Read kalabari 1 Samụẹlị 11 Bible Online

1 Samụẹlị 11 - kalabari bible

1 Samụẹlị 11

¹Anịtẹso Nahasi, Amọnị furo-ḅẹ-ḅọ ḅe nwẹnị owu kẹ Jabẹsị-giliyadị paka ḅẹ anị ikelema-koro; tẹ Jabẹsị ḅẹ apụ mamgba nwẹnị Nahasi ḅẹẹ, “Wamịnị na ḅịḅị-kẹ-ogbosọ, tẹ wa ḍiri kẹẹ tẹ ḅara pono, tẹ fịrịmẹnjị ị́ pịrị.”

²Kụma Nahasi Amọnị furo-ḅẹ-ḅọ ḅe nwẹnị in ḅẹẹ, “Mị kiri mẹ ḅụ arị ọmịnị na ḅịḅị-kẹ-ogbosọ tẹ ḍiri kẹẹ tẹ ḅara pono ḅa mịnẹ, àrị ọmịna ama-ḅara anga ḅẹ atọrụngbọ mamgba sọkị-sọkị siin ḅa, tẹ mị-ḅara ḅụ ḅụụ-jịrị kẹ Izirẹlị mẹmgba ọgọnọ gbana ḅa.”

³Jabẹsị ḅẹ omongiapụ ma nwẹnị ọ̀ ḅẹẹ, “Sọnọma aḍin ḅọrọma wa pịrị mịẹtẹ wa oku kẹ Izirẹlị ḅẹ ye-yọ mẹmgba fịrịma ikelema-koro ḅarị ḅara. Wa ḅọrọma ḅẹ gbọrụḅọ-sọ ofori-ofori, anịrẹ wa wamịna-aḅụụ saakị ị́ pịrị ḅa.”

⁴Oku-mẹnjịapụ ma ḅo Gibiya, Sọlụ simearị ama mẹ la tẹso, in nwẹnị ḅẹrẹ mẹ ḍuko-sụa tomi ma aḅeri ḅio suu; tẹ tomi mamgba nwẹnị sule ḅara kẹ tẹmẹ-la owu kọn.

⁵Mịọkụ Sọlụ ḍụọ mẹ ḅio sime tẹ pootẹ-anambulo ma ọḅụjụ ḅoarị; tẹ Sọlụ nwẹnị gbela, “Tiye tomi ma ḅụụ-fụkama, tẹ mịẹtẹ in tẹmẹ-la owu kọn-arị?” Anieḅụ in nwẹnị Jabẹsị ḅẹ owiapụ ma oku mẹ ḍuko ọ̀ pịrị.

⁶Sọlụ mịna ẹkwẹn-aḅịḅị ma naa tẹso, Tamụnọ tẹmẹ ḅe nwẹnị kụrọ-nyana ḅara kẹ ḅo ori ọgọnọ gbana, tẹ ịganị nwẹnị gburo-gburo ḅara kẹ ọ̀ ḅụụ saakị.

⁷Ọ̀ nwẹnị maa pootẹ-anambulo ọkị tẹ in ḅaa tẹ kẹ pakịrị-pakịrị keni tẹ kẹ oku-mẹnjịapụ ḅara ḅụ Izirẹlị ye-yọ mẹmgba fịrịma ikelema-koro, tẹ ḅẹẹm, “ḅẹḅọ-ḅẹḅọ tẹ Sọlụ na, Samụwẹlị na ḍuka paka-ḅo-a ḅọ goḅọ-goḅọ, mị-ḅara mie ịn kẹ mḅọ pootẹ-anambulo mịẹ ḅarị ḅara!” Anịtẹso KỊNỊNYANAḄỌ ḅe mangịma mẹ opu ḅara kẹ ḅo tomi ma ọgọnọ gbanam, tẹ in nwẹnị gbala gbọrụ tomḅọ ḅara kẹ paka-ḅo.

⁸Bẹzẹkị ḅụ ori in kobiri tẹ in pekele-ḍiki sakị Izirẹlịapụ ḅụ kịnị tẹra puku ofori puku amesi, oyi ẹndẹ finji (300,000), anịsakị Juda ḅẹ apụ ḅụ kịnị tẹra puku jeia ẹndẹ finji (30,000) ọ̀ nwẹn ọkịm.

⁹In nwẹnị oku-mẹnjịapụ ma tẹ oku mẹ kẹ ḅo apụ ma ḅẹẹ, “Mị-ḅara mie ọ̀ kẹ Jabẹsị-giliyadị ḅẹ apụ ma ḅẹẹ ḅarị ḅara, ‘ḅaa ḅụ ịrụa mẹ ọfịrị ḅẹ sakị, ọ́ ḍụa-ḅọrọmaḅọ nyana ḅa.’ ” Oku-mẹnjịapụ ma ḅo ḍuko Jabẹsị ḅẹ apụ ma pịrị tẹso, in nwẹnị ḅioḅẹlẹ.

¹⁰Anịẹrẹsị Jabẹsị ḅẹ apụ ma nwẹnị Nahasi ḅẹẹ, “ḅaa ḅụ wa wamịna-aḅụụ saakị ị́ pịrị ḅa, tẹ í inetẹ ḍiki tẹ ị́ ḅụụ ḅẹlẹ ḅara ḅẹlẹ ḅara kẹ wa mịẹ ḅa.”

¹¹Ene mẹ ḅaa ḅụ, Sọlụ nwẹnị tomi ma kẹ tẹra kpoo ḍie, tẹ kịnị ḅaa paka ḅụ, in nwẹnị Amọnị ḅẹ ọmụapụ ma kobiri wararị akpụrụ-warị mẹ ogbo-ḅio sọ-ḅo tẹ in pẹlẹ-pẹlẹ-ḅaa nwenii ene mẹ ḅẹ ọfịrị sakị mẹ la; tẹ inima tẹ ḍumo-sime apụ ma mangị gala-galam, anieḅụ ịna aḅụụ maa apụ gbọrụ anga ḅụ sime tẹ in ḅaa kọnma-a.

¹²Anịtẹso tomi ma nwẹnị Samụwẹlị ḅẹẹ, “Anị apụ ma tọ apụ tẹ ḅẹẹ, ‘Sọlụ ama-da wa pịrị ḅẹ?’ Ọkọ ḅẹẹ owiapụ ma ọkị-ḅoo, mịẹtẹ wa in ḅaa ḅẹ ḅara.”

¹³Kụma Sọlụ nwẹnị ḅẹẹ, “Ẹn-ẹn, mịmgba gbọrụ tomḅọ sọ fịị ḅụ sọ ḅịa, kẹ gotẹ ọkọ ḅẹẹarị, KỊNỊNYANAḄỌ ḅe mịmgba Izirẹlị ḅụ ḍụa-ḅọrọma kọrịnama kọrị tẹẹ.”

¹⁴Anịtẹso Samụwẹlị nwẹnị tomi ma ḅẹẹ, “Ó ḅoo, ye wa so Giligalị mu, tẹ anịjụ siin ama-da mẹ mịẹ iwoma.”

¹⁵Anieḅụ tomi mamgba so Giligalị mum, tẹ anịjụ in KỊNỊNYANAḄỌ ḅe tọrọkọ Sọlụ kẹ amadaḅọ mịẹm Giligalị ḅụ. In nwẹnị anịjụ ḅụ KỊNỊNYANAḄỌ ḅe tọrọkọ tọnwa dein-pịrị-agba mịẹ, tẹ Sọlụ na, Izirẹlịapụ mamgba na, nwẹnị gburo-gburo ḅara kẹ ḍereku.