Read kalabari 2 Timoti 3 Bible Online

2 Timoti 3 - kalabari bible

2 Timoti 3

¹Kẹ ḅiokoroma mịnẹ kunoma ene ma ḅụ ye ḅụụ-fụkama lama ḅa.

²Tomi ịna ḅụụ ngẹrị bala ḅa, fị-ye fị-ye pọkọ-ta-a, ḅụụ-boma na ḅụụ-gelema na; ịn ja apụ mịẹ-sima ma ḅọrọ ḅa, ini ịna ḍapụ-na-iyingiapụ-na ḅịḅị poki ḅịa, ịmịẹtẹ ḅẹẹ ḍịn-a, Tamụnọ etela kẹ ye-sịn-a;

³ini iḅi ḅara kẹ kịnị na mịẹ ḅịa, ọkụrụkụrụ nyana-a, kịnị wori guluguluma, kụrọ kụrọ-ḅara kẹ kịnị na mịẹ tẹ ḅalafama ḅara sime; ini iḅi nwẹn-sịn ye ḍiki-ḅioḅu ḅa;

⁴ini mbasị ḅa, gbala-gbala ḅụụ da sịẹma-a ḅara kẹ ye mịẹ, tẹ opu amịẹaị gbọrsịḅị ịna sịḅị foinma ḅa; ịn Tamụnọ ḅẹlẹma ḅẹ nakara tomikiri ḅẹ tọrụ-ḅẹlẹ mịẹ ịn ḅẹlẹma ḅarịye;

⁵Tamụnọ etela mẹ ḅụ tọrụngbọ ẹrịarị pakịrị anga mẹ mie ini ọlọ-sịẹma ḅarịye, kụma nwẹnị anị ḅẹ karakara kụrọ mẹ sịkị ḅa. Ọkọ sime atomi ma ḅụ ị́ ḅụụ wẹrị ḅelemaa.

⁶Ini ḅẹ ja apụ kịnị awarị sọ, sọ tẹ tẹmẹ lọkọarị ereme kun, kun tẹ ḅẹrẹtọn ịn pịrịarị, anie elemu amịna mịẹ tẹ asi ḅẹ ḅẹrẹ-ḅarasii ḅẹ kuroma ponoma tẹ kịrị-kịrị akuroma fọnọ mẹnjịarị apụ,

⁷ereme tẹ sakị mamgba ḅụụ kụrọmatẹ ye ḍawọ ḅẹ ḍọkịarị apụ, kụma inetẹ karakara mẹ ḍawọ ḅo-a apụ.

⁸Janẹsị na Jamụbẹrẹsị na kẹ Mozizi na tụḅụrụ ḅara mie mịna atomi ma kẹ karakara mẹ na tụḅụrụarị ḅara — ḅioḅẹngbọ-pụụntẹ minini mẹ ḅụ ḅịkị tẹ apụ.

⁹Kụma in mu la ḅaka ḅẹ anga ofori, kẹ gotẹ ọkọ ḍukoarị, ịna ḅụ ọrụḅọ-ọrụḅọ ẹrị ḅa mịnẹ ịn oḅori-sọ lama tẹ. Anị gbọrụ ḅara mẹ mie anị paka Janẹsị na Jamụbẹrẹsị na pịrị ḅara.

¹⁰Ị́yẹrị kụma, í ì tolumaye na ì ḍumo kọn ḅara na, ḍumo ḅụ à kẹ ḅioḅẹngbọ ḅụ sụa tẹ ḅẹẹye-ḅẹẹye mịẹarị ye na, ị́ nwẹn ḍukamẹnjị tẹ; ị́ pịkị kẹ elekima sụa tẹ, ì minini na, ì ye-inema na, ị̀ ḅẹlẹma na, arị akụye inema alamarị ḅara na,

¹¹tomi ḅaa-aḅọkọ kẹ ị̀ ḍọkị ḅara na, ị̀ atọrụsiẹrị na. Anịtọkụ ḅụ na, Ikonịyọmụ ḅụ na, Lisitara na ḅụ, ị̀ ḅụụ paka aị mamgba í nimi wararị, ḅalafama ḅaa-ḅọkọ ḅio arị inema aị la ḅara! Kụma KỊNỊNYANAḄỌ ḅe arịmgba ḅio ị̀ pụkọ-pakamaḅom.

¹²Kịrayịsị Jizọsị na gbọrụ ḅụ sime tẹ Tamụnọ kịka ḍumo ḅiiarị ḅọ, ḅiiarị ḅọ ịn ḅaa-ḅọkọ kẹ mḅọ ḍọkị ḅa;

¹³si-mịẹapụ na, ḅụụ kẹ in sime-a ḅara elekimarị apụ na, in sii tọrọkọ-tọrọkọ mu ḅa, ini oḅori kẹ ja apụ sịn-arị ḅara mie ini ma sọ ja apụ oḅori kẹ ịn sịn-arị ḅara.

¹⁴Ị́yẹrị kịngẹ kụma, ịn kẹ í toluma tẹ akarakara ma ḅụ sime tọrọkọ mu, tẹ minini kụrọmaa. Ye mẹ kẹ í toluma apụ ma í in nimi wararị,

¹⁵tẹ pịkị kẹ ḅiokoroma mịnẹ ị́ kala-sakị kụra-ḅio, ị́ Fịafịa Ḍiri mẹ ḅẹ ẹkwẹn ma nimi wararị, anie inetẹ nimi kẹ ị́ kẹ mu ḅọrọma la ḅẹ ye mẹ, Kịrayịsị Jizọsị ḅụ minini nyana ḅụ.

¹⁶Fịafịa Ḍiri mẹmgba Tamụnọ tomina tẹmẹ jike tẹ ịn kẹẹm, tẹ anị kẹ karakara mẹ toluma na, kura-aye ḍiki-ịganị na, mịẹkọn aị tẹlẹma na, kura ḍumo kọn ḅụ kịnị mịẹ ḅẹ ye ḍuko na ḅụ anị mịẹye ḅụ sọm,

¹⁷anie ḅụ Tamụnọ fịrịmẹnjịarị ḅọ mẹ ḅo gbọrsịḅị tẹlẹmatẹ laa tẹ ḅọ sọ ḅẹ ḅara, iḅi mịẹye goyegoye ḅụ.