Read kalabari 1 Jọnị 2 Bible Online

1 Jọnị 2 - kalabari bible

1 Jọnị 2

¹Ị̀ awọmẹ, à miemẹ kẹẹ tẹ kẹ ọ́ fịrịmarị, mịẹtẹ ó si mịẹ ḅịa ḅara; kụma ọmịna ḅụ gbọrụḅọ si mịẹ-mịẹ, wa sịẹpịrịḅọ nyana wararị, tẹ Ḍaḅọ ḅe sime anga wa ḍụarị — ori anie Jizọsị Kịrayịsị, karakaraye-mịẹḅọ ḅee.

²Anịsakị, Kịrayịsị ḅe ḅioju ḅụ mie Tamụnọ ḅọrọ tẹ wamịna asi wẹrịso wa pịrị ye, tẹ wamịna asi kịngẹ-a, kụma ḅẹḅọ-ḅẹḅọ asi sọ.

³Wa Tamụnọ ḅịḅị poki tẹ ọ̀ sụa oloko ma kokoarị ḅẹḅẹ, anịsakị rẹ mie wa nimi ḅarịye, mịnẹ wa ò nimim.

⁴Gbọrụḅọ ḅẹẹarị mịnẹ mḅọ Tamụnọ nimim, kụma mḅọ ọ̀ ḅịḅị poki tẹ ọ̀ sụa oloko ma koko-a ḅẹḅẹ, ọkọ sime tomḅọ mẹ anie iruoḅọ, tẹ mḅọ ḅụụ ḅio gbọrụ karakara sọ ofori.

⁵Kụma ḅẹḅọ-ḅẹḅọ tẹ Tamụnọ ẹkwẹn mẹ ḍuko ḅara mịẹarị ḅọ mẹ, anie mḅọ nyana ọ̀ pịrị ḅẹlẹma ḅo karakaramatẹ bebe ye sọ tẹ. Mị ḅọkọ mie wa ḅọrọ, tẹ inetẹ nimi ḅarịye mịnẹ wa Tamụnọ na gbọrụ ḅụ sime wararị:

⁶ḅẹḅọ-ḅẹḅọ tẹ ḅẹẹarị mịnẹ mḅọ Tamụnọ na gbọrụ ḅụ emi ḅẹḅẹ, mḅọ Jizọsị Kịrayịsị kẹ ḍumo kọn gbọrụ ḅara mẹ kẹ ḍumo kọn.

⁷Ì iḅi ikiapụ, à kẹẹ tẹ kẹ ọ́ fịrịmarị oloko mẹ ịwọ ye-a; anie elemu oloko mẹ tẹ ọ́ tarị KỊNỊNYANAḄỌ ḅe minini sakị ọ́ nyana tẹ ye mẹ. Elemu oloko mẹ anie oku mẹ tẹ ọ́ naa ḅọrọma tẹ ye mẹ.

⁸Anịsọ, à kẹẹ tẹ kẹ fịrịmarị oloko mẹ ịwọ ye, kẹ gotẹ ọkọ ḍukoarị, anị ḅẹ karakara mẹ kịnị ẹrị tẹ Kịrayịsị ḅụ, pịkị ọmịna ḅụ sọ. Gbala kanakana mẹ ḅọrọ soarị, tẹ karakara bele mẹ saakị ḅịya pakarị.

⁹Ḅẹḅọ-ḅẹḅọ, tẹ ḅẹẹarị mịnẹ mḅọ bele ḅio angarị, anịsọ mḅọ mịnaḅọ ḍiki-ḅioḅuarị ḅọ mẹ, mḅọ paa kanakana ḅio emi, ḅo mị gbọrụ sakị mẹ sọ lam.

¹⁰Ḅẹḅọ-ḅẹḅọ, tẹ mḅọ mịnaḅọ ḅẹlẹmarịḅọ, mḅọ bele ḅio angarị, anie ḅụ mḅọ mịẹarị gberie tẹ jụmọ mịẹtẹ anị ḅọ mẹ mu siye mịẹ ḅẹ ye ofori.

¹¹Kụma ḅẹḅọ-ḅẹḅọ, tẹ amịna mịnaḅọ ḍiki-ḅioḅuarị ḅọ, mḅọ kanakana ḅio emi; mḅọ anị ḅio mẹnjịarị, tẹ mḅọ muarị anga tọ-anga-o, tọ-anga-o, mḅọ nimi-a, kanakana mẹ mḅọ tọrụngbọ pụnma tẹ ẹrẹsị.

¹²Ị̀ awọmẹ, à ḍiri kẹẹ tẹ kẹ ọ́ fịrịmarị, Kịrayịsị sịḅị ẹrẹsị Tamụnọ ọmịna asi wẹrịso ọ́ pịrị tẹ ye mẹ gotẹ.

¹³Ḍapụ, à ḍiri kẹẹ tẹ kẹ ọ́ fịrịmarị, ó tomikiri mẹ amụ tẹmẹ-a kụra-ḅio emi ḅọ ḅe nimi wararị ẹrẹsị. Asawọ amẹẹ, à ḍiri kẹẹ tẹ kẹ ọ́ fịrịmarị, ọmịnị Ekwesu ḅe nẹngịma tẹ ẹrẹsị.

¹⁴Ị̀ awọmẹ, à ḍiri kẹẹ tẹ kẹ ọ́ fịrịmarị, ọ́ Ḍaḅọ ḅe nimi wararị ẹrẹsị. Ḍapụ, à ḍiri kẹẹ tẹ kẹ ọ́ fịrịmarị, ó tomikiri mẹ amụ tẹmẹ-a kụra-ḅio emi ḅọ ḅe nimi wararị ẹrẹsị. Asawọ amẹẹ, à ḍiri kẹẹ tẹ kẹ ọ́ fịrịmarị, ọ́ kụrọ wararị ẹrẹsị; Tamụnọ ẹkwẹn mẹ pịkị ọmịna ḅụụ ḅio angarị, tẹ ọmịnị Ekwesu ḅe nẹngịma tẹ ẹrẹsị.

¹⁵Ó tomikiri mẹ ḅẹlẹma ma, anịanịa sime tomikiri mẹ pịrị aị ma ḅẹ gberie-sọ. Ó tomikiri mẹ ḅẹlẹmarị ḅẹḅẹ, ọ́ ḅarị Ḍaḅọ ḅe ḅẹlẹma-a.

¹⁶Sime tomikiri mẹ pịrị ye goyegoye — tomḅọ si sime-ḅara mẹ ḅiiarị aị na, tomi tọrụngbọ kẹ ẹrị tẹ nyana ḅẹ ḍọkịarị aị na, ḅẹẹye-ḅẹẹye tẹ mị tomikiri ḅụ tomi kẹ ḅụụ-bomarị aị na mịna aị mamgba ḅẹ gberie-sọ Ḍaḅọ ḅe ḅara ḅo-a; arịmgba tomikiri ḅụ ḅo aị.

¹⁷Tomikiri mẹ na tomi nyana ḅẹ-ḅiiarị aị na, ḅọrọ soarị; kụma Tamụnọ ḅii ye mịẹarị ḅọ mẹ ḍumo gbamasom.

¹⁸Ị̀ awọmẹ, tomikiri mẹ kunoma mẹ kpeki tẹẹ! In ḍuko ọ́ pịrịm mịnẹ anị ọkọ la tẹ ḅẹḅẹ Kịrayịsị-na-tụḅụrụḅọ ḅe ḅo ḅa; tẹ mịọkụ si kẹ Kịrayịsị tọn tọnwa-apụ ma tolu sịẹ tẹ, mie ḅụ wa nimi tẹ mịnẹ tomikiri mẹ kunoma mẹ ḅo kpeki tẹ.

¹⁹Karakara-ḅara-ḅụ, mịna atomi ma sime wamịna ogbo mẹ pịrị apụ-a, anie mie in gotẹ wa koroma tẹ so yee; in sime wamịna ogbo mẹ pịrị namịna, mimgbe ịn wamịnị na sime tẹẹ. Kụma in som, kẹ mịẹtẹ kịnị nimi mịnẹ ini ma in sime wa pịrị-a.

²⁰Ọmịnị kụma, Kịrayịsị ọmịna ọgọnọ Fịafịa Tẹmẹ ḅe ọsụma sara tẹ ọmịnị ọ̀ nyanam, anie ḅụ ọmịnị-mgba karakara mẹ nimi wararị.

²¹Ọkọẹrẹsị à kẹẹ tẹ kẹ ọ́ fịrịmarị ḍiri mẹ fie-a mịnẹ ọ́ karakara mẹ nimi-a; anie nakara ọ́ karakara mẹ nimi wararị ẹrẹsị, anịsakị ọ́ pịkị nimi wararị mịnẹ gbọrụ iruoye sọ karakara mẹ ḅụ ḅo-a.

²²Ọkọ kụma, iruoḅọ ḅe anie tụḅọ? Anie ḅẹḅọ-ḅẹḅọ tẹ ḅẹẹarị mịnẹ Jizọsị anie Mẹsaya ḅe ori-a. Ọkọ sime tomḅọ mẹ anie Kịrayịsị-na-tụḅụrụḅọ, mḅọ Ḍaḅọ ḅe na Tụḅọ ḅe na sịkịarị.

²³Kẹ gotẹ ọkọ ḍukoarị, Tụḅọ ḅe sịkị ḅọ, sịkị ḅọ, Ḍaḅọ ḅe sọ sịkị tẹ; Tụḅọ ḅe daa-ọkịḅọ-ọkịḅọ Ḍaḅọ ḅe sọ daa-ọkị tẹ.

²⁴Ọkọẹrẹsị, ọmịnị ẹrị mịnẹ tarị-pịrịpịrị-ḅụ ọ́ naa oku mẹ ọmịna aḅioḅẹngbọ ḅụ simem. Ọmịnị anị oku mẹ kokoarị ḅẹḅẹ, sakị mamgba ọ́ Tụḅọ ḅe na Ḍaḅọ ḅe na, na gbọrụ ḅụ sime ḅụ anga ḅa.

²⁵Anịsakị miemẹ anie Kịrayịsị ḅioju mininim ọ̀ kẹ wa pịrị ḅẹ ye mẹ — sime gbamaso ḍumo.

²⁶À miemẹ kẹẹ tẹ kẹ ọ́ fịrịmarị, anie oḅori kẹ ọ́ sịn ḅẹ ḍọkịarị apụ ma gboloma ye.

²⁷Ọmịnị kịngẹ kụma, Kịrayịsị ọ̀ Tẹmẹ ḅe kẹ ọmịna ọgọnọ ọsụma sara tẹ. Ọ̀ Tẹmẹ ḅe ọmịna ḅụụ ḅio emi sakị goyegoye, ò ḅii ḅịa kịnị ye kẹ ó toluma. Kẹ gotẹ ọkọ ḍukoarị, ọ̀ Tẹmẹ ḅe ye goyegoye kẹ ó tolumarị, anịsakị ò tolumarị ye mẹ karakaram, iruo ye ofori. Ọ́ Fịafịa Tẹmẹ ḅe tolumarị ye mẹ mịẹ, tẹ Kịrayịsị na gbọrụ ḅụ simee.

²⁸Ọkọẹrẹsị, ị̀ awọmẹ, ọmịnị ori na gbọrụ ḅụụ simee, mịẹtẹ ò tolu-sịẹ sakị, wa ḅiokpọ lama tẹ ḅarị ḅụụ-jịrị ḅụ ò ḅoarị Ene mẹ ḅụ ọ̀ ḅụụ ḅụ kikima ḅịa ḅara.

²⁹Ó nimi wararị mịnẹ Kịrayịsị anie karakara mịẹḅọ, ọkọẹrẹsị ó nimi na-iḅim, mịnẹ ḅẹḅọ-ḅẹḅọ tẹ kuraye mịẹarị ḅọ anie Tamụnọ tụḅọọ.