Read kalabari 1 Samụẹlị 22 Bible Online

1 Samụẹlị 22 - kalabari bible

1 Samụẹlị 22

¹Devidi nwẹnị anịjụ ḅụ mangị-so, tẹ Adulamụ ḅẹ fukuru mẹ mu, tẹ ọ̀ ḍa warị mẹmgba anị naa tẹso, in nwẹnị anịjụ ḅụ ọ̀ ḍọkụma-mu.

²Tẹ ḅẹḅọ-ḅẹḅọ tẹ ḅụụ-ḅalaḅala ḅọ ḅalaḅala ḅọ na, ḅẹḅọ-ḅẹḅọ tẹ saa fị ḅọ fị ḅọ na, ḅẹḅọ-ḅẹḅọ tẹ mịẹye ḅụụ na-iḅi-a ḅọ goḅọ-goḅọ na nwẹnị kobiri ọ̀ ḍọkụma-mu; tẹ ori ḅo ịna sịḅịdaḅọ sọm. Kịnị ẹndẹ (400) pembe apụ mu anịjụ ọ̀ ḅụụ sọm.

³Devidi nwẹnị anịjụ ḅụ so Mohabụ ḅụ Mizipa mu; tẹ ọ̀ nwẹnị Mohabụ ḅẹ amadaḅọ ḅe ḅẹẹ, “Arị ị́ tẹkẹm yee ị̀ ḍa-na-iyingi-na ị́ na mịanga sime nwenii à Tamụnọ mịẹ ị̀ pịrị ḅẹ ye nimi.”

⁴Devidi nwẹnị in koroma Mohabụ ḅẹ amadaḅọ ḅe pịrị, tẹ Devidi kụrọtẹ ḅọị anga mẹ ḅụ sime sakị mamgba ḅụ ini ori na simem.

⁵Anịtẹso ịkịankoroḅọ Gadi ḅe nwẹnị Devidi ḅẹẹ, “kụrọtẹ ḅọị anga mẹ ḅụ sime ma, soo, tẹ Juda ḅẹ ama mẹ ḅio sọ-muu.” Anieḅụ Devidi som, tẹ mẹnjị Hereti ḅẹ opu piri mẹ ḅio sọ-mum.

⁶Mịọkụ Sọlụ naam mịnẹ in Devidi na, owiapụ ma tẹ ọ̀ ḅụụ emi apụ ma na ẹrịm. Sọlụ, Gibiya ḅụ tụndụ ọgọnọ Hiburu ḅẹ apụ kẹ Ẹsịsẹlị sịn gbọrụ opu sịn suku lẹgị-sime wararị, ọ̀ sụḅa ọ̀ ḅara ḅụ emi, tẹ ori afịrịmẹnjịapụ mamgba sịẹsime ori ikelema-koro wararị.

⁷Sọlụ nwẹnị ori afịrịmẹnjịapụ tẹ sịẹsime ori ikelema-koro wararị apụ ma ḅẹẹ, “Mịọkụ ọ́ naa ọmịnị Benijamịnị furo-ḅẹ-apụ: Jese owiḅọtụḅọ ḅe piri na, kụrọ-aḍụọ na kẹ ọmịna aḅụụ ọrụḅọ-ọrụḅọ pịrị, ọ́ kẹ ḅẹrẹtọn-apụ mịẹ kịnị maa ẹndẹ oyia asi finji na, sọnọa si sọnọa si na pịrị ḅẹ,

⁸mịẹ ọmịnị-mgba ḅẹrẹ-ḅiya ị̀ pịrị tẹ ye? Ì owiḅọtụḅọ ḅe Jese owiḅọtụḅọ ḅe na ḅarasụa jụmọ-jụmọ pịrị gbọrụ ḅụụ sime nyana sakị, gbọrụḅọ-sọ ì ḍiki-sịḅịjịrị-a, anịanịa mịẹ-pakama ị̀ pịrị mịnẹ ì owiḅọtụḅọ ị̀ fịrịmẹnjịḅọ toluma tẹ ori owu kẹ ị̀ ẹbị wararị anị wẹrịtẹ mịmgba mẹ ḅụ sime-ḅara.”

⁹Anịtẹso Dowẹgị, Edọmụ ḅẹ ḅọ ḅe tẹ Sọlụ afịrịmẹnjịapụ ma akaka sịẹsime ḅọ ḅe nwẹnị pakịrị, “À Jese owiḅọtụḅọ ḅe ẹrịm, ọ̀ Nọbụ ḅụ Ayitubu owiḅọtụḅọ Ayimẹlẹkị ḍọkụma-ḅoarị,

¹⁰tẹ ọ̀ KỊNỊNYANAḄỌ ḅe ḅịḅị gbela ọ̀ pịrịm, tẹ fịaị na, Golayatị, Filisiteniḅọ ḅe okologie mẹ na kẹ ọ̀ pịrịm.”

¹¹Anịtẹso amadaḅọ ḅe nwẹnị Ayimẹlẹkị agbamịẹḅọ ḅe, Ayitubu owiḅọtụḅọ ḅe na, ọ̀ ḍa warị mẹmgba anie agbamịẹapụ tẹ Nọbụ ḅụ sime apụ ma sịn, tẹ inimgba nwẹnị amadaḅọ ḅe ḍọkụma-ḅo.

¹²Sọlụ nwẹnị ḅẹẹ, “Ayitubu owiḅọtụḅọ mịọkụ naa.” Ọ̀ nwẹnị pakịrị, “mie yẹrị, ị̀ nyanaḅọ.”

¹³Sọlụ nwẹnị ọ̀ ḅẹẹ, “Ị́yẹrị na, Jese owiḅọtụḅọ ḅe na tiegotẹ ḅẹrẹ-ḅiya ị̀ pịrị, anieḅụ ị́ fịturu na, okologie na kẹ ọ̀ pịrị tẹẹ, tẹ Tamụnọ ḅịḅị gbela ọ̀ pịrị tẹẹ, anie mịẹtẹ ọ̀ saakị tẹ ị̀ da-paka ḅẹ sime ì koru tẹẹ, anị wẹrịtẹ mịmgba ḅụ sime-ḅara?”

¹⁴Anịtẹso Ayimẹlẹkị nwẹnị amadaḅọ ḅe pakịrị, “Ị́ afịrịmẹnjịapụ mamgba ogbo-ḅio ḅụ oriḅe tẹ amadaḅọ ḅe fụanḅọ Devidi ḅe minini nyana ḅara kẹ minini nyana, tẹ ị́ ḅụụ-ḍikiḍikiapụ ma ḅẹ ọmụ alaḅọ sọ, tẹ ị́ warị-ḅio kụn nyana ḅọ tụḅọ.?

¹⁵Mịmgba anie tarị ene tẹ à Tamụnọ ḅịḅị gbela ọ̀ pịrị tẹ ye? Ẹn-ẹn! Yee amadaḅọ ḅe gberie-sọ kẹ ọ̀ fịrịmẹnjịḅọ, anịanịa ọ̀ ḍa warị mẹmgba sịḅị-sẹịn ma; kẹ gotẹ ọkọ ḅẹẹarị, anị opuye-o, kalịye-o, ị́ fịrịmẹnjịḅọ mie mẹmgba ḅụ nimi ye ofori.”

¹⁶Tẹ amadaḅọ ḅe nwẹnị ḅẹẹ, “Ayimẹlẹkị, tụkụma ḅara ḅụ ị́yẹrị na, ị́ ḍa warị mẹmgba na fịị ḅa.”

¹⁷Amadaḅọ ḅe nwẹnị ye-yọ ḍikiḍikiapụ ma tẹ sịẹsime ori ikelema-koro wararị apụ ma ḅẹẹ, “Ọ́ pịkị tẹ KỊNỊNYANAḄỌ ḅe agbamịẹapụ ma ḅaa, gbala ini sọ Devidi konju emi, tẹ nimim mịnẹ ò ḍumo-mangị kọnm, tẹ anị mịẹ-pakama ị̀ pịrị-a.” Kụma amadaḅọ ḅe afịrịmẹnjịapụ ma ịna ḅara kẹ KỊNỊNYANAḄỌ ḅe agbamịẹapụ ma daa ḅụ suu ḅẹ ḅịa.

¹⁸Anịtẹso amadaḅọ ḅe nwẹnị Dowẹgị ḅẹẹ, “ị́yẹrị pịkịtẹ agbamịẹapụ ma ḅaa,” tẹ Dowẹgị Edọmụ ḅẹ ḅọ ḅe nwẹnị pịkịtẹ agbamịẹapụ ma ḅaa; anị sakị anị ene mẹ ḅụ, lọkọ-ḅịtẹ kẹ gbin wararị ẹfọdị nwẹn-sịn kapa sụarị tẹ ọ̀ ḅaa apụ, kịnị inia si sọnọ finji.

¹⁹Anịsakị Nọbụ agbamịẹapụ ma opu ama mẹ ọ̀ kẹ okologie mẹ ḅụ suum; owiapụ na, ereme na, awọmẹ na, ndo-ndoarị awọmẹ na, pootẹ-anambulo na, yedogi-anama na, pịkị anana amẹẹ na sọ ọ̀ kẹ okologie mẹ ḅụ suum.

²⁰Kụma Ayitubu owiḅọtụḅọ Ayimẹlẹkị owiapụ-awọmẹ ma ḅẹ gbọrụḅọ ini Abịyata kẹ ẹrẹ kẹ sịn ḅọ ḅe mangị-som tẹ ḍumo-mangị kọn Devidi ḍọkụma-mum.

²¹Tẹ Abịyata nwẹnị ḍuko Devidi pịrị mịnẹ Sọlụ KỊNỊNYANAḄỌ ḅe agbamịẹapụ ma ḅaa tẹẹ.

²²Devidi nwẹnị Abịyata ḅẹẹ, “anị ene mẹ ḅụ tẹ Dowẹgị, Edọmụ ḅẹ ḅọ ḅe anịjụ ḅụ sime sakị, ò nimim mịnẹ tụkụma ḅara ḅụ ò ḍuko Sọlụ pịrị ḅa. Yẹrị mie ị́ ḍa warị ḅẹ apụ mamgba fịị mẹ dogi-ḅo yee.

²³Ị̀ na simee, ḅalafa ma; kẹ gotẹ ọkọ ḅẹẹarị, oriḅe tẹ ì ḍumo fama ḍọkịarị ḅọ ḅe mie pịkị í ḍumo fama ḍọkịarị; ị́ ị̀ na emi ọkụma, ị́ la-la ye ofori.”