Read kalabari Jemụsị 4 Bible Online

Jemụsị 4 - kalabari bible

Jemụsị 4

¹Ọmịna ogboku simearị owu sọ na kamụ-sọ na mamgba tọ-anga ḅọrọ ḅoarị? Ọ́ kẹ ọmịna ḅioḅẹngbọ ḅụ wẹrị wararị tomikiri ḅẹ tọrụ-ḅẹlẹ ḍọkị akuroma ma mie ọmịna ḅụụ ḅio sime tẹ owu sọarị ye.

²Ọ́ nyana ḅẹ-ḅiiarị aị emi, kụma ọmịnị inetẹ arị nyana-a, anie ḅụ ọ́ tẹlẹma tẹ kịnị ḅaa ḅẹ tẹ; ọmịnị ọ́ nyana ḅẹ-ḅiiarị aị kẹ kpọma ḅiokoromarị, kụma ọmịnị inetẹ arị nyana-a, mie ḅụ ọ́ nwẹnị kamụ na owu na sọ. Ọ́ Tamụnọ ḅara ḅụ ọ́ nyana ḅẹ-ḅiiarị ye mẹ ḅii-a ẹrẹsị ọ́ pịkị nyana-a.

³Tẹ ó ḅiiarị sakị ọ́ nyana ḅo-a, ọ́ sụa tẹ kẹ ḅiiarị kuroma mẹ si wararị ẹrẹsị; ó ḅiiarị aị ma ọmịna tọrụ-ḅẹlẹ aị mie ọ́ kẹ mịẹarị.

⁴Ọmịnị sunsin Tamụnọ pịrị sịkịtẹ atomi! Ó nimi-a mịnẹ ḅẹlẹma nyana tomikiri ḅẹ si-aị pịrị anie Tamụnọ na fịya-a? Tomikiri ḅẹ si-aị ḅẹlẹmaḅọ ḅẹlẹmaḅọ, mḅọ Tamụnọ na fịya-a ḅọ sọ tẹẹ.

⁵Ó kuroma ma mịnẹ Fịafịa Ḍiri mẹ ḍukoarị ye mẹ karakara anị ḅụ ofori, “Tamụnọ kẹ wamịna ḅụụ ḅio suu wararị tẹmẹ mẹ kụrọma ye ịgbanịarị.”

⁶Kụma Tamụnọ kẹ tomi pịrịarị ḍiki-ḅụụjịrị mẹ kụrọ anị nẹngịm. Anie Fịafịa Ḍiri mẹ ḅẹẹarị ḅara, “Tamụnọ opu amịẹaị mịẹ apụ na tụḅụrụarị, kụma ò ḍiki-ḅụụjịrị nyana ḅụụ iderima apụ ma pịrịarị.”

⁷Anie ḅụ, ọ́ sịḅị-tuu Tamụnọ pịrịị. Ọ́ ḍụkụ Ekwesu ḅe pịrị ma, ori ọmịna ḅụ mangị-so ḅa.

⁸Ó ḅo Tamụnọ kpekii, ori sọ ḅo ó kpeki ḅa. Si apụ, ọ́ ḅara sịkịrịị! Ọmịnị mịẹ tomi ḍie apụ, ọmịnị ọmịna aḅioḅẹngbọ wẹrị fịafịamaa!

⁹Ó kururuu, ọmịnị olokuu, tẹ owuu; ọmịnị ọmịna ḍẹrị ḍima tẹ kẹ owu sọmaa, pịkị ọmịna ḅioḅẹlẹ kẹ tọrụ-fụrụ sọmaa!

¹⁰Ọ́ KỊNỊNYANAḄỌ ḅe tọrọkọ ḅụ ḅụụ lẹgịma, anịsakị ori ọ́ saakị-gelema ḅa.

¹¹Ị̀ amịnapụ, ọ́ jụmọ-jụmọ sọkịrị ma. Ḅẹḅọ-ḅẹḅọ tẹ Kịrayịsị Ḍukamẹnjị mịnaḅọ sọkịrịarị, anịanịa mḅọ kọn-arị ḅọ, mḅọ Oloko mẹ sọkịrịtẹ pịkị anị kọn-arị. Ọkọẹrẹsị, í Oloko mẹ kọn-arị ḅẹḅẹ, ị́yẹrị ḅarị Oloko mẹ kokoarị ḅọ-a, kụma anị kọn-arị ḅọ.

¹²Tamụnọ ngẹrị anie Oloko-sụaḅọ, pịkị Ḅẹrẹkọnḅọ. Ori ngẹrị mie inetẹ ḅọrọma ḅarịye, pịkị guluguluma ḅarị ye. Ị́yẹrị tụḅọ tẹ ị́ ị́ pembe tomḅọ kọn ḅẹ?

¹³Mịọkụ ọmịnị ì pokii, ọmịnị ḅẹẹarị apụ, “Mịmgba, anịanịa ḅaa, wa paka gbọrụ ama mu tẹ anịanga gbọrụ kụra sime, tẹ tuḅo kọn tẹ tọnwa igbigi mịẹ ḅa.”

¹⁴Ḅaa mẹ ḅụ í ḍumo mẹ tọ-ḅara sime ḅẹ-o, tọ-ḅara sime ḅẹ-o í nimi-a! Ọmịna ḍumo mẹ kịkarị ye anie okpoka onwin, boowa kala-sakị kẹ tụrụrụma paka tẹ ala-a kịnị ḅarị pịkị ẹrị-a ye mẹ.

¹⁵Ọ́ ḅẹẹ na-iḅi ye anie mie: “KỊNỊNYANAḄỌ ḅe ḍụkụ ḅẹḅẹ, wa ḍumo sime tẹ mie, anịanịa anie mịẹ ḅa.”

¹⁶Kụma mịọkụ ọmịnị opu amịẹaị mịẹarị, tẹ ḅụụ-bomarị; ọkọ sime ḅụụ-boma mẹ kura-a.

¹⁷Anie ḅụ, amịna mịẹ ḅẹ iḅiye mẹ nimi wararị tẹ mịẹ-a ḅọ mẹ mḅọ si mịẹ tẹẹ.