Read kalabari 1 Timoti 3 Bible Online

1 Timoti 3 - kalabari bible

1 Timoti 3

¹Miemẹ karakara ẹkwẹn: Tomḅọ nwẹnị sọsị kẹ sịḅịdaa ḅẹ ḅii lamarị ḅẹḅẹ, mḅọ iḅi lamatẹ kọrịnama kọrị ḅẹ ḍọkịarị.

²Sọsị sịḅịdaḅọ mẹ mḅọ ḅụụ ḅụ ḅẹẹ ḅẹẹ ye pakama; mḅọ gbọrụ ẹrẹḅọ ngẹrị simee; mḅọ sịḅịḅio kuḅu tẹ, ḅụụ ọlọ tẹ ọrụtọn ḍumo kọn; mḅọ tọrụ-nimi-a atomi da warị suu; mḅọ inetẹ ye-tolumaa;

³mḅọ iru ḅuuḅọ anịanịa gbiri-gbiri-gbiri ḍumo kọn-arị ḅọ sọ ḅịa, kụma gbene tẹ dein tẹ ḍumo; mḅọ igbigi ḅẹlẹma ḅịa;

⁴mḅọ amịna warị-kpo ḍikiḍiki kpaịnma tẹ mḅọ awọmẹ mḅọ ḅịḅị poki tẹ ḅin tẹ kụn kẹ mḅọ pịrị.

⁵Kẹ gotẹ ọkọ ḍukoarị, tomḅọ inetẹ mḅọ warị-kpo sọ ḍikiḍiki-a kụma ndẹẹ mḅọ inetẹ Tamụnọ sọsị mẹ ḍikiḍiki ḅẹ ḅara?

⁶Mḅọ mininiye mẹ nimi tolu tẹ ḅọ sọọ, mịẹtẹ mḅọ ḅo opu amịẹaị ḅụ sọ tẹ mḅọ ḅẹrẹ-ḅarasii ḅụ sọ ḅịa ḅara, anị Ekwesu ḅe na sime-ḅara mẹ.

⁷Mḅọ sọsị ḅẹ apụ-a tomi sime anga ḅụ tomi mamgba mangịmarị ḅọ sọọ, mịẹtẹ mḅọ ḅo ḅụụ-jịrịma ye ḅio sọ tẹ Ekwesu ḅe ḍiein ḅio sọ ḅịa ḅara.

⁸Sọsị ḅio ḅarasụarị apụ sọ iḅi-yemịẹ-ḅara nyana tẹ epele ofori ḅara simee; ini iru ḅuu ḅụrama ma, anịanịa igbigi opu pọkọ-ḅẹngbọ sụa ma;

⁹Tamụnọ mịẹfinji wararị karakara mẹ ḅẹ mininiye mẹ ịn nwẹn fịnama sịẹma, ḅẹrẹ-ḅarasii-a tẹmẹ ḅioḅẹngbọ ḅụ.

¹⁰Ịn tarị daaḍiki ọkịị, Anịtẹso ịn daaḍiki mẹ ḅọrọ, ḅọrọ, ịn fịrị mẹ mẹnjịị.

¹¹Ịna ereme ma sọ iḅi-yemịẹ-ḅara nyana tẹ kịnị kẹ ọḅụjụ fiema ḅọrọ apụ sọma; in sịḅị ḅio kuḅu ḅara na ye mingirima-a ḅara na sime, ye goyegoye ḅụ.

¹²Sọsị ḅio ḅarasụa fịrịmẹnjịarịḅọ mẹ, mḅọ gbọrụ ẹrẹḅọ ngẹrị simee, pịkị inetẹ mḅọ warị-kpo na mḅọ awọmẹ na ḍikiḍiki kpaịnmaa.

¹³Ḅarasụa fịrịmẹnjịarị apụ ma ḅụ iḅiọkụ ịna kọrịnama kọrị apụ ma ini ịna ḅụụ kẹ iḅi kiri sịẹma tẹ, ịn pịkị inetẹ ḅiokpọ tẹ Kịrayịsị Jizọsị ḅụ ịn nyana minini mẹ ḍuko pakama ḅa.

¹⁴À mị ḍiri mẹ kẹẹ ị́ fịrịmarị ḅẹsọ, à ḅiokpọ wararị ala-a à ḅo ị́ ẹrị ḅa.

¹⁵Kụma à ḅarị sarama ḅo-a sọ, yee mị ḍiri mẹ mịẹtẹ í nimi wa kẹ Tamụnọ warị mẹ ḅio wẹrịtẹ ḍumo kọn ḅarị ḅara, anie ḍumo wararị Tamụnọ ḅe warị mẹ karakara mẹ ḅẹ ḅeriye tẹ anị dasịẹma wararị ye mẹ.

¹⁶Gbọrụḅọ-sọ inetẹ pịkị ḅịa mịnẹ wamịna Tamụnọ etela mẹ ḅụ gbọrụ kikima wararị opu ye emi: Tomina sime-ḅara ḅụ ọ̀ paka-ḅom, Tẹmẹ ḅe ọ̀ karakara mẹ ḍie-pakamam, enjẹlị apụ Ori ẹrịm. Sịẹ-sịẹ ma ogboku ini ò ḍuko-pakamam, bebe tomikiri mẹ ḅụ tomi ò mininim, tẹ Tamụnọ ọ̀ kẹ iwo so mum.