Read kalabari Ẹfisọsị 1 Bible Online

Ẹfisọsị 1 - kalabari bible

Ẹfisọsị 1

¹Pọlụ, Tamụnọ minini ḅara ḅụ, ḅo Kịrayịsị Jizọsị fịrịmẹnjịḅọ sọ ḅọ ḅe: Mị ḍiri mẹ kẹẹ tẹ kẹ Ẹfisọsị ḅụ Tamụnọ atomi ma, tẹ minini nyana ḍumo ḅụ Kịrayịsị Jizọsị na gbọrụ ḅụụ simearị apụ ma fịrịmarị.

²Yee Tamụnọ, wamịna Ḍaḅọ ḅe, na KỊNỊNYANAḄỌ Jizọsị Kịrayịsị ḅe na, ḍiki-ḅụụjịrị na dein na kẹ ọ́ pịrị.

³Ó yee wa ịmịẹtẹ kẹ Tamụnọ, pịkị wa Nyanaḅọ Jizọsị Kịrayịsị Ḍa ḅẹ, ḅẹẹ. Kẹ gotẹ ọkọ ḍukoarị, wa Kịrayịsị na gbọrụ ḅụ simearị mẹ gotẹ ọ̀ wa boma tẹ, So-ḅio ḅẹ tẹmẹ ḅụ ḅẹ boma goyegoye kẹ wa pịrị ḅụ.

⁴Tomikiri mẹ amụ tẹmẹ-a kụra-ḅio Tamụnọ wa sẹlẹ-ọkịm, mịnẹ wa ḅo Kịrayịsị na gbọrụ ḅụ sime ḅụ ḅọrọ tẹ ori atomi sọ, mịẹtẹ wa fịafịa tẹ ḅịḅị ḅụụ la-a ḅara sime ḅẹ ḅara, ọ̀ tọrọkọ ḅụ. Ọ̀ ḅẹlẹma ḅụ,

⁵Tamụnọ tọn-pẹlẹ wẹrị wararị kụra-ḅio iḅerea mịnẹ ó Jizọsị Kịrayịsị ḅụ ḅọrọ tẹ wa kẹ ori awọmẹ mịẹ ḅa — miemẹ ọ̀ ḅụụ-ḅẹlẹ tẹ ọ̀ pịkị tọn wẹrị ye.

⁶Ọkọẹrẹsị, ó yee wa Tamụnọ ebube ḍiki-ḅụụjịrị mẹ gotẹ ò tokini, anie ọ̀ ḅẹlẹma Tụḅọ ḅe ḅụ ọ̀ kẹ papaa ḍie wa pịrị ye mẹ!

⁷Kẹ gotẹ ọkọ ḍukoarị, Kịrayịsị fịị mie ọ̀ kẹ si omoni ḅara-ḅio wa pakama-ḅo tẹ si mẹ wẹrịso wa pịrị yee. Tamụnọ ḍiki-ḅụụjịrị mẹ ḍụḅa la ḅara ḍikii,

⁸ḍuko na-iḅi-a ḅara mie ọ̀ kẹ anị ọsụma sara wa pịrị ye! Ò nimi mẹmgba na pokoloma ye ḅio ḍiki na ḅụ

⁹Tamụnọ nwẹnị ò ḅioḅẹngbọ sime tẹ ọ̀ mịẹ ḅẹ ye mẹ mịẹ, tẹ nwẹnị ọ̀ mịẹ ḅẹ tẹ tọn wẹrị tẹ ḅọị sime ye mẹ, tẹ ọ̀ Kịrayịsị ḅụ ḅọrọ tẹ kọrị busunuma ḅẹ ye mẹ kẹ wa ḍie.

¹⁰Sakị mẹ ḅo la sakị, miemẹ tẹ Tamụnọ tọn wẹrị ye mẹ, ori anị mịẹ busunuma ḅa, aniemẹ anie, tẹmẹ ye-mẹmgba kẹ ḅo gberie mịẹ, So-ḅio sime ye-o, tomikiri ọgọnọ sime ye-o, tẹ Kịrayịsị nwẹnị sịḅị daa.

¹¹Ye mamgba Tamụnọ tọn-pẹlẹ ḅara mie arị mịẹarị, tẹ ori Tamụnọ ḅe nwẹnị wa sẹlẹ-ọkị, mịnẹ wa ori atomi sọọ, Kịrayịsị na gbọrụ ḅụ sime ḅụ, anie ọ̀ tọn wẹrị ḅara mẹ ẹrẹsị, sukuyọ-saakị ḅụ tọn-pẹlẹ ye mẹ ḅụ.

¹²Ọkọẹrẹsị, ó yee wamịnị, tarị Kịrayịsị kẹ ḅiokpọma apụ ma, Tamụnọ ebube mẹ tokini!

¹³Tẹ ọmịnị sọ kọkọ ḅo Tamụnọ atomi sọ, ọ́ karakara oku mẹ, anie ḅọrọma ọkị-ḅo ọ́ pịrị Iḅi-Oku mẹ naa sakị. Ọ́ Kịrayịsị mininim, tẹ Tamụnọ nwẹnị ori ọ́ nyana ye mẹ ḅẹ elekima kẹ ọmịna aḅụụ sụa, ò minini ori atomi pịrị Fịafịa Tẹmẹ ḅe kẹ ọ́ pịrị ḅụ.

¹⁴Tẹmẹ ḅe anie sịẹ wa pịrị ḅọ, mịnẹ Tamụnọ minini ori atomi pịrị ye mẹ wamịna ḅara la ḅa, anịsakị mie mẹ mịẹtẹ wa nimiarị mịnẹ Tamụnọ mịẹ tẹ wamịnị sime ọ̀ pịrị apụ ma busunu tẹ ḅara kẹ amịna asịḅị atomi sọ ḅa. Ó yee wa ori ebube mẹ tokini!

¹⁵Miemẹ ẹrẹsị, à KỊNỊNYANAḄỌ Jizọsị ḅụ ọ́ nyana minini na, ọ́ nyana Tamụnọ atomi mamgba pịrị ḅẹlẹma na, gboloma ye na naa kụra-ḅio,

¹⁶àrị ó gotẹ ịmịẹtẹ kẹ Tamụnọ ḅẹẹarị sakị mamgba. Arị ọ́ kẹ ḅiokoromarị ị̀ tẹkẹ sakị mamgba ḅụ,

¹⁷tẹ wa Nyanaḅọ Jizọsị Kịrayịsị Ḍa, ebube Ḍaḅọ ḅẹ, ḅara ḅiiarị mịnẹ ọ̀ Tẹmẹ ḅe kẹ ọ́ pịrịị, ori ọ́ mịẹtẹ ó ye nimi, tẹ pịkị Tamụnọ mịẹfinji ọ́ pịrị, mịẹtẹ ọmịnị ò nimi ḅarị ḅara.

¹⁸À tẹkẹarị mịnẹ Tamụnọ ọmịna akuroma ma finji tẹ ọmịnị ò bele ẹrị, mịẹtẹ ọmịnị ò gotẹ ọ́ sịn ḅụụ pịrị wararị ḅiokpọma ye mẹ nimi, anie ò minini ori atomi pịrị aboma ngọ ma ḅụụ-buama la ḅara,

¹⁹pịkị wamịnị minini apụ ma ḅụ ọ̀ kọrịarị opu kọrịnama ḍụḅa la ḅara na nimi. Wamịna ḅụụ ḅio kọrịnama kọrịarị kụrọ mẹ anie anị gbọrụ opu ịnyọ mẹ,

²⁰tẹ ọ̀ kẹ Kịrayịsị saakịma ye mẹ fịị ḅụ, tẹ ọ̀ kẹ So-ḅio ḅụ ori ama aḅara anga lẹgịma ye mẹ.

²¹Kịrayịsị anịanga sime tẹ ḅẹrẹtọn So-ḅio ḅẹ ḅẹrẹtọn-apụ na, kụrọ-ḅara ḅụ emi apụ na, kụrọ apụ na, kịnịnyanapụ mamgba na pịrịarị: ori ẹrẹ mị tomikiri mẹ na jen tomikiri na ḅẹrẹtọn kụrọ-ḅara ḅụ sime ḅarị apụ mamgba fị ẹrẹ ma nẹngịm.

²²Tamụnọ ye mamgba kẹ Kịrayịsị aḅụọ suku kuroma tẹ ọ̀ kẹ ye mamgba sịḅịda KỊNỊNYANAḄỌ sọma sọsị mẹ pịrị tẹ.

²³Sọsị mẹ anie Kịrayịsị oju, tẹ anị nwẹnị anga mamgba ḅụ ye goyegoye busunumarị ḅọ ḅe busunuma ye sọ tẹ.