Read kapsiki Gha ta Wəshi 17 Bible Online

Gha ta Wəshi 17 - kapsiki bible

Gha ta Wəshi 17

¹Ma kwa nza va ta Abram meslimsə meslighəmbe ne, pa Mahwətə ncɛte nda geva, ma ke shɛ: «'Ya ya kaShala nde berete. Dzeghwa mbe kema ta ɗa ba'a nza tiɗiɗi.

²Kateve jikə geva 'ya kwelɛ gha le 'ya, kateve ŋa hwelefe 'ya kwele kwele.»

³Pa Abram ŋame ghə mbe hɛɗi, ma ke Shala gezete nda:

⁴«Kaŋa ɗa ne, wa nya jikə geva ta ɗa nya le gha: katenza na kayiteyɛa hwelefefi kwele kwele.

⁵Kazhɛne mbeli kateheka ŋa kaAbram we, ama Abraham tenza sləa ŋa, kwa nza ŋkɛ katezhɛre ŋa 'ya kayiteyɛa hwelefefi kwele kwele.

⁶Kateve ŋa ŋwale 'ya kaɗema ghala kwa, kwele kwele tenza hwelefefia ŋa, shave mbe gha teshave ka meghea kɛfi.

⁷Katemene jikə geva 'ya le gha, le hwelefefia ŋa kwetere wəmbəa ŋa. Ma jikə geva nya kaghala ghala shɛ ne, kaShala ta ŋa ba'a ŋa mbeli nyi ketesawa mbe gha teve ɗa ŋkɛ.

⁸Ke gha le ŋwalea ŋa teve ŋayɛ hɛɗi nya nza na te kande se se 'ya, pɛtɛa hɛɗia Kanan. Kaŋa nci tenza ŋkɛ kaghala ghala, kaShala ta nci tenza 'ya.»

⁹Ma ke Shala sha Abraham zhɛkwa: «Gha ne, kateya jikə geva ta ɗa na, kwa sebe ta ŋa ne, tsagha ŋwalea nyi keteshave mbe gha.

¹⁰Wa nya wəsə nya temene yɛ kezha ya jikə geva nya kwelɛ 'ya le gheyɛ, geze ta ŋkɛ, gha ba'a hwelefe ta ŋa kwetere wəmbəa ŋa nya: pɛtɛa ŋwale tezhili katesla mɓɛta.

¹¹Mɓɛta nya slamte yɛ nde tenza kawəsə kencɛ jikə geva nya kwelɛ gheyɛ le 'ya.

¹²Ma kemenete hɛ deghese ŋwale tezhili ne, pɛtɛ tesla nda mɓɛta mbeli ke hɛ kehwelefe kehwelefe. Tsagha ka mavashi nyi keya ki ghɛ ŋa keɗema nyi pake mbeli te cɛdɛ se mbe kweci hwelefefi nyi keɗema kahwelefe ta ŋa.

¹³Ma tsagha ne, kesla sla tenza mɓɛta te mava nya keya ki ghɛa ŋa keɗema nya pake mbeli pa pa, kezha nza jikə geva ta ɗa te geva ta ŋayɛ kaghala ghala.

¹⁴Ama wəndə nya ɗema mɓɛta kesla te ne, kateŋka ŋkɛ mbeli shave hwa mbeli, kwa ɗema ŋkɛ keyipəyi ghena ta jikə geva ta ɗa kwa.»

¹⁵Ma ke Shala sha Abraham: «Katezhɛne na kaheka male ta ŋa kaSaray we, Sara tenza sləa nta tsetsenya.

¹⁶Katewəpi ŋkɛ 'ya ba'a kateve ŋa wəzege teza 'ya sawa hwe. Katewəpi ŋkɛ 'ya, kateya hwelefefi nde kwele kwele, shave mbe ghenta teshave ka meghea kɛfi.»

¹⁷Ntiŋə Abraham ŋame ghə mbe hɛɗi kaŋ'wəshi. Ma ke mbe wənəa ŋkɛ: «Tsema nza 'ya kayake wəzege gwəmsə va ta ɗa tse wa? Meslimsə va ta Sara ne, mba nde kayake wəzege na?»

¹⁸Ma ke Abraham sha Shala: «Yɛte kezha nza Ismayɛl kwa kema ta ŋa, wərə ɗa ŋkɛ tsagha!»

¹⁹Ama ma ke Shala zhɛnete: «Ewə! Kateya ŋa wəzege teza male ta ŋa Sara, kateheka nda slə na kaIzak. Katemene jikə geva 'ya le gheŋkɛ, kajikə geva nya kaghala ghala kaŋa ŋwale nyi ketesawa mbe kwetere wəmbəa ŋkɛ tenza ŋkɛ.»

²⁰Nahe 'ya kefate 'yɛwe ta ŋa kaŋa Ismayɛl. Katewəpi ŋkɛ 'ya, kateve nda ŋwale 'ya kwele kwele. Katenza ŋkɛ kayiteyɛa mbeli nyi te ghə meŋe bakeghəmbe ba'a kashia hwelefe nya wəba.

²¹Ama jikə geva nya temene 'ya le Izak nya teya ŋa Sara ne, heshi tsetse ŋkwa tenza ŋkɛ.

²²Ma kwa keɗaŋemte geze nda ghena Shala ke Abraham ne, ntəŋə ŋkɛ slənyɛ.

²³Pa Abraham kelete wəzege ta ŋkɛ Ismayɛl, zlaɓe le pɛtɛa ka mavashi nyi keya ki ghɛa ŋkɛ ba'a nyi pake ŋkɛ, pa ŋkɛ slamte nda mɓɛta ke hɛ te veci nya gezete nda ghena Shala.

²⁴Va ta Abraham meslimsə meslighəmbe nda slamte mɓɛta ŋkɛ.

²⁵Ma Ismayɛl ne, meŋe mahekeneghəmbe va ta ŋkɛ nda slamte nda mɓɛta ŋkɛ.

²⁶Te veci nya kwetɛŋe slamte mɓɛta yɛ Abraham le wəzege ta ŋkɛ Ismayɛl,

²⁷zlaɓe le mbeli nyi ki ghɛa ŋkɛ, ka mavashi nyi keyanji ki ghɛa ŋkɛ ba'a nyi pake ŋkɛ pa pa.