Read kalabari Mịẹfinji 7 Bible Online

Mịẹfinji 7 - kalabari bible

Mịẹfinji 7

¹Mie ḅọrọ tẹso, àrị ini enjẹlị ẹrịm, in tomikiri mẹ ḅẹ ini ịkọlị ma ḅụ sịẹsime, tẹ ini afẹrụ-aḅịḅị ma dasịẹma wararị, mịẹtẹ kiri ọgọnọ-o, minji tọrụ-o, pịkị sịn ọgọnọ sọ, fẹrụ ḅarị fie mu la ḅịa ḅara.

²À nwẹnị jen enjẹlị ẹrị, ori ịrụa saakị paka-ḅoarị anga mẹ ḅụ sime tẹ ḅoarị, tẹ ḍumo wararị Tamụnọ ḅe elekima mẹ ọlọ wararị. Ọ̀ nwẹnị oloku pọkọ kẹ ini enjẹlị ma, tẹ Tamụnọ tomikiri mẹ na tọrụ mẹ na sima kụrọ kẹ pịrị apụ ma sịn.

³Enjẹlị ḅẹ mẹẹ, “Ó ye kẹ tomikiri mẹ na, tọrụ mẹ na, sịn ma na lama ma, nwenii wa elekima kẹ Tamụnọ fịrịmẹnjịapụ ma fụḅara ḅọkọ sụa fama sakị la.”

⁴Tẹ in ḍuko ị̀ pịrịm, mịnẹ ịn Tamụnọ elekima mẹ kẹ fụḅara ḅọkọ ḅụ sụa apụ ma kịẹn-ḅịḅị maa puku fa si (144,000). Izirẹlị ḅẹ oyi maa furo finji ma ḅụ ịn paka-ḅom.

⁵Juda furo ḅụ gbọrụ puku oyi ẹndẹ finji ịn nwẹn sụam (12,000). Rubẹnị furo ḅụ gbọrụ puku oyi ẹndẹ finji (12,000) Gadi furo ḅụ gbọrụ puku oyi ẹndẹ finji (12,000).

⁶Asa furo ḅụ gbọrụ puku oyi ẹndẹ finji (12,000), Nafutali furo ḅụ gbọrụ puku oyi ẹndẹ finji (12,000), Manasẹ furo ḅụ gbọrụ puku oyi ẹndẹ finji (12,000).

⁷Simiyọnị furo ḅụ gbọrụ puku oyi ẹndẹ finji (12,000), Livayị furo ḅụ gbọrụ puku oyi ẹndẹ finji, (12,000) Ịsaka furo ḅụ gbọrụ puku oyi ẹndẹ finji (12,000).

⁸Zẹbulọnị furo ḅụ gbọrụ puku oyi ẹndẹ finji (12,000), Josẹfụ furo ḅụ gbọrụ puku oyi ẹndẹ finji (12,000) pịkị Benijamịnị furo ḅụ gbọrụ puku oyi ẹndẹ finji (12,000).

⁹Mie ḅọrọ tẹso, à ḍiki tẹ ḅakatẹ inweni-ogbo ẹrịm — inetẹ arị atomi mamgba kịẹn fama ḅẹ ḅọ ofori! Tomi kịrị-kịrị na, furo goyegoye na, sịẹ goyegoye na, ẹkwẹn-ḅịḅị goyegoye na ḅụ in ḅom, tẹ pịna-pịnatẹ vọrọrọ-akapa sụa tẹ emine mẹ na, Anana Tụḅọ ḅe na tọrọkọ sịẹsimem, tẹ ini eneme ọrọrọ ọlọ wararị ịna aḅara ḅụ.

¹⁰Ịn nwẹnị oloku pọkọ kẹ ḅẹẹarị, “Wamịna Tamụnọ, tẹ emine mẹ ọgọnọ lẹgị wararị ḅọ ḅe, na, Anana Tụḅọ ḅe na ḅara ḅụ mie ḅọrọma ḅoarị ye!”

¹¹Enjẹlị mamgba sịẹ emine mẹ na, omongiapụ ma na, Tamụnọ tẹmẹ tẹ ḍumo wararị ini aị ma na ikelema-korom; ịn nwẹnị iḅo tẹ fụḅara kẹ kiri gbolo tẹ sunsin Tamụnọ pịrị,

¹²tẹ ḅẹẹarị, “Amẹnị! Tokini na, ebube na, nimi na, ịmịẹtẹ na, kụn na, kụrọ na, opu kụrọ na sime wamịna Tamụnọ ḅe pịrị mu ḅẹẹ-sakị ḅẹẹ-sakị la! Amẹnị!”

¹³Omongiapụ ma ḅẹ gbọrụḅọ nwẹnị ì gbela, “Nwẹn kẹ pịna-pịnatẹ vọrọrọ-akapa sụa wararị atomi ma tọ apụ, ịn tọ-anga sime tẹ ḅo?”

¹⁴À nwẹnị pakịrị, “Ị̀ nyanaḅọ, à nimi-a. Ị́yẹrị nimim.” Ọ̀ nwẹnị ị̀ ḅẹẹ, “Mịna atomi ma anie ye ḅụụ la-a ḅara kẹ ḅalafama opu ḅaa-ḅọkọ ḅio tolu-ḅọrọ tẹ apụ ma. Ini ịna vọrọrọ-akapa ma kẹ Anana Tụḅọ ḅe ọmbie mẹ ḅio sikiri tẹ arị pịna-pịna tẹ.

¹⁵Anịẹrẹsị ịn Tamụnọ emine mẹ tọrọkọ sịẹ tẹ ọ̀ warị mẹ ḅio ene ḅaka na ḍin na, kẹ fịrịmẹnjị ọ̀ pịrịarị. Emine mẹ ọgọnọ lẹgị wararị ḅọ ḅe emi tẹ in kikima ḅa.

¹⁶Ḅuru ḅarị jen kẹ ịn tarị ḅịa, anịanịa minji; ịrụa sọ ḅarị ịn fọị ḅịa, ọfịrị sọ ḅarị ịn dọkịma ḅịa,

¹⁷kẹ gotẹ ọkọ ḍukoarị, Anana Tụḅọ ḅe tẹ emine mẹ karakara ogboku ḅụ emi ḅọ ḅe in ḍikiḍiki tẹ tọrọkọ-sụn ịn pịrị mu ḍumo-pịrịarị ngụngụḅa minji mẹ la ḅa. Tẹ Tamụnọ ịna atọrụ ḅẹ owu aminji ma sin fama ḅa.”