Read kalabari Hiburu 7 Bible Online

Hiburu 7 - kalabari bible

Hiburu 7

¹Ḅị Mẹlịkizẹdẹkị ḅe anie Salẹmụ ḅẹ amadaḅọ, tẹ pịkị Geletẹịn Tamụnọ ḅe agbamịẹḅọ. Ebira-amụ ori inia amadapụ nẹngịma ọmụ mẹ ḅụ pịkị-ḅoarị ogbo, Mẹlịkizẹdẹkị ori na donia tẹ ò bomam,

²tẹ Ebira-amụ nwẹnị ọmụ mẹ ḅụ ọ̀ fọịn ḅo aị mamgba kẹ oyia akiri ḍiya ḅẹ gbọrụ kiri kẹ ọ̀ pịrị. (Tarị ye Mẹlịkizẹdẹkị ẹrẹ mẹ fiearị ye anie “Karakara mịẹ Amadaḅọ”, tẹ ori Salẹmụ ḅẹ amadaḅọ ẹrẹsị ori ẹrẹ mẹ pịkị fiearị ye anie “Dein Amadaḅọ.”)

³Mẹlịkizẹdẹkị ḅe ọ̀ ḍa, anịanịa ò iyingi, anịanịa ọ̀ paka-furo ḅẹ gbọrụḅọ-sọ gbolomaye kẹẹ koro anga ofori; ori ḅẹ iyi, anịanịa fịị, gbolomaye sọ ḍiri ḅio ofori. Ọ̀ kịkarị ḅọ anie Tamụnọ Tụḅọ ḅee, ori agbamịẹḅọ sọ gbamasom.

⁴Mie ḅụ, ọmịnị ori opu la ḅara ẹrị tẹ. Ebira-amụ wamịna atẹngịḅọ ḅe, tẹ kịnị ẹrẹ naa tẹ ḅọ ḅe, ọmụ ḅụ ọ̀ fọịn ḅo aị kẹ oyia akiri ḍiya ḅẹ gbọrụ kiri kẹ ọ̀ pịrịm.

⁵Anịsakị Livayị furo-ḅẹ-apụ tẹ agbamịẹapụ ma, Oloko mẹ tọnm mịnẹ ini Izirẹlịapụ ma ḅara ịn nyana aị kẹ oyia akiri ḍiya ḅẹ gbọrụ kiri ọkịị, anie ịna sịẹ ḅẹ apụ ma ḅara-o, ini ma sọ Ebira-amụ furo-ḅẹ-apụ sọ.

⁶Mẹlịkizẹdẹkị ḅe Livayị furo ḅụ ọ̀ paka-a, kụma ori Ebira-amụ ḅara ḅụ ye kẹ oyia akiri ḍiya ḅẹ gbọrụ kiri ọkị tẹ ò bomam, anie Tamụnọ minini aị ma daa-ọkị tẹ tomḅọ ḅe.

⁷Piki-pikiye-ofori ḅara ḅụ, kịnị-bomarịḅọ mẹ ḍụḅa mḅọ bomarị ḅọ nẹngịm.

⁸Gbọrụ pakịrị anga ḅụ ḍiki kụma, agbamịẹapụ ma tẹ ye kẹ oyia akiri ḍiya ḅẹ gbọrụ kiri ọkị apụ ma anie fịị, fịị atomi, Mẹlịkizẹdẹkị pakịrị anga kụma ye kẹ oyia akiri ḍiya ḅẹ gbọrụ kiri mẹ ọkị ḅọ ḅe anie fịị, fịị-a ḅọ, anie Fịafịa Ḍiri mẹ ḅẹẹarị ḅara.

⁹Tẹ anị sime-ḅara ḅụ, Ebira-amụ ye kẹ oyia akiri ḍiya ḅẹ gbọrụ kiri mẹ gbẹẹ sakị, Livayị (ó furo-ḅẹ-apụ ye kẹ oyia akiri ḍiya ḅẹ gbọrụ kiri da ḅọ ḅe) sọ anị gbẹẹm.

¹⁰Kẹ gotẹ ọkọ ḅẹẹarị, anị sakị Livayị amụ iyi-a sọ, kẹ ye ḍuko, ḍuko ḅara ḅụ, ori ori atẹngịḅọ Ebira-amụ ḅe oju ḅio simem, Mẹlịkizẹdẹkị ḅe Ebira-amụ na donia sakị.

¹¹Livayị agbamịẹ ọrụ mẹ mie Tamụnọ ḍiki tẹ Oloko mẹ kẹ Izirẹlịapụ ma pịrị ye. Livayị agbamịẹ ọrụ mẹ ḅẹ agbamịẹapụ ma kọrịnama mẹ ḅụ ḅẹẹ, ḅẹẹ ye ofori namịna, kịrị agbamịẹ ọrụ paka na-iḅi-a, anie Mẹlịkizẹdẹkị kịka agbamịẹḅọ, Erọnị ọrụ ḅụ ḅo ḅọ-a.

¹²Kẹ gotẹ ọkọ ḍukoarị, agbamịẹ ọrụ mẹ ḍima sakị goyegoye, oloko mẹ ḅụ sọ ḍima paka tẹ.

¹³Anịsakị, Wanyanaḅọ ḅe, ḅụụ ḅụ wa mịna aị ma ḍukoarị ḅọ ḅe, ori jen furo-ḅẹ-ḅọ, tẹ ò furo-ḅẹ-ḅọ amụ jen sakị agbamịẹḅọ sọ-a.

¹⁴Tọnwa apụ nimi lama wararị mịnẹ ori Juda furo-ḅẹ-ḅọ; anịsakị Mozizi agbamịẹapụ ḅẹrẹ ḍuko sakị, ọ̀ mị furo mẹ go-a.

¹⁵Ḅẹrẹ mẹ gbọrsịḅị giregire tarị ḅara mẹ nẹngịarị; ḅie kịrị agbamịẹḅọ ḅe tolu-paka tẹ, anie Mẹlịkizẹdẹkị kịkaḅọ ḅe.

¹⁶Tomi ye kẹ ọrụtọn tọn ḅara na oloko na ḅụ ini ọ̀ kẹ agbamịẹḅọ sọma-a, kụma kuno, kuno-a ḍumo kụrọ ḅụ.

¹⁷Kẹ gotẹ ọkọ ḍukoarị Fịafịa Ḍiri mẹ ḅẹẹarị, “Ị́ agbamịẹḅọ sọ gbamaso ḅa, Mẹlịkizẹdẹkị agbamịẹ ọrụ sime-ḅara.”

¹⁸Elemu ịn kẹ ye tọn tọn ḅara mẹ ịn saakị sikima tẹ, anị kụrọ nyana-a, tẹ ịn pịkị anị kẹ mịẹ mịẹye ḅarị ofori ẹrẹsị.

¹⁹Kẹ gotẹ ọkọ ḍukoarị, Mozizi Oloko mẹ inetẹ gberie sọ mịẹ iḅima fama-a. Tẹ mịọkụ iḅi anị nẹngị ḅiokpọmaye ịn nwẹn ọkị-ḅo tẹ, wa anị ḅụ ḅọrọ mu Tamụnọ kpekiarị.

²⁰Kẹ anie ḅụ sụa, Tamụnọ karị ye mẹ pịkị emi. Osi apụ ma agbamịẹapụ sọ sakị, ọkọ sime karị ye ofori.

²¹Kụma Jizọsị ḅo agbamịẹḅọ sọ sakị, Tamụnọ karịm, “KỊNỊNYANAḄỌ ḅe karị tẹ à pịkị ì kuroma ḍima ḅịa: ‘Ị́ agbamịẹḅọ sọ gbamaso ḅa.’ ”

²²Mie ḅụ, mị kịrị mẹ mịẹtẹ Jizọsị sịẹ iḅi jen nẹngị ọḅọkụ pịrị ḅọ sọ tẹ.

²³Jen kịrị emi: osi agbamịẹapụ ma ini tọnwa apụụ, ịn fịị fịị tẹ ḅarị kọrị gbamaso-a ẹrẹsị.

²⁴Kụma Jizọsị ḅe ò ḍumo tọrọkọ-tọrọkọ muarị, tẹ agbamịẹḅọ kọrịnama tẹ ọ̀ kọrịarị ye mẹ saḅama jụmọ pịrị-a.

²⁵Tẹ anie ḅụ, ori inetẹ ọ̀ ḅụụ ḅọrọ Tamụnọ ḍọkụma-ḅoarị apụ ḅọrọmarị mịọkụ na, ḅẹẹ-sakị ḅẹẹ-sakị na ḅụ, ò ḍumo gbamasoarị tẹ sakị mamgba Tamụnọ tọrọkọ ịn ḍụarị ẹrẹsị.

²⁶Mie ḅụ, Jizọsị anie wamịna ḅụụ-fụka mịẹ pẹlẹarị Sịḅịda-Agbamịẹḅọ ḅee. Ọ̀ fịafịa wararị; ọ̀ ḅụụ ḅẹẹ-ḅẹẹye anịanịa si ofori; si-mịẹapụ ḅụ Tamụnọ ọ̀ saakị ḅelema wararị, tẹ ori iwoma mu So ma ḅọrọ tẹẹ.

²⁷Ori osi Sịḅịda-Agbamịẹapụ ma kịka-a; ori ene-ḅaaene-ḅaaene amịna asi gotẹ agbamịẹ tẹrẹmẹ, ḅo pịkị tomi ma asi ma agbamịẹ ḅụụ-fụka nyana-a. Gbọrụ agba ngẹrị mie ọ̀ mịẹ tẹ kẹ arịmgba gbaịn ye, ori amịna ḅụụ kẹ mịẹ agba mẹ.

²⁸Mozizi Oloko mẹ la-a atomi tọn-arị ịn Sịḅịda-Agbamịẹapụ sọ; kụma Tamụnọ karị tẹ minini ye mẹ, anie Oloko mẹ ḅọrọ tẹrẹmẹ ḅo ye mẹ, Tụḅọ ḅe tọnm, anie Tamụnọ mịẹ tẹ laa gbamaso tẹ ḅọ ḅe.