Read kalabari 1 Samụẹlị 24 Bible Online

1 Samụẹlị 24 - kalabari bible

1 Samụẹlị 24

¹Sọlụ Filisiteniapụ ma owu mẹ ḅụ pịkịma-ḅo tẹso, in nwẹnị ḍuko ọ̀ pịrị, “ḍikii, Devidi Engedi ḅẹ ịkpa mẹ ḅio emi.”

²Anịtẹso Sọlụ nwẹnị Izirẹlị mẹmgba ḅụ sẹlẹtẹ owiapụ sọnọma ẹndẹ na oyia asi finji (3,000) ọkị, tẹ so Devidi na, ori atomi na ḍọkị ḅẹ mu Piri-oḅori Ịkụ mẹ tọrọkọ.

³Ọ̀ nwẹnị ḅo etela mẹ akaka, ini anana kokoarị awarị ma ḅụ gbọrụ fukuru emi anga la; Sọlụ nwẹnị mẹnjị anị ḅio ịnyọsara ḅẹ sọ-mu. Mịọkụ Devidi na, ori atomi na fukuru mẹ ḅio ịlụkụlụkụ ḅụ lẹgị-sime wararị.

⁴Devidi atomi ma nwẹnị ọ̀ ḅẹẹ, “Ene mẹ tẹ KỊNỊNYANAḄỌ ḅe ị́ ḅẹẹm, ‘ḍikii, àrị ị́ na fịya-a ḅọ ḅe kẹ ị́ ḅara-ḅio suu ḅa, anịsakị ị́yẹrị ḍikitẹ í na-iḅi ḅẹ ḅara kẹ ọ̀ ḅa ḅẹẹ ene mẹ mie anị.’ ” Anịtẹso Devidi nwẹnị ḅụọ fie-a ḅara kẹ mẹẹma mu Sọlụ vọrọrọ-kapa mẹ suku kịrị ọkị.

⁵Anịtẹrẹmẹ Devidi ḅioḅẹngbọ nwẹnị ọ̀ ḅụụ-fụkama, ọ̀ Sọlụ vọrọrọ-kapa suku kịrị-siin ye mẹ ẹrẹsị.

⁶Ọ̀ nwẹnị ori atomi ḅẹẹ, “KỊNỊNYANAḄỌ ḅe ḍụkụ ma mịnẹ yẹrị miemẹ kẹ ị̀ nyanaḅọ ḅe mịẹ, KỊNỊNYANAḄỌ ḅe pulo kẹ sịḅị ḅụ sara tẹ ḅọ ḅe, ị̀ ḅara-sụn pakama tẹ kẹ ọ̀ lama, yẹrị sọ ẹrịarị ḅara ḅụ ori anie KỊNỊNYANAḄỌ ḅe pulo kẹ sịḅị ḅụ sara ḅọ ḅe.”

⁷Mị-ḅara mie Devidi mịna ẹkwẹn-aḅịḅị ma kẹ ori atomi ma dedema ḅara, tẹ ḍụkụtẹ ini owu kẹ Sọlụ paka-a ye. Sọlụ nwẹnị saakị tẹ fukuru mẹ koroma-so, tẹ mẹnjị ò muarị anga mum.

⁸Anịtẹrẹmẹ Devidi so nwẹnị saakị, tẹ fukuru mẹ ḅio mẹnjị paka, tẹ nwẹnị Sọlụ sịn, “Ị̀ nyana amadaḅọ ḅe!” Tẹ Sọlụ tọrụ-pịkị ori ọḅụjụ ḍiki tẹso, Devidi nwẹnị sịḅị-tuu mu kiri mẹ lama tẹ kụn kẹ ọ̀ pịrị.

⁹Devidi nwẹnị Sọlụ ḅẹẹ, “Í tiegotẹ tomi ma tẹ ḅẹẹm, ‘ḍikii, Devidi ye kẹ ị́ lama ḅẹ ḍọkịarị ḅẹẹ apụ ma pokiarị?’

¹⁰Ḍikii mị eneḅaka mẹ ḅụ ị́ atọrụngbọ ẹrị tẹẹ, KỊNỊNYANAḄỌ ḅe wẹrịtẹ fukuru mẹ ḅio ị́ kẹ mịmgba ị̀ ḅara-ḅio sun ị̀ pịrị ḅara; anịsakị jen-apụ ị̀ ḅẹẹm àrị ị́ ḅaa, kụma àrị ị́ wẹrịsom, yẹrị mẹẹ, ‘àrị ị̀ ḅara-sụn pakama tẹ ye kẹ ị̀ nyanaḅọ ḅe lama ḅịa; kẹ gotẹ ọkọ ḅẹẹarị, ori anie KỊNỊNYANAḄỌ ḅe pulo kẹ sịḅị ḅụ sara tẹ ḅọ.’

¹¹Paa ḍikii, ị̀ ḅara-ḅio ị́ vọrọrọ-kapa mẹ suku ḍikii; karakara yee, mịnẹ, àrị ị́ vọrọrọ-kapa mẹ suku kịrị-siinm, tẹ ị́ ḅaa-a ye mẹ, í inetẹ nimi tẹ ẹrị ḅa mịnẹ, mịẹ-irima, anịanịa ama kan ị̀ aḅara-ḅio ofori. Ị́ ị̀ ḅaa ḅẹ ì ḍumo ḍọkịarị ḅẹsọ, amụ à si kẹ ị́ mịẹ-a.

¹²Yee KỊNỊNYANAḄỌ ḅe yẹrị na ị́nịna ogboku ḅẹrẹ mẹ kọn; yee KỊNỊNYANAḄỌ ḅe ị́ ọgọnọ ḅụ ị̀ gbẹẹfị ḅii, kụma ị̀ ḅara ị́ da-paka ḅịa.

¹³Elemu sakị ḅẹ apụ ma egberima-ẹkwẹn mẹ ḅẹẹ ḅara, ‘Si-sịḅịḅio-sụaḅọ ḅe ḅụ si-sịḅịḅio saakị paka ḅom, kụma ị̀ ḅara ị́ da-paka ḅịa.’

¹⁴Izirẹlị ḅẹ amadaḅọ ḅe ọ̀ tụḅọ ḍukama paka-ḅo? Ị́ tụḅọ ḍukarị? Fịtẹ obiri! Kungu gbọrụmgbọ mie í ḍukarị ye!

¹⁵Yee KỊNỊNYANAḄỌ ḅe anịẹrẹsị ḅẹrẹkọnḅọ sọ, tẹ toluma anị ḅio ḍiki, tẹ yẹrị na ị́nịna ogboku ḅẹrẹ-pẹlẹ, tẹ ḅẹrẹ ịgbanị ị́ pịrị, tẹ ị́ ḅara-ḅio ḅụ ị̀ ḍụa-ḅọrọma.”

¹⁶Devidi mịna ẹkwẹn-aḅịḅị ma kọn Sọlụ pịrị fama tẹso, Sọlụ nwẹnị ḅẹẹ, “Ì owiḅọtụḅọ Devidi, miemẹ ị́ pọkọ anị?” Tẹ Sọlụ nwẹnị pọkọ saakị tẹ tẹmẹ-la ḅara kẹ owu.

¹⁷Ọ̀ nwẹnị Devidi ḅẹẹ, “Ị́yẹrị karakara ị̀ nẹngịm; kẹ gotẹ ọkọ ḅẹẹarị, ị́yẹrị iḅi kẹ ị̀ mịẹ anga ḅụ, yẹrị siye kẹ ị́ gbẹẹ tẹẹ.

¹⁸Anịsakị mịmgba ị́ ị̀ na sime iḅi ḅara mẹ mịẹfinji tẹẹ, aniemẹ mie KỊNỊNYANAḄỌ ḅe ị̀ kẹ ị́ ḅara-ḅio suu sakị í gotẹ ị̀ ḅaa-a ye.

¹⁹Kẹ gotẹ ọkọ ḅẹẹarị, gbọrụ tomḅọ mḅọ na fịya-a ḅọ ḍọkị-ẹrị ọkụma, mḅọ gberie-sọ kẹ mḅọ lama-a ḅara kẹ mḅọ wẹrịso ḅẹ? Anieḅụ yee KỊNỊNYANAḄỌ ḅe mịmgba ị́ kẹ ị̀ mịẹ ye mẹ ḅụ iḅi gbẹẹ-ye kẹ ị́ pịrị.

²⁰Anịsakị ḍikii, mẹkịnẹ à nimim mịnẹ tụkụma ḅara ḅụ ị́ amadaḅọ sọ ḅa, anịsakị ị́ ḅara ḅụ mie Izirẹlị amakiri mẹ sịẹ kụrọ ḅarị ye.

²¹Anịẹrẹsị KỊNỊNYANAḄỌ ḅe ẹrẹ ḅụ ḅụụ-pikima ị̀ pịrị mịnẹ, à ḅọrọ-so sakị ị́ ị̀ ḅụụ paka-ḅo apụ ma pẹlẹ-siin ḅịa, aniemẹ ḅụ, ị́ ị̀ ḍa warị mẹ ḅụ ị̀ ẹrẹ fama ḅịa.”

²²Devidi miemẹ ḅụ ḅụụ-pikima Sọlụ pịrịm. Anịtẹso Sọlụ so ama mum; kụma Devidi na, ori atomi na, iwo kụrọtẹ ḅọị anga mẹ mum.