Read kalabari 2 Kọrịntị 8 Bible Online

2 Kọrịntị 8 - kalabari bible

2 Kọrịntị 8

¹Wamịna mịnapụ, wa ḅiiarị ọ́ Tamụnọ ḍiki-ḅụụjịrị mẹ Masidoniya ḅẹ asọsị ma ḅụ kọrị tẹ kọrịnama nimi.

²Tọnwa ḅụụ-fụka kpọma ịn daaḍiki tẹ, ini arị ḅio tolu-ḅọrọ tẹ; kụma ịn kpọma iḅiọkụ ḅioḅẹlẹ ḅụ waa tẹ ḅara kẹ ḅara sarasara ḅara kẹ ḍiepịrịye pịrịarị, karakaraye ini igoin lama wararị sọ.

³Àrị inetẹ ḍuko ọ́ pịrị ḅa mịnẹ ini ini inetẹ ḅara, inetẹ ḅara nwẹn pịrị tẹ pịkị ọkọ nẹngịmam. Ini mie ḅarana tọn ịna ḅụụ pịrị ye,

⁴in wa tẹkẹ lamam mịnẹ wa paa mịẹtẹ ini sọ, kẹ ḅarasụa Judiya ḅụ simearị Tamụnọ atomi ma pịrị ḅẹ ye mẹ ḅụ, ịna ẹrẹ sọ gotẹ.

⁵Ịn mịẹ ye wa kẹ ḅiotọn ye nẹngịm! Tarị ye, ini ịna ḅụụ saakị KỊNỊNYANAḄỌ ḅe pịrịm; anịtẹso, Tamụnọ ḅii ḅara ḅụ, ịn pịkị ịna ḅụụ kẹ wamịnị sọ pịrịm.

⁶Mie ḅụ, wa ḍuko kụrọma Tayịtọsị, mị ḅẹlẹma karakara kọrịnama mẹ saakị ḅọ ḅe pịrịm, mịnẹ ọ̀ ḅara sin ma tẹ ḅarasụa ọ́ pịrị tẹ ọ́ kọrị fama.

⁷Ọ́ nyana aị mamgba ḍiki sakị, ọ́ kọn lama wararị: minini emi; ẹkwẹn-ḅịḅị emi; ye ḍawọ ḍin emi; tẹrẹmẹ ḅio-sẹsẹ tẹ ọ́ nyana wa pịrị ḅẹlẹma ḅụ ḅarasụa wa pịrị sọ pịkị emi. Mie ḅụ, wa ḅiiarị mịnẹ mị ḅẹlẹma fịrị mẹ ḅụ sọ, ọmịnị ọkọ kẹ ḅara sarasara.

⁸Àrị oloko sụa ọ́ pịrị-a-o. Kụma ja apụ ḅio-sẹsẹ tẹ ḅarasụa ḅẹ ḍọkịarị ḅara kẹ ó ḍie ḅụ, à ḍọkị nimi ḅẹ-ḅiiarị ọmịna ḅẹlẹma kụrọ la ḅara.

⁹Wa Nyanaḅọ Jizọsị Kịrayịsị ḅe ḍiki-ḅụụjịrị mẹ sime ḅara ó nimi wararị: ọ́ kọn la ḅara mamgba ḅụ, ori ó gotẹ igoin ḅara kẹ ḅụụ wẹrịm, paa kẹ mịẹtẹ ori igoin mẹ ọ́ kọnma ḅẹ ẹrẹsị.

¹⁰Ị̀ ḅụụ kụma ọ́ gbọrsịḅị osi kụra ọ́ saakị kọrịnama mẹ kọrị fama iḅitẹịnm. Ọmịnị anie tarị apụ tẹ, saakị kọrị apụ ngẹrị-a, kụma ọ́ kọrị ḅẹ ḅiiarị nwẹn ḅẹẹ ye ḍuko apụ.

¹¹Ọkọ ẹrẹsị, ọ́ kọrị tẹ gbọrsịḅị kọrịnama mẹ kọrị famaa! Ó ḅio-sẹsẹ ḅụ saakị ḅara, ọ́ pịkị ọkọ kẹ kọrị mu anị ḅẹ kunoma la, tẹ ọmịna ḅara simearị ye mẹ kẹ anị mịẹ.

¹²Ọ́ pịrị ḅẹ tẹ ḅio-sẹsẹarị ḅẹḅẹ, Tamụnọ pịkị ọ́ nyana tẹ pịrị ḅẹ-ḅiiarị ye mẹ daa-ọkị ḅa, ọ́ nyana-a ye ḅụ-a.

¹³Wa ḅii-a mịnẹ ye ó ponoma tẹ ja apụ na feke-feke, kụma kịnị mamgba gbasịị.

¹⁴Mịọkụ ọmịnị ọ́ nyana sara wararị aị ma ḅụ ịna ḅụụ-fụka mịẹ ịn pịrị ḅa, mịẹtẹ ḅọ ini nyana sakị la tẹ ḅẹḅẹ ini sọ ọmịna ḅụụ-fụka mịẹ ḅa. Mị ḅọkọ ḅụ, anị ḅo maa apụ ma kẹ gbọrụ ḅara mịẹ ḅara sime tẹẹ.

¹⁵Fịafịa Ḍiri mẹ ḅẹẹarị ḅara ḅụ, “Tọnwa aị kobiri ḅọ, ḅaka ḅara nyana-a, tẹ boowa aị kobiri ḅọ, ịrụ ḅaka ḅara nyana-a.”

¹⁶Tamụnọ mịẹ lamam, ḅarasụa ọ́ pịrị ḅụ wamịna ḅio-sẹsẹarị ḅara anie Tayịtọsị sọ ḅio-sẹsẹarị ḅara!

¹⁷Ọ̀ wa ḅiiarị ò ḅo ọ́ la nwẹn ḅẹẹ ye mẹ minini ọkị ye mẹ ngẹrị-a; ori ḅarana ḅo ḅarasụa ọ́ pịrị ḅẹ ḅara gotẹ tọn-pẹlẹ tẹ mịnẹ ò ḅo ó la ḅa, tẹ anị ḅẹ ḅio-sẹsẹ nyanarị.

¹⁸Wa kẹ ori na sụa fịrịmarị mịnaḅọ ḅe, anie sọsị mamgba kẹ ye-sịn lama wararị ḅọ, ọ̀ kọrịarị iḅi-oku mẹ ḍuko kọrịnama mẹ gotẹ.

¹⁹Anie sikima, sọsị ḅẹ apụ mamgba ọ̀ sẹlẹ pakama-ḅo tẹ ọ̀ tọn tẹ mịnẹ ọ̀ wamịna ḅụụ sọ tẹ mị ḅẹlẹma kọrịnama mẹ kọrịị, KỊNỊNYANAḄỌ ḅe ebube mẹ gotẹ, tẹ pịkị wa tẹmẹ-la ḅara kẹ ḅarasụa ḅẹ-ḅiiarị mẹ ḍie-pakamaa.

²⁰Wa ẹbịarị wa mịẹtẹ tomi wa kẹ mie kiki nyana-a ḅara kẹ tan sara wararị ḍiepịrịye mẹ mịẹ ḅara gotẹ ḍuko-sụa ma ḅọrọ ḅịa ḅara.

²¹Wamịna ḅioḅẹngbọ simearị ye anie, KỊNỊNYANAḄỌ ḅe tọrọkọ karakara mịẹ, kịngẹ-a, pịkị tomḅọ tọrọkọ sọ.

²²Mie ḅụ wa pịkị wamịna iyimbere kẹ ini na sụa fịrịmarị; wa tọnwa sakị kẹ ọ̀ daaḍiki tẹ ẹrị tẹ mịnẹ, sakị mamgba ọ̀ kpọma ḅio-sẹsẹ tẹ ḅarasụa ḅẹ ḍọkịarị. Tẹ mịọkụ ori ọmịna ḅụụ ḅiokpọ nyana lama tẹ mẹ, ḅarasụa mẹ pịkị ò ḅio-sẹsẹma ḅaka tẹ.

²³Tayịtọsị kụma, ori anie ị̀ na sọ tẹ kọrịnama kọrịarịḅọ, ḅarasụa ọ́ pịrị ḅụ; osi amịnapụ ma anie sọsị ma tọrụ ḍima tẹ ori na muarị apụ, ebube ọkị-ḅo Kịrayịsị pịrị ḅẹ ḅara.

²⁴Ọ́ ḅẹlẹma ḅara kẹ ịn daa-ọkị, mịẹtẹ sọsị mamgba nimi ḅarị ḅara mịnẹ wa kẹ ọ́ kẹ ḅụụ-bomarị ye mẹ karakara ye.