Read kalabari 1 Samụẹlị 27 Bible Online

1 Samụẹlị 27 - kalabari bible

1 Samụẹlị 27

¹Devidi nwẹnị ò ḅioḅẹngbọ ḅụ ḅẹẹ, “À gbọrụ ene Sọlụ ḅara-ḅio fịị-faa so ḅịa; ị̀ ḅụụ iḅi à mangị-so Filisiteniapụ ma ama mẹ mu nẹngị ḅẹ jen ye ofori; anịrẹ Sọlụ Izirẹlị agara ma ḅio ị̀ ḍọkịma-ḅọrọ ḅụ ḅio ḅịkị ḅa, tẹ arị ọ̀ ḅara ḅụ mangị paka-so ḅa.”

²Anieḅụ Devidi nwẹnị saakị, tẹ ori na kịnị ẹndẹ oyia asi finji (600) ma tẹ ori na simearị apụ ma na saḅa-ḅọrọ Akisi, Mahọkụ owiḅọtụḅọ Gati ḅẹ amadaḅọ ḅe ḍọkụma-mu.

³Devidi nwẹnị Gati ḅụ Akisi na anga, ori na ori atomi na, ọrụḅọ-ọrụḅọ amịna warị suku na simem, anịsakị Devidi ori amaa ereme, Jeziri ḅẹ Ayinohamụ na, Kamẹlị ḅẹ Abigẹlị Nabalị, fịtẹ ḅọ ḅe ta ma na simem.

⁴Tẹ ini anị ḍuko Sọlụ pịrịm mịnẹ Devidi ḍumo-mangị kọn Gati mu tẹẹ, tẹso, ọ̀ ḅarị jen-maaịn kẹ ọ̀ ḍọkị-a.

⁵Anịtẹso Devidi nwẹnị Akisi ḅẹẹ, “À nwẹnị ị́ tọrụ ḅụ ḍiki-ḅụụjịrị ḍọkị-ẹrị tẹ ḅẹḅẹ, í opu sịẹ mẹ ḅẹ ama-ama ma ḅụ, yee ị́ gbọrụ ama kẹ ị̀ pịrị ye sọ, mịẹtẹ arị anịjụ anga ḅẹ ḅara, kẹ gotẹ ọkọ ḅẹẹarị, ị́ fịrịmẹnjịḅọ tiegotẹ amadaḅọ opu ama mẹ ḅio ị́ na anga na-iḅi?”

⁶Anieḅụ Akisi anị eneḅaka mẹ ḅụ Zikilagị kẹ ọ̀ pịrịm; anịẹrẹsị Zikilagị sime Juda ḅẹ amadaḅọ ḅe pịrị ḅo mịmgba lam.

⁷Anịsakị ene ma tẹ Devidi kẹ Filisiteni ḅẹ opu sịẹ mẹ ḅio sime ene ma ḅẹ kịẹn-ḅịḅị anie gbọrụ kụra na ini akalụ na.

⁸Mịọkụ Devidi na, ori atomi na iwo mu Gẹsọ ḅẹ apụ na, Gazi ḅẹ apụ na, Amalẹkị ḅẹ apụ na gbaịn tẹ fọịn-fọịnm; gbala mịna apụ ma anie elemu sakị ḅụ ama mẹ nyana apụ ma, ọkị mu Sọọ jụjụ-ḅio ḅụ mu Ijiputi ama mẹ la.

⁹Devidi ama mẹ ḅaa famam, tẹ ḍumo tọrụ ḅụ gbọrụ owiḅọ anịanịa ẹrẹḅọ sọ kọnma-a, kụma anana ma na, pootẹ-anambulo ma na, yedogi-anama ma na, ike-sụa-anama ma na, opu akapa ma na ọkị tẹ pịkịma Akisi ḍọkụma-ḅom.

¹⁰Akisi, “Mịmgba ị́ tọ apụ gbaịn tẹ fọịn?” gbela sakị goyegoye, Devidi ḅẹẹ ḅa, “Juda ḅẹ suku-jụ opu sịẹ mẹ,” anịanịa “Jeramili ḅẹ suku-jụ opu sịẹ mẹ,” anịanịa “Kenanị ḅẹ suku-jụ opu sịẹ mẹ.”

¹¹Devidi gbọrụ ḍumo wararị owiḅọ, anịanịa ẹrẹḅọ sọ kọnma-a, oku kẹ Gati ama mẹ ḅo, kuromarị, “Anie ofori in ḅofa wa gbolomaye ḍuko, tẹ ḅẹẹ, ‘Mị-ḅara mie Devidi mịẹ ḅara. Mị-ḅara mẹ mie ò Filisiteni ḅẹ opu sịẹ mẹ ḅio anga sakị mamgba ḅụ ọ̀ mịẹ ḅara.’ ”

¹²Akisi nwẹnị ḅioḅẹngbọ kẹ Devidi ọgọnọ gbana, kuromarị, “ori amịna ḅụụ kẹ gbọrsịḅị ori atomi Izirẹlị ḅioḅuma tẹ ḍiki-ḅioḅuarị ḅọ mịẹ tẹẹ; anịẹrẹsị sakị mamgba ori ị̀ fịrịmẹnjịḅọ sọ ḅa.”