Read kapsiki Gha ta Wəshi 20 Bible Online

Gha ta Wəshi 20 - kapsiki bible

Gha ta Wəshi 20

¹Cape Abraham slə tagha kadzawa hɛɗia Nɛgɛv, pa ŋkɛ nzanyɛ kwelɛ yɛ Kadɛs le Shəwr. Kwetere wəmbəa ŋkɛ, cape ŋkɛ dzawa kanzanyɛ kwa Gɛrar.

²«Wəzha ta meyɛ ɗa nde», a ke Abraham sha se kageze te ghəa male ta ŋkɛ Sara. Vatse kelehwe malea shɛ Abimɛlɛk, meghea ka Gɛrar.

³Ama heviɗi ne, pɛkwe Shala sha Abimɛlɛk te shiwə, ma ke shɛ: «Katemte na tewəmbəreke male nya kelehwe nya na, va nya nza nde kamale ta za.»

⁴Ma kwa nakama Abimɛlɛk kahendave nda geva ke malea shɛ ne, ma ke: «Shala yawe, kaɗe na kazamte mbeli ya fete ɗema va hɛ na?

⁵Abraham le ghəa ŋkɛ nde gezete ɗa kawəzha ta meghekɛ nde. Ghenta le ghəa nta ne, nahe nde kegezete kawəza meghekɛ ŋkɛ. Le mehele nya tiɗiɗi menete 'ya, kemenete wəsə kwa ndiremi 'ya we.»

⁶Ma ke Shala zhɛnete nda te shiwəa shɛ: «'Ya perə ne, nahe 'ya keɗepe le mehele nya tiɗiɗi menete na. 'Ya nde fɛake ŋa kebeze ɗa ghena, vatse sema 'ya kapele ŋa kakwaɗe ŋkɛ.

⁷Tsetsenya, zhɛnave nda male ta ŋkɛ ke wəndəa shɛ, va nya nza ŋkɛ kande mɛ ŋkwa ta Shala nya ketesəkwə ghə yitea nza na teghweme. Ma keɗema ve nda male ta ŋkɛ na ne, ɗepete katempə yɛ le pɛtɛa mbelia ŋa.»

⁸Pelɛhetɛme Abimɛlɛk sate te ŋkwa masheke masheke, pa ŋkɛ tsenete mbeli nyi yite pɛtɛ ba'a gezete nda ghena shɛ ke hɛ. Pa mbeli nyighɛ ghazlənənji kwele kwele.

⁹Pa Abimɛlɛk hekakɛ Abraham, ma ke shɛ: «Wa nya wəsə menete n'yɛ na wa? Laka wa bezemte ŋa 'ya nda tsəkwəyite n'yɛ na le mbeli nyi te hɛɗia ɗa yitea jaɗafa nya wəba nya wa? Wəsə nya ghama mbeli kamene nda ke wəndə yamenete ɗa nya na.

¹⁰Wa wəsə nya zəzəte na nda menete na kala nya wa?»

¹¹Ma ke Abraham zhɛnete: «Ma zəzə 'ya ne, kahawe mbeli nyi teke va Shala ya ɓɛhwɛ we, katepesle ɗa hɛ tewəmbəreke male ta ɗa.

¹²Bandanyɛ ne, wəzha ta yiteyɛ ɗa nde, yita nya kwetɛŋe nde yake ɗa le ghenta, ama keghə keghə meyɛ n'yɛ, vatse zhɛrenyɛ nde kamale ta ɗa.

¹³Ma kwa kelemte ɗa Shala cakeɗake le ghɛa yiteyɛ ɗa ne, ma 'ya sha Sara: ‹Yɛhwe ɗa kezha geze na te yayata ŋkwa nya telə gheɓə kawəza meyɛ ŋa 'ya.›»

¹⁴Pa Abimɛlɛk fəte timɛti, kwi, yɛ sla, ka mavashi ba'a ka kwaterashi, pa ŋkɛ fəave nda hɛ ke Abraham vəa ŋkwa nya zhɛne nda male ta ŋkɛ Sara ŋkɛ.

¹⁵Ma ke shɛ: «Wa nya hɛɗia ɗa nya mbe kema ta ŋa, nza ŋa te yayata ŋkwa nya ɗe na.»

¹⁶Kwetere wəmbəa ŋkɛ, ma ke sha Sara: «Newe, 'ya kave nda dəɓərəa mze kwa tɛawetɛa slibə ke wəza yiteyɛ ŋa: gheŋkɛ ya kawəsə kencɛ ŋkɛ kwa kema ta mbeli nyi nza yɛ le hɛ kaɗema na kemenete wəsə mbe ghena nya.»

¹⁷Pa Abraham səkwəte Shala, pa Shala mbe Abimɛlɛk, male ta ŋkɛ ba'a ka kwaterashia ŋkɛ. Ntake hɛ kaya ŋwale zhɛkwa.

¹⁸Kwa nza ŋkɛ nahe Mahwətə kezhɛrete mi nyi ki ghɛa Abimɛlɛk kaka jɛŋa kɛfi pɛtɛ tewəmbəreke Sara, male ta Abraham.