Read kalabari 1 Samụẹlị 23 Bible Online

1 Samụẹlị 23 - kalabari bible

1 Samụẹlị 23

¹Mịọkụ in ḍuko Devidi pịrịm, Filisiteniapụ ma Kẹyịla na owu sọarị, tẹ kụrọ-ḅara ḅụ kura-a ḅara kẹ mgbọlụ sẹlẹ akiri ma ḅụ sime aị ọkịarị.

²Devidi nwẹnị anịẹrẹsị KỊNỊNYANAḄỌ ḅe ḅịḅị gbela, “À mu owu kẹ mịna Filisiteniapụ ma paka mọ?” KỊNỊNYANAḄỌ ḅe nwẹnị Devidi pakịrị, “Mu tẹ owu kẹ Filisiteniapụ ma paka tẹ Kẹyịla ḅọrọmaa.”

³Kụma Devidi atomi nwẹnị ọ̀ ḅẹẹ, “ḍikii, mịanga Juda ḅụ wa ḅalafaarị; wa nwẹnị Kẹyịla mu Filisiteni ḅẹ ọmụ-ogbo ma dee-pakama ọkụma anị tọ-ḅara ḅaka ḅa!”

⁴Anịtẹso Devidi nwẹnị siin KỊNỊNYANAḄỌ ḅe ḅịḅị gbela; KỊNỊNYANAḄỌ ḅe nwẹnị ọ̀ pakịrị, “Saakịị, ideri Kẹyịla muu; kẹ gotẹ ọkọ ḅẹẹarị, à Filisiteniapụ ma kẹ ị́ ḅara-ḅio ị́ pịrị ḅa.”

⁵Devidi na ori atomi na nwẹnị Kẹyịla mu, tẹ Filisiteniapụ ma na owu sọm, tẹ nwẹnị ịna opu anama ma ọkị so, tẹ ịna ogbo-ḅio gburo-gburoma kịnị ḅaam. Mị-ḅara mịẹ Devidi kẹ Kẹyịla ḅụ sime apụ ma ḍụa-ḅọrọma ḅara.

⁶Abịyata, Ayimẹlẹkị owiḅọtụḅọ ḅe ḍumo-mangị kọnm Kẹyịla ḅụ Devidi ḍọkụma-ḅo sakị, ori ọ̀ ḅara-ḅio ḅụ ẹfọdị nwẹn-sịn kapa kẹ ideri-ḅom.

⁷Mịọkụ ini anị ḍuko Sọlụ pịrị tẹ mịnẹ Devidi Kẹyịla ḅo tẹẹ. Sọlụ nwẹnị ḅẹẹ, “Tamụnọ ọ̀ kẹ ị̀ ḅara-ḅio ị̀ pịrị tẹẹ; kẹ gotẹ ọkọ ḅẹẹarị, ori ama ogigo-aḅọkọ na, ẹngbẹsẹ na nyana wararị ama ḅio sọ-mu ye ḅụ ori amịna ḅụụ ịkasị suu tẹẹ.”

⁸Tẹ Sọlụ nwẹnị ideri Kẹyịla mu, tẹ Devidi na, ori atomi na ikelema-koro tẹ owu paka ḅẹ ḅara kẹ ọmụgbin tomi mamgba sịn ḅo.

⁹Devidi nimim mịnẹ Sọlụ siye kẹ ọ̀ mịẹ ḅẹrẹ ḅịyarị tẹ ọ̀ nwẹnị Abịyata agbamịẹḅọ ḅe ḅẹẹ, “Ẹfọdị nwẹn-sịn kapa mẹ kẹ mịanga ḅoo.”

¹⁰Anịtẹso Devidi nwẹnị ḅẹẹ, “Yei KỊNỊNYANAḄỌ, Izirẹlịapụ tẹkẹarị Tamụnọ ḅẹ, ị́ fịrịmẹnjịḅọ tụkụma ḅara ḅụ naa tẹ mịnẹ Sọlụ ị̀ sịḅị gotẹ Kẹyịla ḅo tẹ opu ama mẹ fama ḅẹ ḍọkịarị.

¹¹Kẹyịla ḅẹ apụ ma ini ị̀ ọlọ tẹ kẹ ọ̀ ḅara-ḅio suu ḅarị mọ? Ị́ fịrịmẹnjịḅọ ḅe wẹrịtẹ naa tẹ ḅara, Sọlụ ḅe ori ideri-ḅo ḅa aro?” KỊNỊNYANAḄỌ ḅe nwẹnị pakịrị, “Ori ideri-ḅo ḅa.”

¹²Anịtẹso Devidi nwẹnị gbela, “Kẹyịla ḅẹ apụ ma ini yẹrị na, ị̀ atomi na ọlọ tẹ kẹ Sọlụ ḅara-ḅio suu ḅarị mọ?” KỊNỊNYANAḄỌ ḅe nwẹnị pakịrị, “Ini ị́ ọlọ tẹ kẹ ọ̀ pịrị ḅa.”

¹³Anịtẹso Devidi na ori atomi tẹ kịnị ẹndẹ, oyia asi finji pembe kịẹn-ḅịḅị la apụ ma nwẹnị saakị tẹ Kẹyịla ḅụ mẹnjị-so, tẹ ini inetẹ mu ḅẹ anga mu ḅẹ anga mum. In Devidi Kẹyịla ḅụ mangị-so ye ḍuko Sọlụ pịrị tẹso, ọ̀ nwẹnị ò mu ḅẹ ye mẹ wẹrịso.

¹⁴Devidi nwẹnị ịkpa mẹ ḅio kụrọ-kụrọtẹ aḅọị-anga ma ḅụ sime, tụndụ ọgọnọ ḅẹ opu sịẹ mẹ ḅẹ Zifu ḅẹ ịkpa mẹ ḅio. Tẹ Sọlụ ọ̀ ḍọkịm ene-ḅaaene-ḅaaene ḅụ kụma Tamụnọ ọ̀ kẹ ọ̀ ḅara-ḅio suu-a.

¹⁵Devidi ḅalafaam gbala Sọlụ ò ḍumo fama ḅẹ ḍọkị kẹ paka-ḅo tẹ ẹrẹsị. Devidi Zifu ḅẹ ịkpa mẹ ḅio Horesi ḅụ simem.

¹⁶Tẹ Jonatanị, Sọlụ owiḅọtụḅọ ḅe nwẹnị saakị tẹ Devidi dama-mu Horesi ḅụ tẹ Tamụnọ ḅụ ịnyọ ḅii ọ̀ pịrịm.

¹⁷Ori ọ̀ ḅẹẹm, “Ḅalafa ma, kẹ gotẹ ọkọ ḅẹẹarị, ị̀ ḍa Sọlụ ḅara mẹ ị̀ ḍọkị-ẹrị ḅịa; ị́ amadaḅọ sọ Izirẹlị pịrị ḅa, tẹ yẹrị ị́ palị ḅa; ị̀ ḍa Sọlụ sọ miemẹ nimi wararị.”

¹⁸Tẹ ini maa apụ ma nwẹnị KỊNỊNYANAḄỌ ḅe tọrọkọ ọḅọkụ fị. Devidi Horesi ḅụ simem tẹ Jonatanị nwẹnị so ama mu.

¹⁹Anịtẹso Zifu ḅẹ apụ ma nwẹnị iwo Gibiya ḅụ Sọlụ dama-mu, tẹ ḅẹẹm, “Devidi ọ̀ wamịna ogbo-ḅio Hakila ḅẹ tụndụ mẹ tẹ Jesimoni ḅẹ suku-jụ ḅụ simearị ye mẹ ọgọnọ Horesi ḅụ kụrọ-kụrọtẹ aḅọị-anga ma ḅụ emii.

²⁰Yei amadaḅọ, mịọkụ ideri-ḅoo, í ḅioḅẹngbọ ḅụ ị́ ọkọ mịẹ ḅẹ tẹ ḅii sakị goyegoye; anịsakị wamịna kiri anie ori ọlọ tẹ kẹ amadaḅọ ḅe ḅara ḅio suu.”

²¹Sọlụ nwẹnị ḅẹẹ, “Yee KỊNỊNYANAḄỌ ḅe ó bomaa, gbala ọmịnị ì ḍiki sịḅị-kụrụkụrụm ẹrẹsị.

²²Ó soo, tẹ mu iḅiọkụ ḍọkị nimii; ọmịnị ò sime-sime anga mẹ nimi tẹ ḍikii; anịsakị tụḅọ anịjụ ḅụ ori ẹrị tẹ; kẹ gotẹ ọkọ ḅẹẹarị, in ḍuko ị̀ pịrịm mịnẹ ori epele tii ḍin lama wararị.

²³Anịẹrẹsị ọmịnị ò ḅo-ḅo simearị anga mamgba ẹrị tẹ kẹ elekima sụa, tẹ pịkịma-ḅo ḅio-maaịn-tọn-a ḅara kẹ ye ḍuko ị̀ pịrịị. Anịtẹrẹmẹ arị ọmịnị na mu ḅa, tẹ ori ama mẹ ḅio emi ḅẹḅẹ, Juda ḅẹ kịnị maa ẹndẹ oyia asi finji-finji mamgba ogbo-ḅio ḅụ arị ọ̀ ḍọkị pakama-ḅo ḅa.”

²⁴In nwẹnị saakị tẹ Sọlụ tọrọkọ tarị so Zifu mu. Mịọkụ Devidi na ori atomi na Mahoni ḅẹ ịkpa ḅio ḅẹ Ele mẹ ḅio emi Jesimoni ḅẹ suku-jụ mẹ da-mu ḅụ.

²⁵Sọlụ na, ori atomi na nwẹnị ọ̀ ḍọkị ḅẹ mu. Ini anị ḍuko Devidi pịrịm; anịẹrẹsị ori ideri ịkụ mẹ tẹ Mahoni ḅẹ ịkpa mẹ ḅio simearị ye mẹ mum. Tẹ Sọlụ aniemẹ naa tẹso, ọ̀ nwẹnị Devidi ḍuka ma-mu Mahoni ḅẹ ịkpa mẹ ḅio.

²⁶Sọlụ tụndụ mẹ ḅẹ gbọrụ pakịrị mum, anịsakị Devidi na ori atomi na tụndụ mẹ ḅẹ osi pakịrị emi, tẹ Sọlụ na, ori atomi na sụma-sụma ḅo Devidi na ori atomi na kpekiarị ini in kun ḅẹ ḅara; Devidi nwẹnị Sọlụ ḅụ mangị-so ḅẹ ḅara kẹ fọnya mịẹarị,

²⁷tẹso, gbọrụ fịrịmẹnjịḅọ nwẹnị Sọlụ dama-ḅo, tẹ ḅẹẹm, “Fọnya-fọnya ḅoo, gbala Filisiteniapụ ma ama gbaịn tẹ fọịn ḅara kẹ ama mẹ koro tẹẹ.”

²⁸Anieḅụ Sọlụ, Devidi ḍuka ḅụ pịkịma-som, tẹ mu Filisiteniapụ ma da-pakam; anịẹrẹsị ini anịjụ mẹ sịnm “Ḍiema Ịkụ.”

²⁹Devidi nwẹnị anịjụ ḅụ mẹnjị iwo, tẹ mu Engedi ḅẹ kụrọ-kụrọtẹ aḅọị-anga ma ḅụ simem.