Read kalabari Ẹfisọsị 6 Bible Online

Ẹfisọsị 6 - kalabari bible

Ẹfisọsị 6

¹Awọmẹ, Kịrayịsị ḍukamẹnjịapụ ḅara ḅụ ọ́ mịẹ na-iḅi ye, ọmịnị ọmịna ḍapụ-na-iyingiapụ-na ḅịḅị pokii, kẹ gotẹ ọkọ ḍukoarị, miemẹ anie kuraye tẹ ọ́ mịẹ ḅẹ ye.

²Tarị oloko tẹ in ye minini anị ḅụ sụa ye anie mie, “Ị́ ḍa na í iyingi na kụn,

³mịẹtẹ ye mamgba ị́ na iḅi, tẹ ị́ pịkị tomikiri ḅụ nangwọ ḍumo kọn ḅarị ḅara.”

⁴Ḍapụ-na-iyingiapụ-na, ọmịnị ọmịna awọmẹ ma ịganịma ḅẹ ḅara kẹ ini na anga ma. Anie nakara, ọ́ Kịrayịsị ḍukamẹnjịapụ ḍumo ḅara na tolumaye na ḅụ in ḍikiḍiki pakama-ḅoo.

⁵Ọmịnị omoniapụ, ọmịnị in ḍiki-ḅalafa ḅara na ḅụụ-tukutuku na kẹ tomina sime-ḅara ḅụ ọmịna sịḅịdapụ ma ḅịḅị pokii; epele ofori ḅioḅẹngbọ ḅụ, ọ́ fịrịmẹnjị Kịrayịsị pịrịarị pembema ḅara.

⁶Ini emi tẹ tọrụ kẹ ọmịna ọgọnọ gbana wararị sakị kịngẹ ḅụ ọ́ mị-ḅara mẹ mịẹ ma, anie ini ó boma ḅẹ ẹrẹsị; kụma ọmịna ḅioḅẹngbọ mẹmgba kẹ Tamụnọ ḅii ye mịẹarị apụ ḅara, Kịrayịsị omoniapụ ḅara ḅụ.

⁷Ọmịna omoni kiri mẹ ḅụ ó ḅioḅẹlẹ ḅara kẹ ọmịna kọrịnama kọrịị, gbala ọ́ KỊNỊNYANAḄỌ ḅe fịrị mẹnjịarị ye ọkụ, mẹnjị tomikiri ḅẹ atomi pịrịarị kịngẹ-a.

⁸Ọ́ kẹ ḅiokoroma mịnẹ KỊNỊNYANAḄỌ ḅe ọrụḅọ-ọrụḅọ kọrịarị iḅi kọrịnama ḅẹ gbẹẹ-ye kẹ mḅọ pịrị ḅa, anị ḅọrọ omoniḅọ-o, furo-tụḅọ-o.

⁹Ọmịnị omoni nyana apụ, ọmịnị sọ mị gbọrụ ḅara mẹ kẹ ọmịna omoni ma na anga. Ọmịnị ini ẹrẹma ma-ḅọrọ ma. Ọ́ kẹ ḅiokoromaa, So-ḅio ḅụ ọmịnị na ọmịna omoni ma na gbọrụ Sịḅịdaḅọ nyana wararị, anie gbọrụ ḅara kẹ ḅẹḅọ-ḅẹḅọ kọn-arị ḅọ ḅe.

¹⁰Kunoma ye, ọmịnị ịnyọ sụa ḅinma, KỊNỊNYANAḄỌ ḅe na gbọrụ ḅụ sime na ori opu kụrọ mẹ ḅụ sịrẹrẹ na ḅụ.

¹¹Ọ́ Tamụnọ kẹ ọ́ pịrịarị ọmụgbin aị mamgba ọkị ḅirii, mịẹtẹ ọmịnị inetẹ Ekwesu ḅe tii ḅarị si aka mamgba ḅụ sịẹ-kụrọ ḅẹ ḅara.

¹²Kẹ gotẹ ọkọ ḍukoarị, wa sọarị owu mẹ wa wamịna pembe atomi na sọ-a, kụma So-ḅio ḅẹ si-atẹmẹ kụrọ mie owu mẹ kẹ wamịnị na sọarị, ḅẹrẹtọn-apụ na, kụrọ ḅara ḅụ emi apụ na, mị kanakana sakị mẹ ḅụ sime oru akụrọ ma na.

¹³Ọkọẹrẹsị, mịọkụ ọ́ Tamụnọ ọmụ-aị ma ọkị ḅiri. Anịtẹso, si ene mẹ la sakị, ọmịnị inetẹ kịnị na fịya-a ḅọ ḅe kẹ ọ́ pakarị owu mẹ ḅụ daasịẹ tẹ ori na sọ mu kunoma, tẹ paa ọ́ sịẹ kiri ḅụ jike-a ḅara sime ḅa.

¹⁴Mie ḅụ, ọ́ tẹlẹma tẹ sịẹsimee, karakara kẹ ḅiri pono ye sọma tẹ kẹ ọmịna ḅiri pono ḅụ, karakara mịẹ kẹ ọmịna ekpe gbaịn ye sọma ḅụ,

¹⁵tẹ ọmịna okuro ma nwẹnị karakara sime dein Iḅi Oku mẹ ḍuko wasama aị sọ.

¹⁶Sakị mamgba ó minini kẹ ekpeke sọma tẹ dogi mẹnjịị; kẹ gotẹ ọkọ ḍukoarị, anị mie ọmịnị inetẹ kẹ Ekwesu ḅe kẹ ọ́ tẹịn-arị fịnị-fịnị kụrọ tẹ aḍịẹịn mamgba da-sikima ḅarịye.

¹⁷Ọ́ ḅọrọma ọkị tẹ kẹ ikulele okpoko-sun sọma tẹ kẹ sịḅị suree, tẹ Tamụnọ ẹkwẹn mẹ kẹ Tẹmẹ ḅe kẹ ọ́ pịrịarị okologie sọmaa.

¹⁸Ọ́ tẹkẹ ḅụ mie mẹmgba mịẹ, Tamụnọ ḅara ḅụ ḅarasụa ḅii ḅụ. Paka ye, paka ye sọ, ọ́ tẹkẹẹ, Tẹmẹ ḅe ọ́ kẹ tọrọkọ sụn-arị ḅara ḅụ. Miemẹ ẹrẹsị, ọmịnị ẹbị, ịnyọ pịkị ọ́ ta ma; sakị mamgba ọ́ tẹkẹ Tamụnọ atomi mamgba pịrịị.

¹⁹Yẹrị sọ, ọ́ tẹkẹ ị̀ pịrịị, mịnẹ Tamụnọ à ḍuko ḅẹ ye kẹ ị̀ pịrị, arị ẹkwẹn ḅarị sakị, mịẹtẹ à ḅiokpọ ḅara kẹ ẹkwẹn tẹ iḅi-oku mẹ ḅụ kikima wararị aị ma mịẹ tẹ kịnị nimi.

²⁰Mị iḅi-oku mẹ sịḅị ẹrẹsị àrị amanyanaḅọ ẹrẹ ḅụ jen sịẹ mu ḅọ sọ wararị, karakaraye mịọkụ ikoli-warị ḅio arị emi ḅẹsọ. Ọ́ tẹkẹ ị̀ pịrị mịnẹ à ḅiokpọ tẹ iḅi-oku mẹ ḅẹ ẹkwẹn kọn, à mịẹ na-iḅi ḅara ḅụ.

²¹ Wamịna iḅi mịnaḅọ, Tịkịkọsị, ḅioḅẹngbọ la ḅara kẹ KỊNỊNYANAḄỌ ḅe kọrịnama mẹ kọrịarịḅọ ḅe, ì gboloma aị mamgba ḍuko ọ́ pịrị fama ḅa, mịẹtẹ ó ye ị̀ na simearị ḅara nimi ḅẹ ḅara.

²²Anie à gotẹ ọ̀ kẹ ọ́ fịrịmarị — wa gboloma aị mamgba na ye wamịnị na simearị ḅara na ḍuko ọ́ pịrịị, tẹ pịkị ọmịna ḅiokpọmaa.

²³Yee Tamụnọ Ḍaḅọ ḅe na, KỊNỊNYANAḄỌ Jizọsị Kịrayịsị ḅe na, dein na ḅẹlẹma na ḅụụ ḅụ simearị minini na kẹ Kịrayịsị ḍukamẹnjị amịnapụ mamgba pịrị.

²⁴Yee Tamụnọ ḍiki-ḅụụjịrị, fịị fịị-a ḅẹlẹma wa Nyanaḅọ Jizọsị Kịrayịsị ḅẹlẹmarịapụ mamgba na sime.