Read kalabari 2 Kọrịntị 2 Bible Online

2 Kọrịntị 2 - kalabari bible

2 Kọrịntị 2

¹Mie ḅụ à tọn kuromam mịnẹ à ḅarị jen ḅo tẹ ó kururuma ḅịa.

²Kẹ gotẹ ọkọ ḍukoarị, à mịẹ tẹ ó kururu kụma, tọ apụ mịẹ tẹ à ḅioḅẹlẹ ḅẹ? Paa gbọrụ apụ ma tẹ à mịẹ tẹ kururutẹ apụ ma mụnọọ.

³Anie à gotẹ anị ḍiri mẹ kẹẹ tẹ kẹ ọ́ fịrịma ye; à ḅii-a à ḅo tẹ ì ḅioḅẹlẹma ḅarị apụ ma ḅo pịkị ì kururuma ḅẹ apụ sọ. À gotẹ ọkọ ḅẹẹarị, àrị ọkịm mịnẹ ì ḅioḅẹlẹ tẹ ḅẹḅẹ ọmịnị-mgba sọ ḅioḅẹlẹ tẹ.

⁴À ḍiri mẹ kẹẹ ọ́ fịrịma sakị ì ḅioḅẹngbọ kpọma ị̀ na dein-a, owu pịkị iḅiọkụ ị̀ tọrụ saram; àrị ó kururuma ḅẹm gotẹ kẹẹ-a, kụma kẹ mịẹtẹ ọmịnị àrị ọmịnị-mgba ḅẹlẹma la ḅara nimi.

⁵Mịọkụ gbọrụḅọ mịẹtẹ jụmọ kururum ḅẹḅẹ, mḅọ kẹ ị̀ mịẹ-a, ọmịnị-mgba mie mḅọ kẹ mịẹ ye — ḅarị ọmịnị-mgba fama-a sọ. (À gotẹ miemẹ ḍukoarị, à ḅii-a à gbala-gbala ọkụrụkụrụ ofori ḅara kẹ anị tomḅọ ḅe na mịẹ).

⁶Ọmịna ḅụ ḅẹ opu anga kẹ ḅieḅe pịrị tẹ fomu-ḅara sọ boo tẹẹ.

⁷Mịọkụ ye sime-ḅara sime-ḅara sọ, ọ́ wẹrịso ọ̀ pịrị tẹ ó ḅiokpọmaa, ọkọ-a kụma ò ḅofa kururu saḅa ḅọrọ, tẹ gbọrsịḅị Kịrayịsị etela mẹ ḅụ sọ.

⁸Ọkọẹrẹsị, sisi yee mḅọ nimi mịnẹ karakara ḅara ḅụ ọmịnị mḅọ ḅẹlẹmarị.

⁹À gotẹ anị ḍiri mẹ kẹẹ ọ́ fịrịma ye, à ḍọkị nimi ḅẹ ḅiim ọ́ wẹrịtẹ daaḍiki mẹ ḅụ sịẹ-kụrọ ḅara, na ọ́ pịkị kẹ sakị mamgba tẹlẹma tẹ à kẹ ó toluma aị ma mịẹarị ḅara na.

¹⁰Ọ́ gbọrụḅọ mịẹ-irima wẹrịso mḅọ pịrị-pịrị, yẹrị sọ wẹrịso mḅọ pịrị tẹ. Kẹ gotẹ ọkọ ḍukoarị, à mịẹ-irima wẹrịso pịrị na-iḅi ḅọ emi tẹ arị ọkọ mịẹ-mịẹ, ọmịna sịḅị gotẹ à mịẹarị, Kịrayịsị tọrọkọ ḅụ.

¹¹Anie ofori Ekwesu ḅofa anị ḅụ ḅọrọ tẹ wa nẹngịma, gbala ọ̀ tọn tẹ mịẹ ḅẹ aị ma ḅụ wa nimi-a ye ofori.

¹²À Torohasị jụ Kịrayịsị gboloma Iḅi-Oku mẹ ḍuko ḅẹ mu sakị, àrị ẹrịm KỊNỊNYANAḄỌ ḅe tarị à kẹ kọrịnama mẹ kọrị ḅẹ ḅọkọ finji tẹ anịanga.

¹³Kụma arị inetẹ wamịna iyimbere Tayịtọsị ẹrị-a ye mẹ kpọma ì ḅio-sẹsẹma lamam. Anie ḅụ à ḅaaḅaa kẹ anị ama ḅẹ apụ ma ḅẹẹ tẹ ḅọrọ-so Masidoniya mum.

¹⁴Kụma wa ịmịẹtẹ kẹ Tamụnọ ḅẹẹm! Kẹ gotẹ ọkọ ḍukoarị, wa Kịrayịsị ḅụ emi ḅara ḅụ, sakị mamgba Tamụnọ tọrọkọ tarị tẹ wa ọgbụrụ-sụn tẹ, Kịrayịsị ikoliapụ ḅara kẹ ori owu-ḅara-iḅi ogbo mẹ ḅụ mẹnjịarị. Tamụnọ wa kẹ mịẹtẹ kịnị anga, anga ḅụ Kịrayịsị gboloma ye nimi mẹ wasamarị, gbala iḅi kụnụye kụnụ wasama ḅara.

¹⁵Gbala wa kịkarị ye anie kụnụaị agba tẹ Kịrayịsị dọkịma Tamụnọ pịrị tẹ kụnụ wasama mu ḅọrọmarị apụ na faarị apụ na ogboku laarị ye sime-ḅara.

¹⁶Faarị apụ ma ḅụụ anị fụrụ ḅo kịnị-ḅaaḅa ye sọ wararị; kụma ḅọrọmarị apụ ma ḅụụ anị ḍumo pịrịarị kụnụye sọ wararị. Tụḅọ nwẹnị inetẹ ọkọ sime kọrịnama mẹ kọrị ḅẹ?

¹⁷Wa tọnwa, tọnwa ja apụ ḍikima tẹ Tamụnọ ẹkwẹn mẹ kẹ yela-a dẹrịye sọma-a, kụma Tamụnọ wa fịrịmam ẹrẹsị wa Kịrayịsị fịrịmẹnjịapụ ḅara kẹ ọ̀ tọrọkọ tẹmẹ la ḅara kẹ ẹkwẹn mẹ kọn-arị.