Read kalabari Jemụsị 2 Bible Online

Jemụsị 2 - kalabari bible

Jemụsị 2

¹Ị̀ amịnapụ, wa Nyanaḅọ Jizọsị Kịrayịsị minini apụ ḅara ḅụ, anie ebube KỊNỊNYANAḄỌ ḅe, gbala-gbala ó tomi ẹrị tẹ kẹ ini na mịẹarị aḅara ḅụ ọ́ kịrị pakama ma.

²Kẹ ọkị, ó kobiri wararị anga ḅụ ngọ-kọn tẹ golu na iḅi kapa na ḅiri ḅọ nwẹnị sọ-ḅo, tẹ igoinḅọ tẹ kanị-kanịtẹ kapa sụa ḅọ sọ-ḅo sọ-ḅo,

³ó nimiatẹ ḅiri gbasị wararị ḅọ ḅe ḅẹẹ, “Mịanga simearị iḅitẹịn kiri mẹ ḅụ lẹgịị,” tẹ igoinḅọ ḅe ḅẹẹ, “Anịanga sịẹsimee, anịanịa ḅo mịanga ị̀ ḅụọ-suku kiri-ḅio lẹgịị,” ḅẹẹ ḅẹẹ,

⁴anie ḅụ ọmịnị ọmịna ogboku kịrị pakama ḅẹrẹ-ḅarasii nyana tẹ, pịkị si akuroma ḅụ ḅo aḅẹrẹkọn kọn tẹ.

⁵Ị̀ iḅi amịnapụ, ó pokii! Tamụnọ mị tomikiri mẹ ḅẹ igoin-apụ ma sẹlẹ-ọkịm, in ḅo minini ngọ-kọn tẹ ò minini ọ̀ ḅẹlẹma apụ pịrị Ama mẹ nyana.

⁶Kụma ọmịnị igoin-apụ ḍiki-simarị! Ó ponoma tẹ ọ́ fọnọ ḅẹrẹkọn-apụ tọrọkọ muarị apụ ma tọ apụ? Ngọ-kọnapụ ma!

⁷Ini mie pịkị ịn kẹ ọ́ pịrị tẹ iḅi ẹrẹ mẹ ḍuko-simarị apụ ma.

⁸Ọ́ karakaraye mẹ mịẹarị apụ sọ ḅa, ọ́ Tamụnọ Ama-da tẹ ḅẹrẹtọn-arị anga mẹ ḅẹ oloko mẹ koko, koko, anie Fịafịa Ḍiri mẹ ḅio emi ye mẹ, “Ị́ ị̀ ḅụụ ḅẹlẹma ḅara kẹ ị́ na kpekitẹ anga ḅọ ḅẹlẹmaa.”

⁹Kụma ọ́ tọrụngbọ kẹ ye ẹrị ḅara kẹ tomi na mịẹ-mịẹ, ó si mịẹ tẹ, anịsakị Oloko mẹ pịkị ḅẹrẹ-pẹlẹ ọmịna ḅara sima ḅa, oloko kan apụ ḅara ḅụ.

¹⁰Ḅẹḅọ-ḅẹḅọ tẹ gbọrụ oloko kịngẹ kan ḅọ, mḅọ arịmgba kan tẹ.

¹¹Kẹ gotẹ ọkọ ḍukoarị, “Sẹfị ma” ḅẹẹ gbọrụḅọ ḅe mie pịkị ḅẹẹ ye, “Kịnị-ḅa ma.” Ị́ nwẹnị sẹfị-a sọ, ị́ kịnị-ḅaaḅa, ị́ paa oloko kan ḅọ sọ tẹẹ.

¹²Ọmịnị omoni ḅara-ḅio kịnị pakama-ḅoarị Oloko ḍiki tẹ kọn ḅarị atomi ḅara kẹ ẹkwẹn kọn tẹ pịkị anị ḅara kẹ ye mịẹ.

¹³Kẹ gotẹ ọkọ ḍukoarị Tamụnọ ọkụrụkụrụ nyana ḅara kẹ ọkụrụkụrụ nyana kịnị pịrị-a ḅọ kọn ḅịa. Kụma ọkụrụkụrụ mẹ kụrọ tẹịnm Tamụnọ ḅẹrẹkọn ḅụ.

¹⁴Ị̀ amịnapụ, gbọrụḅọ nwẹnị ḅẹẹm mḅọ minini nyana wararị, tẹ mḅọ amịẹaị ọkọ sime-a kụma tọ iḅi anị ḅụ emi? Anị minini mẹ inetẹ mḅọ ḅọrọma ḅẹ?

¹⁵Ọkị mịnẹ mịnapụ ma ḅụ owiapụ, anịanịa ereme emi tẹ sụa ḅẹ akapa na fị ḅẹ fịye na ḅụụ-fụka nyana wararị.

¹⁶Anị tọ iḅi kẹ ịn mịẹ ḅẹ ị́ papaa ḅịḅị kẹ ịn ḅẹẹ, “Tamụnọ ó bomaa! Ori ọmịna oḅoku mẹ dee tẹ pịkị ọ́ pịrị fị furo ḅinmaa!” ọmịnị ịn kẹ anga ḅẹ aị ḍọkị ịn pịrị-a kụma?

¹⁷Anie anị pịkị sime minini pịrị ḅara: anị ngẹrị emi tẹ kọrịnama anị ḅụ ofori ḅẹḅẹ, anị papaa fịtẹ koro simearị.

¹⁸Kụma gbọrụḅọ ḅẹẹ ḅa, “Gbọrụ tomḅọ minini nyana wararị, jụmọ kọrịnama nyana wararị.” Ị̀ pakịrị ḅịḅị anie, “Ị́yẹrị tomḅọ inetẹ kọrịnama ofori ḅara kẹ minini nyana ḅẹ ḅara mẹ kẹ ì ḍie. Yẹrị ị̀ akọrịnama ḅụ ì minini kẹ í ḍie ḅa.”

¹⁹Gbọrụ Tamụnọ kịngẹ mie emi ye mẹ í minini? Iḅim! Oru ma sọ minini wararị, tẹ oju sẹkịarị, ḅalafa ḅụ.

²⁰Ị́yẹrị oḅori-ḅọ! Í ḅiiarị jụmọ kẹ í toluma, mịnẹ kọrịnama ḅụ ḅụ ofori minini mẹ anie ye ḅụ ofori ye?

²¹Ndẹẹ wamịna atẹngịḅọ Ebira-amụ ḅọrọ tẹ Tamụnọ na kura ḅara? Ori ọ̀ kọrị kọrịnama ḅụ ḅọrọm, anie ori ọ̀ tụḅọ Ayịzịkị kẹ agbamịẹ-anga ḅụ agba mịẹ Tamụnọ pịrị sakị mẹ.

²²Ọmịnị inetẹ ẹrị-a? Ò minini na ori akọrịnama na gbọrụ ḅụ mẹnjịm; ori akọrịnama ma mịẹtẹ ò minini bebe ye sọm.

²³Tẹ Fịafịa Ḍiri mẹ ḍuko ye mẹ ḅo mịẹ tẹ ye sọ tẹ, “Ebira-amụ Tamụnọ mininim, tẹ ò minini nyana ye mẹ ẹrẹsị Tamụnọ karakaraye-mịẹḅọ ḅara kẹ ori ọkịm.” Tẹ mie ḅụ ini Ebira-amụ kẹ Tamụnọ ikiaḅọ sịnm.

²⁴Ọkọẹrẹsị, ọmịnị ẹrị tẹ mịnẹ tomḅọ akọrịnama ḅụ mie mḅọ ḅọrọ tẹ Tamụnọ na kurarị ye, mḅọ minini ḅụ kịngẹ-a.

²⁵Anị gbọrụ ḅara mie anị sime Rehabụ, ama-mẹnjị-ẹrẹḅọ ma pịrị ḅara. Á Tamụnọ na kura ḅọ sọm, árị akọrịnama ḅụ, anie arị Izirẹlịapụ kẹ fịrịma tẹ toluma ama mẹ sime-ḅara ḍiki ḅẹ mu apụ ma, da warị suu tẹ pịkị ḅarasụa ịn pịrị tẹ ịn jen etela ḅụ tolu-ḅọrọ so ye mẹ.

²⁶Mie ḅụ, tẹmẹ mẹ ofori oju fịị tẹ ḅara, anie pịkị kọrịnama ḅụụ ḅụ ofori minini sọ fịị tẹ ḅara.