Read kalabari 1 Jọnị 3 Bible Online

1 Jọnị 3 - kalabari bible

1 Jọnị 3

¹Ḍaḅọ ḅe kẹ wa ḅẹlẹma la ḅara ḍikii! Ọ̀ nyana wa pịrị ḅẹlẹma mẹ ḍụḅa la ḅara ḅụ, ịn Tamụnọ awọmẹ kẹ wa sịn tẹ — karakara-ḅara-ḅụ anie wa pịkị sime-ḅara. Miemẹ ẹrẹsị tomikiri ḅẹ atomi ma wa nimi-a: anie amụ in Tamụnọ nimi-a ẹrẹsị.

²Ì iḅi ikiapụ, mịọkụ wamịnị Tamụnọ awọmẹẹ; kụma tọrọkọ-jụ wa sime ḅarị ḅara amụ giregire paka-a. Kụma wa nimi wararị mịnẹ Kịrayịsị tolu-paka sakị, wa ọ̀ kịka ḅa, anie wa ò sime karakara ḅara mẹ kẹ ori ẹrị ḅarị ẹrẹsị.

³Ọrụḅọ-ọrụḅọ tẹ Kịrayịsị ḅụ mị ḅiokpọmaye mẹ nyana wararị ḅọ, amịna ḅụụ wẹrị fịafịamaa, anie Kịrayịsị fịafịa wararị gbọrụ ḅara mẹ.

⁴Si mịẹ ḅọ, mịẹ ḅọ, mḅọ Tamụnọ oloko kan tẹ ḅẹrẹ-ḅarasii nyana tẹ, kẹ gotẹ ọkọ ḍukoarị, si anie oloko kan.

⁵Ó nimi wararị mịnẹ Kịrayịsị gotẹ tomikiri mẹ ḅụ tolu-sịẹ ye tomina asi sin, anịsakị ọ̀ ḅụụ ḅio gbọrụ si sọ ofori.

⁶Mie ḅụ, ọrụḅọ-ọrụḅọ tẹ Kịrayịsị na gbọrụ ḅụ ḍumo simearị ḅọ, ḅarị si mịẹ tọrọkọ mu-a; kụma ḅẹḅọ-ḅẹḅọ tẹ si mịẹ ma tọrọkọ muarị ḅọ, mḅọ amụ gbala-gbala ori ẹrị-a, pịkị ò nimi-a.

⁷Ị̀ awọmẹ, ọ́ ḍụkụ tẹ gbọrụḅọ-sọ oḅori kẹ ọ́ sịn ma! Ḅẹḅọ-ḅẹḅọ tẹ kuraye mịẹarị ḅọ, anie karakara mịẹ ḅọọ, anie Kịrayịsị sọ karakara mịẹarị gbọrụ ḅara mẹ.

⁸Ḅẹḅọ-ḅẹḅọ tẹ paa si mịẹ ma tọrọkọ muarị ḅọ mẹ mḅọ sime Ekwesu ḅe pịrịm, kẹ gotẹ ọkọ ḍukoarị, Ekwesu ḅe ọ̀ saakị Tamụnọ ḅịḅị kan kụra-ḅio, ò si mịẹ ma ḅo mịọkụ lam. Mị gbọrụ ye mẹ mie Tamụnọ Tụḅọ ḅe gotẹ tolu-paka ye, ori Ekwesu ḅe kọrị tẹ kọrịnama mẹ guluguluma ḅẹm.

⁹Tamụnọ tụḅọ goḅọ-goḅọ si mịẹ ma tọrọkọ mu mu-a, kẹ gotẹ ọkọ ḍukoarị, Tamụnọ sime-ḅara mẹ mḅọ ḅụụ ḅio emi; anịsakị Tamụnọ anie mḅọ Ḍaḅọ ẹrẹsị, mḅọ ḅarị inetẹ si mịẹ tọrọkọ mu ḅịa.

¹⁰Miemẹ giregirema Tamụnọ awọmẹ ma na Ekwesu ḅe awọmẹ ma na ogboku simearị kịrị mẹ ḍie-pakamarị; ḅẹḅọ-ḅẹḅọ tẹ kuraye mịẹ-a, pịkị amịna mịnaḅọ ḅẹlẹma-a ḅọ, anie Tamụnọ tụḅọ-a.

¹¹Oku mẹ tarị ḅo ọ́ la sakị Kịrayịsị sụa ọ́ pịrị oloko mẹ ọ́ naa tẹ, mịnẹ wa jụmọ-jụmọ ḅẹlẹmaa.

¹²Wa Keni kịka ma; ori ḅe ò sime Ekwesu ḅe pịrịm, tẹ ori iyimbere Ebẹlị ḅaam. Keni tiegotẹ Ebẹlị ḅaa? Ò gotẹ ọ̀ ḅaa ye, ori Keni ḅe ḅioju kura-aye mịẹm, kụma ori iyimbere Ebẹlị ḅe kuraye mịẹm.

¹³Ị̀ amịnapụ, ọkọẹrẹsị tomikiri ḅẹ atomi ma ó ḍiki-ḅioḅuarị ḅẹḅẹ, anị ọmịna aḅụụ buama ma.

¹⁴Wa nimi wararị mịnẹ wa fịị ḅụ so tẹ saḅa-ḅọrọ ḅo ḍumo ḅio sọ tẹ; wa wamịna mịnapụ ḅẹlẹmarị ẹrẹsị wa miemẹ nimim. Jen tomḅọ ḅẹlẹma-a ḅọ mẹ mḅọ paa fịị kụrọ suku-ḅio emi.

¹⁵Amịna mịnaḅọ ḍiki-ḅioḅuarị ḅọ mẹ anie kịnị-ḅaḅọ, anịsakị ó nimi wararị mịnẹ kịnị-ḅaḅọ mḅọ ḅụụ ḅio ḅụ sime gbamaso ḍumo nyana-a.

¹⁶Kịrayịsị wa gotẹ fịị ye ḅụ mie wa ḅọrọ tẹ ḅẹlẹma fiearị ye nimi ye. Ọkọẹrẹsị, wamịnị sọ wamịna aḍumo kẹ wamịna amịnapụ ma pịrị saa fị tẹ!

¹⁷Kẹ anga ḅẹ ye nyana wararị ḅọ mḅọ mịnaḅọ ẹrịm ye mḅọ ḅụụ-fụkamarị, tẹ ọkụrụkụrụ nyana mḅọ mịnaḅọ mẹ pịrị-a ḅẹ kụma, ndẹẹ mḅọ inetẹ ḅẹẹ ḅẹ ḅara mịnẹ mḅọ Tamụnọ ḅẹlẹmarị?

¹⁸Ị̀ awọmẹ, wa ḅịḅị ḅọkọ kịngẹ kẹ ẹkwẹn-ẹkwẹn sara kẹ kịnị ḅẹlẹma apụ sọ ḅịa; wamịna ḅẹlẹma mẹ karakara ḅẹlẹma sọọ, anie mịẹye ḅụ amịna ḅụụ ḍie-pakamarị ye.

¹⁹Ọkọẹrẹsị, mị-ḅara mie wa ḅọrọ tẹ nimi ḅarịye mịnẹ wa karakara mẹ ḅụ emi; mị-ḅara mie wa ḅọrọ tẹ Tamụnọ tọrọkọ ḅiokpọ nyana ḅarịye.

²⁰Wamịna tẹmẹ ḅioḅẹngbọ ḅẹrẹ-pẹlẹ wamịna ḅara simearị ḅẹḅẹ, wa nimi wararị mịnẹ Tamụnọ kẹ wa nimi ḅara wamịna tẹmẹ ḅioḅẹngbọ kẹ wa nimi ḅara nẹngịm, tẹ Tamụnọ nimi-a gberie-sọ pịkị ofori.

²¹Anịẹrẹsị, ì iḅi ikiapụ, wamịna tẹmẹ ḅioḅẹngbọ ḅẹrẹ-pẹlẹ wamịna ḅara sima-a ḅẹḅẹ, wa ḅiokpọ tẹ Tamụnọ tọrọkọ ḅụ.

²²Wa ọ̀ ḅara ḅii ye, ḅii ye wa nyanarị, wa ọ̀ ḅịḅị poki tẹ, ori oloko koko tẹ ò ḅioḅẹlẹmarị ye mịẹarị ẹrẹsị.

²³Ọ̀ sụa oloko mẹ anie, wa ọ̀ Tụḅọ Jizọsị Kịrayịsị ḅe minini tẹ jụmọ-jụmọ ḅẹlẹmaa, Kịrayịsị tọn wa pịrị gbọrụ ḅara mẹ.

²⁴Ḅẹḅọ-ḅẹḅọ tẹ Tamụnọ ḅịḅị poki tẹ ọ̀ sụa oloko ma kokoarị ḅọ, mḅọ Tamụnọ na gbọrụ ḅụ angarị, tẹ Tamụnọ pịkị mḅọ na gbọrụ ḅụ angarị. Tẹ Tamụnọ kẹ wa pịrị tẹ Tẹmẹ ḅe gotẹ wa nimi wararị mịnẹ Tamụnọ wamịnị na gbọrụ ḅụ angarị.