Read kalabari Hiburu 1 Bible Online

Hiburu 1 - kalabari bible

Hiburu 1

¹Ḅọrọ tẹ sakị ḅụ Tamụnọ ịkịankoroapụ ma ḅụụ ḅọrọ tẹ, tọnwa asakị na tọnwa aḅọkọ na ḅụ ẹkwẹn wamịna atẹngịapụ ma pịrịm,

²kụma mịna kunoma ene ma ḅụ ori ọ̀ Tụḅọ ḅụ ḅọrọ tẹ ẹkwẹn wa pịrị tẹ. Ọ̀ ḅụụ mie Tamụnọ ḅọrọ tẹ bebe tomikiri mẹ na So-tọrụ simearị aị mamgba na tẹmẹ ye, ori anie Tamụnọ pịkị sẹlẹ-ọkị ḅọ ḅe mịnẹ kunoma ḅụ ye mamgba ò nye sọ.

³Ọ̀ ḅụụ mie Tamụnọ ebube mẹ ḅịya pakarị ye, tẹ ori anie pịkị gbọrsịḅị Tamụnọ sime-ḅara mẹ kịkaḅọ, tẹ amịna ẹkwẹn mẹ kụrọ mẹ kẹ bebe tomikiri mẹ na So-tọrụ simearị aị mamgba na gboloma ọlọ-sịẹma wararị ḅọ. Tẹ ò tomina asi ma wẹrịso ịn pịrị ḅẹ kọrịnama mẹ kọrị sịẹma tẹso, ò mu So-ḅio Tamụnọ, Kụrọmamgba Nyanaḅọ ḅe, ama-ḅara anga lẹgị simem.

⁴Tamụnọ ọ̀ Tụḅọ ḅe mịẹ tẹ ori enjẹlị ma nẹngịm opu ḅụ, anie ọ̀ kẹ ọ̀ pịrị ẹrẹ pịkị ịna nye nẹngị ḅara.

⁵Kẹ gotẹ ọkọ ḍukoarị, jene-jene, Tamụnọ amụ enjẹlị ma ḅẹ gbọrụḅọ-sọ ḅẹẹ-a, “Ị́yẹrị anie ị̀ Tụḅọọ; mịmgba àrị ị́ Ḍa sọ tẹẹ.” Anịsakị Tamụnọ amụ pịkị gbọrụ enjẹlị sọ gbolomaye ḅụ ḅẹẹ-a, “Àrị ọ̀ Ḍa sọ ḅa, tẹ ori pịkị ị̀ Tụḅọ sọ ḅa.”

⁶Kụma Tamụnọ ọ̀ tarị tụḅọ kẹ tomikiri fịrịmarị sakị ọ̀ ḅẹẹm, “Tamụnọ enjẹlị mamgba sunsin ọ̀ pịrị.”

⁷Kụma enjẹlị ma gbolomaye ḅụ Tamụnọ ḅẹẹm, “Tamụnọ ori enjẹlị ma kẹ fẹrụ sọmarị, pịkị ori afịrịmẹnjịapụ ma kẹ kọrị-fịnị sọmarị.”

⁸Tụḅọ ḅe gbolomaye kịngẹ kụma, Tamụnọ mẹẹ: “yei, Tamụnọ, ị́ ama-da tẹ ḅẹrẹtọn mu ḅẹẹ-sakị ḅẹẹ-sakị la ḅa! Inoma ofori ḅara mie ị́ kẹ ḅẹrẹtọn ị́ atomi ma pịrịarị.

⁹Í kuraye ḅẹlẹma tẹ kura-aye ḍiki-ḅioḅuarị. Miemẹ anie Tamụnọ, ị́ Tamụnọ ḅe gotẹ ị́ sẹlẹ-ọkị yee, tẹ pịkị ị́ nyana kụn ḅụ ḅẹ ḅioḅẹlẹ mẹ mịẹtẹ anị ọ̀ kẹ ị́ jụ ḅẹ apụ ma pịrị ye nẹngị lama yee.”

¹⁰Ọ̀ pịkị ḅẹẹm, “Ị́yẹrị, KỊNỊNYANAḄỌ, sukuyọ-saakị ḅụ tomikiri mẹ tẹmẹm, tẹ ị́ pịkị ḅarana ị́ aḅara ma kẹ So ma sọ mịẹm.

¹¹Ini ịmaịn-faa ḅa, kụma Ị́yẹrị í sime ḅa; kapa sụa nwenii tẹ anị ḅuu tẹ kaan faa ḅara, anie inimgba faa ḅarị ḅara.

¹²Ị́ kapa iko ḅara kẹ arị iko ḅa, tẹ arị ḍima fama ḅa, ịn kapa ḍima ḅara. Kụma ị́yẹrị, sakị mamgba gbọrụ ḅara mẹ mie í simearị ye, anịsakị í ḍumo pịkị kunoma nyana-a.”

¹³Jene-jene, Tamụnọ amụ ori enjẹlị ma ḅẹ gbọrụḅọ-sọ ḅẹẹ-a: “Mịanga lẹgị ị̀ ama-ḅara anga, nwenii à si kẹ ị́ tọn apụ ma kẹ ị́ aḅụọ gbana ịkasiye sọma.”

¹⁴Nwẹnị ọkọ kụma, enjẹlị ma ḅọrọ tọ apụ? Ini ma anie fịrịmẹnjị Tamụnọ pịrịarị atẹmẹ, tẹ ọ̀ kẹ fịrịma tẹ ḅarasụa ḅọrọma nyana ḅẹ apụ pịrịarị apụ.