Read kalabari 2 Pita 1 Bible Online

2 Pita 1 - kalabari bible

2 Pita 1

¹Sayịmọnị Pita, Jizọsị Kịrayịsị omoniḅọ, pịkị ọ̀ fịrịmẹnjịḅọ ḅe ḅara ḅo ḍiri ịn kẹ: Inima tẹ wamịna Tamụnọ pịkị wa Ḅọrọmaḅọ Jizọsị Kịrayịsị karakara mịẹ ḅụ ḅọrọ tẹ wa nyana yelatẹ minini ye mẹ nyana wararị apụ ma pịrị ḍiri mẹ:

²Yee ḍiki-ḅụụjịrị na dein na, Tamụnọ na wa Nyanaḅọ Jizọsị na ḅụ ọ́ nyana nimi ḅụ ḅọrọ ḅo ọmịna nye sọ, ḅintẹ ḅara ḅụ.

³Wa sịnm wa ḅo ori na sọ tẹ ori ebube na iḅi na nyana ḅẹ ḅọ ḅe nimi ḅụ, Tamụnọ amịna kụrọ ḅụ wa kẹ karakara Tamụnọ nimi ḍumo kọn ḅẹ ye goyegoye kẹ wa pịrị tẹ.

⁴Mị-ḅara ḅụ, ori ò minini wa pịrị opu, yela ḍiepịrị-aị ma kẹ wa pịrị tẹ, mịẹtẹ mịna ḍiepịrị-aị ma ḅụ ọ́ ḅọrọ tẹ mị tomikiri mẹ ḅụ kịnị ḅẹlẹma tẹ ḍumo gulugulumarị ye mẹ ḅụ wa pụkọ-pakaḅo tẹ wa Tamụnọ na gbọrụ ḍumo kọn ḅẹ ḅara.

⁵Mị gberie mẹ ẹrẹsị, ọmịnị ọmịnị inetẹ ḅara, inetẹ ḅara mịẹ tẹ iḅi ḍumo kẹ ọmịna minini ḅụ sụa; ọmịna iḅi ḍumo ḅụ ó nimi kẹ sụa;

⁶nimi ḅụ ọ́ ḅụụ-ọlọ kẹ sụa; ḅụụ-ọlọ ḅụ ó ye-inema alama kẹ sụa; ọmịna ye-inema alama ḅụ ọ́ Tamụnọ kịka ḍumo kẹ sụa;

⁷ọmịna Tamụnọ kịka ḍumo mẹ ḅụ ọ́ mịnapụ ḅẹlẹma kẹ sụa; mịnapụ ḅẹlẹma ḅụ ọ́ kịnị mamgba ḅẹlẹma kẹ sụa.

⁸Mịna iḅi-yemịẹ-aḅara ma mie ọ́ nyana na-iḅi aị, tẹ ọ́ nwẹnị opu ḅara kẹ arị nyana-nyana, arị ọ́ mịẹtẹ ọ́ ḅụụ sarasaratẹ pịkị ye mịẹ sọma ḅa, wa Nyanaḅọ Jizọsị Kịrayịsị nimi mẹ tẹ ọ́ nyana wararị ye mẹ ḅụ.

⁹Kụma ḅẹḅọ-ḅẹḅọ tẹ árị aị ma nyana-a ḅọ mẹ, anie sụma tọrụ kẹ ye ḍiki-a ḅọ, mḅọ pịkị kẹ ḅioḅọrọma tẹ, mịnẹ mḅọ amịna elemu asi ma ḅụ sịkịrị fịafịa tẹ.

¹⁰Ọkọẹrẹsị, ị̀ amịnapụ, ọ́ ḅụụkụrọma mịẹ tarị ọ́ mịẹ-mịẹ ḅara nẹngị, tẹ mịẹtẹ Tamụnọ ọ́ sịn tẹ ọ́ sẹlẹ-ọkị ye mẹ gbọrsịḅị ọmịna aḅụụ ẹnwẹịn gbamaso; ọmịnị ọkọ mịẹ-mịẹ ọ́ ḅarị ọmịna minini sịkị tẹ apụ sọ ḅịa.

¹¹Mị ḅọkọ ḅụ mie Tamụnọ gbọrsịḅị ḅintẹ kụrọ kẹ ọ́ pịrị tẹ ọ́ kẹ wa Nyanaḅọ pịkị wa Ḅọrọmaḅọ Jizọsị Kịrayịsị sime gbamaso ama mẹ ḅio sọ-mu ḅarịye.

¹²Tẹ mie ḅụ, sakị mamgba à mịna aị ma kẹ ọmịna ḅiokoroma ḅa, karakaraye ọmịnị arị nimi kụra-ḅio iḅerea, tẹ pịkị ọ́ nyana tẹ karakara mẹ ḅụ sịẹ-kụrọ wararị ḅẹsọ.

¹³À paa ḍumo-sime wararị sakị goyegoye, anị iḅim à mịna aị ma kẹ ọmịna ḅioḅẹngbọ jike tẹ ọmịnị arị kẹ ḅiokoroma.

¹⁴Wa Nyanaḅọ Jizọsị Kịrayịsị kẹ banabana ḅara kẹ ị̀ ḍie tẹ ḅara ḅụ, à nimi wararị mịnẹ ala-a à mị fịị, fịị oju mẹ sin koroma ḅa.

¹⁵Ọkọẹrẹsị, àrị àrị ine-ḅara, ine-ḅara mịẹ tẹ ḅọkọ ḍọkị ọ́ pịrịarị sakị mamgba ọ́ kẹ mịna aḅẹrẹ ma kẹ ḅiokoroma ḅarị ḅara, à fịị ḅọrọ tẹso.

¹⁶Wa tomi ḅarana kuroma ḅo ịlụkụ ḅụ sịrẹrẹ tẹ wa Nyanaḅọ Jizọsị Kịrayịsị opu ḅo mẹ ḍuko ọ́ pịrị-a. Wamịnị ḅarana tọrụngbọ kẹ ori opu mẹ ẹrịm.

¹⁷Wa anịanga emi ogbo Tamụnọ Ḍaḅọ ḅe kụn na ebube na kẹ ọ̀ pịrịm, anie pọkọ mẹ Tẹịn Ebube ḅe ḅịḅị ḅụ ḅo ọ̀ la sakị mẹ, mịnẹ, “Ḅie ì iḅi Tụḅọ ḅe, mịẹye ị̀ ḅụụ-ḅẹlẹarị ḅọ ḅe.”

¹⁸Wa wamịna aḅeri kẹ mị pọkọ mẹ naam, anị So-ḅio fie ḅo sakị mẹ, anie wa ori na fịafịa tụndụ mẹ ọgọnọ emi sakị.

¹⁹Mie ḅụ wa ḅo ịkịankoroapụ ma ḍuko pakama oku mẹ ḅụ kpọma ḅiokpọ nyana lama tẹ. Anị iḅi lama ḅa ọmịnị anị kẹ ye-sịn kụma, kẹ gotẹ ọkọ ḍukoarị, anị gbala kanakana emi anga ḅụ kọrịarị tọnjọ ọkụ, tẹ ọkọ kọrị nwenii Ene mẹ ḅaa tẹ dede lolia mẹ ọmịna aḅioḅẹngbọ ḅụ ḅịya.

²⁰Anị sime-ḅara, sime-ḅara sọ, ye goyegoye ḅụ tẹịn ye, ọ́ kẹ ḅiokoroma mịnẹ gbọrụḅọ-sọ inetẹ mḅọ ngẹrị kuroma kẹ ịkịankoroapụ ẹkwẹn ma tẹ Fịafịa Ḍiri mẹ ḅio simearị aị ma puu-finji ḅịa.

²¹Kẹ gotẹ ọkọ ḍukoarị, gbọrụ ịkịankoro ẹkwẹn sọ amụ jene-jene tomḅọ kuroma ḅụ ḅo-a, kụma Fịafịa Tẹmẹ ḅe ḅẹrẹtọn tomina aḅioḅẹngbọ pịrịarị ogbo mie ịn Tamụnọ ḅara ḅo oku mẹ ḍuko ye.