Read kalabari 1 Kọrịntị 4 Bible Online

1 Kọrịntị 4 - kalabari bible

1 Kọrịntị 4

¹Kịrayịsị Fịrịmẹnjịapụ, tẹ Tamụnọ ọ̀ karakara mẹ, tẹ elemu tomi nimi-a aị ma, kẹ ḅara ḅụ sụam ḍuko pakama ḅẹẹ apụ ḅara, mie ọ́ kẹ wa ọkị ḅarịye.

²Ọkọ sime fịrịmẹnjịḅọ ḅe ḅara ịn ḅiiarị kpọkpọ gberie anie, mḅọ ḅioḅẹngbọ-kẹ-sịrẹrẹ-niḅi ḅara sime amịna sịḅịdaḅọ pịrịị.

³Mie ḅụ ọmịnị ị̀ ḅụ ḍukoarị ye-o, ja apụ tẹ tomina ḅara kẹ ye ḍikiarị apụ ḍukoarị ye-o, ị̀ ḅụụ ḅẹrẹ-a. Yẹrị sọ ḅarana ị̀ ḅụụ ye ḍuko ḅịa.

⁴Ị̀ tẹmẹ ḅioḅẹngbọ fịafịa wararị, kụma anie fie-a mịnẹ ị́yẹrị si-ḅọa. KỊNỊNYANAḄỌ ḅe mie ḅarana ḍiki tẹ ị̀ kọn ḅarịye.

⁵Anie mịẹ tẹ, sakị mẹ amụ la-a ogbo ọ́ ḅẹrẹ-ḅarasii pẹlẹ gbọrụḅọ-sọ pịrị ma. Kunoma ḅẹrẹkọn mẹ koru mu KỊNỊNYANAḄỌ ḅe sakị la, tẹ mịọkụ kanakana ḅio kikima wararị aị mamgba, ori ọkị-ḅo bele ḅio sara fama tẹ, pịkị tomina ḅioḅẹngbọ jụ ḅio simearị akuroma mamgba pakama-ḅo fama ḅa. Anị ḅo ọkọ la sakị ọrụḅọ-ọrụḅọ Tamụnọ ḅara mḅọ la tokini nyana ḅa.

⁶Ọmịna iḅi mie à gotẹ Apọlọsị na ị̀ na kẹ tọnma ọ́ pịrịarị, ị̀ amịnapụ, mịẹtẹ ọ́ mị ẹkwẹn mẹ fiearị ye nimi ḅẹ ḅara, “Ọ́ Fịafịa Ḍiri mẹ ḍuko ḅara ḍiki mẹnjịị.” Ọ́ gbọrụḅọ-sọ kẹ iḅi-ḅọ ọkị tẹ osi-ḅọ ḍiki-sima ma.

⁷Tụḅọ ị́ mịẹtẹ í iḅi ja apụ nẹngị ḅọ sọ? Ị́ nyana aị ma ḅụ Tamụnọ kẹ ị́ pịrị-a ye emi? Nwẹnị ọkọ kụma ndẹẹ ị́ kẹ inetẹ ḅụụ-boma ḅẹ ḅara, gbala ị́ nyana ye mẹ ḍiepịrịye-a ye ọkụ?

⁸Ọ́ nyana ḅẹ ḅii ye, ḅii ye ọ́ nyana fama tẹ? Ọ́ pẹrẹ tẹ? Ó ḅo amadapụ sọ tẹ, karakaraye wamịnị amụ ọkọ sime-a sọ. Iḅim, anie yẹrị sọ ḅii ḅara, mimgbe ọmịnị amadapụ sọ fama tẹ, mịẹ tẹ wamịnị sọ inetẹ ọmịnị na sọ tẹ ama-da ḅarị ḅara.

⁹Anị ị̀ ḅụụ kịkarị ye anie, Tamụnọ gbala wamịnị fịrịmẹnjịapụ ma kẹ iderima tẹịn kiri ḅụ koroma tẹ, tẹ ịn ḅaa-ḅẹrẹ-pẹlẹ pịrị tẹ, ama karakara ogbo ḅaa ḅẹ muarị si-mịẹapụ pembe ḅara, enjẹlị apụ na tomi na dẹẹ tẹ ḍikiarị anga ḅụ.

¹⁰Kịrayịsị sịḅị gotẹ wa gbala ye-nimia-apụ sọ tẹ! Kụma ọmịnị ye-nimiapụ, Kịrayịsị na gboloma ḅụ. Ịnyọ sọ wa nyana-a, kụma ọmịnị, ọ́ kụrọ wararị! Kịnị wa kẹ ye-sịn-a, kụma ini ọ́ kụn-arị!

¹¹Ḅo mị gbọrụ sakị mẹ la sọ, ḅuru paa wa tarị ḅaarị, minji sọ wa ẹrị ḅuu-a; kanị-kanịtẹ akapa mie wa sụa wararị; in fomuye kẹ wa fomuarị; sọ ḅẹ warị nyana-a apụ ḅara mie wa kẹ ikelekelema-ḅọrọarị;

¹²wa kụrọ kọrịnama kẹ ḅuu ponoma ḅaarị. Ịn wa woriarị sakị, wa ịn bomarị; ịn ḅaa-ḅọkọ kẹ wa ḍọkịarị sakị, wa inemarị;

¹³ịn wa mịẹ-simarị sakị, wa iḅi ḅịḅị kẹ ịn pakịrịarị. Gbala anị simearị ḅara ḅụ wa iḅi sara ọgọnọ ḅẹ fun nẹngị-a; tomi kẹ mịẹ-mịẹ gberie-sọ ḅarị ofori ḅọ kiri mie ịn wa koroma ye, ọfịn mu piri-ḅio nguma ḅẹ fun, sime-ḅara mie wa simearị ḅara, ḅo mịmgba la sọ!

¹⁴Àrị ọmịna ḅụụ-jịrịma ḅẹ ye gotẹ miemẹ kẹẹ-a, kụma kẹ ye kẹ ó toluma, ị̀ ḅụụ yela awọmẹ ḅara ḅụ.

¹⁵Kẹ gotẹ ọkọ ḍukoarị, Kịrayịsị ḍukamẹnjị ḍumo mẹ ḅụ ḅarasụa ọ́ pịrị ḅẹ apụ kịnị puku emi sọ, gbọrụ ḍaḅọ ngẹrị mie ọ́ nyana ye. Ọ́ Kịrayịsị Jizọsị ḅụụ emi tẹ kọn-arị ḍumo mẹ ḅụ mie à ḅọrọ tẹ ḍa sọ ọ́ pịrị ye, àrị Iḅi Oku mẹ ọkị-ḅo ọ́ pịrị ye mẹ ẹrẹsị.

¹⁶Ọkọẹrẹsị, àrị ọ́ tẹkẹm, ọmịnị ì ḍikima mịẹ.

¹⁷Miemẹ anie à gotẹ ị̀ ḅẹlẹma tụḅọ, Kịrayịsị etela mẹ ḅụ, ḅioḅẹngbọ-kẹ-sịrẹrẹ-niḅi Timoti ḅe, kẹ ọ́ fịrịmarị. Ori, à Kịrayịsị Jizọsị na gbọrụ ḅụ sime ye ḅụ kọn tẹ pịkị kẹ anga, anga ḅụ sọsị mamgba tolumarị ịwọ ḍumo mẹ kọn, kọn ḅara mẹ ḅẹ ọrụ ma kẹ ọmịna ḅiokoroma ḅẹ ḅara.

¹⁸Ọmịna ḅụụ ḅẹ ja apụ ọkịm à ḅarị ḅo ọmịnị na ẹrịya ḅịa ḅoto, tẹ opu amịẹaị mịẹ ḍumo ḅụ sọ tẹ.

¹⁹Tamụnọ ḍiki-ḅụụjịrị ḅụ ala-a à ḅo ọ́ la ḅa; à ḅo ọ́ la sakị, opu amịẹaị mịẹarị apụ ma à papaa ịna opu ẹkwẹn poki tẹ so ḅịa, kụma à pịkị ini inetẹ mịẹ ḅẹ ye ḍiki ḅa.

²⁰Kẹ gotẹ ọkọ ḅẹẹarị, Tamụnọ Ama-da mẹ anị ẹkwẹn-ḅịḅị ḅụ ofori, kụma kụrọ ḅụ.

²¹Ndẹẹ ọmịna aḅụụ ḅẹlẹ ye? À fomuye ọlọ tẹ ḅo mụnọọ, à ḅẹlẹma ḅioḅẹngbọ na dein na kẹ ḅo?