Read kalabari Hiburu 10 Bible Online

Hiburu 10 - kalabari bible

Hiburu 10

¹Juu-ḅẹ-apụ Oloko mẹ, anị karakara aị ma kịka fama-a; ịn gbala ḅọrọ anị kẹ boowa kala ḅara kẹ ḅo ḅarị iḅi aị ma tọnmam. Kuno-a ḅara kẹ, kụra, kụra ḅụ ịn gbọrụ agba ḅara mịẹarị. Ndẹẹ mị-ḅara ḅụ Oloko mẹ inetẹ mịna agba ma ḅụ ḅọrọ tẹ Tamụnọ ḍọkụma-ḅoarị apụ ma mịẹ karakarama fama ḅẹ ḅara?

²Ḅo Tamụnọ tẹkẹarị apụ ma nwẹnị karakara ḅara kẹ ịna asi ḅụ sịkịrị fịafịam ḅẹ kụma, ịn ḅarị in si mịẹ tẹ tẹmẹ-naịn-naịn nyana ḅịa, anịsakị agba mịẹ mamgba pịkị ḅo daasịẹ ḅa.

³Anị sime-ḅara, sime-ḅara sọ, kụra, kụra ḅụ ịn mịẹarị agba mẹ mịẹarị ye anie, tomi ma asi kẹ ịna ḅiokoroma.

⁴Kẹ gotẹ ọkọ ḍukoarị, nambulo na oḅori na ọmbie gbala-gbala inetẹ tomina asi sin ḅịa.

⁵Miemẹ ẹrẹsị, Kịrayịsị tomikiri mẹ ḅo ḅẹ-yearị sakị ọ̀ Tamụnọ ḅẹẹm: “Ị́ agba na ḍiepịrị-aị na ḅii-a, kụma ị́ gbọrụ oju tẹlẹma ị̀ pịrị tẹ.

⁶Bebe nama kẹ agbamịẹ-anga ọgọnọ dọkịma fama agba ma, anịanịa tomina asi sin ḅẹ tẹ mịẹarị ḍiepịrị-aị agba ma, ị́ ḅụụ-ḅẹlẹ-a.

⁷Anịtẹso à ḅẹẹm, ‘Mie yẹrịị mịanga, kẹ í ḅii ye mịẹ, Yei Tamụnọ, paa mị-ḅara mẹ anie ì gbolomaye ḅụ anị kẹẹ ḅara Oloko ḍiri mẹ ḅio.’ ”

⁸Tarịye, ori mẹẹ, “Agba na, ḍiepịrị-aị na, ị́ ḅụụ-ḅẹlẹ-a, anịanịa ini agbamịẹ-anga ọgọnọ dọkịma tẹ anama na, ịn kẹ tomina asi sin ḅẹ ẹrẹsị mịẹarị agba ma na, í ḅii-a, pịkị ị́ ḅụụ-ḅẹlẹ-a.” Karakaraye, mịna agba mamgba Oloko mẹ tọn koroma ọrụ ḅụ ini arị mịẹarị sọ, ọ̀ paa miemẹ ḍukom.

⁹Anịtẹso ọ̀ ḅẹẹm, “Mie yẹrịị mịanga, Yei Tamụnọ, ị̀ kẹ í ḅii ye mịẹ.” Mie ḅụ, Tamụnọ elemu agba mamgba saakị anga pịrị tẹ, Kịrayịsị agba mẹ kẹ arị kiri ḍima tẹ.

¹⁰Jizọsị Kịrayịsị ḅe Tamụnọ ḅiim ọ̀ mịẹ ḅẹẹ ye mịẹ tẹ ọ̀ ḅụụ kẹ gbọrụ sakị kịngẹ kẹ mịẹ agba mẹ ẹrẹsị wamịnị-mgba si ḅụ sịkịrị fịafịa tẹ.

¹¹Juu-ḅẹ-apụ agbamịẹḅọ nwẹn sin ḅọ, sin ḅọ amịna afịrị mẹnjịarị, ene, ene ḅụ, tẹ tọnwa asakị kẹ gbọrụ agba ḅara mẹ mịẹarị; kụma mịna agba ma inetẹ gbala-gbala tomina asi sin-a.

¹²Anị sime-ḅara, sime-ḅara sọ, Kịrayịsị si gotẹ mịẹ gbọrụ agba mẹ, anị kụrọ nyana mu ḅẹẹ-sakị ḅẹẹ-sakị laarị, anịtẹso ọ̀ nwẹnị Tamụnọ ama-ḅara anga lẹgị-sime.

¹³Mịọkụ ori anịanga sime tẹ koru nwenii Tamụnọ si kẹ ọ̀ tọn apụ ma kẹ ori aḅụọ gbana ịkasiye mịẹ sakị la ḅa.

¹⁴Gbọrụ agba kịngẹ mẹ ḅụ ọ̀ mịẹtẹ in si ḅụ sịkịrị fịafịamatẹ apụ ma ḅo gbọrsịḅị kara-gbasị gbamaso tẹ.

¹⁵Tẹ Fịafịa Tẹmẹ ḅe sọ anị ḅụ ò nimi ye ḍukoarị. Tarị ye, ori mẹẹ,

¹⁶“KỊNỊNYANAḄỌ ḅe ḍukom, mie àrị ini na fị ḅarị ọḅọkụ mẹ, ḅo ḅarị ene ma ḅụ: Àrị ì oloko ma kẹ ịna aḅioḅẹngbọ suu tẹ árị kẹ ịna akuroma ḅụ kẹẹ ḅa.”

¹⁷Anịtẹso, ori mẹẹ, “À ḅarị jen kẹ ịna asi ma na mbasị amịẹaị ma na kẹ ḅiokoroma ḅịa.”

¹⁸Mie ḅụ, Tamụnọ mịna aị ma wẹrịso tẹ ḅẹ sakị, ḅarị jen kẹ tomina asi sin ḅẹ agba mịẹ na-iḅi-a.

¹⁹Ọkọẹrẹsị, ị̀ amịnapụ, Jizọsị fịịm gotẹ, sọ Fịafịa-tẹịn Yọ mẹ mu ḅụ wa kiki gberie-sọ ḅarị ofori.

²⁰Ori ịwọ etela finji wa pịrịm, ḍumo wararị etela, kiki-pẹlẹ-ḅịtẹ mẹ ḅụ tolu-ḅọrọ ḅụ, anie fiearị, ori oju mẹ ḅụ tolu-ḅọrọ.

²¹Wa gbọrụ opu agbamịẹḅọ nyana wararị, tẹ Tamụnọ-warị mẹ ḅẹ kụrọ-ḅara ḅụ simearị ḅọ.

²²Mie ḅụ, ó yee wa sọma-ḅo Tamụnọ kpeki, karakara ḅioḅẹngbọ na jike-a minini na ḅụ; ḅioḅẹngbọ ma sịkịrị fịafịa, tẹ si ḅẹrẹ-ḅarasii ponoma-a tẹmẹ ḅioḅẹngbọ na minji sịkịrị vịọịmatẹ oju ma na ḅụ.

²³Ó yee wa kụrọma wa ḍuko pakamarị ḅiokpọmaye mẹ ọlọ sịẹma, wa ḅiokpọ wararị mịnẹ Tamụnọ inetẹ ò minini ye mẹ mịẹ ḅa.

²⁴Yee jụmọ la ye jụmọ ḅụ ḅẹrẹ ye sọ, ḅarasụa jụmọ-jụmọ pịrị, ḅẹlẹma na iḅi mịẹ na ḅụ.

²⁵Ó yee wa ḅo, ḅo kobiri mịẹtẹ wa wamịna ḅụụ na ịya tẹ ye mẹ ḅụ ḅara-siin ḅịa ḅara, ja apụ mịẹarị ḅara. Anie nakara, ó yee wa jụmọ-jụmọ ḅio-kụrọma tarị wa mịẹ-mịẹ ḅara nẹngị lama, ọmịnị ẹrị tẹ mịnẹ KỊNỊNYANAḄỌ ḅe Ene mẹ ḅo kpekiarị ḅara ḅụ.

²⁶Si sin gotẹ mịẹ ḅẹ jen agba ḅarị ofori, wa karakara mẹ nimi tẹrẹmẹ tọrụ-gelegele paa si mịẹ ma tọrọkọ muarị kụma.

²⁷Anie nakara, sime wa pịrị ye anie ḅalafa ḅụ sime tẹ ḅo ḅarị ḅẹrẹkọn mẹ na ḅalafama opu kọrị-fịnị mẹ na, tẹ Tamụnọ na tụḅụrụarị apụ ma dọkịma guluguluma ḅarịye mẹ na, koru!

²⁸Mozizi Oloko mẹ kan ḅọ, kan ḅọ, tẹ maa apụ, anịanịa ọkọ nẹngị apụ, paka-ḅo in nimi ḅara ḍuko, tẹ ḅẹrẹ mẹ mḅọ ọlọ-ọlọọ, gbọrụ ọkụrụkụrụ sọ nyana mḅọ pịrị-a ḅara ḅụ ini mḅọ ḅaa ḅaam.

²⁹Anị nwẹnị ọkọ sime kụma, ndẹẹ anị sime Tamụnọ Tụḅọ ḅe ḍiki-sima tomḅọ pịrị ḅẹ ḅara? Ndẹẹ anị sime Tamụnọ ọḅọkụ mẹ ḅẹ ọmbie mẹ tẹ si ḅụ mḅọ sịkịrị fịafịama ye mẹ kẹ ye-sịn-a tomḅọ pịrị ḅẹ ḅara? Ndẹẹ anị sime Ḍiki-ḅụụjịrị Tẹmẹ ḅe mịẹ simearị ḅọ mẹ pịrị ḅarị ḅara? Ọ́ paa kẹ ḅiokoromaa, mḅọ la na-iḅi fomu-ḅara mẹ ḍụḅatẹịn ḅaka ḅịa?

³⁰Kẹ gotẹ ọkọ ḍukoarị, wa miemẹ ḍuko ḅọ ḅe nimi wararị, “À gbẹẹfị ḅii ḅa, à kẹ pịkịma mḅọ gbẹẹ ḅa.” Ọ̀ pịkị ḅẹẹm, “KỊNỊNYANAḄỌ ḅe ori atomi ma kọn ḅa.”

³¹Anị kpọma tẹmẹ-naịn-naịnmaye sọ ḅa, tomḅọ ḍumo wararị Tamụnọ ḅe aḅara-ḅio ḅịkị sọ kụma!

³²Ọ́ ḅọrọtẹ sakị ḅụ ye ọmịnị na sime-ḅara kẹ ḅiokoromaa. Arị ene ma ḅụ, tẹ Tamụnọ bele mẹ ḅo ọ́ la sakị mẹ, ọ́ kpọma tọnwa ḅụụ-fụka dam, anịsọ arị ọ́ nẹngịma-a.

³³Ja asakị tomina ogboku ḅụ ini ọ́ mịẹ-sima tẹ si ḅara kẹ ọmịnị na mịẹm, osi asakị ma ḅụ ọ́ tẹlẹma tẹ ịn mịna aị ma kẹ mịẹ apụ ma ḅụụ sọm.

³⁴Ikoliapụ ẹrị-ẹrị atọrụsiẹrị mie ọmịnị sọ ẹrị ye, tẹ ini ọ́ nyana aị mamgba fọịn ọkị fama sakị, ó ḅioḅẹlẹ ḅara kẹ fa mẹ daa-ọkịm, ó nimi wararị mịnẹ ọ́ paa iḅi mịna aị ma nẹngị lama ye nyana wararị ẹrẹsị, anie sime gbamaso ḅarị ye mẹ.

³⁵Ọkọẹrẹsị, ọ́ ḍụkụ tẹ ọ́ nyana wararị kụrọtẹ ḅioḅẹngbọ mẹ ọmịna ḅụ sọma, anị opu gbẹẹ-ye kẹ ḅo ọ́ pịrịarị ẹrẹsị.

³⁶Ó ye-inema na-iḅim, mịẹtẹ ọ́ Tamụnọ ḅii ye mịẹ, tẹ ò minini ye mẹ nyana ḅẹ ḅara.

³⁷Kẹ gotẹ ọkọ ḍukoarị, Fịafịa Ḍiri mẹ ḅẹẹarị, “Paa boowa sakị kẹ ala ḅa, tẹ ḅo ḅarị ḅọ ḅe ḅo ḅa; ọ̀ ḅarị ala ọkọ nẹngị ḅịa.

³⁸Anị sime-ḅara, sime-ḅara sọ, ị̀ atomi tẹ karakaraye-mịẹapụ ma, in minini nyana tẹ ḍumo ḅa; kụma ịna ḅụ tọrụ pịkị ọḅụ ḍiki ḅọ emi ḅẹḅẹ, àrị mḅọ ḍiki-ḅioḅẹlẹ ḅịa.”

³⁹Wamịnị anie tọrụ pịkị ọḅụ ḍiki tẹ fa tẹ apụ-a. Anie nakara, wa minini tẹ ḅọrọma tẹ.