Read kalabari Galesiya 4 Bible Online

Galesiya 4 - kalabari bible

Galesiya 4

¹Kụma mịọkụ, ọ́ pịkị mị-ḅara kẹ anị ḍikii — ḍaḅọ fịtẹ ori ngọ fị ḅẹ tụḅọ ḅe mḅọ kala-sakị ḅụ mḅọ omoniḅọ na kịkam, karakaraye, ye goyegoye sime mḅọ pịrịm ḅẹ sọ.

²Mḅọ kala-sakị ja atomi mie mḅọ ḍikiḍiki tẹ pịkị ngọ ma wẹrị kpaịnmarị, nwenii mu ḍaḅọ ḅe ḅẹẹ sakị la.

³Mị gbọrụ ḅara ḅụ, wamịnị sọ omoni-sọ so na kiri na ḅụ ḅẹrẹtọn sime atẹmẹ ma pịrị ḅara, amụ wa tẹmẹ gboloma aị ḅụ ḍụḅa paka-ḅo-a sakị mẹ ḅụ.

⁴Kụma kunoma ḅụ karakara sakị mẹ ḅo la tẹso, Tamụnọ ọ̀ Tụḅọ kẹ fịrịmam. Tomikiri ḅẹ iyingiḅọ iyi tụḅọ ḅara mie ọ̀ kẹ ḅo tẹ Juu-ḅẹ-apụ Oloko mẹ suku-ḅio anga ye,

⁵ori Oloko mẹ suku-ḅio sime-sime apụ ma pakịrị-ḅo ḅẹ ḅara, mịẹtẹ wa ḅo Tamụnọ awọmẹ sọ ḅẹm.

⁶Kẹ ọmịnị ori awọmẹ mẹ ḍie-pakama ḅụ, Tamụnọ ọ̀ Tụḅọ ḅe Tẹmẹ ḅe kẹ wamịna aḅioḅẹngbọ suu tẹ, tẹ Tẹmẹ ḅe oloku pakamarị, “Ḍa, ị̀ Ḍa,”

⁷Miemẹ ẹrẹsị, ḅarị omoniḅọ-a, kụma furo-tụḅọ. Tẹ ọ̀ tụḅọ nwẹn ḅẹẹ sakị goyegoye, Tamụnọ ọ̀ nyana ori awọmẹ pịrị aị mamgba kẹ ị́ pịrị ḅa.

⁸Ḅọrọtẹ sakị, amụ ọ́ Tamụnọ nimi-a sakị, ọmịnị omoni sọ Tamụnọ-a aị pịrị simem.

⁹Kụma mịọkụ ó ḅo Tamụnọ nimi tẹ ḅẹẹ sakị, anịanịa yee à ḅẹẹ, mịọkụ Tamụnọ ó nimi tẹ ḅẹẹ sakị, ó tiegotẹ pịkịma ịnyọ sọ nyana-a, sịḅị-jịrịma ḅara simearị tẹ ḅẹrẹtọn-arị nwẹn ḅẹẹ atẹmẹ ma dama-muarị? Ó tiegotẹ mu sin omoni-sọ ịn pịrị ḅẹ-ḅiiarị?

¹⁰Ọ́ tẹmẹ-la ḅara kẹ ja ene na, akalụ na, sakị na, kụra na kẹ ye-sịn lama tẹ arịḅẹ amịẹ-mịẹaị mịẹarị.

¹¹Ó gotẹ ì ḅio dein-a. Anị inetẹ mịẹ ḅẹ, mịnẹ arị ó gotẹ kọrị kọrịnama mamgba ḅo papaa fa ye sọ tẹ?

¹²Ị̀ amịnapụ, sisi arị ọ́ tẹkẹm, ọmịnị ị̀ kịka-a. Jen-a jen-a sọ, yẹrị na ọmịnị na paa gberie mẹ. Ọ́ kẹ ị̀ mịẹ tẹ si ofori.

¹³Ọ́ kẹ ḅiokoromaa, à tarị ḅo iḅi-oku mẹ ḍuko ọ́ pịrị sakị, mịẹtẹ à ḅo ye; arị obim ẹrẹsị.

¹⁴Kụma karakaraye ị̀ ḅụụ kụrọ-a opu daaḍiki sọ ọ́ pịrịm sọ, ọmịnị ì ḍiki-sima-a, anịanịa ị̀ sịkị. Anie nakara, So-ḅio koro ḅo enjẹlị daa-ọkị ḅara mie ọ́ kẹ ị̀ daa-ọkị ye; ọ́ kẹ ị̀ daa-ọkị ḅara gbala ọ́ Kịrayịsị Jizọsị daa-ọkịm ọkụ.

¹⁵Ó ḅioḅẹlẹ lamam anị ene! Mịọkụ tiye paka tẹ? Yẹrị ḅarana inetẹ ḍuko ḅa mịnẹ anị ene à kẹ ye ẹrị ḅara, inetẹ mịẹ ḅẹ ye kụma ọmịna atọrụngbọ sọ ó pọkọ pakama-ḅo ị̀ pịrị ḅa.

¹⁶Mịọkụ à ḅo ọmịnị na fịya-a ḅọ sọ tẹ, à karakara mẹ ḍuko ọ́ pịrị ye gotẹ?

¹⁷Osi atomi ma tẹ ọmịnị ịna ḅụụ yela lama wararị nwẹn ḅẹẹ ḅara kẹ ó ḍiearị apụ ma, ini iḅi kẹ ọ́ tọn-a. Ini bebe ḍọkịarị ye anie ị̀ ḅụụ ó puu sikima, tẹ ọmịnị ịn kẹ ye-sịn, ini sọ ọ́ kẹ ye-sịn-arị ḅara.

¹⁸Ọkọ sime tẹmẹ-la ḅara kẹ jụmọ-jụmọ kẹ ye-sịn mẹ iḅim, tomḅọ iḅi kuroma kẹ anị mịẹarị ḅẹ kụma — miemẹ sakị mamgba karakaram, arị ọmịnị na emi sakị ḅụ ngẹrị-a.

¹⁹Ị̀ ḅụụ yela awọmẹ, gbala iyi laarị ẹrẹḅọ pembe ḅara, à pịkị siin iyi akụ ḅụ sọ tẹ, nwenii Kịrayịsị sime-ḅara ọmịna ḅụụ ḅio tọn sakị la ḅa.

²⁰À ḅii lamam, mimgbe mịọkụ arị ọmịnị na emi ḅẹ kụma àrị ẹkwẹn ọ́ pịrị ḅẹ ḅara à nwẹn nimi tẹ. Ó gotẹ kẹlẹ-sọ ì ḅio dein-a!

²¹Ọmịnị Oloko mẹ suku-ḅio sime ḅẹ-ḅiiarị apụ, yee à paa ó gbela: Oloko mẹ ḍukoarị ye ọ́ naa-a?

²²Anị mẹẹ Ebira-amụ maa owiapụ-awọmẹ iyim, gbọrụḅọ omoni-ẹrẹḅọ na ori na, osi-ḅọ furo-tụḅọ na ori na.

²³Omoni-ẹrẹḅọ ma ori na iyi tụḅọ ḅe tomi kẹ awọ iyi-iyi ḅọkọ ḅụ ori iyim, kụma furo-tụḅọ ma na ori na iyi tụḅọ ḅe Tamụnọ minini ọ̀ pịrị ye ḅụ ọ̀ ḅọrọ tẹ ori iyim.

²⁴Mịna aị ma egberima-aị ḅara mie kịnị kẹ inetẹ arị naa ḅarịye: maa ereme ma sịẹ maa ọḅọkụ pịrị wararị. Omoni kiri ḅụ amịna awọmẹ iyi ḅọ ma anie Ega, anịsakị árị sịẹ Sayịnayị Tụndụ ọgọnọ fị ọḅọkụ mẹ pịrịm.

²⁵Ega, tẹ sịẹ Sayịnayị, Arebịya ḅẹ Tụndụ mẹ pịrị ḅọ ma, anie ịn kẹ mịọkụ simearị Jeruselemu mẹ tọnma ḅọ, mịọkụ anị na anị ḅẹ atomi mamgba na omoni ḅara-ḅio emi.

²⁶Kụma So-ḅio ḅẹ Jeruselemu mẹ, anie amịna furo-tụḅọ, anie wamịna iyingiḅọ ma.

²⁷Kẹ gotẹ ọkọ ḍukoarị, Fịafịa Ḍiri mẹ ḅẹẹarị: “Ị́yẹrị tụḅọ iyi-a ẹrẹḅọ, ḅioḅẹlẹẹ! Ị́yẹrị jene-jene amụ tụḅọ iyi akụ da-a ḅọ, oloku tẹ ḍerekuu! Gbala owiḅọ sịkịtẹ ẹrẹḅọ ma awọ ọlọ diḅọ amụ sịkị-a ẹrẹḅọ ma nẹngị ḅa.”

²⁸Mịọkụ, ọmịnị ị̀ amịnapụ ma ọmịnị Tamụnọ awọmẹ, ò minini ye ḅụ, anie Ayịzịkị sime-ḅara mẹ.

²⁹Anị eneḅaka tomi awọ iyi-iyi ḅara kẹ iyi tụḅọ ḅe, Tamụnọ Tẹmẹ ḅụ iyi ḅọ ḅe ḅaa ḅẹ ḍọkịm; mịọkụ sọ anie anị sime-ḅara.

³⁰Kụma Fịafịa Ḍiri mẹ tiye ḍukoarị? Anị mẹẹ, “Omoni-ẹrẹḅọ ma na á tụḅọ ḅe na dee-siin; kẹ gotẹ ọkọ ḍukoarị, omoni-ẹrẹḅọ ma tụḅọ ḅe furo-tụḅọ ma tụḅọ na sọ tẹ ḍaḅọ ngọ ma ḍie ḅịa.”

³¹Miemẹ ẹrẹsị, ị̀ amịnapụ, wamịnị omoni-ẹrẹḅọ awọmẹ-a, kụma furo-tụḅọ awọmẹ.