Read kapsiki Gha ta Wəshi 12 Bible Online

Gha ta Wəshi 12 - kapsiki bible

Gha ta Wəshi 12

¹Ma ke Mahwətə sha Abram: «Sərəakɛ hɛɗia ŋa, hwelefe ta ŋa ba'a ghɛa yiteyɛ ŋa, kwiɗi kadzete hɛɗi nya tencɛ ŋa 'ya.

²Kateve ŋa hwelefe nya wəba 'ya, katewəpi ŋa 'ya ba'a kateve zləvə 'ya te sləa ŋa. Katewəpi kweci mbeli 'ya laka gha.

³Katewəpi mbeli nyi ketewəpi ŋa 'ya, katebezla mbeli nyi ketebezla ŋa 'ya. Se laka gha tewəpi geva pɛtɛa hwelefefi nyi te hɛɗi.»

⁴Cape yɛ Abram le Lot kala nya gezete nda Mahwətə. Va ta Abram mberefaŋemsə mcɛfeghəmbe nda slənyɛ ŋkɛ mbe Haran.

⁵Pa Abram kelete yɛ male ta ŋkɛ Saray le Lot nya kawəzege ta wəza meghekɛ. Kəliɓə hɛ te pɛtɛa wəshi nyi va hɛ ba'a ka mavashi nyi pave hɛ pelɛ Haran. Pa hɛ ntsehe te hɛɗia Kanan. Ma kwa ntsehe hɛ te hɛɗia Kanan ne,

⁶pa Abram jivenyɛ mbe hɛɗia shɛ hwa'a yitea cɛana nya mbe Morɛ, mbe Sishɛm. Nahe ka Kanan kenza te hɛɗia shɛ mbe vəa shɛ.

⁷Pa Mahwətə ncɛte nda geva ke Abram, ma ke shɛ: «Ke ka hwelefefia ŋa teve nda hɛɗi nya 'ya.» Pa Abram pate nda reghwetɛ te ŋkwa shɛ ke Mahwətə nya kencɛte nda geva.

⁸Slə tagha ne, tarame ŋkɛ pelɛ ghweme nya laka ŋkwa kesame ta veci yitea Bɛtɛl. Pa ŋkɛ mɓeyi cɛ lekwesa ta ŋkɛ kwelɛ yɛ Bɛtɛl nya laka ŋkwa kepəkwə ta veci le Ay nya laka ŋkwa kesame ta veci. Ma tagha ne, pa ŋkɛ pate nda reghwetɛ ke Mahwətə, ntake ŋkɛ kasəkwə Shala le heka sləa ŋkɛ kaMahwətə.

⁹Kwetere wəmbəa ŋkɛ, menete teke menete teke ke Abram sha ghɛ hwa'a mbe Nɛgɛv.

¹⁰Pa ma menete geva te hɛɗia shɛ, cape Abram slənyɛ kadzawa Ɛzhipte kezha teməakɛ temə kwa nza ma kwele kwele te hɛɗia shɛ.

¹¹Ma kwa nza ŋkɛ takwa takwa yitea Ɛzhipte, ma ke sha male ta ŋkɛ Saray: «Fate, nahe 'ya keɗepe keganyɛ ŋa na.

¹²Ma vəa ŋkwa nya tenakɛ ŋa ka Ɛzhipte ne, male ta ɗa na tegeze hɛ. Katepesle ɗa hɛ ba'a katesərə ŋa hɛ le mpi.

¹³Gezete nda ke hɛ təhwə təhwə ŋa 'ya kawəzha ta meyɛ ɗa na, kezha kemaneve ɗa mbeli megela te ghəa ŋa. Ma tsagha ne, pələsə tenza mpia ɗa te zlaɓa ta ŋa.»

¹⁴Ma kwa ntsehe Abram mbe Ɛzhipte ne, pa ka Ɛzhipte nakɛ tsema tsema nza male ta ŋkɛ kendeɗe nda.

¹⁵Pa mbelia jama nyi yitea Farawon nakɛ ŋkɛ ba'a gezete nda ndeɗea nta ke Farawon, pa mbeli keleghe malea shɛ kadzeki ghɛa meghe.

¹⁶Pa meghea ka Ɛzhipte kemaneve Abram megela te zlaɓa ta nta. Pa ŋkɛ fəave nda yɛ timɛti, kwi, sla, ka mene slene ba'a ka kwaterashi, kwara ŋezhili, ŋemia kwara lɛmə ba'a zlegweməa lɛmə.

¹⁷Ama pa Mahwətə vate ɗa nya dzawe te yɛ Farawon le mbelia ŋkɛ tewəmbəreke Saray, male ta Abram.

¹⁸Pa Farawon hekakɛ Abram, ma ke shɛ: «Wa wəsə nya menete ɗa nya na wa? Va wa ɗema na kese kagezete ɗa kamale ta ŋa nde wa?

¹⁹Yitea wa gezete ɗa na kawəzha ta meyɛ ŋa nde wa? Nahe 'ya kekelete ŋkɛ kamale. Ma tsetsenya, wa nya male ta ŋa nya. Kele ŋkɛ shɛ na slə ŋa!»

²⁰Pa meghe Farawon gezete nda ke mbelia ŋkɛ kaŋka yɛ Abram le male ta ŋkɛ ba'a pɛtɛa wəshia ŋkɛ kalə hwa'a kwa ghala.