Read kalabari 1 Kọrịntị 8 Bible Online

1 Kọrịntị 8 - kalabari bible

1 Kọrịntị 8

¹Mịọkụ à ḅo ịn kẹ agbamịẹ oru pịrị tẹ fịye ḅụ ọ́ kẹẹ ye la tẹ. Tomi ḍuko, ḍuko ḅara ḅụ, “Wamịna ḅụ ye-nimia-ḅọ ofori.” Anịsọ ọkọ sime ye-nimi mẹ ḅụụ-gelema mie anị dogi-ḅoḅo ye, kụma ḅẹlẹma mie Kịrayịsị ḍukamẹnjị ogbo mẹ nama saakịarị.

²Amịna ḅụụ kẹ ye-nimiḅọ ọkịarị ḅọ mẹ, karakaramatẹ mḅọ nimi la anga ofori.

³Kụma Tamụnọ ọ̀ ḅẹlẹmarịḅọ nimi wararị.

⁴Mie ḅụ, kẹ agba mịẹ oru pịrị tẹ fịye gboloma ye mẹ ḅụ, wa nimi wararị mịnẹ oru fụḅara mẹ, ofori ye mie anị sịẹ pịrị ye; wa nimi wararị, mịnẹ kpọkpọ gbọrụ Tamụnọ ḅe sikima jen ofori.

⁵Ọkị mịnẹ tomi kẹ tamụnọ sịn-arị aị emi, anị ḅọrọ So-ḅio-o, kiri-ḅio-o; tẹ ịn pịkị tọnwa aị kẹ “tamụnọ amẹẹ” na “kịnịnyanapụ na sịn-arị”

⁶sọ, wamịnị kịngẹ kụma kpọkpọ gbọrụ Tamụnọ ngẹrị mie wa nyana ye, anie Ḍaḅọ ḅe tẹ ye mamgba Tẹmẹ ḅọ ḅe, tẹ wa pịkị ḍumo pịrịarị ḅọ ḅe; tẹ kpọkpọ gbọrụ KỊNỊNYANAḄỌ kịngẹ mie emi ye, anie Jizọsị Kịrayịsị, ḅụụ ḅụ ye mamgba ḅọrọtẹ tẹmẹ tẹ, wa pịkị ḅụụ ḅụ angarị ḅọ ḅe.

⁷Kụma ḅẹḅọ-ḅẹḅọ mị karakara mẹ nimi-a. Ja apụ oru afụḅara na nangwọ sakị kẹ mịẹye gboloma tẹ ẹrẹsị, ḅo mịmgba la sọ ini ọkọ sime fịye fị sakị, fị sakị ini ọkịarị oru fịye mie ịn fịarị ye; ịna tẹmẹ ḅioḅẹngbọ lọkọ wararị ẹrẹsị, ini ọkịarị fịye mẹ in pilemarị.

⁸Anị sime-ḅara, sime-ḅara sọ, fịye rẹ wa mịẹtẹ wa Tamụnọ na sime ḅarị ḅara iḅi tarị ḅara nẹngị ḅịa; wa ye fị-a ẹrẹsị wa fama ḅẹ gberie-sọ ofori, anịsakị wa ye fị ye ẹrẹsị wa nyana ḅẹ gbọrụ sọye sọ pịkị ofori.

⁹Anị sime-ḅara, sime-ḅara sọ, ẹbịị, ḍụkụ tẹ ị́ ḅụụ-ḅẹlẹ tẹ ị́ mịẹarị ye mẹ minini la-a apụ ma kẹ mu siye ḅio suu ma.

¹⁰Ọkị mịnẹ ị́yẹrị ye nimim nwẹn ḅẹẹ ḅọ ḅe oru warị ye fịarị, tẹ tẹmẹ kụrọ-a ḅọ ḅe ị́ ẹrị kụma, anị ọ̀ mịẹtẹ ori oru warị ḅẹ fịye kẹ fị-fị ye sọma ḅịa?

¹¹Tẹ mie ḅụ í ye-nimi mẹ mịẹtẹ ị́ mịnaḅọ, tẹ Kịrayịsị gotẹ fịịḅọ ḅe mu gulugulu fa tẹ!

¹²Tẹ mị-ḅara ḅụ, ị́ kẹ Kịrayịsị ḍukamẹnjị amịnapụ mịẹarị siye mẹ, tẹ kẹ ịna tẹmẹ kpọ-a ḅioḅẹngbọ mẹ lamarị ye mẹ, ḅo ị́ kẹ Kịrayịsị mịẹ si sọ tẹẹ.

¹³Ọkọẹrẹsị, ḅịḅị-ḅio sụa fị fịye mie tẹ ị̀ mịnaḅọ siye mịẹarị ḅẹḅẹ, à ḅarị jen kẹ nama pẹị ḅịa, mịẹtẹ ị̀ mịnaḅọ ḅe ḅarị mu siye ḅio sọ ḅịa ḅara.