Read kalabari 1 Samụẹlị 13 Bible Online

1 Samụẹlị 13 - kalabari bible

1 Samụẹlị 13

¹Sọlụ sịḅị kụra suei ḅọrọ tẹso, ò ḅo amadaḅọ sọm, tẹ kụra amesi kẹ ama-da Izirẹlị pịrịm. Ọ̀ maa akụra kẹ ama-da tẹso,

²Sọlụ nwẹnị Izirẹlị ḅẹ owiapụ sọnọma ẹndẹ oyia asi finji (3,000) sẹlẹ ọkị; kịnị sọnọ ẹndẹ (2,000) ori na simem Mikimasi na, Bẹtẹlị tụndụ ọgọnọ ḅẹ opu sịẹ mẹ na ḅụ, tẹ kịnị maa ẹndẹ oyia asi finji (1,000) Jonatanị na simem Benijamịnị ḅẹ Gibiya ḅụ; owiapụ ma ḅụ kirikọn-apụ ma ori ịn kẹ ama fịrịmam, ọrụḅọ-ọrụḅọ so mḅọ akpụrụ-warị mum.

³Jonatanị Filisiteni ḅẹ ọmụ-ogbo mẹ tẹ Geba ḅụ sime ye mẹ nẹngịmam; tẹ Filisiteniapụ ma anị gbolomaye naam. Tẹ Sọlụ nwẹnị ọdụ mẹ ofuro ama mẹmgba ikelema-koro, tẹ ḅẹẹm, “Yee Hiburu ḅẹ apụ ma naa.”

⁴Izirẹlị mẹmgba anị naa-ḅo naa-ḅo ḅẹẹm mịnẹ Sọlụ Filisiteniapụ ma ọmụ-ogbo mẹ nẹngịma tẹẹ, tẹ pịkị ḅẹẹm mịnẹ, Izirẹlị ḅo Filisiteniapụ ma tọrụ-ịnọ apụ sọ tẹẹ. Tẹ in nwẹnị tomi ma sịn pakama-ḅo, in Giligalị ḅụ Sọlụ ḅụụ sọ ḅẹ ḅara.

⁵Filisiteniapụ ma nwẹnị Izirẹlị na owu sọ ḅẹ kirimẹnjị-ọmụarụ tẹra puku, jeia ẹndẹ finji (30,000) tẹlẹma, asụ-dọkụ-ọmụapụ kịnị jeia ẹndẹ (6,000) na pekele-ḍiki tẹ sẹlẹ-ọkị, ḅụọ kẹ mẹnjị ọmụgbin-apụ itu kụma mịmọ ọgọnọ ḅẹ onwi sara ḅara saratẹ inweni-ogbo sẹlẹ-ọkị; in nwẹnị iwo Mikimasi dama-mu, anie Bẹtị-aveni ḅẹ ịrụa-saakịarị-anga mẹ, tẹ akpụrụ-warị pike tẹ kobiri.

⁶Izirẹlịapụ ma in kpasị tẹ ẹrị tẹso, (kẹ gotẹ ọkọ ḅẹẹarị, in mịẹ ḅẹ ọkụ ḅarị ofori) tomi ma nwẹnị fukuru na, olulu na, ịkụ na, ịḅụkụ na, suḅe na ḅio ịna aḅụụ ḅọị,

⁷jen-apụ Jodanị mẹ ḅẹ kpongbo mịẹ tẹ ḅụọ kẹ mẹnjị saḅa anga ḅụ saḅa-ḅọrọ Gadi na, Gilẹdị na ama mum. Sọlụ paa Giliyadi ḅụ simem, tẹ ori na sime atomi mamgba ori na ḅalafa ḅụ oju sẹkịm.

⁸Ọ̀ sọnọma aḍin kẹ Samụwẹlị korum, Samụwẹlị sakị mẹ pẹlẹ ọ̀ pịrị ḅara; kụma Samụwẹlị ḅo Giligalị la-a, tẹ tomi ma ọ̀ ḅụụ ḅụ gala-galarị.

⁹Anieḅụ Sọlụ nwẹnị ḅẹẹ, “Ọ́ dọkịma-agba mịẹ ye mẹ na, dein-pịrị-agba mịẹ aị ma na ọkị-ḅo ị̀ pịrịị mị anga.” Tẹ ọ̀ nwẹnị dọkịma-agba mẹ mịẹ.

¹⁰Ọ̀ paa dọkịma-agba mẹ mịẹ fama gbọrụ sakị, ḍikii, Samụwẹlị ḅom; tẹ Sọlụ nwẹnị mẹnjị paka Samụwẹlị na bịama ḅẹ mu, tẹ sịn-ḅịḅị kẹ ọ̀ pịrị.

¹¹Samụwẹlị nwẹnị ọ̀ ḅẹẹ, “Ị́ nwẹn mịẹ ye mẹ í tiye mịẹ tẹ?” Sọlụ nwẹnị pakịrị, “Àrị ẹrịm mịnẹ tomi ma ị̀ ḅụụ ḅụ gala-galarị, anịsakị ị́yẹrị pịkị ị́ pẹlẹ ene ma ḅụ ḅo-a, tẹ Filisiteniapụ ma pịkị Mikimasi ḅụ ḅụụ tẹlẹma tẹẹ,

¹²à nwẹnị ḅẹẹ, ‘Mịọkụ Filisiteniapụ ma ideri-ḅo Giligalị ḅụ ị̀ jụụ ḅẹ tẹẹ, tẹ amụ à KỊNỊNYANAḄỌ ḍiki-ḅụụjịrị ḅii-a,’ anieḅụ àrị ị̀ ḅụụ sukuruma tẹ dọkịma-agba mẹ mịẹm.”

¹³Samụwẹlị nwẹnị Sọlụ ḅẹẹ, “Í oḅori-sọ ḅara kẹ ye mịẹ tẹẹ; tọn ye mẹ tẹ KỊNỊNYANAḄỌ ị́ Tamụnọ ḅẹ, ori tọn ị́ pịrị ye mẹ í koko-a, mimgbe mịọkụ ori Izirẹlị ḅụ ị́ ama-da mẹ sịẹma kụrọma gbamaso tẹẹ.

¹⁴Kụma mịọkụ ị́ ama-da mẹ ḅarị sime tọrọkọ-tọrọkọ mu ḅịa; KỊNỊNYANAḄỌ ḅe ò soku-ḅẹ ḅioḅẹngbọ sime-ḅara sime gbọrụ ḅioḅẹngbọ sụa gbọrụ owiḅọ ḍọkị pakama-ḅo tẹẹ, tẹ KỊNỊNYANAḄỌ ḅe ọ̀ kẹ amadaḅọ owiḅọtụḅọ sọ ori atomi pịrị ḅẹ ḅọ tọn tẹẹ, gbala ị́ KỊNỊNYANAḄỌ ḅe tọn ị́ pịrị ye mẹ koko-a ẹrẹsị.”

¹⁵Samụwẹlị nwẹnị saakị tẹ Giligalị ḅụ iwo so Benijamịnị ḅẹ Gibiya mu. Sọlụ nwẹnị inima tẹ ori na sime apụ ma kịẹn, ini kịnị ẹndẹ oyia asi finji pembe apụ.

¹⁶Sọlụ na, ori owiḅọtụḅọ Jonatanị na, tomi ma tẹ ori na sime apụ ma na nwẹnị Benijamịnị ḅẹ Gibiya ḅụ sime; kụma Filisiteniapụ ma Mikimasi ḅụ akpụrụ-warị pike tẹ simem.

¹⁷Ama gbaịntẹ fọịn apụ nwẹnị Filisiteni ḅẹ akpụrụ-warị mẹ ḅio tẹra akpo ḅụ paka-ḅo; gbọrụ kpo tọrụ-pịkị Ọfịra da-mum, Suhalị ḅẹ ama mẹ ḅụ,

¹⁸Jen kpo tọrụ-pịkị Bẹtị-horoni da-mum, tẹ jen kpo pịkị tọrụ-pịkị agara mẹ tẹ ịkpa mẹ da-mu ḅụ ḍiki iderima ma Zeboyimu ḅẹ tụndụ ogboku mẹ mu anga da-mum.

¹⁹Mị sakị mẹ Izirẹlị ḅẹ ama mẹmgba ikelema-koro ḅụ, kịnị ikulele-tẹmẹḅọ ḍọkị-ẹrị ḅẹ gbọrụ anga sọ ofori; anị kẹ gotẹ ọkọ mịẹ ye, Filisiteniapụ ma mẹẹ, “Anie ofori Hiburu ḅẹ apụ ma ḅofa tọnwa okologie na, ḅẹkẹrẹ na tẹmẹ-tẹmẹ sara amịna aḅụụ pịrị.”

²⁰Kụma Filisiteniapụ ma mie Izirẹlịapụ ma ḅụ ḅẹḅọ-ḅẹḅọ ideri-ideri mu mḅọ fịye ḍiḅi kiri soku aị na, ọgụ na, kumbu na, tọrụ andatẹ sịḅị kpụlụtẹ fịye soku kala-ogie na farịarị ye;

²¹Anịsakị ini arị kẹ farịarị igbigi anie ịn kẹ pimu sịn seleḅa gbọrụ pakịrị kẹ tẹra akiri ḍiya ḅẹ maa anga anie ịn kẹ fịye-ḍiḅi-kiri soku ye na, ọgụ na farịarị ye; anịsakị kumbu farị na, sịḅị nangwọtẹ kala-ọgụ sịḅị sụa na ḅụ, seleḅa gbọrụ pakịrị kẹ tẹra anga ḍie ḅẹ gbọrụ anga ịn nwẹn gbẹm.

²²Anieḅụ Sọlụ na, Jonatanị na sime apụ ma ḅụụ ḅụ, owu mẹ sọ ene mẹ, in ḅara ḅụ okologie, anịanịa ḅẹkẹrẹ ḍọkị-ẹrị gbọrụḅọ-sọ ofori, Sọlụ na Jonatanị na sikima, kụma Sọlụ na Jonatanị na arị nyanam.

²³Filisiteni ḅẹ ọmụ-ogbo mẹ nwẹnị paka Mikimasi ḅẹ mẹnjị-ḅọrọ-anga mẹ mu.