrọ tiegotẹ fịị apụ ma tọrụ ḍima tẹ minji sararị?

³⁰Tẹ wamịnị ma, wa ḅọrọ tiegotẹ sakị goyegoye ḅụ fịị bala-a ḅara kẹ ye mịẹarị?

³¹Ị̀ amịnapụ, ene-ḅaaene-ḅaaene fịị ị̀ tọrọkọ emi! Àrị ọmịnị na Kịrayịsị Jizọsị, Wanyanaḅọ ḅe na, ḅụ nyana wararị ḅụụ-tọn mẹ mie ị̀ mịẹtẹ à miemẹ ḍuko pakamarị.

³²Mị yọ à simearị Ẹfisọsị mẹ ḅụ, yẹrị tomḅọ ḅe, tomikiri ḅẹ kuroma kịngẹ gotẹ “piri-ḅio-ḅẹ nama” na ḅara owu sọ kụma, à nyana sọye ḅọrọ tiye? Kụma ịn fịtẹ-apụ saakịma tẹ in ḍumo ḍumo-a ḅẹḅẹ, ó yee wa tomi ẹkwẹn-arị ḅara mẹ ọkị ya, “Ó yee wa fị-na-ḅuu-na, ḅaa wa fịị ḅarị sakị.”

³³Ọ́ ḍụkụ tẹ kịnị oḅori kẹ ọ́ sịn ma. “Si ikia-ogbo iḅi-yemịẹ-ḅara sima simam.”

³⁴Ọ́ pịkịma ḅo elemu ọ́ nyana-nyana karakara akuroma ma ḅụ sọ, tẹ ọ́ mẹnjịarị asi etela ma ḅụ daasịẹ. Kẹ mịẹtẹ ọ́ ḅụụ-jịrị ḅẹ ḅara, à ḍuko pakamarị mịnẹ ọmịna ḅụ ḅẹ ja apụ Tamụnọ nimi-a.

³⁵Ẹbịsịya gbọrụḅọ gbela ḅa, “Ndẹẹ ini inetẹ fịtẹ-apụ ma saakịma tẹ in ḍumo ḅẹ ḅara? Ịn tọ-ḅara sime oju sụa ḅẹ?”

³⁶Ị́yẹrị oḅori-ḅọ! Ị́ sịnmgbọlị kẹ kiri-ḅio ḍiḅi kụma, anị so-paka ḅịa, anị fịị-a ogbo.

³⁷Papaa sịnmgbọlị mie í ḍiḅiarị, ẹbịsịya mbịaka mgbọlị ḅa, anịanịa jen mgbọlị, bebe sịn mẹ tẹ anị so-paka tẹ ḍụḅa paka-ḅo fama tẹ sime ḅarị ḅara mẹ sime ye ị́ nwẹn ḍiḅi-a.

³⁸Kụma Tamụnọ ọ̀ ḅụụ-ḅẹlẹ oju kẹ mgbọlị mẹ pịrịarị; mgbọlị goyegoye ḅẹ karakara oju mie ọ̀ kẹ anị pịrịarị.

³⁹Ḍumo wararị aị ma meni mẹ gbọrụ ḅara sime meni-a; tomi gbọrụ meni ḅara nyana wararị, nama amẹẹ ịna meni, feni amẹẹ ịna meni, tẹ inji pịkị ịna meni.

⁴⁰So-ḅio ḅẹ oju ma emi, tẹ tomikiri ḅẹ oju ma pịkị emi; sime So-ḅio ḅẹ oju mẹ pịrị tọrụ-gbẹ iḅi sime-ḅara mẹ, sime tomikiri ḅẹ oju mẹ pịrị iḅi sime-ḅara mẹ ḅụ kịrịm.

⁴¹Ịrụa mẹ amịna iḅi nyana wararị, akalụ jen iḅi nyana wararị, tẹ lolia ma iḅi pịkị kịrịm; lolia ma ogboku sọ iḅi kịrị-kịrị wararị.

⁴²Mie ịn fịtẹ-apụ ma saakịma tẹ in ḍumo ḅarị sakị anị sime ḅarị ḅara. Oju akpakpa mẹ fịị fịị ḅara ḅụ ini anị ḍiḅim; ini anị saakịma sakị, anị fịị fịị-a ḅara sime ḅa.

⁴³Ini anị ḍiḅiarị sakị anị si lama tẹ, pịkị lọkọ tẹ; ini anị saakịma sakị anị iḅi tẹ pịkị kụrọ ḅa.

⁴⁴Ini anị ḍiḅiarị sakị meni-ojuu; ini anị saakịma ḅarị sakị anị tẹmẹ oju sọ ḅa. Ye sime-ḅara ḅụ, meni oju emi ḅara mie tẹmẹ oju sọ emi ḅara.

⁴⁵Fịafịa Ḍiri mẹ ḅẹẹarị, “Tarị tomḅọ, Adamụ ḅe, ḍumo wararị ḅo ḅara mie Tamụnọ kẹ ọ̀ tẹmẹ ye; kụma kunoma Adamụ ḅe anie ḍumo pịrịarị Tẹmẹ ḅe.”

⁴⁶Tẹmẹ ḅụ ḅẹ ḅọ ḅe tarị ḅọ-a, kụma meni oju ḅẹ ḅọ ḅe tarị, anị tẹrẹmẹ tẹmẹ ḅụ ḅẹ ḅọ ḅe ḅom.

⁴⁷Tarị Adamụ ḅe tẹ ịn lịka kẹ tẹmẹḅọ ḅe, kiri ḅụ ò ḅom; maaịn karama Adamụ ḅe So-ḅio ò ḅom.

⁴⁸Sime kiri mẹ pịrị apụ ma, ịn lịka kẹ tẹmẹ ḅọ ḅe na kịkarị; So-ḅio ḅẹ apụ ma So-ḅio ḅo ḅọ ḅe na kịkarị.

⁴⁹Mịọkụ wa ịn lịka kẹ tẹmẹḅọ ḅe sime-ḅara mẹ kẹ kapa sọma tẹ sụa ḅara mie wa pịkị So-ḅio ḅo Tomḅọ ḅe sime-ḅara mẹ kẹ kapa sọma tẹ sụa ḅarị ḅara.

⁵⁰Mịnapụ, à fiearị ye anie, meni na ọmbie na sụa ḅọ inetẹ Tamụnọ Ama-da tẹ ḅẹrẹtọn-arị anga mẹ sọ-mu ḅịa, tẹ fịị, fịị ye inetẹ fịị, fịị-a ye nyana ḅịa.

⁵¹Ọ́ mị ḅọị ye mẹ pokii: wamịnị-mgba fịị ḅịa, kụma wamịnị-mgba ḍima ḅa,

⁵²gbọrụ kiri, tọrụ gbaịn finji ḅụ, kunoma ọdụ mẹ fie sakị. Kẹ gotẹ ọkọ ḍukoarị ọdụ mẹ fie tẹ fịtẹ-apụ ma saakịma tẹ ịn ḅarị fịị fịị-a ḅara sime ḅa, tẹ wamịnị-mgba ḍima ḅa.

⁵³Gbala fịị, fịị ye mẹ ḍima ḅo fịị, fịị-a ye sọ ḅa; fịị ḅarịye mẹ ḍima ḅo fịị ḅịa ye sọ ḅa.

⁵⁴Mie ḅụ miemẹ mịẹarị sakị, ịn fịị, fịị ye mẹ ḍima ḅo fịị, fịị-a ye sọma tẹ anie mịẹ tẹ Fịafịa Ḍiri mẹ ḍuko ye mẹ ḅo karakaraye sọ ḅa: “Ịn Fịị ḅaa guluguluma tẹ; owu ḅara iḅi mẹ bebe ye sọ tẹ!”

⁵⁵“Fịị, ndẹẹ í owu-ḅara-iḅi mẹ? Fịị, ị́ kẹ ye kẹ kịnị lama ḅẹ kụrọ mẹ ndẹẹ anị?”

⁵⁶Fịị kẹ ye kẹ kịnị lama ḅẹ kụrọ mẹ si ḅụ ḅoarị, tẹ si kụrọ mẹ Oloko mẹ ḅụ ḅoarị.

⁵⁷Kụma Tamụnọ mịẹtẹ, Wanyanaḅọ Jizọsị Kịrayịsị ḅe ḅụ ḅọrọ tẹ owu-ḅara-iḅi mẹ kẹ wa pịrị ḅọ ḅe.

⁵⁸Ọkọẹrẹsị, ị̀ iḅi amịnapụ, ó jike-a ḅara kẹ sịẹ-kụrọọ. Ọ́ sakị mamgba ọ́ kọrị KỊNỊNYANAḄỌ ḅe pịrịarị kọrịnama mẹ kọrịị, ó nimi wararị sakị goyegoye, mịnẹ KỊNỊNYANAḄỌ ḅe ḅụ ọ́ mẹnjịarị fịrị mẹ papaaye sọ ḅịa.