Read kalabari Mịẹfinji 19 Bible Online

Mịẹfinji 19 - kalabari bible

Mịẹfinji 19

¹Mie ḅọrọ tẹso, à naa ye, gbala tọnwa atomi ogbo So-ḅio ẹkwẹn tẹ ḅẹẹarị, “Tamụnọ tokinii! Wamịna Tamụnọ ḅe mie ḅọrọma na, opu na, ebube na, kụrọ na nyana ḅọọ.

²Ori aḅẹrẹkọn ma karakaram, aḍụa pịkị arị ḅụ ofori. Amịna ama-mẹnjị si ḍumo kẹ tomikiri mẹ simarị ẹrẹḅọ ma, ọ̀ ḅẹrẹ si pẹlẹ á pịrị tẹ, árị ori afịrịmẹnjịapụ ḅaa ye gotẹ, ò fomu-ḅara kẹ á pịrị tẹ.”

³Ịn nwẹnị siin oloku, “Tamụnọ tokinii! Ḍụḅa ḅakatẹ opu ama mẹ kọn-arị dọkị mẹ ḅụ ḅẹ onwin mẹ iwo gbamasoarị!”

⁴Si inia omongiapụ finji ma na Tamụnọ tẹmẹ tẹ ḍumo wararị ini aị ma na nwẹnị kiri koro tẹ sunsin emine mẹ ọgọnọ lẹgị wararị Tamụnọ ḅe pịrị, tẹ ḅẹẹ, “Amẹnị. Ọ́ Tamụnọ tokinii!”

⁵Anịtẹso gbọrụ pọkọ nwẹnị emine mẹ ḅụ fie ḅo tẹ ḅẹẹ, “Tamụnọ fịrịmẹnjịapụ na sunsin ọ́ pịrịarị atomi mamgba na, opu na kala na, ọ́ wamịna Tamụnọ ḅe tokinii!”

⁶Anịtẹso à naa ye, opu tomi ogbo ẹkwẹn-arị, minji tụndụ ọgọnọ pẹlẹ-pẹlẹ sararị tẹ anị fie-fie ḅara, pịkị so-alagba tẹịn tẹ fie ḅara kịkam. Àrị in ḍuko ye naam, mịnẹ “Ọ́ Tamụnọ tokinii! Gbala KỊNỊNYANAḄỌ, wamịna Tamụnọ, Kụrọmamgba Nyanaḅọ ḅe, anie Amadaḅọ!”

⁷Ó yee wa ḍereku tẹ ḅioḅẹlẹ; ó yee wa ori opu mẹ tokini! Kẹ gotẹ ọkọ ḍukoarị, Anana Tụḅọ ḅe ere-ịya sakị mẹ laa tẹẹ, tẹ ịya-mu-ẹrẹḅọtụḅọ ma á ḅụụ tẹlẹma anị pịrị tẹẹ.

⁸Ini á sụa ḅẹ fịafịa, yori-yoritẹ iḅi kapa kẹ á pịrị sụa ḅẹm. (Nwẹn ḅẹẹ fịafịatẹ yori-yoritẹ iḅi kapa mẹ anie Tamụnọ atomi ma iḅi amịẹaị ma.)

⁹Anịtẹso enjẹlị ḅe ḅẹẹm, “Miemẹ kẹẹ koromaa: Ịn sịn Anana Tụḅọ ḅe ere-ịya-alalị mẹ mu apụ ma ḅioḅẹlẹ sime ịn pịrịm.” Tẹ enjẹlị ḅe pịkị ị̀ ḅẹẹm, “Mịna ẹkwẹn ma anie Tamụnọ kọn karakara ẹkwẹn.”

¹⁰Àrị ọ̀ ḅụọ-suku ḅịkị koro tẹ ọ̀ tẹkẹ ḅẹ-yearị ogbo ori ị̀ ḅẹẹm, “Ọkọ mịẹ ma! Yẹrị sọ kọkọ, ị́yẹrị na ị́ amịnapụ ma na, inimgba tẹ Jizọsị kẹ tomi ḍie karakara mẹ minini tẹ ọlọ-sịẹma wararị apụ ma, pembema fịrịmẹnjịḅọ. Sunsin Tamụnọ pịrịị!” Gbala Jizọsị mịẹfinji karakara mẹ anie ịkịankoroapụ ma tẹmẹ jikearị ye.

¹¹Anịtẹso, à ḍiki ḅẹ sakị, so finji tẹ à pịna-fa asụ ẹrị tẹ. Ori ọgọnọ kpọlị tẹ ò dogi mẹnjị ḅọ ḅe ẹrẹ, Ḅioḅẹngbọ kẹ gbana na-iḅi na, karakara na; sime tomḅọ pịrị kiri kẹ mḅọ pịrị ḅara mie ọ̀ kẹ ḅẹrẹkọn-arị, pịkị kẹ ori ọmụ ma gbin-arị ye.

¹²Ori atọrụngbọ fịnị kọrị ḅara kọrịm, tẹ ọ̀ tọnwa ama-da sun surem. Ori ọgọnọ ḅụ ẹrẹ kẹẹ wararị, kụma ò ḅioju sikima anị nimi jụmọ ofori.

¹³Ọ̀ sụa kapa mẹ ọmbie anị kpeleki wararị. Ori ẹrẹ anie “Tamụnọ Ẹkwẹn.”

¹⁴So-ḅio ọmụ-ogbo-ogbo ma, ọrụ na ọrụ na, amịna pịna-fa asụ kpọlị tẹ pịna-fa kapa sụa tẹ ò ḍukamẹnjịarị.

¹⁵Ọ̀ ḅịḅị-ḅio oḅuarị okologie emi, anie mie ọ̀ kẹ sịẹ, sịẹ ma nẹngịma ḅarịye. Kụrọ ḅara mie ọ̀ kẹ ḅẹrẹtọn ịn pịrị ḅarịye, tẹ pịkị iru pọnjị pakama-ḅo ḅara kẹ Kụrọmamgba Nyana Tamụnọ ḅe opu ịganị mẹ pọnjị pakama-ḅo ḅarịye.

¹⁶Ọ̀ kapa na ọ̀ ḅụọ-ẹtẹnẹ na ḅụ ẹrẹ kẹẹ wararị: “Amadapụ mamgba Amadaḅọ, pịkị kịnịnyanapụ mamgba KỊNỊNYANAḄỌ.”

¹⁷Anịtẹso àrị ịrụa mẹ ọgọnọ sịẹsime wararị enjẹlị ẹrịm. Ọ̀ kụrọma oloku So-tọrụ fiin-arị afeni mamgba pịrịm: “Ó ḅo kobiri tẹ gbọrụ ḅụụ ḅụ Tamụnọ opu alalị mẹ fị!

¹⁸Ó ḅo amadapụ na, ọmụ-alapụ na, ọmụ asawọ na, asụ na, ịn dọkụ apụ ma na, tomi mamgba na, omoniapụ-o, furo awọmẹ-o, opu-o, kala-o, meni pẹị!”

¹⁹Anịtẹso à nwẹnị kịnị-ḅaaḅa opu nama ḅe na, tomikiri ḅẹ amadapụ ma na, ịna ọmụ-ogbo-ogbo ma na ẹrị, ini ọmụ gbin ḅẹ ḅara kẹ kobiri tẹ owu kẹ asụ ḅe kpọlị tẹ ò dogi mẹnjịarị ḅọ ḅe na ori ọmụ-ogbo mẹ na paka ḅẹ-yearị.

²⁰Ịn nwẹnị kịnị-ḅaaḅa opu nama ḅe na ọ̀ tọrọkọ ḅụụ-buama-aị mịẹ iruo ịkịankoroḅọ ḅe na kun ọkị. (Mịna ḅụụ-buama-aị ma ḅụ mie ọ̀ ḅọrọ tẹ oḅori kẹ ịn kịnị-ḅaaḅa opu nama ḅe elekima mẹ kẹ ḅụụ ḅụ sụa apụ ma na, ọ̀ fụḅara mẹ tẹkẹ apụ ma na sin-arị ye.) Ịn kịnị-ḅaaḅa opu nama ḅe na, iruo ịkịankoroḅọ ḅe na kẹ fịị-a ḅara kẹ ọpọlị balị kọrị ḅara kọrịarị fịnị tọrụ ḅio gbin suum.

²¹Asụ ḅe kpọlị tẹ ọ̀ kẹ mẹnjịarị ḅọ ḅe ḅịḅị ḅio paka-ḅo okologie mẹ mie ịn kẹ osi-apụ ma ọmụ-ogbo-ogbo ma ḅaa ye; tẹ feni mamgba fịị apụ ma meni mẹ ḅụ ini inetẹ ḅara pẹịm.