Read kalabari Jọsụwa 22 Bible Online

Jọsụwa 22 - kalabari bible

Jọsụwa 22

¹Anịtẹso Jọsụwa Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na sịn kobirim;

²Ọ̀ nwẹnị ịn ḅẹẹ, “Ó Mozizi, KỊNỊNYANAḄỌ ḅe fịrịmẹnjịḅọ ḅe tọn ọ́ pịrị aị mamgba koko tẹẹ, pịkị ị̀ pọkọ poki tẹẹ à tọn ọ́ pịrị aị mamgba ḅụ.

³Mịna ene mamgba ḅụ ọmịnị ọmịna amịnapụ ma sịkị-a ḅo mịmgba lam, kụma ọ́ ḅụụ ẹbị tẹ KỊNỊNYANAḄỌ ọmịna Tamụnọ ḅe tọnm ọ́ mịẹ ḅẹ aị ma mịẹm.

⁴Anịsakị KỊNỊNYANAḄỌ ọmịna Tamụnọ ḅe mịọkụ ịnyọsara kẹ ọmịna amịnapụ ma pịrị tẹ, ọ̀ wẹrịtẹ kẹ ịn karịma ḅara; anịẹrẹsị ọ́ pịkị tẹ so anị ama mẹ tẹ Mozizi, KỊNỊNYANAḄỌ ḅe fịrịmẹnjịḅọ ḅe Jodanị mẹ ḅẹ osi pakịrị anga ḅụ kẹ ọ́ pịrị tẹ ọ́ nyana ye simearị anga mẹ mu.

⁵Ọmịnị iḅiọkụ ḅụụ ẹbị tẹ tọn ye mẹ na, oloko mẹ na tẹ Mozizi, KỊNỊNYANAḄỌ ḅe fịrịmẹnjịḅọ ḅe sụa aị ma kẹ elekima sụa, KỊNỊNYANAḄỌ ọmịna Tamụnọ ḅe ḅẹlẹma, tẹ ori etela mamgba ḅụ mẹnjị, pịkị ori oloko ma koko tẹ ọ̀ fịnamaa, tẹ ọmịna ḅioḅẹngbọ mẹmgba na, tẹmẹ mẹmgba na kẹ fịrịmẹnjị ọ̀ pịrịị.”

⁶Anịtẹso Jọsụwa nwẹnị ịn boma, tẹ ịn fịrịma mu; tẹ ịn nwẹnị so ịna ama ma mu.

⁷Mịọkụ Manasẹ furo mẹ kẹ maa anga ḍiya ḅẹ gbọrụ pakịrị Mozizi ye kẹ ịn pịrị nyana tẹ Basani ḅio ḅụ kụma osi pakịrị mẹ Jọsụwa Jodanị mẹ ḅẹ ịrụa-ideriarị-anga ḅẹ ama mẹ ḅụ ịna amịnapụ akaka ịn nyana ḅẹ anga kẹ ịn pịrịm. Tẹ Jọsụwa ịna ama ma fịrịma tẹ ịn boma sakị,

⁸ori ịn ḅẹẹm, “Ó gburo-gburotẹ ngọ na, tọnwa tọnwa opu anama na, seleḅa na, golu na, ojo na, ikulele na, tọnwa akapa na kẹ pịkịma so ọmịna ama ma mu; ọmịnị ọmịnị na fịya-a apụ ḅara ḅụ fọịn ḅo aị ma kẹ ọmịna amịnapụ na ḍie.”

⁹Anieḅụ Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na nwẹnị Silo tẹ Kenanị sẹ mẹ ḅio simearị ama mẹ ḅụ kirikọn Izirẹlịapụ ma ḅụ pịkịma-so. Ịn nwẹnị Gilẹdị ịna soku-ḅẹ ama mẹ tẹ KỊNỊNYANAḄỌ ḅe Mozizi ḅụ ḅọrọtẹ tọn ḅara ḅụ ịn ḅarana nyana tẹ ama mẹ mu.

¹⁰Ịn ḅo Jodanị mẹ ye-yọ mẹ ḅiri tẹ Kenanị ama mẹ ḅio simearị anga mẹ la tẹso, Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na nwẹnị anịjụ gbọrụ ḍụḅatẹ agbamịẹ-anga nama, Jodanị mẹ akaka ḅụ.

¹¹Kirikọn Izirẹlịapụ ma naam mịnẹ Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na Gẹlịlọtị ḅụ, Kenanị sẹ mẹ agara, Jodanị ye-yọ mẹ ḅiri sime Izirẹlịapụ ma pịrị anga ḅụ gbọrụ agbamịẹ-anga nama tẹẹ.

¹²Tẹ Izirẹlịapụ ma anị naa tẹso, bebe Izirẹlị kobiri-ogbo mẹ inina ọmụ gbin ḅẹ ḅara kẹ Silo ḅụ kobirim.

¹³Anịtẹso Izirẹlịapụ ma nwẹnị Ẹlịyeza agbamịẹḅọ ḅẹ owiḅọtụḅọ Finihasi fịrịma Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na dama-mu.

¹⁴Ọ̀ ḅụụ sọ tẹ arị na mu apụ oyia alapụ, Izirẹlị ḅẹ afuro ma ḅụ gbọrụḅọ-gbọrụḅọ paka-ḅom, Ini ḅẹ gbọrụḅọ-gbọrụḅọ anie Izirẹlị ḅẹ furo-furo ma ḅẹ gbọrụ kpo gbọrụ kpo ḅẹ sịḅịdaḅọ.

¹⁵Ịn nwẹnị Rubẹnị furo-ḅẹ-apụ ma na Gadi furo-ḅẹ-apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na dama-ḅo Gilẹdị ama mẹ ḅio, tẹ ịn nwẹnị ịn ḅẹẹ,

¹⁶“Mie KỊNỊNYANAḄỌ ḅe bebe tomina-ogbo mẹ ḅẹẹ ḅara, ‘Miemẹ anie tọ kịnị pikirima ḅara tẹ ọ́ kẹ Izirẹlịapụ tẹkẹarị Tamụnọ ḅe pikirima tẹ sịḅị-kụrọma KỊNỊNYANAḄỌ ḅe pịrị ḅụ mịmgba gbọrụ agbamịẹ-anga nama ọmịna aḅụụ pịrị tẹ mịmgba KỊNỊNYANAḄỌ ḅe ḍukamẹnjị ḅụ pịkị-soarị?

¹⁷Pẹyọ ḅẹ si mẹ ḅụ wa la tẹ mịọkụ mẹ sọ wa paa amụ wamịna aḅụụ sịkịrị fịafịama-a, tẹ anị gotẹ Tamụnọ fomu-ḅara ḅo KỊNỊNYANAḄỌ ḅe tomina-ogbo mẹ ọgọnọ gbana ye mẹ amụ wamịnị na-iḅi-a,

¹⁸tẹ mịmgba ḅụ ọ́ KỊNỊNYANAḄỌ ḅe ḍukamẹnjị ḅụ pịkị-so nyana? Anịsakị mịmgba ị́ sịḅị-kụrọma KỊNỊNYANAḄỌ ḅe pịrị-pịrị, ori ịganị nyana bebe Izirẹlị tomina-ogbo mẹ pịrị ḅa ḅaa ḅụ.

¹⁹Kụma mịọkụ ḅụ ọmịna ama mẹ nwẹnị fịafịa-a ḅẹḅẹ, ọ́ saḅa-ḅọrọ KỊNỊNYANAḄỌ ḅe ama mẹ ḅio KỊNỊNYANAḄỌ ḅe Ọḅọkụ-Igbe mẹ Akpụrụ-warị mẹ sịẹ wararị anga mẹ mu, tẹ wamịna ogbo-ḅio gbọrụ anga ọkị nyana ọmịna aḅụụ pịrị; ọ́ paa sịḅị-kụrọma KỊNỊNYANAḄỌ ḅe pịrị ma ngẹrị, anịanịa KỊNỊNYANAḄỌ wamịna Tamụnọ agbamịẹ-anga mẹ sikima, jen agbamịẹ-anga nama ọmịna aḅụụ pịrị ḅụ wa kẹ sịḅị-kụrọ apụ sọma ma.

²⁰Ekanị, Zera owiḅọtụḅọ ḅe sime sima pịrị aị mẹ ḅẹrẹ ḅụ minini kan sakị, ịganị mẹ bebe Izirẹlị tomina-ogbo mẹ ọgọnọ gbana-a? Anịsakị ori ngẹrị ọ̀ kọn iri mẹ gotẹ fịị.’ ”

²¹Anịtẹso Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na nwẹnị Izirẹlị ḅẹ afuro ma ḅẹ asịḅịdapụ ma pakịrị ḅụ ḅẹẹ,

²²“Kụrọmamgba Nyana Gbọrụ Tamụnọ ḅe, KỊNỊNYANAḄỌ ḅe! Kụrọmamgba Nyana Gbọrụ Tamụnọ ḅe, KỊNỊNYANAḄỌ ḅe! Ori nimi wararị; anịsakị yee Izirẹlị ḅioju sọ nimi! Anị nwẹnị sịḅị-kụrọ, anịanịa KỊNỊNYANAḄỌ ḅe ḅụụ nyana minini kan gotẹ nama, nama, mịmgba mẹ wẹrịso wa pịrị ma!

²³Wa gotẹ agbamịẹ-anga nama ye kẹ KỊNỊNYANAḄỌ ḅe ḍukamẹnjị ḅụ pịkị-so, anịanịa anị ọgọnọ ḅụ dọkịma-agba mịẹ, anịanịa mgbọlụ agba mịẹ, anịanịa dein-pịrị-agba mịẹ ḅẹḅẹ, yee KỊNỊNYANAḄỌ ḅe ḅioju ḅarana gbẹẹfị ḅii.

²⁴Ẹn-ẹn, kụma ḅalafa ḅụ wa anị namam, mịnẹ, tọrọkọ ḅo ḅarị sakị ḅụ ọmịna awọmẹ sosi wamịna awọmẹ ḅẹẹ ḅa, ‘Ọ́ KỊNỊNYANAḄỌ Izirẹlịapụ tẹkẹarị Tamụnọ ḅe na tọ mịẹye nyana?

²⁵Kẹ gotẹ ọkọ ḅẹẹarị, KỊNỊNYANAḄỌ ḅe Jodanị mẹ kẹ oke mịẹ tẹ wamịnị na, ọmịnị na ogboku, ọmịnị Rubẹnị furo-ḅẹ-apụ na, Gadi furo-ḅẹ-apụ na, ọ́ gbọrụ ḍiekiri sọ nyana-a KỊNỊNYANAḄỌ ḅe ḅụ.’ Anieḅụ ọmịna awọmẹ inetẹ wamịna awọmẹ mịẹ tẹ ịn sunsin KỊNỊNYANAḄỌ ḅe pịrị dasịẹma ḅa.

²⁶Anịẹrẹsị wa ḅẹẹm, ‘Yee wa mịọkụ gbọrụ agbamịẹ-anga nama; anị sime dọkịma-agba mịẹ anịanịa agba mịẹ pịrị-a,

²⁷kụma wamịnị na, ọmịnị na ogboku ogbo-sịẹ ye sọ, pịkị wa ḅọrọtẹ so sakị, ḅụọ-ḅụọ ma ogboku ogbo-sịẹ ye sọ ḅẹ ḅara, mịnẹ wamịnị sọ wamịna dọkịma-agba ma na, agba mịẹ-aị ma na, dein-pịrị-agba ma na kẹ KỊNỊNYANAḄỌ ḅe fịrị mẹnjịm ọ̀ tọrọkọ ḅụ’; anieofori ọmịna awọmẹ ḅofa tọrọkọ ḅo ḅarị sakị ḅụ wamịnị ḅẹẹ, ‘Ọ́ KỊNỊNYANAḄỌ ḅe ḅụụ gbọrụ ḍiekiri sọ nyana-a.’

²⁸Wa ḅiotọnm, tọrọkọ ḅo ḅarị sakị ḅụ ịn miemẹ kẹ wa ḅẹẹ ḅẹẹ, anịanịa kẹ wamịna aḅụụ paka-ḅo apụ ḅẹẹ ḅẹẹ, wa ḅẹẹ ḅa, ‘KỊNỊNYANAḄỌ ḅe agbamịẹ-anga mẹ sime-ḅara sime ye mẹ tẹ wamịna aḍapụ ma mịẹ ye mẹ, sime kẹ dọkịma-agba, anịanịa agba mịẹ pịrị-a, kụma kẹ wamịnị na, ọmịnị na ogboku ḅụ ogbo-sịẹye mịẹ.’

²⁹Yee anị paka-paka-a ye sọ wa pịrị, mịnẹ wa sịḅị-kụrọma KỊNỊNYANAḄỌ ḅe pịrị ḅa, tẹ KỊNỊNYANAḄỌ wamịna Tamụnọ ḅe agbamịẹ-anga mẹ tẹ Ọḅọkụ-Igbe mẹ Akpụrụ-warị mẹ tọrọkọ sịẹ wararị ye mẹ sikima, agbamịẹ-anga nama tẹ kẹ dọkịma-agba, anịanịa mgbọlụ agba anịanịa agba mịẹ pịrị ḅụ mịmgba KỊNỊNYANAḄỌ ḅe ḍukamẹnjị ḅụ pịkị-so ḅarị mẹ.”

³⁰Finihasi agbamịẹḅọ ḅe na, tomina-ogbo mẹ ḅẹ alapụ na, Izirẹlị ḅẹ afuro ma ḅẹ sịḅịdapụ ma tẹ ọ̀ ḅụụ sọ apụ ma ẹkwẹn-aḅịḅị ma tẹ Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo-ḅẹ-apụ ma na kọn ẹkwẹn mẹ naa tẹso, anị nwẹnị iḅiọkụ ịna aḅụụ ḅẹlẹ.

³¹Ẹlịyeza agbamịẹḅọ ḅe owiḅọtụḅọ Finihasi nwẹnị Rubẹnị furo-ḅẹ-apụ ma na, Gadi furo-ḅẹ-apụ ma na, Manasẹ furo-ḅẹ-apụ ma na ḅẹẹ, “Mịmgba mie wa nimi ye mịnẹ KỊNỊNYANAḄỌ ḅe wamịna ogbo-ḅio emi, kẹ gotẹ ọkọ ḅẹẹarị, KỊNỊNYANAḄỌ ḅụụ amụ ọ́ mị kịnị pikirima mẹ mịẹ-a; mịọkụ mie ọ́ KỊNỊNYANAḄỌ ḅe ḅara ḅụ Izirẹlịapụ ma ḅọrọma tẹ ye.”

³²Anịtẹrẹmẹ mie Ẹlịyeza, agbamịẹḅọ ḅe owiḅọtụḅọ Finihasi na alapụ ma na, Gilẹdị ama mẹ ḅio Rubẹnị furo-ḅẹ-apụ ma na, Gadi furo-ḅẹ-apụ ma na ḅụ pịkịma-so Izirẹlịapụ ma ḍọkụma-ḅo tẹ ḅịḅị da ḅo ḍuko ịn pịrị ye Kenanị ama mẹ ḅio.

³³Ịn da ḅo ḍuko ịn pịrị ye mẹ Izirẹlịapụ ma ḅụụ-ḅẹlẹm; tẹ Izirẹlịapụ ma nwẹnị Tamụnọ boma tẹ ḅarị jen-maaịn kẹ Rubẹnị furo-ḅẹ-apụ ma na, Gadi furo-ḅẹ-apụ ma na ọmụgbin tẹ ịn sime ama mẹ fama ẹkwẹn kọn-a.

³⁴Rubẹnị furo-ḅẹ-apụ ma na, Gadi furo-ḅẹ-apụ ma na nwẹnị ẹrẹ kẹ agbamịẹ-anga mẹ sịn “Ogbo-sịẹ Ye”; kẹ gotẹ ọkọ ḅẹẹarị, ini mẹẹ: Anị mie wamịna ogboku ogbo-sịẹ ye sọ wa pịrị ye mịnẹ, KỊNỊNYANAḄỌ ḅe anie Tamụnọ.