Read kalabari Jemụsị 1 Bible Online

Jemụsị 1 - kalabari bible

Jemụsị 1

¹Jemusị, Tamụnọ na KỊNỊNYANAḄỌ Jizọsị Kịrayịsị na fịrịmẹnjịḅọ ḅe ḅara ḅo ḍiri mẹ: Ḅii-ḅịḅị sime Tamụnọ atomi ma tẹ bebe tomikiri mẹ ḅụ gala-gala wararị apụ mamgba pịrịị.

²Ị̀ amịnapụ, ọmịnị ọmịna aḅụụ kẹ iḅi fụḅara nyana apụ ọkịị, daaḍiki ḅara, ḅara ḅo, ḅo ọ́ laarị ḅẹḅẹ,

³kẹ gotẹ ọkọ ḍukoarị, ó nimi ḅara ḅụ, ọmịna minini daaḍiki da-tolu-ḅọrọ tẹ ḅẹḅẹ, anị dogi-ḅo ḅarịye anie, ịnyọ nyana tẹ akụye inema alama.

⁴Ọmịnị ẹrị mịnẹ ọmịna ye-inema ó dogi tọrọkọ mu lamam, ọḅụ da-a ḅara ḅụ, mịẹtẹ ó bebe tẹ kara-gbasị tẹ ḅara sime ḅẹ ḅara, gberie-sọ ọmịna ḅara kọn-a ḅara.

⁵Kụma ọmịna ḅụ nimi nyana-a ḅọ emi-emii, mḅọ Tamụnọ tẹkẹẹ, ori anị kẹ mḅọ pịrị ḅa; kẹ gotẹ ọkọ ḍukoarị, Tamụnọ anie tọn-a ḅara na ḍiki-ḅụụjịrị nyana ḅara na kẹ ye kẹ kịnị mamgba pịrịarị ye.

⁶Kụma ị́ tẹkẹarị sakị, minini kụrọma, tẹ ḅio maaịn, maaịn tọnma gbala-gbala. Ḅio maaịn, maaịn tọn-arị ḅọ mẹ kịkarị ye anie abajị ḅio ḅẹ ọnụngọ, tẹ fẹrụ ḅakụ iwo-na-ideri-naarị ye.

⁷Ọkọ sime tomḅọ mẹ mḅọ kuroma ma mịnẹ mḅọ KỊNỊNYANAḄỌ ḅe ḅara nyana ḅẹ ye emi;

⁸mḅọ anie maa ḅioḅẹngbọ sụa wararị tomḅọ, inetẹ gbọrụ kiri sịẹ-a ḅọ.

⁹Kịrayịsị ḍukamẹnjịḅọ tẹ igoin kiri ḅụ Tamụnọ saakị-gelema ḅọ mẹ, mḅọ ḅioḅẹlẹẹ,

¹⁰anịsakị ngọ-kọn wararị Kịrayịsị ḍukamẹnjịḅọ mẹ Tamụnọ mḅọ sin iderima sakị mḅọ ḅioḅẹlẹẹ. Kẹ gotẹ ọkọ ḍukoarị, ngọ-kọn ḅọ mẹ piri-ḅio-ḅẹ fịlawa kpatụ fa ḅara mie mḅọ ḅọrọ-so ḅarịye.

¹¹Ịrụa paka tẹ anị ḅẹ ọfịrị mẹmgba kẹ ḅịya sịn mẹ sarama tẹ anị dọkịmarị; anịtẹso anị ḅẹ fịlawa mẹ siin-koro tẹ anị ḅẹ iḅi mẹ gulugulumam. Anị gbọrụ ḅara mẹ mie ngọ-kọnḅọ mẹ gulugulu ḅarị ḅara, mḅọ amịna tuḅo kọn ma ḅọrọarị ogbo.

¹²Ḅioḅẹlẹ sime anị ḅọ mẹ pịrịị, anie ịn sọkịrị ḍiki fama tẹ paa amịna minini ḅụ sịẹ-kụrọ wararị ḅọ mẹ, kẹ gotẹ ọkọ ḍukoarị, ọkọ sime sọkịrị mẹ ḅụ tolu-ḅọrọ tẹ ḅọ mẹ mḅọ Tamụnọ minini ọ̀ ḅẹlẹma apụ ma pịrị gbẹẹ-ye mẹ nyana ḅa.

¹³Ini ọkọ sime asọkịrị kẹ tomḅọ daaḍikiarị ḅẹḅẹ, mḅọ ḅẹẹ ma, “Mị daaḍiki mẹ Tamụnọ ḅara ḅoarị.” Kẹ gotẹ ọkọ ḍukoarị, gbọrụ siye sọ inetẹ Tamụnọ daaḍiki ḅịa, anịsakị ọ̀ pịkị siye kẹ gbọrụḅọ-sọ daaḍiki ḍiki-a.

¹⁴Kụma tomḅọ mịẹ ḅẹ-ḅiiarị siye ḅẹ kuroma mie mḅọ fọnọ mu daaḍiki ḍiein ḅio koromarị ye.

¹⁵Siye kẹ ḅioḅẹngbọ sụa wẹrị mẹ kịkarị ye fura; anị iyiarị ye si; tẹ si mẹ ḍụḅa paka-ḅo tẹ ḅẹḅẹ, anị nwẹnị fị iyiarị.

¹⁶Ị̀ iḅi amịnapụ, ọ́ ḍụkụ tẹ gberie-sọ oḅori kẹ ọ́ sịn ma.

¹⁷Iḅi ye pịrị ḅara goyegoye na, iḅi ḍiepịrịye goyegoye na So-ḅio ḅoarị; Tamụnọ, So-ḅio ḅẹ abele ma Tẹmẹḅọ, tẹ ḍima ḍima-a ḅọ ḅe, anịanịa vuunma pịkị tẹ kanakana pakama-a ḅọ ḅe, ḅara ḅụ mie anị sime tẹ koro-ḅoarị.

¹⁸Ọ̀ ḅụụ-ḅẹlẹ ḅara ḅụ ori ḅarana wa kẹ ḅo ḍumo wararị atomi mịẹm, ọ̀ karakara ẹkwẹn mẹ ḅụ, mịẹtẹ ọ̀ tẹmẹ aị mamgba ḅụ wamịnị tarị kiri ọkị ḅẹ ḅara.

¹⁹Ị̀ iḅi amịnapụ, ó miemẹ kẹ ḅiokoromaa! Ọrụḅọ-ọrụḅọ sarasarama ye naa, kụma mḅọ fọnya ẹkwẹn ma, pịkị fọnya ịganịma.

²⁰Tomḅọ ịganị kẹ Tamụnọ ye tọn ḅara ḅẹ karakara mịẹ mịẹ-a.

²¹Ọkọẹrẹsị, ọ́ sịḅị-ngụngụnma amịẹaị kẹ mịẹ-mịẹye sọma na, si-sịḅịḅio ḍumo na wẹrị ḅelema ọmịna aḅụụ. Ọ́ sịḅị-tuu Tamụnọ pịrị, tẹ ori ọmịna aḅioḅẹngbọ ḅụ ḍiḅiarị ẹkwẹn mẹ daa-ọkị, anị inetẹ ọ́ ḅọrọma ḅa.

²²Ọmịnị oḅori kẹ ọmịna aḅụụ sịn tẹ ẹkwẹn mẹ poki ngẹrị mịẹ ma; ọ́ pịkị anị kẹ mịẹye ḅụ suu.

²³Papaa ẹkwẹn mẹ poki tẹ anị kẹ mịẹye ḅụ suu-a ḅọ mẹ kịkarị ḅọ anie tẹmẹ-ḍikiye ḅio amịna ḅụụ ḍikiarịḅọ.

²⁴Mḅọ iḅiọkụ amịna ḅụụ ḍikiarị, tẹ mḅọ sikima gbọrụ sakị mḅọ mḅọ sime-ḅara kẹ ḅioḅọrọma tẹ.

²⁵Kụma ḅẹḅọ-ḅẹḅọ tẹ kweinma omoni ḅara-ḅio kịnị pakama-ḅoarị kara-gbasịtẹ oloko mẹ ḅio ḍiki tẹ, sakị mamgba anị kẹ ḅiokoromarị, tẹ poki ngẹrị poki tẹ kẹ ḅioḅọrọmaa ḅọ, kụma anị kẹ mịẹye ḅụ suuarị ḅọ, anị tomḅọ mẹ anie Tamụnọ boma ḅarị ḅọ, mḅọ mịẹarị ye ḅụ.

²⁶Tụḅọ emi tẹ ḅẹẹarị mḅọ Tamụnọ nimi wararị? Mḅọ amịna ḅẹlẹ ọlọ-a ḅẹḅẹ, mḅọ Tamụnọ nimi mẹ ye ḅụ ofori, tẹ mḅọ pịkị oḅori kẹ amịna ḅụụ sịn-arị.

²⁷Tamụnọ Ḍaḅọ ḅe kẹ kpaịn tẹ, karakara Tamụnọ nimi sịn-arị ye anie mie: ḍapụ na iyingi apụ na fịtẹ awọmẹ na, diapụ-fịtẹ-ereme na, ḍikiḍiki ịna tọrụsiẹrị ḅụ, tẹ pịkị mị tomikiri mẹ ḅụ fịafịa ḅara kẹ ḅụụ wẹrị.