Read kapsiki Gha ta Wəshi 11 Bible Online

Gha ta Wəshi 11 - kapsiki bible

Gha ta Wəshi 11

¹Pɛtɛ se mbeli nyi te hɛɗi kageze ghena nya kwetɛŋe, kanya kwetɛŋe se mɛrea nci.

²Ma te kwete və ne, pa mbeli slənji kadzeyi laka ŋkwa kesame ta veci, pa hɛ ntsate kwete ŋwela te hɛɗia Shinɛyar, pa hɛ nzanji tagha.

³Ma ke hɛ kwelɛ ghəa nci: «Mbara ɓəmə! Mpate ɓəmə brəki shɛ gheɓəmə terekɛ hɛ mbe ghwə!» Brəki yamene slene hɛ le te ŋkwa pelɛ, shimti ya te ŋkwa rekɛ.

⁴Ma ke hɛ zhɛkwa: «Mbara ɓəmə! Ŋate ɓəmə meleme ba'a ŋkwa nya biya nya kedzeme kacɛme ghweme! Ma tsagha ne, kateɗepe zləvəa ɓəmə mbeli te yayata ŋkwa ba'a katepesle geva gheɓəmə kwetɛ kwetɛŋe te hɛɗi we.»

⁵Pa Mahwətə sawa kadzete hɛɗi kezha newe meleme ba'a ŋkwa nya biya nyi ŋa mbeli.

⁶Ma ke Mahwətə ɓiyitsa: «Amaga, wa nyi hɛ nyi kejikəte geva kambeli nyi kwetɛŋe, ghena nya kwetɛŋe yageze hɛ, ganyɛke ghate hɛ! Ma tsetsenya ne, wəsə shɛ kafɛake wəsə nya tarete hɛ kamene kemene geva we.

⁷Mbara ɓəmə kadzawa kagweɗə ghena ta nci, fɛake ɓəmə hɛ kefa ghena kwelɛ ghəa nci.»

⁸Pa Mahwətə tazemte hɛ shave mbe meleme ta nci kadzete yayata ŋkwa te hɛɗi, pa hɛ zlenekɛ ŋa ta melemea shɛ.

⁹Vatse ndeke nda sləa Babɛl mbeli kwa nza nde tagha gweɗəmte ghena ta mbeli nyi te hɛɗi Mahwətə ba'a se tagha pesleyi mbeli ŋkɛ te hɛɗi.

¹⁰Wa nyi hwelefefia Sɛm nyi: va gwəmsə menete Sɛm nda yake Arpaksad ŋkɛ, va bake kwa sebe ta yɛmə nya wəba.

¹¹Ma kwetere wəmbəa ya ta Arpaksad ne, va gwəmsə mcɛfe menete Sɛm zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

¹²Va mahekenemsə mcɛfeghəmbe menete Arpaksad nda yake Shɛla ŋkɛ.

¹³Ma kwetere wəmbəa ya ta Shɛla ne, va gwəmsə wəfaɗe ba'a mahekene menete Arpaksad zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

¹⁴Va mahekenemsə menete Shɛla nda yake Ɛbɛr ŋkɛ.

¹⁵Ma kwetere wəmbəa ya ta Ɛbɛr ne, va gwəmsə wəfaɗe ba'a mahekene menete Shɛla zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

¹⁶Va mahekenemsə wəfaɗeghəmbe menete Ɛbɛr nda yake Pɛlɛg ŋkɛ.

¹⁷Ma kwetere wəmbəa ya ta Pɛlɛg ne, va gwəmsə wəfaɗe ba'a mahekenemsə menete Ɛbɛr zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

¹⁸Va mahekenemsə menete Pɛlɛg nda yake Rɛwə ŋkɛ.

¹⁹Ma kwetere wəmbəa ya ta Rɛwə ne, va gwəmsə bake ba'a mesli menete Pɛlɛg zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

²⁰Va mahekenemsə bakeghəmbe menete Rɛwə nda yake Serəwg ŋkɛ.

²¹Ma kwetere wəmbəa ya ta Serəwg ne, va gwəmsə bake ba'a mberefaŋe menete Rɛwə zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

²²Va mahekenemsə menete Serəwg nda yake Nahor ŋkɛ.

²³Ma kwetere wəmbəa ya ta Nahor ne, va gwəmsə menete Serəwg zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

²⁴Va bakemsə meslighəmbe menete Nahor nda yake Tɛra ŋkɛ.

²⁵Ma kwetere wəmbəa ya ta Tɛra ne, va gwəmsə ba'a meŋe meslighəmbe menete Nahor zhɛkwa teghweme. Nahe ŋkɛ keyake kweci ŋwale tezhili ba'a ŋwalea kwɛ.

²⁶Va mberefaŋemsə menete Tɛra nda yake ŋwale tezhili ŋkɛ mahekene: Abram, Nahor ba'a Haran.

²⁷Wa nyi hwelefefia Tɛra nyi: gheŋkɛ nde yake Abram, Nahor ba'a Haran. Haran nde yake Lot.

²⁸Pa Haran mtenyɛ mpelɛa ma ke yitenyɛ Tɛra te hɛɗi nya ya ŋkɛ, mbe Əwr nya hɛɗia Kaldɛ.

²⁹Pa Abram wəmeve Saray, pa Nahor wəmeve Milka, wəzha ta Haran. Nahe Haran kenza kayiteyɛa Iska perə.

³⁰Keyake wəzege Saray we, jɛŋa se nde.

³¹Pa Tɛra kelete wəzege ta ŋkɛ Abram ba'a shinyɛ Lot nya kawəzege ta Haran, tsagha makwa ta ŋkɛ Saray, male ta Abram. Cape ŋkɛ le hɛ shave mbe Əwr nya mbe Kaldɛ kadzete hɛɗia Kanan. Pa hɛ dzeme Haran ba'a nzanji pelɛ.

³²Ma kwa menete va Tɛra gwəmsə bake ba'a mcɛfe teghweme ne, mtiwə ŋkɛ pelɛ Haran.