Read kalabari Rufu 3 Bible Online

Rufu 3 - kalabari bible

Rufu 3

¹Jen eneḅaka, Nahomi nwẹnị Rufu ḅẹẹ, “Ị̀ ẹrẹḅọtụḅọ, à diḅọ ḍọkị ị́ pịrị na-iḅi tẹẹ, tẹ iḅi ḅara kẹ í ḍikiḍiki ḅarị ḅọ.

²Mịọkụ Bohazi ḅe tẹ ị́ ọ̀ fịrịmẹnjị-ereme ḅụụ sọ tẹ namakọrị ḅọ ḅe anie wamịnị na kpeki-tẹịn mịnaḅọ. Ḍikii, mị ḍiin ori ịn kẹ Bali sịn fịye mẹ pịnị-pịnị sara ḅa mgbọlụ-sẹlẹ-kiri mẹ ḅụ.

³Anịẹrẹsị minji ḅiri tẹ olo ọmbịị, tẹ ị́ iḅitẹịn akapa ọkị sụaa, tẹ ideri mgbọlụ-sẹlẹ-kiri mẹ muu; kụma ḍụkụtẹ ò nimi ma í ḅo wararị nwenii ọ̀ fị-na-ḅuu-na fama tẹrẹmẹ.

⁴Kụma ọ̀ ḅọlọlọ ḅẹ sakị, mu ò ḅọlọlọ ḅarị anga mẹ kẹ lekiri, anịtẹso ọkụma, mu ọ̀ kẹ ḅụụ gbaịn ye mẹ da-saakị tẹ ọ̀ ḅụọ-suku ḅọlọlọ simee; anịsakị ori ị́ mịẹ ḅẹ ye ḍuko ị́ pịrị ḅa.”

⁵Rufu nwẹnị pakịrị, “Àrị í ḍuko aị mamgba mịẹ ḅa.”

⁶Anieḅụ á nwẹnị ideri mgbọlụ-sẹlẹ-kiri mẹ mu tẹ gbọrsịḅị á di iyingi ḍuko á pịrị ḅara mẹ mịẹ.

⁷Bohazi fị-na-ḅuu-na tẹ ò ḅioḅẹngbọ ḅụ ḅioḅẹlẹ tẹso, ọ̀ nwẹnị mu ini mgbọlị mẹ sara kpolima wararị kunoma mẹ ḅụ ḅọlọlọ ḅẹ mu. Anịtẹso á nwẹnị kẹmẹ-kẹmẹma mu, tẹ ọ̀ kẹ ḅụụ gbaịn ye mẹ da-saakị tẹ ọ̀ ḅụọ-suku ḅọlọlọ sime.

⁸Ḍin-ogbo ḅụ tomḅọ ḅe nwẹnị ḅụụ-gbiripu tẹ saakị tẹ pịkị ikelekele, tẹ ḍiki ḅẹ saakị gbọrụ ẹrẹḅọ ọ̀ ḅụọ-suku ḅụ ḅọlọlọ sime wararị.

⁹Ọ̀ nwẹnị gbela, “Ị́yẹrị tụḅọ?” Á nwẹnị pakịrị, “Yẹrị Rufu, ị́ fịrịmẹnjị-ẹrẹḅọtụḅọ ma, ị́ ḅụụ gbaịn ye mẹ finjima ị̀ gbaịn; kẹ gotẹ ọkọ ḅẹẹarị, ị́yẹrị anie wamịna furo ḅụ kpekitẹịn-mịnaḅọ.”

¹⁰Bohazi nwẹnị ḅẹẹ, “Yee KỊNỊNYANAḄỌ ḅe í boma, ị̀ ẹrẹḅọtụḅọ ị́ mị kunoma iḅi-yemịẹ-ḅara mẹ mịẹtẹ anị ḍụḅa tarị ye mẹ nẹngị tẹ, anie ị́ asambịrịma owiapụ anị igoinḅọ-o, anịanịa igbigi nyanaḅọ-o ḍukamẹnjị-a ye mẹ.

¹¹Anịsakị mịọkụ ḅarị ḅalafa ma, ị̀ ẹrẹḅọtụḅọ, àrị í ḅii-ye ḅii-ye mamgba mịẹ ị́ pịrị fama ḅa, kẹ gotẹ ọkọ ḅẹẹarị, ị̀ ama ḅẹ owiapụ mamgba nimi wararị mịnẹ ị́yẹrị anie ye mịẹ pịrị na-iḅi ẹrẹḅọ.

¹²Anịsakị anị karakaraye mịnẹ yẹrị anie í kpekitẹịn-mịnaḅọ, anịsọ gbọrụ mịnaḅọ tẹ kpeki ị̀ nẹngị ḅọ emii.

¹³Mị ḍin mẹ kẹ sime ene ḅaa, tẹ dede-ḅio ọ̀ nwẹnị ḅụụ-palị-mịnaḅọ ye mẹ mịẹ ị́ pịrị-pịrị, iḅim, yee ori anị mịẹ; kụma ọ̀ nwẹnị ḅụụ-palị-mịnaḅọ kiri mẹ mịẹ ị́ pịrị ḅẹ-ḅii-a ḅẹḅẹ, à ḍumo sime wararị KỊNỊNYANAḄỌ ḅe ẹrẹ kẹ karịm, à ḅụụ-palị-mịnaḅọ kiri mẹ mịẹ ị́ pịrị ḅa. Ḅọlọlọ sime nwenii anị ḅo dede-ḅio mẹ la.”

¹⁴Anieḅụ árị ọ̀ ḅụọ-suku mono sime nwenii dede-ḅio lam, kụma ḅaaso ḅio á saakịm, tẹrẹmẹ gbọrụḅọ inetẹ jụmọ lekiri ḅiri ḅụ; tẹ ọ̀ nwẹnị ọ̀ ḅụụ ḅio kuroma tẹ ḅẹẹ, “Yee kịnị anị nimi ma mịnẹ ẹrẹḅọ mgbọlụ-sẹlẹ-kiri mẹ ḅom.”

¹⁵Ọ̀ nwẹnị pịkị ḅẹẹ, “Ị́ sụa wararị ọgọnọ-ḅọrọma-kapa mẹ ọkị-ḅo tẹ anị ọlọ pakamaa.” Á nwẹnị ọkọ kẹ anị ọlọ, tẹ ọ̀ nwẹnị ye-tọnye mẹ kẹ ịn kẹ Bali sịn fịye mẹ ḅẹ si kilogịramụ (20 kg) tọn pakama-ḅo tẹ kẹ anị ḅio sụa á pịrị, anịtẹrẹmẹ á nwẹnị mẹnjị ama mẹ ḅio sọ-mu.

¹⁶Á ḅo á di iyingi ma la tẹso, á nwẹnị á gbela, “Ndẹẹ ị́ mẹnjị ḅara, ị̀ ẹrẹḅọtụḅọ?” Anịtẹso á nwẹnị owiḅọ ḅe mịẹ á pịrị aị mamgba ḍuko á pịrị.

¹⁷Á ḅẹẹm, “Ịn kẹ Bali sịn fịye mẹ ḅẹ si kilogịramụ ọ̀ nwẹn tọn ị̀ pịrịm, gbala ọ̀ ḅẹẹm, ‘ị́ papaa ḅara kẹ pịkịma-so í di iyingi ḍọkụma-mu nyana-a ẹrẹsị.’ ”

¹⁸Nahomi nwẹnị á pakịrị, “Ị̀ ẹrẹḅọtụḅọ koru nwenii ị́ ḅẹrẹ mẹ pịkị paka-ḅo ḅẹ ḅara nimi, kẹ gotẹ ọkọ ḅẹẹarị, tomḅọ ḅe ori ịnyọsara ḅịa, kụma mịmgba ḅụ ọ̀ ḅẹrẹ mẹ mịẹ pẹlẹ ḅa.”