Read kalabari 1 Kọrịntị 5 Bible Online

1 Kọrịntị 5 - kalabari bible

1 Kọrịntị 5

¹Kịnị ye kikima-a ḅara kẹ ḍuko ị̀ pịrị tẹ, mịnẹ ọmịna ogboku ḅụ owiapụ na ereme na ḍuko na-iḅi-a si mẹnjị kọn-arị, oru nimi apụ ma sọ mịẹ-a ḅara. In ḍuko ị̀ pịrịm mịnẹ gbọrụ owiḅọ ọ̀ ḍa ta na olo-sọarị!

²Mie ḅụ, ndẹẹ ọ́ kẹ opu amịẹaị mịẹ-mịẹ ye? Anie nakara, ọ́ mịẹ na-iḅi ye kururu, tẹ ọkọ sime ye mẹ mịẹ tomḅọ ḅe dee-siin, ọmịna kobiri-ogbo ḅụ.

³Karakaraye, oju akpakpa ḅụ àrị ọmịnị na ofori sọ, tẹmẹ ḅụ àrị ọmịnị na emi. Tẹ à ḅẹrẹ-pẹlẹ mie mẹ mịẹ tomḅọ ḅe pịrị kụra-ḅio iḅerea, gbala yẹrị sọ anịanga simem pembe ḅara.

⁴Wa Nyanaḅọ Jizọsị ẹrẹ ḅụ ó ḅo kobiri tẹ ị́yẹrị sọ tẹmẹ ḅụ ọmịnị na emi sakị, tẹ wa Nyanaḅọ Jizọsị kụrọ mẹ sọ emi ogbo,

⁵ọ́ ḅị tomḅọ ḅe saḅama Ekwesu pịrịị, mịẹtẹ ọ̀ tomina oju mẹ fịị gulugulu tẹ KỊNỊNYANAḄỌ ḅe Ene mẹ ḅụ ọ̀ tẹmẹ ḅọrọma ḅarị ḅara.

⁶Anị kura-a ọmịnị opu amịẹaị mịẹ! Mị ẹkwẹn mẹ fiearị ye ó nimi wararị, “Ye sunma ye kala ye mie ịn kẹ fịturu mịẹ ḅẹ fịlawa kala kpo sunma tundurumarị.”

⁷Mie ḅụ ọmịnị ọmịna ogbo ḅụ elemu ye sunma si saakị sin, mịẹtẹ ọ́ gbọrsịḅị fịafịa fama ḅarị ḅara. Anịtẹso ọ́ nwẹnị ḅo ịwọma fọị ḅẹ fịlawa kpo, tẹ ye sunma ye ofori ye, yẹrị ḅarana nimim ó sime karakara ḅara mẹ, sime ḅa. Kẹ gotẹ ọkọ ḍukoarị, mịọkụ Kịrayịsị, wamịna Saḅaḅọrọ-Alalị agba anana tụḅọ ḅe, ini ọ̀ ḅaa tẹ ḅẹ sakị, Saḅaḅọrọ-Alalị mẹ tẹlẹma fama tẹ.

⁸Ọkọẹrẹsị, ó yee wa Saḅaḅọrọ-Alalị mẹ fị, wa elemu ye sunma ye mẹ na, si na, si-sịḅịḅio na simearị fịturu kẹ fị ḅịa, kụma ye sunma ye sọ-a fịturu, anie fịafịa na karakara na fịturu mẹ.

⁹À tarị kẹẹ tẹ kẹ ọ́ fịrịma ḍiri mẹ ḅio arị ọ́ ḅẹẹm ọ́ ḍụkụ tẹ ama mẹnjị si ḍumo kọn-arị apụ na ọmịnị na gboloma ma.

¹⁰Àrị ọkọ ḅẹẹ sakị oru nimi apụ tẹ ama mẹnjị ḍumo kọn-arị apụ, anịanịa opu pọkọ-ḅẹngbọ sụa apụ, anịanịa furuapụ, anịanịa oru tẹkẹarị apụ à nwẹn ḅẹẹ-a. Ọmịnị ọkọ sime apụ mamgba kịlẹ fama ḅarị ḅẹḅẹ, anie ọ́ gbọrsịḅị mị tomikiri mẹ koroma so ḅa.

¹¹À fiearị ye anie, amịna ḅụụ kẹ Kịrayịsị ḍukamẹnjị mịnaḅọ sịn-arị ḅọ tẹ ama mẹnjị ḍumo kọn-arị ḅọ, anịanịa opu pọkọ-ḅẹngbọ sụa ḅọ, anịanịa oru tẹkẹarị ḅọ, anịanịa kịnị ḍuko simearị ḅọ, anịanịa iru ḅuu ḅụramarị ḅọ, anịanịa furuḅọ, ọmịnị mḅọ na gboloma ma. Ọkọ sime tomḅọ mẹ, mḅọ na lẹgị tẹ ḅara gboloma ye fị sọ ọ́ mịẹ ma.

¹²À sọsị ḅẹ apụ-a tomi kọn ḅụ ḅẹrẹ nyana-a. Kụma sọsị ḅẹ apụ ma anie ọ́ kọọn ḅẹ apụ-a?

¹³Sọsị ḅẹ apụ-a tomi kọn mẹ anie Tamụnọ ḅẹrẹ. “Ọmịnị ọmịna ogbo ḅụ simearị si tomḅọ ḅe dee-siin.”