Read kalabari Ḅẹrẹkọn-apụ 19 Bible Online

Ḅẹrẹkọn-apụ 19 - kalabari bible

Ḅẹrẹkọn-apụ 19

¹Arị ene ma tẹ amadaḅọ Izirẹlị ḅụ ofori sakị mẹ, Livayị furo ḅẹ gbọrụḅọ igoni kẹ Iferemu tụndụ ọgọnọ ḅẹ opu sịẹ mẹ ḅio iḅere-iḅerea anga ama ọḅụjụ pakịrị bịan simem, oriḅe tẹ Juda ḅio Bẹtịlịhẹmụ ḅụ gbọrụ ịgwa-ẹrẹḅọ ọkị ḅọ ḅe.

²Ori ịgwa-ẹrẹḅọ ma ọ̀ ḅụụ ḅụ ịganị nyanam, tẹ á nwẹnị ò koroma-so Juda ḅio Bẹtịlịhẹmụ ḅụ á ḍa warị mu, tẹ ini akalụ kẹ anịjụ simem.

³Anịtẹso á di ḅe nwẹnị saakị tẹ á ḍuka mu, ḅio deinma iḅi ẹkwẹn kọn á pịrị, tẹ á pịkịma-ḅo ḅe ḅara. Ori ọ̀ fịrịmẹnjịḅọ na, maa yedogi-anama na kẹ sụa mum. Ọ̀ nwẹnị á ḍa warị la; tẹ ẹrẹḅọtụḅọ ma ḍa ori ẹrị tẹso, ọ̀ nwẹnị ḅioḅẹlẹ kẹ ori na bịama ḅẹ ḅo.

⁴Ẹrẹḅọtụḅọ ma ḍa, ò fụanḅọ (ọgọḅọ) ḅe nwẹnị mịẹtẹ ò sime, tẹ ọ̀ tẹra aḍin kẹ ori na simem; anị ḅara mie ịn kẹ fị, pịkị ḅuu tẹ anịjụ sime-ḅara.

⁵Inia aḍin karama ene ḅụ ịn nwẹnị dede-ḅio dede-ḅio kẹ saakị, tẹ ọ̀ nwẹnị so ḅẹ ḅara kẹ ḅụụ tẹlẹma; kụma ẹrẹḅọtụḅọ ma ḍa nwẹnị ò fụanḅọ ḅe ḅẹẹ, “Fịye kalịye fị tẹ ịnyọ kẹ í ḅioḅẹngbọ mẹ pịrịị; ịnyọ ị́ ḅụụ pakaa, anị tẹrẹmẹ ị́ inetẹ mẹnjị-so ḅa.”

⁶Anieḅụ maa owiapụ ma nwẹnị lẹgị-sime tẹ fị pịkị ḅuu gboloma; tẹ ẹrẹḅọtụḅọ ma ḍa nwẹnị owiḅọ ḅe ḅẹẹ, “Sisi ḍin mẹ kẹ mịanga sime tẹ tọrụ-ḅẹlẹ nyanaa.”

⁷Owiḅọ ḅe saakị tẹ so ḅẹ tẹso, ọ̀ fụanḅọ ḅe ọ̀ mịẹ nwenii ò siin anịjụ simem.

⁸Sọnọa ḍin karama ene ḅụ ò so ḅẹ tẹ dede-ḅio, dede-ḅio saakịm; tẹ ẹrẹḅọtụḅọ ma ḍa nwẹnị ḅẹẹ, “Ịnyọ kẹ í ḅioḅẹngbọ mẹ pịrịị; sisi ye fịị, tẹ sime nwenii ene tuukoro.” Anieḅụ ini maa apụ ma ye fịm.

⁹Owiḅọ ḅe na, ori ịgwa-ẹrẹḅọ na, ọ̀ fịrịmẹnjịḅọ na saakị tẹ so ḅẹ tẹso, ò fụanḅọ, ẹrẹḅọtụḅọ ma ḍa, nwẹnị ọ̀ ḅẹẹ, “Ḍikii, mịọkụ ene mẹ ḅo ḅoḅiri-so la tẹ; arị ị́ tẹkẹm, ḍin mẹmgba kẹ simee. Ḍikii, ene mẹ gbaịn tẹ; mịanga sime tẹ í ḅioḅẹngbọ ḅụ ị́ tọrụ-ḅẹlẹ nyana; anịsakị ḅaa, ị́ nwẹnị dede-ḅio, dede-ḅio kẹ saakị ị́ mẹnjị kọn tẹ so ị́ ama mu.”

¹⁰Kụma owiḅọ ḅe ḍin mẹ kẹ sime-a; ọ̀ saakị tẹ som, tẹ ḅo Jebusi na dama-dama anga lam (anie Jeruselemu). Ori na sime aị anie, ịn ye kẹ dẹẹ wararị maa yedogi-anama na, ori na emi ori ịgwa-ẹrẹḅọ ma na.

¹¹Ịn ḅo Jebusi kpeki sakị ene mẹ ḅẹlẹma ḍin mu tẹ, tẹ fịrịmẹnjịḅọ ḅe nwẹnị ọ̀ sịḅịdaḅọ ḅe ḅẹẹ, “Mịọkụ ḅoo, yee wa mie Jebusayịtị apụ opu ama mẹ ḅio agba tẹ ḍin mẹ kẹ anị ḅio sime.”

¹²Ọ̀ sịḅịdaḅọ ḅe nwẹnị ọ̀ ḅẹẹ, “Wamịnị igoniapụ, tẹ sime Izirẹlịapụ pịrị-a apụ opu ama mẹ agba tẹ anị ḅio sọ-mu ḅịa; kụma wa ḅọrọ so Gibiya mu ḅa.”

¹³Ọ̀ nwẹnị ọ̀ fịrịmẹnjịḅọ ḅe ḅẹẹ, “Ḅoo, yee wa sọma mịna anga ma ḅẹ gbọrụ anga Gibiya, anịanịa Rama kpeki tẹ ḍin mẹ kẹ sime.”

¹⁴Anieḅụ ịn nwẹnị mẹnjị-ḅọrọ so ịna etela da; Gibiya kpeki, sime Benijamịnị pịrị anga ḅụ ịrụa mẹ ịna sịḅị ḅụ tuuiderim.

¹⁵Ịn nwẹnị pịkị anịjụ agba, tẹ sọ mu Gibiya ḅụ ḍin mẹ kẹ sime ḅẹ ḅara. Ọ̀ nwẹnị mu opu ama mẹ ḅẹ ama-ogbo ḅụ lẹgị-sime; gbala gbọrụ owiḅọ sọ ọ̀ da ọ̀ warị suu tẹ ò ḍin mẹ kẹ sime-a.

¹⁶Gbọrụ omongitẹ owiḅọ nwẹnị ḅoḅiri-so ḅụ ọ̀ ḍụọ ḅio ọ̀ kọrịnama kọrị fama tẹ ḅọrọ; owiḅọ ḅe anie Iferemu tụndụ ọgọnọ ḅẹ opu sịẹ mẹ ḅụ sime ḅọ, tẹ igoni ḅara kẹ Gibiya ḅụ simearị; ye-yọ mẹ ḅẹ apụ anie Benijamịnị furo-ḅẹ-apụ.

¹⁷Ọ̀ nwẹnị ọ̀ tọrụ saakị tẹ opu ama mẹ ḅẹ ama-ogbo ḅụ igoni-muḅọ ḅe ẹrị; omongitẹ owiḅọ ḅe nwẹnị ò gbela, “Ị́ tọ-anga muarị? Anịsakị ị́ tọ-anga ḅụ sime tẹ ḅo?”

¹⁸Ọ̀ nwẹnị ọ̀ pakịrị, “Wa Juda ḅẹ Bẹtịlịhẹmụ ḅụ ḅọrọ so à sime tẹ ḅo anga, anie Iferemu tụndụ ọgọnọ ḅẹ opu sịẹ mẹ ḅẹ iḅere-iḅerea ama ọḅụjụ pakịrị muarị; à Juda ḅio Bẹtịlịhẹmụ mum, tẹ à so ị̀ ama muarị; anịsakị ị̀ da amịna warị ḅio su gbọrụḅọ-sọ ofori.

¹⁹Wa samụnọtẹ-osuka na, nama-afịaị na nyana wamịna yedogi-anama pịrị wararị, ì fịye na, iru na, ị́ fịrịmẹnjị-ẹrẹḅọtụḅọ ma na, ị́ fịrịmẹnjịapụ ma na simearị asambịrịma owiḅọtụḅọ ḅe na fị ḅẹ fịye emi. Wa gberie-sọ ḅii-a.”

²⁰Omongitẹ owiḅọ ḅe nwẹnị ḅẹẹ, “Dein sime ị́ pịrịị; arị í ḅiiarị aị mamgba mịẹ ị́ pịrị ḅa ị́yẹrị paa ḍin mẹ kẹ ama-ogbo mẹ ḅụ sime ma.”

²¹Anieḅụ ori ori ọkị-ḅo ọ̀ warị ḅio sunm, tẹ nama afịaị kẹ yedogi-anama ma pịrịm; tẹ ịn nwẹnị ịna aḅụọ-suku sịkịrị tẹ ye fị tẹ pịkị ḅuum.

²²Ini ọkọ kẹ tọrụ-ḅẹlẹarị ogbo, opu ama mẹ ḅẹ ngoro-ngoro owiapụ nwẹnị ḅo warị mẹ gbori ikelema-koro tẹ ḅọkọ mẹ ḅakụ ḅakụtẹ warị nyanaḅọ ḅe ḅẹẹ, “Ḅo ị́ warị sọ owiḅọ ḅe pakama-ḅoo, mịẹtẹ wa ori na gboloma ḅẹ ḅara.”

²³Warị nyanaḅọ ḅe nwẹnị paka ịn dama-mu tẹ ḅẹẹ, “Ẹn-ẹn, ị̀ amịnapụ, ọ́ mị-ḅara kẹ si-sịḅịḅio-sụa ḅara kẹ ye mịẹ ma; ọmịnị ẹrịarị mịnẹ ḅieḅe ị̀ warị ḅio sọ-ḅo tẹ ḅẹẹ-sakị ó mị ḅụụ-jịrịma si mịẹye mẹ mịẹ ma.

²⁴Ḍikii! Ị̀ ẹrẹḅọtụḅọ amụ ḅụụ-gboloa ḅọ na, ori ịgwa-ẹrẹḅọ na mịanga emii; yee á mịọkụ ịn pakama-ḅo. Ọmịnị ịn kan, tẹ ó ḍiki tẹ kẹ inina mịẹ na-iḅi ḅara mịẹ; kụma ḅị tomḅọ ḅe ḅụụ ọ́ nwẹn sime ḅụụ-jịrịma siye mịẹ ma.”

²⁵Kụma owiapụ ma ò poki-a. Anieḅụ Livayị furo-ḅẹ-ḅọ ḅe nwẹnị ori ịgwa-ẹrẹḅọ ma ọlọ tẹ á pakama ịn pịrị; tẹ ịn nwẹnị kụrọ ḅara kẹ arị ọlọtẹ arị na nimi-a, tẹ bebe ḍin mẹmgba kẹ á wori nwenii ḅo dede-ḅio la. Ene mẹ saakị finji koroarị ogbo, ịn nwẹnị á wẹrịso tẹ á so.

²⁶Ḅaaso ḅụ ene finji-koroarị ogbo ẹrẹḅọ ma nwẹnị ḅo owiḅọ ḅe warị ḅọkọ á sịḅịdaḅọ ḅe sime anga mẹ ḅụ ḅịkị-koro tẹ sime nwenii ene nwẹnị finji-koro.

²⁷Á sịḅịdaḅọ ḅe dede-ḅio mẹ ḅụ saakị tẹ warị mẹ ḅẹ aḅọkọ ma finji tẹ paka ò muarị anga mu ḅẹ tẹso, ori ẹrịm ori ịgwa-ẹrẹḅọ ma anịjụ warị mẹ ḅẹ ḅọkọ mẹ ḅụ ḅọlọlọ wararị, tẹ árị aḅara ḅọkọ mẹ suku ḅụ emi.

²⁸Ọ̀ nwẹnị á ḅẹẹ, “Saakịị, yee wa nwẹnị mẹnjị.” Kụma pakịrị ḅịḅị ofori. Anịtẹso ọ̀ nwẹnị á saakị yedogi-nama mẹ ọgọnọ gbana; tẹ owiḅọ ḅe nwẹnị saakị tẹ so ori ama mu.

²⁹Ò ḅo ọ̀ warị ḅio sọ tẹso, ọ̀ nwẹnị gbọrụ kala-ogie ọkị, tẹ ori ịgwa-ẹrẹḅọ ma ọkị tẹ eleke-eleke ḅụ á kẹ oyi maa apakịrị finji keni, tẹ á kẹ Izirẹlị ḅẹ oyi maa afuro finji mamgba fịrịma ikelema.

³⁰Anị ẹrị apụ mamgba nwẹnị ḅẹẹ, “Anị ene mẹ tẹ Izirẹlịapụ Ijiputi ḅẹ ama ḅio paka-ḅo sakị ḅụ nwenii ḅo mịmgba la gbala-gbala nwẹn sime ye amụ paka-a, anịanịa tọrụngbọ kẹ ẹrị. Ọmịnị anị kẹ ḅiokoromaa, kẹ ḅịḅị-kẹ-ogbosọọ, tẹ ẹkwẹẹn.”