Read kalabari 1 Kọrịntị 3 Bible Online

1 Kọrịntị 3 - kalabari bible

1 Kọrịntị 3

¹Karakaraye ḍuko ḅụ, ị̀ amịnapụ, àrị ẹkwẹn ọ́ pịrịarị sakị, àrị inetẹ Tẹmẹ ḅe ḅụụ ḅio simearị apụ ḅara kẹ ẹkwẹn ọ́ pịrị-a, kụma sime mị tomikiri mẹ pịrị apụ, tẹ Kịrayịsị ḍukamẹnjịapụ mininiye mẹ ḅẹ kala awọmẹ ḅara.

²Ndo mie à kẹ ọ́ pịrị ye, kụrọtẹ fịye-a, amụ ọ́ ḍụḅa paka-ḅo kụrọtẹ fịye fị la-a ẹrẹsị. Ḅo mịọkụ la sọ amụ ọ́ paa ọkọ la-a,

³kẹ gotẹ ọkọ ḅẹẹarị, ọ́ paa mị tomikiri ḅẹ apụ kẹ ḍumo kọn, kọn ḅara kẹ ḍumo kọn-arị. Ḍiki ya, ọmịna ogboku afana na kamụ-sọ na paa emi, miemẹ ḍie-pakama-a mịnẹ ó sime tomikiri mẹ pịrị, tẹ pịkị anị wẹrị tẹ ḍumo kọn, kọn ḅara kẹ ḍumo kọn-arị?

⁴Ó tomikiri ḅẹ apụ mịẹ-mịẹ ḅara mịẹarị ḅara ḍikii, ọmịna ḅụụ gbọrụḅọ ḅẹẹarị, “Yẹrị Pọlụ ḍukamẹnjịḅọ”, tẹ jụmọ mẹẹ, “Yẹrị Apọlọsị ḍukamẹnjịḅọ.”

⁵Sụntẹ, Apọlọsị gbeke tụḅọ? Pọlụ gbeke tụḅọ? Wamịnị Tamụnọ fịrịmẹnjịapụ kịngẹ, tẹ ḅụụ ḅụ ọ́ ḅọrọ tẹ minini apụ. Wamịna ḅụụ ọrụḅọ-ọrụḅọ KỊNỊNYANAḄỌ ḅe kẹ mḅọ fịrịma fịrị mẹnjịarị.

⁶Yẹrị mgbọlị mẹ ḍiḅim, Apọlọsị minji kẹ so-paka tẹ ye mẹ saram, kụma Tamụnọ mie mịẹtẹ ḍiḅi ye mẹ so-paka ye.

⁷Sụntẹ ḍiḅiarị ḅọ na, minji kẹ sararị ḅọ na ye ḅụ ofori, kụma mịẹtẹ anị so-pakarị Tamụnọ ḅe anie ye mamgba.

⁸Ḍiḅiarị ḅọ ḅe na, minji kẹ sararị ḅọ ḅe na, ogboku kịrị ofori; Tamụnọ ọrụḅọ-ọrụḅọ kọrị ye ḍikitẹ mḅọ gbẹẹ ḅa.

⁹Kẹ gotẹ ọkọ ḍukoarị, wamịnị anie gbọrụ ḅụ sime tẹ kọrịnama kọrị Tamụnọ pịrịarị apụ, anịsakị ọmịnị nwẹnị Tamụnọ ye ḍiḅi kiri. Ọmịnị pịkị Tamụnọ namarị warị.

¹⁰Tamụnọ kẹ ị̀ pịrị ḍiepịrịye mẹ sime-ḅara ḅụ, yẹrị anie gbala ḅọrọ warị nama ḍịn-ḅọ ḅara kẹ warị mẹ suku mẹ saakị ye, tẹ jụmọ anị ọgọnọ nama pakama ḅoarị. Kụma ọrụḅọ-ọrụḅọ mḅọ namarị ḅara ẹbịị.

¹¹Kẹ gotẹ ọkọ ḍukoarị, Tamụnọ ḅarana Jizọsị Kịrayịsị kẹ ngẹrị sukutarị-ḍụḅarị mẹ sọma tẹ kẹ suku mẹ saakị tẹ, gbọrụḅọ-sọ ḅarị inetẹ jen suku-saakị ḅịa ḅara.

¹²Ja apụ golu, anịanịa seleḅa, anịanịa yela aḍụḅarị, kẹ saakị tẹ suku mẹ ọgọnọ namarị; osi apụ sịn, anịanịa osuka, anịanịa asịra, kẹ nama ḅa.

¹³Tẹ ọrụḅọ-ọrụḅọ kọrịnama ḅẹ iḅi na si na giregire paka tẹ kịnị ẹrị ḅa, Kịrayịsị ḅo tẹ ḅẹrẹkọn ḅarị Ene mẹ ḅụ. Kẹ gotẹ ọkọ ḍukoarị, anị Ene mẹ ḅụ fịnị ọrụḅọ-ọrụḅọ kọrịnama sime-ḅara ḍie-pakama ḅa; fịnị mẹ mie anị daaḍiki tẹ anị ḅẹ karakara sime-ḅara kẹ kịnị ḍie ḅarịye.

¹⁴Fịnị mẹ tomḅọ kẹ saakị wararị suku mẹ ọgọnọ nama ye mẹ dọkịma-a ḅẹḅẹ, mḅọ gbẹẹ-ye nyana ḅa.

¹⁵Kụma mḅọ kọrịnama mẹ dọkịm ḅẹḅẹ mḅọ fa nyana tẹ; kụma mḅọ ḅioju ḅọrọma ḅa, gbala fịnị ḅio fọịn pakama-ḅo ḅọ pembe ḅara.

¹⁶Tomi-juḅẹye, ó nimi tẹ ḅara ḅụ, ọmịnị ma anie Tamụnọ-warị, tẹ Tamụnọ Tẹmẹ ḅe ọmịna ḅụụ ḅio angarị!

¹⁷Mie ḅụ, gbọrụḅọ nwẹnị Tamụnọ-warị mẹ kan sararị ḅẹḅẹ, Tamụnọ mḅọ ḅaa guluguluma ḅa. Kẹ gotẹ ọkọ ḍukoarị, Tamụnọ-warị mẹ fịafịa, wararị, anịsakị ọmịnị ma anie ọ̀ warị mẹ.

¹⁸Gbọrụḅọ-sọ oḅori kẹ amịna ḅụụ sịn ma. Ọmịna ogboku ḅụ mị tomikiri mẹ kẹ ye ọkịarị ḅara ḅẹ nimi kọn ḅọ emi-emii, mḅọ tarị oḅori tomḅọ sọọ, mịẹtẹ mḅọ ḅo karakara nimi mẹ nyana ḅarị ḅara.

¹⁹Kẹ gotẹ ọkọ ḅẹẹarị, tomi kẹ nimi sịn-arị ye mẹ anie Tamụnọ tọrọkọ oḅori ye. Anie Fịafịa Ḍiri mẹ ḍukoarị ḅara, “Tamụnọ tomikiri ḅẹ ye-nimiapụ ma kun sịẹma tẹ ịna aka na epele na ḅụ”;

²⁰tẹ jen anga ḅụ Fịafịa Ḍiri mẹ pịkị ḅẹẹarị, “KỊNỊNYANAḄỌ ḅe nimi wararị mịnẹ nwẹn ḅẹẹ ye-nimi apụ ma akuroma mamgba gberie-sọ la-a.”

²¹Ọkọẹrẹsị, gbọrụḅọ-sọ tomi inetẹ mịẹ ḅẹ ye kẹ ḅụụ-boma ma. Karakara-ḅara-ḅụ, ye goyegoye sime ọ́ pịrịm:

²²anị ḅọrọ Pọlụ-o, Apọlọsị-o, Pita-o, mị tomikiri mẹ-o, ḍumo-o, fịị-o, mịọkụ emi aị-o, tọrọkọ-jụ ḅo ḅarị aị-o, arịmgba ọmịna aị famam,

²³tẹ ọmịnị sime Kịrayịsị pịrịm, tẹ Kịrayịsị sime Tamụnọ pịrịm.