Read kalabari Filipayị 2 Bible Online

Filipayị 2 - kalabari bible

Filipayị 2

¹Kịrayịsị ḅụ ọ́ kọn-arị ḍumo mẹ ọ́ mịẹ kụrọmarị, tẹ ọ̀ ḅẹlẹma pịkị ọmịna ḅiokpọmarị. Ọ́ Tẹmẹ ḅe na gbọrụ ḅụ emi, tẹ ọ́ pịkị iḅi-yemịẹ-ḅara na ọkụrụkụrụ na nyana jụmọ-jụmọ pịrịarị.

²Ọkọẹrẹsị, àrị ọ́ tẹkẹm, ọ́ mịẹtẹ à busunu tẹ ḅioḅẹlẹ nyana, ọ́ gbọrụ ḅara sime akuroma nyana na, gbọrụ ḅara kẹ jụmọ-jụmọ ḅẹlẹma na, gbọrụ tẹmẹ na ḅioḅẹngbọ na nyana ḅụ.

³Ó tomikiri ḅẹ opu ḍọkị ḅụụ pịrị gotẹ gberie-sọ mịẹ ma; anịanịa papaa ḅụụ-boma tẹmẹ sọ ọ́ nyana ma, kụma ọ́ ḅụụ iderima jụmọ-jụmọ pịrịị, tẹ sakị mamgba ja apụ ọkị ọmịna aḅụụ nẹngịmaa.

⁴Gbọrụḅọ-sọ amịna iḅi ngẹrị ḍọkị ma, ọ́ jụmọ iḅi ḍọkịị.

⁵Ọ́ Kịrayịsị Jizọsị kẹ amịna ḅụụ ọkị ḅara mẹ kẹ ọmịna ḅụụ ọkị:

⁶Tamụnọ sime-ḅara mẹ sakị mamgba ọ̀ ḅụụ simem, kụma anị ò ḅioḅẹngbọ sọ-a mịnẹ ọ̀ kụrọ ḅara ḅụ ḅo Tamụnọ na gbasị ḅa.

⁷Miemẹ nakara, ori ḅarana sime ọ̀ pịrị aị mamgba ḅụ ḅara-siinm, tẹ nwẹnị fịrịmẹnjịḅọ sime-ḅara ọkị. Ò ḅo tomḅọ kịkam, tẹ Tomḅọ ḅara kẹ tolu-sịẹm.

⁸Ọ̀ ḅụụ-iderima tẹ ḅịḅị poki etela ḅụ mẹnjị nwenii ḅo fị lam; ẹngbẹsẹ-sịn ọgọnọ ọ̀ kọn fị mẹ.

⁹Mie gotẹ Tamụnọ ọ̀ saakị-gelema mu So-ḅio ḅẹ ọgọnọ-jụ ḅụ geletẹịn anga mẹ mum tẹ jen ẹrẹ goyegoye nẹngị ẹrẹ kẹ ọ̀ sịnm.

¹⁰Anịẹrẹsị, So-ḅio sime tẹ ḍumo wararị apụ mamgba, na, tomikiri na, kiri suku-ḅio na, kụn kẹ Jizọsị ẹrẹ pịrị ḅụ kparakị ḅa,

¹¹tẹ inimgba ḍuko pakama ḅa mịnẹ Jizọsị Kịrayịsị ḅe anie KỊNỊNYANAḄỌ, Tamụnọ Ḍaḅọ ḅe ebube ḅụ.

¹²Ọkọẹrẹsị, ị̀ iḅi ikiapụ, àrị ọmịnị na sime sakị ọ́ kẹ sakị mamgba ị̀ ḅịḅị poki, poki ḅara mẹ ọmịnị ọkọ nẹngị ḅara kẹ ị̀ ḅịḅị poki àrị ọmịnị na ofori sakị mẹ ḅụ. Ọ́ paa ḅalafa na ḅụụ-tukutuku na kẹ kọrịnama kọrị tọrọkọ muu, tẹ kẹ ọmịna ḅọrọma mẹ mịẹ tẹ anị busunu,

¹³anie Tamụnọ sakị mamgba ọmịna ḅụụ ḅio kọrịnama kọrịarị ẹrẹsị, mịẹtẹ ó minini tẹ inetẹ ọ̀ tọn ye mịẹ ḅẹ ḅara.

¹⁴Ọ́ mịẹarị ye goyegoye ọmịnị mbụrụmbụrụ na ye-nụnụa na ofori ḅara kẹ anị mịẹ,

¹⁵mịẹtẹ ọmịnị angarị si, gulugulu fatẹ tomikiri mẹ ḅụ, ọ́ Tamụnọ karakara awọmẹ ḅara kẹ si na gboloma-a, tẹ fịafịatẹ ḍumo kọn ḅarị ḅara. Ịna ogboku ḅụ ó So-tọrụ ḅẹ alolia kọrị ḅara kẹ ḅịya pakaa,

¹⁶anie ó ḍumo oku mẹ daḅọrọma ịn pịrịarị sakị, ọ́ mị ḅara mịẹ-mịẹ, Kịrayịsị ḅo ḅarị Ene mẹ ḅụ, à kẹ ó gotẹ ḅụụ-tọn ḅẹ ye paka tẹẹ, kẹ gotẹ ọkọ ḍukoarị, aniemẹ ḍie-pakama ḅa mịnẹ à ḅụụkụrọma tẹ kọrị kọrịnama mẹmgba papaa fa-a.

¹⁷Ẹbịsịya ì ḍumo mẹ ḅẹ ọmbie mẹ ịn kẹ ọmịna minini ḅụ sụa agba mịẹ Tamụnọ pịrị ḅa. Anị nwẹnị ọkọ paka sọ, ì ḅioḅẹlẹm, tẹ ọmịnị-mgba pịkị ì ḅioḅẹlẹ mẹ ḅụ sọ ḅa.

¹⁸Anị gbọrụ ḅara mẹ ḅụ, ọmịnị sọ ḅioḅẹlẹẹ, tẹ yẹrị sọ ọmịna ḅụ sọ tẹ ḅioḅẹlẹ.

¹⁹KỊNỊNYANAḄỌ ḅe minini kụma, à kuromarị ala-a sakị ḅụ arị inetẹ Timoti kẹ ọ́ fịrịma tẹ ò ḅo ó sime-ḅara nimi tẹ pịkịma-ḅo ḍuko ị̀ pịrị ḅa, mịẹtẹ ì ḅiokpọ ḅarị ḅara.

²⁰Ori ngẹrị mie ị̀ na gbọrụ ḅioḅẹngbọ nyana tẹ pịkị ó gboloma ye kẹ ye-sịn lama wararị ḅọ.

²¹Kirikọn-apụ mamgba, ọrụḅọ-ọrụḅọ amịna ḅara-kuḅu ḅẹ ye kẹ ye-sịn tẹ Jizọsị Kịrayịsị ḅẹrẹ mẹ bala-a.

²²Timoti sime iḅi ḅara mẹ, wa kọrịarị kọrịnama mẹ ḅụ, jụmọ ḍuko ọ́ pịrị ḅịa, ori na ị̀ na, iḅi-oku mẹ gotẹ gbala tụḅọ na mḅọ ḍaḅọ na ḅara kẹ kọrịnama kọrị gboloma tẹ ye mẹ.

²³Mie ḅụ à ḅiokpọ wararị, mịnẹ à ye ị̀ na sime ḅẹ ḅara nimi gbọrụ sakị àrị ọ̀ kẹ fịrịma ḅa.

²⁴Tẹ à KỊNỊNYANAḄỌ ḅe ḅụ ḅiokpọ wararị ḅara ḅụ, yẹrị sọ inetẹ ala-a sakị ḅụ ḅo ọ́ la ḅa.

²⁵À sịn-arị à wamịna iyimbere Ẹpaforoditosị kẹ ọ́ fịrịma na-iḅim, anie ị̀ na kọrịnama kọrị gboloma tẹ, pịkị ị̀ palị tẹ owu sọ tẹ ḅọ ḅe, ḅarasụa ị̀ pịrị ḅụ ọmịna fịrịmẹnjịḅọ ḅe.

²⁶Ḅo ọmịnị-mgba ẹrị ọ̀ tarị-ḅaarị, tẹ ọmịnị ori obi ye mẹ naa ye mẹ pịkị kpọma ò ḅioḅẹngbọ sima lama tẹ.

²⁷Karakara-ḅara-ḅụ ori obim, kẹlẹ kọnm ọ̀ fịị tẹ. Kụma Tamụnọ ò ḍiki sịḅị-kụrụkụrụm, ori ngẹrị-a, kụma yẹrị sọ, tẹ mịẹtẹ ị̀ ḅụụ ḅio simearị kururu mẹ nẹngị ye ḅarị ḅo ị̀ la ḅịa ḅara.

²⁸Ọkọẹrẹsị, ọ̀ kẹ ọ́ fịrịma mẹ pịkị ị̀ ḅio-sẹsẹma ḅaka tẹ, mịẹtẹ ọmịnị ori ẹrị tẹ ḅioḅẹlẹ tẹ ì kururu mẹ sọ kan so ḅarị ḅara.

²⁹Ọkọẹrẹsị ọ́ KỊNỊNYANAḄỌ ḅe ḅụ ḅẹ mịnaḅọ ḅara kẹ ḅioḅẹlẹ kẹ ọ̀ daa-ọkị. Ọ́ kụn kẹ ò sime-ḅara sime atomi ma pịrịị,

³⁰kẹ gotẹ ọkọ ḍukoarị, ori ò ḍumo sọ kẹ ye-sịn-a tẹ kẹlẹ kọnm fịị tẹ, Kịrayịsị kọrịnama mẹ sịḅị ẹrẹsị, ḅarasụa ị̀ pịrị ḅụ, anie ọmịnị inetẹ ḅo pịrị ḅịa ye mẹ.