Read kalabari Kọlọsị 1 Bible Online

Kọlọsị 1 - kalabari bible

Kọlọsị 1

¹Pọlụ, Tamụnọ minini ḅara ḅụ, Kịrayịsị Jizọsị fịrịmẹnjịḅọ ḅe, na wamịna iyimbere Timoti na ḅara ḅo ḍiri:

²Tẹ kẹ Tamụnọ atomi tẹ Kọlọsị ḅụ Kịrayịsị na gbọrụ ḅụ sime minini nyana ḅụ wamịna mịnapụ ma pịrị ye. Yee Tamụnọ, wamịna Ḍaḅọ ḅe, ḍiki-ḅụụjịrị na dein na kẹ ọ́ pịrị.

³Wa tẹkẹ ọ́ pịrịarị sakị mamgba wa ịmịẹtẹ kẹ Tamụnọ, wa Nyanaḅọ Jizọsị Kịrayịsị Ḍa ḅe, ḅẹẹarị.

⁴Wa gotẹ ọkọ mịẹarị ye, wa Nyanaḅọ Kịrayịsị Jizọsị ḅụ ọ́ nyana minini na, ọ́ nyana Tamụnọ atomi mamgba pịrị ḅẹlẹma mẹ na wa naa tẹ.

⁵Karakara oku-ḅịḅị mẹ, anie Iḅi Oku mẹ, tarị ḅo ọ́ la sakị, anị kẹ ọ́ pịrịarị ḅiokpọ mẹ gboloma ye ọ́ naa tẹ. Mie ḅụ, ọmịna minini mẹ na ḅẹlẹma mẹ na mị ḅiokpọ mẹ tẹ, So-ḅio Tamụnọ kẹ kpaịnma ọ́ wẹrịma wararị ye mẹ, ḅụ sịrẹrẹ wararị.

⁶Iḅi oku mẹ boma, boma ọkị-ḅoarị, tẹ anị pịkị tomikiri mẹ kana-koroarị, anie ọ́ tarị Tamụnọ ḍiki-ḅụụjịrị mẹ gbolomaye naa tẹ ḅo karakara ḅara kẹ anị sime-ḅara lekiri kụra-ḅio anị ọmịna ogboku mịẹarị ḅara pembe ḅara.

⁷Ẹpafarasị ḅịḅị ḅụ ọ́ Tamụnọ ḍiki-ḅụụjịrị mẹ gbolomaye ḍawọm, ori anie wamịna ḅụụ yela tẹ wamịnị na fịrịmẹnjị gbolomarị ḅọ, anie ḅioḅẹngbọ kẹ ḅụụ ḅụ gbana na-iḅi ḅara sime tẹ wamịna tọrụ ḍima tẹ kọrịnama kọrị Kịrayịsị pịrịarị ḅọ ḅe.

⁸Tẹmẹ ḅe kẹ ọmịna ḅụụ ḅio suu ḅẹlẹma mẹ gbolomaye sọ ò ḍuko wa pịrịm.

⁹Miemẹ ẹrẹsị, wa ó gboloma ye naa kụra-ḅio, sakị mamgba wa tẹkẹ ọ́ pịrịarị, mịnẹ Tamụnọ paa mịẹtẹ ọmịnị ó ḅiiarị ye nimi, tẹ pịkị ọ̀ Tẹmẹ ḅe kẹ kịnị pịrịarị nimi mamgba na, yefieye naa na nyana.

¹⁰Anịtẹso ó ḅo inetẹ KỊNỊNYANAḄỌ ḅe ḅiiarị ḍumo ḅara, kọn tẹ pịkị sakị mamgba ò ḅioḅẹlẹma ḅarịye mịẹ ḅa. Ọmịna ḍumo iḅi amịẹaị ḅara-ḅara pakama-ḅo ḅa, tẹ ọ́ Tamụnọ nimi tọrọkọ-tọrọkọ mu ḅa.

¹¹Ori ori ebube opu kụrọ mamgba ḅụ ịnyọ kẹ ọ́ pịrị tẹ ọmịnị iḅiọkụ ye-inema alama, tẹ ḍereku ḅara

¹²kẹ ịmịẹtẹ kẹ Ḍaḅọ ḅe ḅẹẹ, anie mịẹtẹ wa Tamụnọ atomi ma ḅụ sọ tẹ ò bele ama mẹ la ḅẹ apụ sọ ḅọ ḅe.

¹³Kẹ gotẹ ọkọ ḍukoarị, ori mie kanakana kụrọ ḅio wa pakama-ḅo tẹ ye wa la-a ḅara kẹ wa kẹ mu ọ̀ ḅẹlẹma Tụḅọ ḅe amakiri mẹ lama ḅọ,

¹⁴ḅụụ ḅụ wa ḅọrọ tẹ pakịrị-ḅo nyana ḅọ ḅe, anie wamịna asi ma wẹrịso wa pịrị mẹ.

¹⁵Kịrayịsị mie wa ẹrị tẹ tọrụngbọ ẹrị-ẹrịa Tamụnọ ḅe sime-ḅara lekiri ḅọ. Ori anie pịkị tarị iyi Tụḅọ ḅe, Tamụnọ Tẹmẹ aị mamgba nẹngị ḅọ, opu ḅụ.

¹⁶Kẹ gotẹ ọkọ ḍukoarị, ọ̀ ḅụụ mie Tamụnọ ḅọrọ tẹ ḅẹẹye-ḅẹẹye tẹmẹ ye, So-ḅio sime ye-o, kiri-ḅio sime ye-o, tọrụngbọ ẹrịarị aị-o, tọrụngbọ ẹrị-a aị-o, tẹmẹ ḅụ simearị akụrọ mamgba na, kịnịnyanapụ na, ḅẹrẹtọn-apụ na ịn kụrọ kẹ ḅara ḅụ sụa wararị apụ na sọ anị ḅụ sọ wararị. Tamụnọ ò gotẹ, pịkị ọ̀ ḅụụ ḅọrọ tẹ So na Kiri na arị ḅio simearị aị mamgba na tẹmẹm.

¹⁷Kịrayịsị emi ogbo ye mamgba pakam, tẹ ori na gbọrụ ḅụ sime ḅụ mie ye mamgba arị sime na-iḅi kiri nyana ḅarịye.

¹⁸Ori anie ori oju mẹ ḅẹ sịḅị, anie sọsị mẹ; oju mẹ ḅẹ ḍumo mẹ saakị paka-ḅoarị anga anie Orii. Ori anie tarị iyi Tụḅọ ḅe, Tamụnọ fịị ḅụ saakịma ḅọ ḅe, mịẹtẹ ye mamgba ḅụ ori tarịḅọ sọ ḅẹ ḅara.

¹⁹Kẹ gotẹ ọkọ ḍukoarị, Tamụnọ ḅarana tọnm mịnẹ Tụḅọ ḅe Tamụnọ sime-ḅara mẹmgba nyana famaa.

²⁰Ọkọẹrẹsị, Tamụnọ tọn tẹ mịnẹ Tụḅọ ḅe ḅụ mie ọ̀ ḅọrọ tẹ bebe So na, kiri na, ḅio sime aị mamgba sịn pịkị ḅo ọ̀ ḅụụ pịrị ḅarịye. Tamụnọ ọ̀ Tụḅọ ẹngbẹsẹ-sịn ọgọnọ kọn fịị mẹ ḅụ ḅọrọ tẹ dein mịẹm, tẹ nwẹnị ye mamgba pịkịma-ḅo ọ̀ ḅụụ pịrị, kiri ḅio sime aị na So-ḅio sime aị na.

²¹Sakị ḅẹ gbọrụ sakị ḅụ ọ́ Tamụnọ ḅụ ḅele fa simem, tẹ ori na fịya-a apụ sọm, anie ọ́ mịẹ-mịẹ si amịẹaị na, kuroma-kuroma si akuroma na ẹrẹsị

²²Kụma mịọkụ ọ̀ Tụḅọ ḅe oju akpakpa ḅụ kọn fịị mẹ ḅụ, Tamụnọ ọ́ kẹ ori ikiapụ sọma tẹ, mịẹtẹ ori ọ́ kẹ fịafịa, kpaịntẹ ḅẹẹ ḅẹẹ ye ḅụụ ḅụ ofori ḅara kẹ ọ́ kẹ ḅo ọ̀ tọrọkọ la ḅẹ ḅara.

²³Ye wẹrị tẹ sime-ḅara ḅụ, ọmịnị ọmịna minini mẹ, tẹ karakara suku mẹ ọgọnọ sịẹ wararị ye mẹ ọlọ kụrọmaa; ọ́ ḍụkụ tẹ gbọrụḅọ-sọ mịẹtẹ ọmịnị iḅi-oku mẹ naa sakị ọ́ nyana ḅiokpọ mẹ jikema. Mị iḅi-oku mẹ ḅẹ fịrịmẹnjịḅọ mie yẹrị Pọlụ sọ ye — mị iḅi-oku mẹ mie in ḍuko ḅẹḅọ-ḅẹḅọ pịrị tẹ ye mẹ tomikiri mẹ ḅụ.

²⁴Tẹ mịọkụ arị ó gotẹ ẹrị atọrụsiẹrị ma ì ḅioḅẹlẹmarị, kẹ gotẹ ọkọ ḍukoarị, ma ì meni-oju ḅụ arị ẹrị atọrụsiẹrị ma ḅarasụa tẹ Kịrayịsị ẹrị ori oju, anie ori ẹrị sọsị mẹ, pịrị atọrụsiẹrị ma ḅụ kara-a anga mẹ karamarị ye.

²⁵Tẹ Tamụnọ ị̀ kẹ sọsị mẹ fịrịmẹnjịḅọ sọma tẹ, anie ọmịna iḅi gotẹ mị kọrịnama mẹ kẹ ị̀ pịrị kọrịarị ḅọ ḅe. Anị kọrịnama mẹ anie, ḅintẹ ḅara kẹ ori oku mẹ ḍuko wasama,

²⁶anie ḅọrọtẹ aḅụọ ma ḅụ tomina tọrọkọ kikima sime ye mẹ tẹ mịọkụ ọ̀ mịẹfinji ori atomi pịrị tẹ ye mẹ.

²⁷Tamụnọ tọn ḅara anie, ọ̀ mịẹtẹ ori atomi ma ọ̀ tọn wẹrịtẹ kikima sime ye mẹ nimi, anie ọ̀ kẹ tomi mamgba pịrị ḅẹ tẹ kikima wararị ngọ mẹ na ebube na. Tẹ kikima wararị ye mẹ anie, Kịrayịsị ọmịna ḅụụ ḅio emi, anie fiearị ọmịnị sọ, sọ tẹ Tamụnọ ebube mẹ nyana ḅa.

²⁸Mie ḅụ wa Kịrayịsị ḅe ḍuko ḅẹḅọ-ḅẹḅọ pịrịarị wa nyana nimi mamgba ḅụ wa ịna ḅeri nụnụ tẹ pịkị ye kẹ in tolumarị, mịẹtẹ wa ọrụḅọ-ọrụḅọ kẹ ḍụḅa paka-ḅo tẹ si, siye nimi tẹ ḅọ ḅara kẹ Kịrayịsị na gbọrụ ḅụụ sime ḅụ Tamụnọ tọrọkọ ḅo ḅẹ ḅara ẹrẹsị.

²⁹Miemẹ mịẹ mie à gotẹ nụnụ tẹ pịkị lịgị-lịgịarị, Kịrayịsị kẹ ị̀ pịrịarị opu ịnyọ mẹ tẹ, ị̀ ḅụụ ḅio sime tẹ kọrịnama kọrị ye mẹ kẹ mịẹye ḅụ suu ḅụ.