Read kalabari Hiburu 6 Bible Online

Hiburu 6 - kalabari bible

Hiburu 6

¹Ọkọẹrẹsị, ó yee wa ḍawọye mẹ ḅụ mẹnjị tọrọkọ mu, tẹ ye-nimi ḅiri la tẹ apụ ḍawọ na-iḅi aị toluma, tẹ Kịrayịsị etela mẹ ḅẹ Suku-saakị aị ma ḅụ ḅara-siin. Wa Kịrayịsị etela mẹ ḅẹ Suku-saakị gboloma aị tẹ wa toluma sime aị ma ḅụ ḅara-siin ḅa, tẹ ḅarị jen Suku-saakị aị toluma ḅịa — anie si amịẹaị ḅụ pịkị tẹ Tamụnọ minini na;

²minji-sara gboloma toluma aị na, ḅara kẹ sịḅị ḅụ gbana na, fị-ḅụ-saakị na, kunoma ḅẹrẹkọn mẹ na.

³Ó yee wa tọrọkọ mu! Tamụnọ minini kụma, miemẹ mie wa mịẹ ḅarịye.

⁴Ndẹẹ tomḅọ inetẹ amịna mininiye sịkị tẹ apụ sịn pịkị-ḅo tẹ kẹ sin si ḅụ pịkị ḅụ suu ḅẹ ḅara? Ini ma gbọrụ sakị ḅụ ịn Tamụnọ bele mẹ ḅio simem, so ḍiepịrịye mẹ sọ ịn gbọn ḅẹlẹ lamam, tẹ pịkị Fịafịa Tẹmẹ ḅe ḅụ ịna ḍiekiri nyanam;

⁵ini ḅarana Tamụnọ ẹkwẹn mẹ iḅim mẹ lekirim, tẹ tọrọkọ-jụ ḅo ḅarị sakị mẹ ḅẹ akụrọ ma sọ ḅo ịn sarama tẹ.

⁶Mịna aị mamgba ịna ḅụụ mịẹ fama tẹso, mie ini ịna mininiye mẹ sịkị ye! In sin pịkị-ḅo mẹ ḅarị inetẹ mịẹ ḅẹ ye-a, kẹ gotẹ ọkọ ḍukoarị, ini ma in sin Tamụnọ Tụḅọ ḅe kẹ ẹngbẹsẹ-sịn ḅụ ḅakụarị, tẹ ọ̀ kẹ ama-karakara-ogbo ḅụ ḅụụ-jịrị ḅụ suuarị.

⁷Eene koro, koro tẹ eene-minji mẹ mẹnị ọkị tẹ, iḅi ḍiḅi aị pakama-ḅo arị ḍiḅi apụ pịrịarị kiri, anie Tamụnọ bomatẹ kiri.

⁸Kụma anị nwẹnị nangị amẹẹ na osuka amẹẹ na rẹ pakama-ḅoarị ḅẹḅẹ, anị kiri mẹ anị gbọrụ iḅi sọ nyana-a; anị sime Tamụnọ wori ḅẹ ye pịrị tẹ, fịnị mie pịkị anị guluguluma ḅarịye.

⁹Kụma, ì iḅi amịnapụ, wa mị-ḅara mẹ kẹ ẹkwẹn-arị sọ, wa paa ọmịna ḅụụ ḅiokpọ nyana wararị. Wa nimi wararị mịnẹ ọmịna ḅọrọma mẹ ḅụ ọ̀ nyana aboma ḅakam.

¹⁰Tamụnọ ò tomḅọ la kiri kẹ mḅọ pịrị-a so so-a. Ọ́ kọrị ọ̀ pịrị kọrịnama mẹ ọ̀ kẹ ḅioḅọrọma ḅịa, anịanịa ò gotẹ ọ́ nyana ọmịna pembema Kịrayịsị ḍukamẹnjịapụ pịrị ḅẹlẹma mẹ, anie ḅarasụa ịn pịrị ḅụ ó ḍie pakama ye mẹ, tarị tarị ọ́ mịẹ tẹ, pịkị mịọkụ mịẹarị ḅara mẹ.

¹¹Wa ḅii lamarị ye anie, ọmịna ḅụ ọrụḅọ-ọrụḅọ mḅọ nyana ḅio-sẹsẹ mẹ ọlọ mu kunoma la, mịẹtẹ ọ́ kẹ ḅiokpọma wararị aị ma ḅo ọmịna ḅara la ḅarị ḅara.

¹²Wa ḅii-a mịnẹ ọ́ ḅụụ-lọkọ nyana, kụma ó minini nyana wararị apụ, tẹ inema tẹ Tamụnọ minini tẹ ye mẹ nyana ḅẹ tẹ apụ ḅara sime.

¹³Tamụnọ ye minini Ebira-amụ pịrị sakị, ọ̀ karịm mịnẹ ò minini ye mẹ ọ̀ mịẹ ḅa. Ọ̀ nẹngị jụmọ ofori sakị goyegoye, ori ẹrẹ mie ọ̀ kẹ ye mẹ karị yee.

¹⁴Ori mẹẹ, “À minini ị́ pịrịm, àrị í boma tẹ tọnwa awọmẹ kẹ ị́ pịrị ḅa.”

¹⁵Ebira-amụ ye-inemam ẹrẹsị Tamụnọ minini ọ̀ pịrị ye mẹ ḅo ọ̀ ḅara lam.

¹⁶Tomḅọ ye karị sakị mḅọ nẹngị ḅọ ẹrẹ mie mḅọ kẹ ye mẹ karị, karị ye, tẹ mḅọ ọkọ karị tẹ ḅẹḅẹ, ḅẹrẹ goyegoye pẹlẹ tẹ.

¹⁷Tamụnọ minini tẹ ye mẹ nyana ḅẹ apụ ma, ò ḅii lamam ọ̀ mịẹ tẹ in nimi mịnẹ ọ̀ ḅịḅị ḍima ḅịa, miemẹ mie ò gotẹ ye karị kẹ ò minini ye mẹ ḅụ sụa ye.

¹⁸Ọkọẹrẹsị mịna maaịn ma emi, mịnẹ ò minini ye mẹ inetẹ ḍima ḅịa, tẹ ọ̀ pịkị iruo ḅịa. Mie ḅụ, wamịnị ọ̀ ḅụụ sịḅị-kikima-yọ ḍọkị-ẹrị tẹ apụ ma, kpọma ḅiokpọ tẹ iḅiọkụ ọ̀ kẹ wamịna tọrọkọ koroma wararị ḅiokpọmaye mẹ fịnama sịẹmarị.

¹⁹Mị ḅiokpọmaye mẹ lụmọ sọ wamịna ḍumo pịrị wararị. Wa ḅiokpọ wararị mịnẹ anị fa ḅịa ḅara sime tẹ, anị So-ḅio ḅẹ Tamụnọ-warị mẹ ḅẹ kiki pẹlẹ ḅịtẹ mẹ tolu-ḅọrọ mu anị ḅẹ ḅioju mẹ laarị.

²⁰Jizọsị wa gotẹ tarị mu anịanga la tẹ, tẹ Sịḅịda-Agbamịẹḅọ sọ gbamaso tẹ, Mẹlịkizẹdẹkị agbamịẹ ọrụ sime-ḅara.