Read kalabari Ḅẹrẹkọn-apụ 16 Bible Online

Ḅẹrẹkọn-apụ 16 - kalabari bible

Ḅẹrẹkọn-apụ 16

¹Samụsịnị nwẹnị Gaza mu, tẹ anịjụ gbọrụ sẹfị ẹrẹḅọ ẹrị, tẹ ọ̀ nwẹnị sọ á ḍọkụma-mu.

²Ịn nwẹnị ḍuko Gaza ḅẹ apụ ma pịrị, “Samụsịnị mịanga ḅo tẹ,” tẹ ịn nwẹnị bebe ḍin mẹmgba kẹ ye-yọ mẹ ikelema-koro tẹ sime ò koru opu ama mẹ ḅẹ ogigo-ḅọkọ mẹ ḅụ. Ịn bebe ḍin mẹmgba kẹ yaụ-simem, tẹ ḅẹẹm, “Ó yee wa koru nwenii ene mẹ finji koro; anịrẹ wa ọ̀ ḅaa ḅa.”

³Kụma Samụsịnị sime nwenii ḍin-ogbo la, tẹ ḍin-ogbo ḅụ ọ̀ nwẹnị saakị tẹ opu ama mẹ ḅẹ ogigo mẹ ḅẹ aḅọkọ ma na, ḅọkọ amasịn ma na ọlọ tẹ arị saakị-siin, ẹngbẹsẹ mẹ na ye mamgba na anị na, tẹ arị kẹ ori apana ọgọnọ gbana, tẹ arị dogi mu tụndụ mẹ tẹ Hẹbụrọnị tọrọkọ simearị tụndụ mẹ ḅẹ sịḅị ọgọnọ ḅụ koroma.

⁴Miemẹ ḅọrọ tẹso, Sọrẹkị ḅẹ Tụndụ Ogboku ḅụ Samụsịnị gbọrụ ẹrẹḅọ ḅẹlẹmam; árịma ẹrẹ anie Dilayịla.

⁵Filisiteni ḅẹ Sịḅịdapụ ma nwẹnị á ḍọkụma-ḅo tẹ á ḅẹẹ, “Ò tolumaa, tẹ ò gburo-gburotẹ ịnyọ mẹ ọ̀ ḅụụ ḅio sime anga ẹrịị, na wa mịẹtẹ inetẹ ọ̀ nẹngịma ḅẹ ḅara na, mịẹtẹ wa inetẹ ọ̀ fịna tẹ ọ̀ mịẹtẹ ọ̀ sịḅị-tuu ḅẹ ḅara; anịsakị wamịna aḅụụ gbọrụḅọ-gbọrụḅọ seleḅa pakịrị maa ẹndẹ jeia si finji finji (1,100) kẹ ị́ pịrị ḅa.”

⁶Dilayịla nwẹnị Samụsịnị ḅẹẹ, “Sisi ị́ gburo-gburotẹ ịnyọ mẹ ị́ ḅụụ ḅio sime anga ḍuko ị̀ pịrịị, na kịnị inetẹ ị́ fịna, tẹ inetẹ ị́ mịẹtẹ ị́ sịḅị-tuu ḅẹ ḅara na.”

⁷Samụsịnị nwẹnị á ḅẹẹ, “Ịn nwẹnị ịwọ-jaja tẹ amụ iri samụnọ-a sọnọma sanḍiki kẹ ị̀ fịna fịna, anịrẹ à ḅo ịnyọ fatẹ ḅara sime tẹ ḅẹẹ owiḅọ-owiḅọ sime-ḅara sime ḅa.”

⁸Anịtẹso Filisiteni ḅẹ Sịḅịdapụ ma nwẹnị ịwọ-jaja tẹ amụ iri samụnọ-a sọnọma sanḍiki ọkị-ḅo á pịrị, tẹ á nwẹnị arị kẹ ọ̀ fịna kpee.

⁹Mịọkụ gbọrụ kala-ḅio ḅụ á sime koruarị owiapụ nyana wararị á nwẹnị oloku, “Samụsịnị! Filisiteniapụ ma ịn ḅoarị!” Kụma ọ̀ kẹ sanḍiki ma pẹlẹ-siin ḅara gbala tanjị kọrị-fịnị la tẹ anị dọkị pẹlẹ ḅara. Anieḅụ kịnị paa amụ ori ịnyọ mẹ ḅẹ ḅọịye mẹ nimi-a.

¹⁰Dilayịla nwẹnị Samụsịnị ḅẹẹ, “Ḍikii, í ì kombo tẹ, iruo-aị ḍuko ị̀ pịrị tẹ; sisi ini inetẹ ị́ fịna ḅẹ ḅara ḍuko ị̀ pịrịị.”

¹¹Ọ̀ nwẹnị á ḅẹẹ, “Ịn nwẹnị ḍiki tẹ jene-jene kịnị amụ kẹ ye mịẹ-a ịwọ-jaja ḍiki kẹ ị̀ fịna fịna, anịrẹ à ḅo ịnyọ fatẹ ḅara sime tẹ ḅẹẹ owiḅọ-owiḅọ sime-ḅara sime ḅa.”

¹²Anieḅụ Dilayịla nwẹnị ịwọ-jaja ḍiki ọkị tẹ arị kẹ ò kpee, tẹ nwẹnị oloku ọ̀ pịrị, “Samụsịnị! Filisiteniapụ ma ịn ḅoarị!” Anịsakị sime koruarị owiapụ ma gbọrụ kala-ḅio ḅụ emi. Kụma ọ̀ nwẹnị ori aḅara kọngọ ḅụ iri pẹlẹ ḅara kẹ ḍigi ma pẹlẹ-siin.

¹³Dilayịla nwẹnị Samụsịnị ḅẹẹ, “Ọkị ḅo mịọkụ la ị́ paa ì kombo-kombo tẹ iruo-aị ḍuko-ḍuko ị̀ pịrịarị; ịn kẹ inetẹ ị́ fịna ḅẹ ḅara ḍuko ị̀ pịrịị.” Ọ̀ nwẹnị á ḅẹẹ, “Ị́ nwẹnị iri kẹ ị̀ sịḅị-ḅẹ-inume parị wararị sọnọma ịkpalị ma kẹ ḅịtẹ ḍori ama sịn ḅụ ḍori, tẹ ye kẹ anị kpara kụrọmam ḅẹḅẹ, anịrẹ à ḅo ịnyọ fatẹ ḅara sime tẹ ḅẹẹ owiḅọ-owiḅọ sime-ḅara sime ḅa.”

¹⁴Anieḅụ ò monoarị ogbo, Dilayịla nwẹnị iri kẹ ọ̀ sịḅị ḅẹ sọnọma ịkpalị ma kẹ ḅịtẹ ḍori ama sịn ḅụ ḍori. Á nwẹnị ye kẹ anị kpara kụrọma, tẹ oloku, “Samụsịnị! Filisiteniapụ ma ịn ḅoarị!” Kụma ọ̀ nwẹnị ọ̀ kọn-arị mono ḅụ naa-saakị, tẹ kpara ye mẹ na, ḅịtẹ ḍori ama sịn mẹ na, iri mẹ na nụnụ sin.

¹⁵Á nwẹnị ọ̀ ḅẹẹ, “Ị́ inetẹ tọ-ḅara kẹ ḅẹẹ ḅẹ, ‘Àrị ị́ ḅẹlẹmam,’ í ḅioḅẹngbọ ị̀ ḅụụ ofori sakị? Mịna tẹra sakị ma ị́ nwẹn kẹ ì kombo tẹ, tẹ í gburo-gburotẹ ịnyọ mẹ simearị anga ḍuko ị̀ pịrị-a.”

¹⁶Ene-ḅaaene-ḅaaene arị ẹkwẹn tịngị-tịngịma tẹ tọn-tọn ọ̀ pịrị kụrọma nwenii sakị, ọ̀ nwẹnị tẹmẹ ịganị kọn mu fịị oke lama.

¹⁷Ọ̀ nwẹnị ò ḅioḅẹngbọ mẹmgba ḍuko finji á pịrị, tẹ á ḅẹẹ, “Gbọrụ sịḅị-sẹịn ogie sọ gbala-gbala amụ ị̀ sịḅị la-a; kẹ gotẹ ọkọ ḅẹẹarị, yẹrị anie ì iyingi furo ḅio ḅụ, ḅụụ saakị Tamụnọ pịrị tẹ fịrịmẹnjị Tamụnọ pịrị gotẹ ye karị amịna ọgọnọ gbanatẹ ḅọ. À nwẹnị ị̀ sịḅị sẹịn ḅẹḅẹ, anịrẹ ị̀ ịnyọ ị̀ ḅụụ faa ḅa, tẹ à ḅo ḅẹẹ owiḅọ-owiḅọ sime-ḅara sime ḅa.”

¹⁸Dilayịla ẹrịm mịnẹ ori ò ḅioḅẹngbọ mẹmgba ḍuko á pịrị tẹ, tẹso, á nwẹnị ḅịḅị kẹ Filisiteni ḅẹ Sịḅịdapụ ma fịrịma, tẹ ḅẹẹm, “Ọ́ mị gbọrụ sakị mẹ kẹ pịkị ḅoo, kẹ gotẹ ọkọ ḅẹẹarị, ori ò ḅioḅẹngbọ mẹmgba ḍuko ị̀ pịrị tẹẹ.” Anịtẹso Filisiteni ḅẹ Sịḅịdapụ ma nwẹnị igbigi mẹ kẹ ịna aḅara-ḅio kpapụ tẹ kẹ á ḍọkụma-ḅo.

¹⁹Á nwẹnị ọ̀ mịẹtẹ ori á ḅụọ-ẹtẹnẹ ḅụ mono; tẹ á nwẹnị gbọrụ owiḅọ sịn, tẹ ọ̀ nwẹnị ọ̀ sịḅị ḅẹ sọnọma ịkpalị ma sẹịn sin, Anịtẹso á nwẹnị ọ̀ kẹ tọrụsiẹrịma, gbala ori ịnyọ ọ̀ ḅụụ fatẹ ẹrẹsị.

²⁰Tẹ á nwẹnị oloku, “Samụsịnị Filisiteniapụ ma ịn ḅoarị!” Ọ̀ nwẹnị ò mono ḅụ naa-saakị, tẹ ḅẹẹ, “Arị osi asakị ma ḅụ á mẹnjị paka-paka ḅara paka ḅa, tẹ ye ḅụụ la-a ḅara kẹ ị̀ ḅụụ jike ḅa.” Ò nimi-a mịnẹ KỊNỊNYANAḄỌ ḅe ọ̀ ḅụụ ḅụ so tẹẹ.

²¹Filisiteniapụ ma nwẹnị ori ọlọ tẹ ori atọrụngbọ sọkị sin, tẹ ọ̀ kẹ ideri Gaza ḅo, tẹ ojo ikoli kẹ ọ̀ sụam tẹ ori ikoli mẹ ḅio sime tẹ ye gbẹẹ-ye mẹ ḅụ ye gbẹẹm.

²²Kụma ini ọ̀ sịḅị-ḅẹ-inume mẹ sẹịn tẹso anị nwẹnị pịkị sin paka-ḅo.

²³Mịọkụ Filisiteni ḅẹ Sịḅịdapụ ma nwẹnị gburo-gburo agba mịẹ Degọnị ịna oru-tamụnọ pịrị tẹ ḍereku ḅẹ ḅara kẹ kobiri; kẹ gotẹ ọkọ ḅẹẹarị, ini mẹẹ, “Wamịna oru-tamụnọ wamịnị na fịya-a Samụsịnị kẹ wamịna ḅara-ḅio ḅụ wa pịrị tẹ.”

²⁴Tomi ma ori ẹrị tẹso, ịn nwẹnị ịna oru-tamụnọ tokini; kẹ gotẹ ọkọ ḅẹẹarị, ini mẹẹ, “wamịna oru-tamụnọ wamịnị na fịya-a ḅọ kẹ wamịna ḅara-ḅio ḅụ wa pịrị tẹ, wamịna opu sịẹ mẹ ḅaa gulugulumaḅọ ḅe, oriḅe tẹ wamịna aḅụụ tọnwa apụ ḅaa ḅọ ḅe.”

²⁵Ịna aḅioḅẹngbọ ọkọ kẹ ḅẹlẹarị ogbo, ịn nwẹnị ḅẹẹ, “Ọ́ Samụsịnị sịn, mịẹtẹ ò tii kọn wa pịrị ḅẹ ḅara.” Anieḅụ ịn nwẹnị ikoli mẹ ḅio Samụsịnị sịn pakama-ḅo, tẹ ò tii kọnm ịna tọrọkọ ḅụ. Ini ọ̀ mịẹtẹ ọ̀ maa ḅeriaị ma ogboku sịẹsimem.

²⁶Samụsịnị nwẹnị ọ̀ ḅọrọmaḅọ owiḅọtụḅọ ḅe ḅẹẹ, “Yee ị̀ ḅara ḅeriaị ma tẹ warị mẹ dogi wararị ḅeriaị ma la, mịẹtẹ arị arị ḅụ sịrẹrẹ ḅẹ ḅara.”

²⁷Mịọkụ owiapụ na, ereme na, warị mẹ ḅio ḅin-jịkịjịkị wararị; Filisiteni ḅẹ Sịḅịdapụ mamgba anịjụ emi; anịsakị warị isun mẹ ọgọnọ, inima tẹ Samụsịnị tii mẹ kọn-arị sakị sime tẹ ò ḍiki kịnị sọnọma ẹndẹ, oyia asi finji (3,000) simem.

²⁸Anịtẹso Samụsịnị nwẹnị KỊNỊNYANAḄỌ ḅe sịn tẹ ḅẹẹ, “yei KỊNỊNYANA-TAMỤNỌ, àrị ị́ tẹkẹm, ị̀ kẹ ḅiokoromaa, tẹ ịnyọ kẹ ị̀ ḅụụ sụa, mị kpọkpọ gbọrụ sakị mẹ ngẹrị ḅụ. Àrị ị́ tẹkẹm, yei Tamụnọ, mịẹtẹ àrị inetẹ gbọrụ sakị ḅụ Filisiteniapụ ma ọgọnọ ḅụ ị̀ amaa tọrụngbọ ma gbẹẹfị ḅii ḅẹ ḅara.”

²⁹Samụsịnị nwẹnị karakara ogboku simearị maa ḅeriaị ma tẹ warị mẹ dogi wararị aị ma ọlọ kụrọma, ama-ḅara kẹ gberie ọlọ, pịkị ere-ḅara kẹ osi ye ọlọ tẹ nwẹnị ori ịnyọ ḅẹ iku kẹ arị ponoma.

³⁰Samụsịnị nwẹnị ḅẹẹ, “Yee à Filisiteniapụ ma na fịị.” Anịtẹso ọ̀ nwẹnị ori ịnyọ mẹmgba kẹ tuu; tẹ warị mẹ nwẹnị ḅịkị gboloki Filisiteni ḅẹ Sịḅịdapụ mamgba na, tomi mamgba tẹ anị ḅio sime apụ ma na ọgọnọ sara. Anieḅụ fịtẹ-apụ tẹ ọ̀ fịị ḅụ ọ̀ ḅaa apụ ò ḍumo sakị ḅụ ọ̀ ḅaa apụ nẹngịm.

³¹Anịtẹso ori owiapụ-amịnapụ na, ò furo mẹmgba na nwẹnị ideri-ḅo ori ọkị, tẹ ọ̀ kẹ iwo ḅo Zora na, Ẹsịtahọlị na, ogboku ḅụ ọ̀ ḍa Manoha ḍuḅu ḅio ò ḍiḅi. Ò si kụra kẹ ḅẹrẹkọn Izirẹlị pịrị tẹ.