Read kalabari Mịẹfinji 14 Bible Online

Mịẹfinji 14 - kalabari bible

Mịẹfinji 14

¹Anịtẹso à ḍiki tẹ ẹrịm, Anana Tụḅọ ḅe Zayọnị Tụndụ mẹ ọgọnọ sịẹ wararị, tẹ ori atomi, kịnị maa puku fa si ma sọ ori na sịẹ simem, tẹ inimgba, ori ẹrẹ na ọ̀ Ḍa ẹrẹ na, ịna fụḅara ḅọkọ kẹẹ wararị.

²Tẹ à So-ḅio gele anga ḅụ paịn paịn-sararị minji fie ḅara fie ḅo gbọrụ pọkọ naam, tẹ pịkị so-alagba kụrọma tẹịn tẹ anị fie, fie ḅara kịkam. Anị pịkị ọbọ farịtẹ anị fie, fie ḅara fiem.

³Kịnị maa puku fa si (144,000) ma nwẹnị emine mẹ na, Tamụnọ tẹmẹ tẹ ḍumo wararị ini aị ma na, omongiapụ ma na tọrọkọ sịẹsime; ịwọ nume mie ịn su sime ye, sikima ja apụ inetẹ ḍawọ ḅo ḅịa nume. Tomikiri ḅẹ atomi mamgba ḅụ ini ngẹrị mie pakịrị ḅo tẹ apụ.

⁴Ini ma anie owiapụ tẹ amụ ereme na gboloma-a, tẹ amịna ḅụụ wẹrị kpaịnma wararị apụ; ini anie fịafịa apụ. Anana Tụḅọ ḅe mu anga, mu anga ini ò ḍuka-muarị. Ini ma anie tomikiri ḅẹ atomi ma ḅụ kirikọn-apụ ma ogboku ḅụ ịn pakịrị ḅo tẹ kẹ tarị agba mịẹ Tamụnọ na Anana Tụḅọ ḅe na pịrị tẹ apụ.

⁵Jene-jene ini iruo ye ḍuko tẹ nwẹn ḅẹẹ ye ofori; ịna ḅụụ ḅụ ḅẹẹ-ḅẹẹye ofori.

⁶Anịtẹso So-tọrụ ḅụ à jen enjẹlị ẹrịm, ò fiin iwo sọ fa wararị, tẹ sime gbamaso iḅi-oku ḍuko tomikiri simearị atomi ma pịrị ḅẹm tomi kịrị-kịrị, furo-furo, ẹkwẹn-ḅịḅị ḅịḅị, sịẹ, sịẹ ḅẹ atomi ma.

⁷Ọ̀ nwẹnị oloku pọkọ kẹ ḅẹẹ, “Ọ́ Tamụnọ mangịma, tẹ ori opu tokinii! Ò tomikiri ḅẹ atomi ma kọn ḅẹ sakị mẹ la tẹ ẹrẹsị. Ọmịnị iḅo tẹ sunsin ọ̀ pịrịị, ori anie so na kiri na, abajị na, ngụngụḅa minji mamgba na tẹmẹ ḅọ!”

⁸Maaịn karama enjẹlị nwẹnị tarị ye ḅe pono tẹ ḅẹẹ, “Á ḅịkị tẹ! Opu Babịlọnị ma ḅịkị tẹ. Árị mie amịna iru mẹ kẹ tomi mamgba pịrị ḅuu ye — anie owiapụ na ereme na si mẹnjị kụrọtẹ iru mẹ!”

⁹Tẹrẹị karama enjẹlị nwẹnị tarị ḅẹ maa enjẹlị ma pono tẹ oloku tẹ, tẹ ḅẹẹm, “Kịnị ḅaa, ḅaa opu nama ḅe na, ọ̀ fụḅara mẹ na tẹkẹ tẹ, pịkị ori elekima mẹ kẹ amịna fụḅara ḅọkọ, anịanịa ḅara ḅụ sụa ḅọ, sụa ḅọ,

¹⁰mḅọ ḅarana Tamụnọ iru mẹ ḅuu ḅa, anie ori opu ịganị mẹ ḅẹ iru mẹ, tẹ ọ̀ kẹ ori ịganị mẹ ḅẹ kọpụ mẹ ḅio, gwa-a ḅara, kẹ sụa ḅinma wararị ye mẹ. Miemẹ mịẹ apụ mamgba kọrị fịnị na ịn kẹ sọlụfọ sịn-arị ḍụḅarị mẹ na ḅụụ-fụka da ḅa, Tamụnọ fịafịa enjẹlị ma na Anana Tụḅọ ḅe na tọrọkọ ḅụ.

¹¹Ịn kẹ ịn kẹ tọrụsiẹrịmarị kọrị fịnị mẹ ḅẹ onwin mẹ turee-tureema so iwo nwenii mu ḅẹẹ-sakị ḅẹẹ-sakị lam. Ḅẹḅọ-ḅẹḅọ tẹ kịnị-ḅaaḅa opu nama ḅe na ọ̀ fụḅara mẹ na tẹkẹ, anịanịa ori elekima mẹ sụa ḅọ, mḅọ ịnyọsara nyana-a, eneḅaka-o, ḍin-o.”

¹²Miemẹ, Tamụnọ atomi ma pakịrị anga ḅụ, anị ye-inema ḅiiarị, ini ma tẹ Tamụnọ tọn koroma aị ma kokoarị tẹ, pịkị Jizọsị minini apụ ma.

¹³Anịtẹso à So-ḅio gbọrụ pọkọ naam, ḅẹẹ mịnẹ, “Miemẹ kẹẹ koromaa. Mịọkụ saakị tọrọkọ mu ḅioḅẹlẹ sime KỊNỊNYANAḄỌ ḅe fịrị mẹ ḅio sime tẹ fịị apụ ma pịrịm.” Tẹmẹ ḅe nwẹnị pakịrị, “Inn, karakaraye lamam! Ini ịna kụrọ kọrịnama mẹ ḅụ ḅioḅẹlẹ ịnyọsara ḅa, tẹ ịn mẹnjị fịrị mẹ dogi-ḅo ye mẹ ini na muarị ẹrẹsị.”

¹⁴Anịtẹso à ḍiki tẹ pịna-pịna oḅuto ẹrịm, tẹ tomḅọ kịkaye anị ọgọnọ lẹgị wararị, tẹ golu ama-da sun ọ̀ sịḅị emi tẹ oḅuarị fịaị pẹlẹ ogie ọ̀ ḅara simem.

¹⁵Anịtẹso jen enjẹlị nwẹnị Tamụnọ-warị mẹ ḅio sime tẹ paka-ḅo, tẹ oloku pọkọ kẹ oḅuto mẹ ọgọnọ lẹgị ḅọ ḅe ḅẹẹ, “Ị́ fịaị pẹlẹ ogie mẹ ọkị tẹ kẹ kpọọtẹ aị ma pẹlẹẹ, kẹ gotẹ ọkọ ḍukoarị, sakị mẹ la tẹ; tomikiri mẹ ḅẹ ḍiḅi aị ma kpọọ ḅo soku ḅiri la tẹ!”

¹⁶Anịtẹso oḅuto ọgọnọ lẹgị ḅọ ḅe nwẹnị ọ̀ fịaị pẹlẹ ogie mẹ kẹ tomikiri mẹ ḅẹ mbịaka ma pẹlẹ.

¹⁷Anịtẹso arị ẹrịm jen enjẹlị nwẹnị So-ḅio ḅẹ Tamụnọ-warị mẹ ḅio sime tẹ paka-ḅo, tẹ ori sọ fịaị pẹlẹ ogie nyanam.

¹⁸Anịtẹso jen enjẹlị, tẹ fịnị kụrọ nyana ḅọ, nwẹnị agbamịẹ-anga mẹ akaka sime tẹ ḅo. Ori oloku oḅuarị fịaị pẹlẹ ogie mẹ ọlọ ḅọ ḅe pịrị tẹ ḅẹẹm, “Ị́ fịaị pẹlẹ ogie mẹ kẹ mịẹye ḅụ suu, tẹ tomikiri mẹ ḅẹ kụrọ mgbọlụ ma pẹlẹ, pẹlẹ koroma, ịkpangị, ịkpangị ḅụ, kẹ gotẹ ọkọ ḍukoarị, mgbọlụ ma ḅịya tẹ!”

¹⁹Mie ḅụ enjẹlị ḅe nwẹnị ọ̀ fịaị pẹlẹ ogie mẹ kẹ tomikiri mẹ ikelema-koro, tẹ arị kẹ Tamụnọ owi ịganị mẹ ḅẹ iru pọnjị pakama otolo mẹ ḅio gbin suu.

²⁰Tẹ ịn nwẹnị ama mẹ ḅụ paka-ḅo anga ḅụ sime iru pọnjị otolo mẹ ḅio kụrọ mgbọlụ ma pọnjị, tẹ ọmbie mie paka-ḅo ye, tẹ anị nwẹnị tọrụ mịẹ tẹ puu ḅọrọ, nangwọ mẹ tombi jeia si lam, tẹ pokolo mẹ tomḅọ sịḅị ḅile ḅara simem.