Read kalabari Galesiya 6 Bible Online

Galesiya 6 - kalabari bible

Galesiya 6

¹Ị̀ amịnapụ, ọmịna ḅụ gbọrụḅọ kura-aye mịẹarị tẹ ini mḅọ kun kun, ọmịnị ma tẹ amụ ọkọ sime si mịẹ-a tẹ tẹmẹ ḅụ simearị apụ ma mḅọ datụkụmaa; kụma sịḅị ama sịn-a ḅara mie ọ́ kẹ anị mịẹ ḅarịye. Tẹ ọ́ pịkị tọrụ kẹ ọmịna aḅụụ wẹrịị, mịẹtẹ ọmịnị sọ ọkọ sime daaḍiki ḅio sọ ḅịa ḅara.

²Ọ́ ḅarasụa tẹ jụmọ-jụmọ ikuye dogii, tẹ mị ḅọkọ ḅụ mie ọ́ ḅọrọ tẹ Kịrayịsị oloko mẹ koko ḅarịye.

³Gbọrụḅọ nwẹnị mḅọ ye ḅụ ofori tẹ amịna ḅụụ kẹ ye-sịn-arị ḅẹḅẹ, mḅọ papaa oḅori kẹ amịna ḅụụ sịn-arị.

⁴Ọrụḅọ-ọrụḅọ ḅarana amịna ye-mịẹ-ḅara pekele-ḍikii. Anị iḅi wararị ḅẹḅẹ, mḅọ amịna ḅụụ ḍiki-ḅioḅẹlẹ ḅa, mḅọ mịẹye mẹ gotẹ, amịna nye kẹ jụmọ mịẹye na tọnma-a ḅara ḅụ.

⁵Kẹ gotẹ ọkọ ḍukoarị, ọrụḅọ-ọrụḅọ sime mḅọ pịrị dogiye dogi ḅa.

⁶Kịrayịsị oku mẹ ḍawọarịḅọ mẹ, amịna nyana iḅi aị mamgba kẹ ye kẹ mḅọ tolumarị ḅọ ḅe na ḍiemaa.

⁷Ọmịnị oḅori kẹ ọmịna aḅụụ sịn ma; gbọrụḅọ sọ Tamụnọ kombo kombo-a. Tomḅọ ḍiḅi gbọrụ ye mẹ mie mḅọ soku ḅarịye.

⁸Tomḅọ nwẹnị tomḅọ si sime-ḅara mẹ ḅẹ ḍụọ mẹ ḅio ye ḍiḅi-ḍiḅi, fịye soku sakị mẹ ḅụ mḅọ soku ọkị ḅarịye fịị; tomḅọ nwẹnị Fịafịa Tẹmẹ ḅe ḍụọ mẹ ḅio ye ḍiḅi, ḍiḅi, fịye soku sakị mẹ ḅụ Fịafịa Tẹmẹ ḅe ḅụ mḅọ sime gbamaso ḍumo soku ḅa.

⁹Mie ḅụ, ó yee wa ịnyọ pọkọ-ta-a ḅara kẹ iḅi mịẹ; kẹ gotẹ ọkọ ḍukoarị, wa ḅara-siin-a kụma, sakị ḅo tẹ wa anị ḅẹ ye soku ḅa.

¹⁰Anie ḅụ otolo foo sakị, foo sakị wa iḅi kẹ ḅẹḅọ-ḅẹḅọ mịẹ, jen-a jen-a wamịnị na gbọrụ minini etela mẹnjịarị apụ ma.

¹¹Ọmịnị à ḅarana kẹẹarị aị ma badara la ḅara ḍikii!

¹²Ó ponoma tẹ ọ́ tarị-ḅụụ sin-a, sin-a ịgbanịarị apụ ma, anie kịnị tọrụngbọ kẹ ẹrịarị ye kẹ amịna aḅụụ bomarị apụ. Anị sime-ḅara, sime-ḅara sọ, kịnị ḅarị Kịrayịsị ẹngbẹsẹ-sịn mẹ gotẹ ḅaa-ḅọkọ kẹ ịn ḍọkị ḅịa ḅara mie in gotẹ mịẹarị.

¹³Ini tarị-ḅụụ sin mẹ mịẹarị apụ ma sọ Oloko mẹ koko-a sakị; in ḅiiarị ọ́ tarị-ḅụụ sin, mịẹtẹ ini ó minini tẹ anị mịẹtẹ ye mẹ kẹ ḅụụ-boma ḅẹ ḅara.

¹⁴Anị sime-ḅara, sime-ḅara sọ yẹrị kịngẹ kụma, wa Nyanaḅọ Jizọsị Kịrayịsị ẹngbẹsẹ-sịn mẹ kịngẹ ḅụ à ḅụụ boma ḅa; kẹ gotẹ ọkọ ḍukoarị, ori ẹngbẹsẹ-sịn mẹ ḅụ tomikiri mẹ ḅọrọ tẹ ị̀ ḅụ fịtẹ, tẹ yẹrị sọ fịị tomikiri mẹ pịrị tẹ.

¹⁵Tomḅọ tarị-ḅụụ sin tẹ-o, mḅọ sin-a-o, gbọrụ ḅẹrẹ sọ nyana-a; mḅọ ịwọma tẹmẹ tẹ ḅọ sọ tẹ ḅẹ ye mẹ anie ye-mẹmgba.

¹⁶Ịna aḍumo ḅụ mị ọrụ mẹ ḍukamẹnjịarị apụ ma, yee dein na, ọkụrụkụrụ na, ini na sime — ini na, pịkị Tamụnọ atomi mamgba na simee!

¹⁷Gbaịn ḅụ: yee gbọrụḅọ-sọ ḅarị jen ḅụụ-fụka kẹ ị̀ pịrị ma; kẹ gotẹ ọkọ ḍukoarị, ì oju mẹ ḅẹ ịnọ akiri ma ḍie-pakamarị mịnẹ yẹrị Jizọsị omoniḅọ.

¹⁸Ị̀ amịnapụ, wa Nyanaḅọ Jizọsị Kịrayịsị ḍiki-ḅụụjịrị mẹ ọmịnị-mgba na simee. Amẹnị.