Read kalabari Mịẹfinji 18 Bible Online

Mịẹfinji 18 - kalabari bible

Mịẹfinji 18

¹Miemẹ ḅọrọ tẹso, à jen enjẹlị ẹrịm So-ḅio sime tẹ koro-ḅoarị. Ori opu kụrọ nyanam, tẹ ori ebube kama bebe tomikiri mẹ saramam.

²Ọ̀ nwẹnị kụrọma gele pọkọ kẹ oloku pakama: “Á ḅịkị tẹ! Opu Babịlọnị ma ḅịkị tẹ! Mịọkụ oru na si-atẹmẹ na mie á ḅio anga tẹ ẹkpẹarị ye, sịḅị-ngụngụnmarị tẹ ḅụụ ḅẹlẹma-a afeni mamgba á ḅio angarị.

³Gbala sịẹ-sịẹ mamgba árị iru mẹ ḅuu tẹ — árị ama-mẹnjị si mẹ ḅẹ kụrọtẹ iru mẹ. Tomikiri ḅẹ amadapụ ma árị na ama-mẹnjị-ẹrẹḅọ si mẹ mịẹm, tẹ tomikiri ḅẹ atuḅoni ma á ḅụụ ọlọ-ọlọ-a ḍumo mẹ ḅụ ḅọrọ tẹ ngọ kọnm.”

⁴Anịtẹso à So-ḅio sime tẹ ḅo jen pọkọ naam, tẹ ḅẹẹm, “Ị̀ atomi, ọ́ paka-ḅoo! Ọmịnị á ḅio ḅụ paka-ḅoo! Ọmịnị árị asi ma ḅụ ḅara suu ma; ọ́ ḍụkụ tẹ á laarị fomu-ḅara mẹ ḅụ ọmịnị sọ kiri nyana ma!

⁵Kẹ gotẹ ọkọ ḍukoarị, árị asi ma tunduru gele mu so la tẹ, tẹ Tamụnọ árị iri amẹnjị ma kẹ ḅiokoroma tẹ.

⁶Ọmịnị á kẹ ọ́ mịẹ gbọrụ ḅara mẹ ḍiki tẹ kẹ á mịẹ; á mịẹ ye mẹ ḅẹ maa kiri ọ́ nwẹn kẹ á gbẹẹ. Maa kiri kẹ kụrọ á sụa ọ́ pịrị iru mẹ nẹngị iru ọ́ nwẹn kẹ á kọpụ ḅio sụa ḅinmaa.

⁷Á sọ opu mẹ na, á nyana tọrụ-ḅẹlẹ mẹ na gbasị tọrụsiẹrị na kururu na ọ́ nwẹn kẹ á pịrịị. Á kọkọ á ḅụụ ḅẹẹ ḅẹẹ: ‘Yẹrị amada-ẹrẹḅọ, mị yọ à yaụ-sime lẹgị tẹ! Yẹrị diḅọ-fịtẹ-ẹrẹḅọ-a, à kururu nimi ḅịa gbamasom!’

⁸Miemẹ gotẹ, gbọrụ ene ḅụ á ḅụụ-fụka mamgba ḅo á la fama ḅa: obi na kururu na ḅuru-ḅa na. Tẹ ịn fịnị kẹ á dọkịma ḅa, kẹ gotẹ ọkọ ḍukoarị, KỊNỊNYANA-TAMỤNỌ ḅe tẹ á kọn-arị ḅọ ḅe ọ̀ ḍụḅa ḅakam.”

⁹Tomikiri ḅẹ amadapụ ma, tẹ árị na sọ tẹ ama-mẹnjị eremịna si na ḅụụ ọlọ-ọlọ-a si mẹ na mịẹ apụ ma opu ama mẹ owu ḅa, ini opu ama mẹ dọkịma famarị orumo mẹ ḅẹ onwin mẹ ẹrị sakị.

¹⁰Ini á daarị ḅụụ-fụka mẹ ḅio sọ ḅarị ḅoto ḅẹ ḅalafa gotẹ ala-jụ mie ịn sịẹsime tẹ ḅẹẹarị, “Á tẹkẹlẹtẹ ḅara ḍikii! Anị ḅalafama ḅara ḍikii! Babịlọnị, mị ḍụḅatẹ, kụrọtẹ opu ama mẹ! Boowa kala-sakị kịngẹ ḅụ á nwẹn sime fomu-ḅara da tẹ ḅara ḍikii!”

¹¹Tomikiri ḅẹ tuḅoniapụ ma sọ á gotẹ owu-owu tẹ kururuarị, ịna ngọ fẹẹarị-ḅọ ḅarị ofori ẹrẹsị,

¹²ịna golu na, seleḅa na, yela aḍụḅarị na, pahalị nwẹn-sịn iḅi aị na, iḅi aḅịtẹ na, pịna-pịna aị na, awụ tọrụ sụa aị na, lọkọ-ḅịtẹ na, pọpụlụ nwẹn-sịn tọrụ sụa ḅịtẹ na, kịrị-kịrị ngọ tẹ ịn kịrị sịn na ọdụ na kẹ mịẹ aị, yela lamarị asịn na, ojo na kẹ mịẹ ngọ na, ikulele na, ngolo ḍụḅarị kẹ mịẹ aị na,

¹³tẹ sịnamọnị na, ẹnyị na, inisẹnịsị na, maa na, fịranịkịnịsẹnịsị nwẹn-sịn kụnụ aị na, waịnị iru na, pulo na, gbẹẹtẹ mbịaka na, mgbọlị mgbọlị ḅụ emi aị na, opu anama na, anana na, asụ amẹẹ na, ye dogi aị na, dẹrị ḅẹ omoni, tẹ ḍumo wararị atomi ma, fẹẹ ḅẹ apụ ḅarị ofori.

¹⁴Tuḅoniapụ ma nwẹnị á ḅẹẹarị, “Ị́ nyana ḅẹ ḍọkị iḅi aị mamgba ịmaịn-faa tẹẹ, ị́ pẹrẹ mamgba na ị́ kẹ kịnị tọrụ daarị iḅi mẹ na sọ so tẹẹ, tẹ ị́ ḅarị jen kẹ arị ḍọkị-ḅo ḅịa!”

¹⁵Tuḅoniapụ ma tẹ mị opu ama mẹ ḅio tuḅokọn ḅụ ḅọrọ tẹ ngọ-kọn apụ ma, á laarị ḅụụ-fụka mẹ ḅofa ini sọ la gotẹ, ala-jụ sịẹsime ḅa. Ini owu-owu tẹ kururu ḅa.

¹⁶Ịn ḅẹẹ ḅa, “Á tẹkẹlẹtẹ ḅara ḍikii! Mị ḍụḅa ḅakatẹ opu ama mẹ! Á kọkọ iḅi aḅịtẹ na, awụ tọrụ na, pọpụlụ nwẹn-sịn tọrụ na sụa aị na, golu na, yela lamatẹ aḍụḅarị na, pahalị nwẹn-sịn aị na kẹ bụlụ-bụlụma á ḅụụ ḅirima-ḅirima!

¹⁷Tẹ boowa sakị kịngẹ ḅụ mịna ngọ mamgba fa fama tẹẹ!” Tẹ arụ-dọkụapụ mamgba na, ḅụkụlọ ye-muapụ na, arụ ḅẹ asawọ na, minji ọgọnọ ḅẹ arụ kẹ kọn-kọn fịarị apụ na ala-jụ sịẹ tẹ

¹⁸á ḅio soarị orumo mẹ ḅẹ onwin mẹ ẹrị tẹ olokum: “Jen sakị mị gburo-gburotẹ opu ama mẹ pembe jen opu ama amụ paka-a!”

¹⁹Tẹ ịn fọọn ḍuu ịna asịḅị sara tẹ owu-owu tẹ ḅẹẹm, “Anị ḅalafama ḅara ḍikii! Mị opu ama mẹ tẹkẹlẹ tẹ ḅara ḍikii! Mị ḍụḅa ḅakatẹ opu ama mẹ Kọn-sara ngọ ḅụ mie arụ nyana tẹ tọrụ kọngọ dọkụ apụ mamgba ḅọrọ tẹ pẹrẹ ye! Kụma ḍikii, boowa kala-sakị kịngẹ ḅụ á nyana ye, nyana ye fa tẹ!”

²⁰So, ḅioḅẹlẹẹ, á fa tẹ ye mẹ gotẹ! Ọmịnị Tamụnọ atomi na, fịrịmẹnjịapụ na, ịkịankoroapụ na, ó ḅioḅẹlẹẹ! Kẹ gotẹ ọkọ ḍukoarị, Tamụnọ á kẹ ọ́ mịẹ-aị ma ḅẹ ḅẹrẹ pẹlẹ á ḅara sima tẹ!

²¹Anịtẹso gbọrụ opu kụrọtẹ enjẹlị nwẹnị gbọrụ opu ḍụḅarị iyingi, ye gbẹẹ-ye na gbasị ye, saakị tẹ kẹ tọrụ minji gbin tẹ ḅẹẹ, “Mie ini anị Babịlọnị nwẹn-sịn opu ama mẹ kẹ kụrọma gbin ḅarị ḅara, tẹ kịnị ḅarị jen kẹ árị ẹrị ḅịa.

²²Tomi ḅarị jen kẹ í ḅio ọbọ na, tomina pọkọ sụarị nume na, kala pọkọ kẹ fiearị ofuro aị na, ọdụ fiearị ye na naa ḅịa! Kịnị ḅarị jen kẹ ḅara ḍin gbọrụḅọ sọ ẹrị ḅịa í ḅio ḅụ; tẹ ye gbẹẹ ḍụḅarị fiearị ye sọ kịnị ḅarị jen kẹ í ḅio naa ḅịa!

²³Tọnjọ sọ ḅarị jen kẹ í ḅio kọrị tẹ kịnị ẹrị ḅịa; ịyarị ama-na-ere-na pọkọ sọ í ḅio kịnị ḅarị naa ḅịa. Tomikiri ḅụ ị́ atuḅoni ma kụrọ nyana tẹịnm, tẹ ị́ pịkị majịkị kẹ oḅori kẹ tomikiri ḅẹ atomi mamgba sịnm.”

²⁴Babịlọnị gotẹ fomu-ḅara da ye, ịkịankoroapụ ma na, Tamụnọ atomi ma na ọmbie ịn nwẹn ẹrịm opu ama mẹ ḅio; karakara-ḅara-ḅụ, tomikiri ịn ḅaa tẹ atomi mamgba ọmbie mẹ.