Read kalabari Filipayị 3 Bible Online

Filipayị 3 - kalabari bible

Filipayị 3

¹Anị ḅẹ kunoma ye ị̀ amịnapụ, ọmịnị ọ́ KỊNỊNYANAḄỌ ḅe na gbọrụ ḅụ emi mẹ go ḅioḅẹlẹẹ. Jen sakị à kẹẹ tẹ aị ma sin kẹẹ sọ ị̀ ḅụụ si-a, tẹ anị ḅara mịẹ mẹ iḅi kẹ ọ́ mịẹ tẹịnma ḅa.

²Ọmịnị iḅiọkụ si amịẹaị mịẹarị atomi ẹbịị, arị obiri amẹẹ ma, tomḅọ oju pẹlẹ-a pẹlẹ-a ịgbanịarị apụ ma.

³Wamịnị ma rẹ anie karakaramatẹ tarị-ḅụụ sin tẹ apụ, inia, kẹ gotẹ ọkọ ḍukoarị, wamịnị wa Tẹmẹ ḅe ḅụ ḅọrọ tẹ sunsin Tamụnọ pịrịarị, tẹ wa Kịrayịsị Jizọsị na gbọrụ ḅụ sime tẹ kọn-arị ḍumo mẹ ḅẹ ḅioḅẹlẹ kọn-arị. Wa ọgọnọ, ọgọnọ tomi ẹrị ḅẹ amịẹaị kẹ ḅiokpọma-a.

⁴Ye simearị ḅara ḅụ, arị inetẹ ọkọ sime aị kẹ ḅiokpọma ḅẹ ḅara simem. Gbọrụḅọ ọkịarị mịnẹ mḅọ ọgọnọ, ọgọnọ tomi ẹrị ḅẹ tẹ mịẹarị aị kẹ ḅiokpọma ḅa ḅẹḅẹ, yẹrị sọ à gotẹ anị ḅara kuroma ḅẹ aị tẹịnm.

⁵Ì iyingi ì iyi koroma tẹ ninea ḍin ini ị̀ tarị-ḅụụ siinm; arị iyi ọrụ ḅụ yẹrị Izirẹlị ḅẹ ḅọ, Benijamịnị furo ḅụ à pakam, karakara Hiburu ḅẹ ḅọ. Juu-ḅẹ-apụ Oloko mẹ koko gboloma ye ḅụ, yẹrị Farịsiiḅọ,

⁶tẹ arịḅẹ ḅio-sẹsẹ ḅụ mịẹ ja apụ nẹngị ḍọkị ḅụ à ḅaa-ḅọkọ kẹ sọsị mẹ ḍọkịm. Tomḅọ nwẹnị inetẹ Oloko mẹ tọn koroma aị ma koko ḅụ karakara mịẹ ḅọ sọ ḅa ḅẹ kụma, yẹrị ị̀ ḅụụ ḅẹẹ ḅẹẹ ye ofori.

⁷Kụma arị aị mamgba tẹ ḅọrọ tẹ sakị ḅụ à kẹ sọye sịn aị ma, Kịrayịsị sịḅị gotẹ à kẹ fa kịẹn tẹ.

⁸Arị aị ma kịngẹ-a à ye goyegoye kẹ gbọrsịḅị fa ye kịẹn tẹ, arị iḅiọkụ ye la arịmgba nẹngị ye nyana tẹ ye gotẹ, anie Kịrayịsị Jizọsị ị̀ Nyanaḅọ ḅe nimi mẹ. Ọ̀ sịḅị ẹrẹsị, à ye goyegoye kẹ wakị nguma tẹ; papaa sara ọgọnọ ḅẹ fun ḅara mie à kẹ arịmgba ọkị ye, mịẹtẹ à Kịrayịsị nyana ḅarị ḅara,

⁹tẹ ḅo busunutẹ ḅara kẹ ori na gbọrụ ḅụ sime ḅa. À ḅarị jen kẹ ị̀ ḅara-kuḅu ḅẹ karakara mịẹ nyana-a, anie tomḅọ Oloko koko ḅụ nyana ḅarịye mẹ. Mịọkụ à Kịrayịsị ḅụ minini ḅụ nyana, nyana karakara mịẹ mẹ nyana tẹ, Tamụnọ ḅara ḅo karakara mịẹ mẹ, tẹ minini ḅụ sịrẹrẹ wararị ye mẹ.

¹⁰À ḅiiarị jen gberie-sọ ḅarị ofori, Kịrayịsị ḅe nimi, tẹ ọ̀ fị-ḅụ-saakị mẹ kụrọ mẹ lekiri sikima tẹ; ori na tọrụsiẹrị, tẹ ọ̀ fịị ḅara fịị,

¹¹yẹrị sọ fịị ḅụ sakị tẹ ḍumo ḅarị mẹ ḅẹ ḅiokpọ ḅụ.

¹²À ḅẹẹ-a mịnẹ à ḅii ye ị̀ ḅara la tẹ, anịanịa à kara gbasị tẹ. À paa ḅụụ kẹ gbin-arị, Kịrayịsị nyana ị̀ pịrị tẹ ye mẹ ḅo ị̀ ḅara la ḅarị ḅara.

¹³Ye wẹrịtẹ sime-ḅara ḅụ, ị̀ amịnapụ, à sịn-a karakara-ḅara-ḅụ anị ḅo ị̀ ḅara la tẹ; anị sime-ḅara, sime-ḅara sọ, kpọkpọ gberie tẹ à mịẹarị ye anie, à ḅọrọ tẹ ye mẹ kẹ ḅioḅọrọma tẹ, arị inetẹ ḅara, inetẹ ḅara mịẹ tẹ tọrọkọ sime ye mẹ la ḅẹ ḍọkịarị.

¹⁴Mie ḅụ, à mangị da-da kunoma mẹ muarị, mịẹtẹ à ḍiepịrịye mẹ nyana ḅẹ ḅara, anie Tamụnọ, Kịrayịsị ḅụ, ị̀ sịnm à ḅo So-ḅio kọn nwẹn ḅẹ ḍumo mẹ.

¹⁵Wamịnị-mgba tẹ tẹmẹ ḅụ ḅẹ aị ḅụ ḍụḅa paka-ḅo tẹ apụ mamgba mị gbọrụ kuroma mẹ sụa na-iḅim. Kụma ọmịna ḅụ ḅẹ ja apụ jen kuroma sụa-sụa, Tamụnọ mie mẹ mịẹ banabanama ọ́ pịrị ḅa.

¹⁶Aniemẹ sime-ḅara sime-ḅara sọ, ó yee wa gbọrụ ḅara ḅẹ ọrụ ma tẹ, anị kụra-ḅio wa ḍukamẹnjị sime aị ma ḍuka-mu.

¹⁷Ị̀ amịnapụ, ọ́ paa ì ḍikima mịẹ ma-muu. Ọmịna tọrụ karakara etela mẹ tẹ wa kẹ ó ḍie tẹ ye mẹ ḅụ so ma.

¹⁸Tọnwa sakị ḅụ à miemẹ ḍuko ọ́ pịrị ḅọrọma tẹ, mịọkụ à paa pịkị owu atọrụ na ḍuko ọ́ pịrịarị, mịnẹ tọnwa-apụ kọn-arị ḍumo, ịn kẹ Kịrayịsị ẹngbẹsẹ-sịn mẹ ḅụ kọn fịị mẹ na fịya-a apụ mịẹarị.

¹⁹Ẹlị ḅio mie ịna kunoma, kẹ gotẹ ọkọ ḍukoarị, ịna meni-oju mẹ sọlịmarị aị mie ịn kẹ ịna tamụnọ sọma wararị. Ịna ḅụụ-jịrịma na-iḅi ye mie ịn kẹ ḅụụ-tọn-arị ye, tẹ sime mị tomikiri mẹ pịrị aị ngẹrị mie in kuromarị.

²⁰Anị sime-ḅara, sime-ḅara sọ, wamịnị anie So-ḅio ḅẹ apụ, tẹ wa ḅio-sẹsẹ ḅara kẹ wa Ḅọrọmaḅọ ḅe koruarị, KỊNỊNYANAḄỌ Jizọsị Kịrayịsị ḅe, ò So-ḅio sime tẹ ḅoarị.

²¹Ọ̀ wamịna ịnyọ ofori, fịị-fịị oju ma ḍima tẹ arị ori ebube oju mẹ kịka ḅa, ọ̀ kẹ inetẹ ye mamgba ọkị-ḅo ò suku-ḅio suuarị kụrọ mẹ ḅụ.