Read kalabari Mịẹfinji 13 Bible Online

Mịẹfinji 13 - kalabari bible

Mịẹfinji 13

¹Anịtẹso à nwẹnị kịnị-ḅaaḅa gbọrụ opu nama ẹrị, ori abajị ogboku sime tẹ paka-ḅoarị. Sọnọma asịḅị na oyi ịfalị na ọ̀ nwẹn sụam; ịfalị ma gberie, gberie ọgọnọ ama-da sun emi, tẹ sịḅị ma ḅụ gberie, gberie ọgọnọ ịn Tamụnọ fie-sima ẹrẹ kẹ kẹẹ wararị.

²Kịnị ḅaa, ḅaa opu nama ḅe, ọ̀ sịrị na kịkam, tẹ ori aḅụọ tuu aḅụọ kịka tẹ, ori ọkụkụ ḅịḅị kịka ḅịḅị nyanam. Daragọnị ḅe nwẹnị amịna soku-ḅẹ kụrọ na emine na opu na saakị kịnị-ḅaaḅa opu nama ḅe pịrị.

³Ye ori asịḅị ma ḅẹ gberie la tẹ ọ̀ kẹ fịị, fịị ḅara wẹrịm, kụma ịnọ mẹ ḅịya tẹ. Bebe tomikiri mẹ ḅụụ-bua tẹ kịnị-ḅaaḅa opu nama ḅe ḍukamẹnjịm.

⁴Anịtẹso ḅẹḅọ-ḅẹḅọ nwẹnị sunsin daragọnị ḅe pịrị, ori ori opu mẹ kẹ kịnị-ḅaaḅa opu nama ḅe pịrị tẹ ye mẹ gotẹ. Kịnị ḅaa, ḅaa opu nama ḅe sọ in sunsin ọ̀ pịrị tẹ ḅẹẹarị, “Kịnị ḅaa, ḅaa opu nama ḅe na kịkaḅọ tụḅọ? Ine ori na kuḅu dama tẹ owu sọ ḅẹ ḅọ tụḅọ?”

⁵Ịn nwẹnị minini kịnị-ḅaaḅa opu nama ḅe pịrị mịnẹ ori opu ḅụụ-boma ẹkwẹn, tẹ Tamụnọ mịẹ-sima ḅẹ aị kọn ma ḅọrọ, tẹ pịkị anị kụrọ mẹ kọn nwenii mu akalụ amesi maa akalụ finji laa.

⁶Tẹ ọ̀ nwẹnị saakị Tamụnọ na, ori ẹrẹ mẹ na, ò sime anga na, So-ḅio angarị apụ mamgba na wori-wori sima.

⁷Ịn pịkị minini ọ̀ pịrịm, mịnẹ ori owu kẹ Tamụnọ atomi ma pakaa, tẹ ịn nẹngịmaa. Tẹ ịn pịkị kụrọ kẹ ọ̀ pịrịm ọ̀ kẹ ḅẹrẹtọn furo-furo na, sịẹ-sịẹ na, ẹkwẹn-ḅịḅị-ḅịḅị na, tomi kịrị-kịrị na, kụlọ-kụlọ ḅẹ atomi ma pịrị.

⁸Tẹ tomikiri ḅẹ atomi mamgba sunsin ọ̀ pịrị ḅa; ẹrẹ, ịn ḅaa Anana Tụḅọ ḅe, ḍumo ḍiri mẹ, anie tomikiri mẹ amụ tẹmẹ-a kụra-ḅio kẹẹ koro wararị ye mẹ, ḅio emi apụ ma sikima.

⁹Ọkọẹrẹsị, ó ḅeri nyana tẹ kẹ ye naa ḅarị ḅẹḅẹ, ó pokii!

¹⁰Ḅẹḅọ-ḅẹḅọ tẹ kun-ḅara ḅio sọọ ḅẹ ḅọ, piki-pikiye-ofori ḅara ḅụ, ini mḅọ kun ḅa; ḅẹḅọ-ḅẹḅọ tẹ ogie ḅịḅị ḅụ fịị ḅẹ ḅọ, piki-pikiye-ofori ḅara ḅụ, ogie mie mḅọ ḅaa ḅarịye. Miemẹ anị ye-inema na minini na ḅiiarị Tamụnọ atomi ma pakịrị anga ḅụ.

¹¹Anịtẹso à jen kịnị-ḅaaḅa opu nama ẹrịm, tẹ kpongbo-kiri mẹ ḅio puu-paka-ḅo ye. Ọ̀ maa ịfalị sụam, anana tụḅọ ịfalị sụa ḅara, tẹ ọ̀ daragọnị ḅe ẹkwẹn ḅara ẹkwẹnm.

¹²Tẹ kịnị-ḅaaḅa tarị opu nama ḅe nyana opu kụrọ mẹ mie ọ̀ kẹ ọ̀ tọrọkọ ḅụ ọ̀ mịẹ ḅẹ ye goyegoye mịẹ ye. Ọ̀ nwẹnị tomikiri ḅẹ atomi mamgba ponoma, mịnẹ ịn sunsin kịnị-ḅaaḅa opu nama, tarị ye ḅe tẹ ye la tẹ ịnọ mẹ pịkị ḅịya tẹ ye ḅe pịrị.

¹³Ḅie maaịn karama kịnị-ḅaaḅa opu nama ḅe, ori opu ḅụụ-buama-aị mịẹm; tomi mamgba ẹrị ḅara ḅụ ò So-ḅio kọrị fịnị gbo tomikiri koromam.

¹⁴Tẹ in minini ọ̀ pịrị tẹ, kịnị-ḅaaḅa tarị opu nama ḅe tọrọkọ ọ̀ mịẹ ḅụụ-buama-aị ma ḅụ, ḅọrọtẹ oḅori kẹ tomikiri ḍumo sime apụ mamgba sịnm. Kịnị ḅaa, ḅaa opu nama ḅe nwẹnị ḍuko ịn pịrị, mịnẹ ịn fụḅara pakama tẹ kẹ kịnị-ḅaaḅa opu nama ḅe, tẹ ogie ịnọ ḅụ ḅọrọtẹ fịị ḅẹ tọn tẹ, pịkị ḍumo ḅọ ḅe kụn.

¹⁵Ịn nwẹnị minini kịnị-ḅaaḅa maaịn karama opu nama ḅe pịrị, mịnẹ ò ḍumo ọwụ sara kịnị-ḅaaḅa tarị opu nama ḅe fụḅara mẹ ḅụ suu, mịẹtẹ oru fụḅara mẹ inetẹ ẹkwẹn tẹ ò sunsin ọ̀ pịrị ḍụkụ-a apụ ma ḅaa ḅarị ḅara.

¹⁶Tẹ kịnị-ḅaaḅa opu nama ḅe nwẹnị tomi mamgba ponoma, kala na opu na, ngọ-kọn apụ na igoin-apụ na, omoni na ḅarana sịḅị nyana apụ na, mịnẹ ini elekima kẹ ịna ama-ḅara ḅụ, anịanịa, ịna fụḅara ḅọkọ sụa.

¹⁷Mị elekima mẹ anie kịnị-ḅaaḅa opu nama ḅe ẹrẹ, anịanịa kịẹn-ḅịḅị tẹ ori ẹrẹ mẹ kiri sịẹ ye. Anị nyana-a ḅọ inetẹ ye fẹẹ-a, pịkị ye dẹrị-a.

¹⁸Miemẹ anị nimi ḅiiarị. Ḅẹḅọ-ḅẹḅọ tẹ sịḅị ḅio ḅẹ oru nyanaḅọ inetẹ kịnị-ḅaaḅa opu nama ḅe kịẹn-ḅịḅị mẹ fiearị ye ḍọkị ḅo ḅa, kẹ gotẹ ọkọ ḅẹẹarị, kịẹn-ḅịḅị mẹ anị sịẹ tomḅọ ẹrẹ pịrịm. Ori ḅe kịẹn-ḅịḅị mẹ anie 666 (ẹndẹ oyia asi finji na ini fa tesi oyi finji na).